வடலூரில் பெண் மானபங்கம் எஸ்.ஐ., உட்பட 7 பேர் மீது வழக்கு

கடலூர்:

                   வடலூர் அருகே நில பிரச்னையில் பெண்ணை மானபங்கப்படுத்தியதாக சப்- இன்ஸ்பெக்டர் உள்ளிட்ட ஏழு பேர் மீது வழக்கு பதிவு செய்யப்பட்டுள்ளது. கடலூர் மாவட்டம் வடலூர் அடுத்த ஆயிப்பேட்டையைச் சேர்ந்தவர் முருகபெருமாள். இவரது மனைவி சூடாமணி (38). முருகபெருமாளுக்கு சொந்தமான 10 ஏக்கர் 40 சென்ட் நிலத்தை, அதே ஊரைச் சேர்ந்த சீனுவாசன் என்பவரிடம் விற்றார்.

                சீனுவாசன் அந்நிலத்தை நெய்வேலி அடுத்த இந்திரா நகர் சவுந்தர்ராஜனுக்கு விற்று விட்டார். இதற்கிடையே சூடாமணி, "தனது கணவர் முருகபெருமாளை ஏமாற்றி நிலத்தை வாங்கி விட்டனர்' என, கோர்ட்டில் வழக்கு தொடர்ந்தார். அந்த வழக்கு தற்போது நிலுவையில் உள்ளது. இந்நிலையில், சவுந்தர்ராஜன் மற்றும் கீழகுப்பம் சவுரிராஜன் உள்ளிட்ட ஆறு பேர் வடலூர் சப்- இன்ஸ்பெக்டர் இளங்கோ முன்னிலையில், பிரச்னைக்குரிய நிலத்தில் உள்ள மரங்களை வெட்டிய போது, அதை தடுக்கச் சென்ற சூடாமணியை சவுந்தர்ராஜன், சவுரிராஜன் கட்டியாங்குப்பம் பெருமாள், தாமோதரன், பன்னீர், பண்ருட்டி ரங்கநாதன் (45) மற்றும் வடலூர் சப்- இன்ஸ்பெக்டர் இளங்கோ ஆகியோர் மிரட்டி, மானபங்கப்படுத்தியதாக வடலூர் போலீசில் புகார் செய்தார். சவுந்தர்ராஜன், சவுரிராஜன் மற்றும் சப்- இன்ஸ்பெக்டர் இளங்கோ உள்ளிட்ட ஏழு பேர் மீது, பெண் கொடுமை தடுப்புச் சட்டம் உள்ளிட்ட பிரிவுகளின் கீழ், வடலூர் போலீசார் வழக்கு பதிவு செய்துள்ளனர்.

Read more »

கனரா வங்கி ஊழியர் சங்கம் நலத்திட்ட உதவிகள் வழங்கல்

நெய்வேலி: 

                        நெய்வேலியில் கனரா வங்கி ஊழியர் சங்க மாநில குழு சார்பில் நலத் திட்ட உதவிகள் வழங்கப்பட்டது. கனரா வங்கி ஊழியர் சங்க தமிழ் மாநிலக் குழுவின் வெள்ளி விழா ஆண்டையொட்டி நெய்வேலி இந்திரா நகரில் உள்ள தாய் தொண்டு மைய குழந்தைகள் மற்றும் முதியவர்களுக்கு பல் வேறு உதவி பொருட்கள் வழங்கப்பட்டது. தொடர்ந்து பேர்பெரியான் குப்பத்தில் ஊராட்சி தலைவர் முன்னிலையில் இலவச மரக்கன்றுகள் வழங்கப்பட்டது. நிகழ்ச்சி ஏற்பாடுகளை தமிழ் மாநிலக்குழு உதவித் லைவர் ஜோசப் இளங்கோவன், கனரா வங்கி அதிகாரிகள் சங்க திருச்சி வட்ட தலைவர் மதுரகவி, மாநில குழு உறுப்பினர் கன்யூட், வேணுகோபால், சுப்ரமணியன் செய்திருந்தனர்.

Read more »

நெய்வேலி இந்திரா நகரில் புறக்காவல் நிலையம் திறப்பு

நெய்வேலி:

           நெய்வேலி இந்திரா நகரில் சீரமைத்த புதிய புறக்காவல் நிலையத்தை டி.எஸ்.பி., திறந்து வைத்தார். நெய்வேலி இந்திரா நகர் பகுதியில் நடைபெற்று வந்த தொடர் திருட்டை தடுக்க கடந்த மார்ச் 23ம் தேதி புறக்காவல் நிலையம் அமைக்கப் பட்டது. அதனை டி.ஐ.ஜி., மாசானமுத்து திறந்த வைத்தார். சில மாதங்களில் மின் கசிவால் ஏற் பட்ட தீ விபத்தில் புறக்காவல் நிலையம் சேதமடைந்தது. இதனை வடக்குத்து ரோட்டரி கிளப் சீரமைத்தது.இதன் திறப்பு விழாவிற்கு இன்ஸ்பெக்டர் சேகர் தலைமை தாங்கினார். வடக்குத்து ரோட்டரி கிளப் நிர்வாகிகள் ஜெகன், தாமோதரன், சடையப்பன் முன்னிலை வகித்தனர். டி.எஸ்.பி., மணி புறக்காவல் நிலையத்தை திறந்து வைத்து பள்ளி மாணவ, மாணவிகளுக்கு இலவச கல்வி உபகரணங்களை வழங்கினார். நிகழ்ச்சியில் சப் இன்ஸ் பெக்டர்கள் ரேவதி, நடராஜன் பங்கேற்றனர்.

Read more »

பெண்ணுக்கு கொலை மிரட்டல்: வாலிபர் கைது

கடலூர் : 

              வடலூர் அருகே இளம் பெண்ணிடம்  கொலை மிரட்டல் விடுத்த வாலிபரை போலீசார் கைது செய்தனர்.
 

                  வடலூர் அடுத்த கோட்டக்கரையைச் சேர்ந்த ராமலிங்கம் மகள் சுகன்யா (18). (பெயர்கள் மாற்றப்பட்டுள்ளது) இவர் தனது சித்தப்பா வீட்டில் தங்கி அருகில் உள்ள பாலிடெக்னிக் ஒன்றில் படித்து வருகிறார். தினமும் கல்லூரிக்கு போகும் போது இந்திரா நகர் பார்வதிபுரத்தைச் சேர்ந்த லட்சுமணன் மகன் வெங்கடேசன் (24) கிண்டல் செய்து வந்துள்ளார். சுகன்யா வழக்கம் போல் கல்லூரிக்கு சென்ற போது தன்னை திருமணம் செய்து கொள்ளும்படியும், இல்லையென்றால் ஆசிட் ஊற்றி கொலை செய்து விடுவேன் என மிரட்டி மானபங்கப்படுத்தியுள்ளார். வடலூர் போலீசார் வழக்குப் பதிந்து வெங்கடேசனை கைது செய்தனர்.

Read more »