விருத்தாசலம்:
திருமணத்துக்கு ஒரு வாரத்துக்கு முன்பாகவே திருமண நல உதவித் தொகை, தாலிக்கு தங்கம் ஆகியன வழங்கப்பட்டு வருவதாக தமிழக சமூக நலத் துறை அமைச்சர் செல்வி ராமஜெயம் தெரிவித்தார்.
விருத்தாசலம், கம்மாபுரம், மங்களூர் மற்றும் நல்லூர் ஒன்றியத்துக்குள்பட்ட 224 பயனாளிகளுக்கு திருமண நிதி உதவி, தாலிக்கு தங்கம் வழங்கும் நிகழ்ச்சி விருத்தாசலத்தில் நடைபெற்றது.
விழாவில் அமைச்சர் எம்.சி.சம்பத் பேசியது:
பெண்கள் கல்வி அறிவை பெற சிறப்பான திட்டத்தை முதல்வர் ஜெயலலிதா அறிவித்துள்ளார். இது, தாலிக்கு தங்கம் வழங்கும் திட்டமாகும். பல்வேறு அம்சங்களை உள்ளடக்கிய திட்டமாக உள்ளது. பத்தாம் வகுப்பு படித்த பெண்களுக்கு 4 கிராம் தங்கமும், 25 ஆயிரம் ரூபாய் பணமும், பட்டப் படிப்பு படித்த பெண்களுக்கு ரூ.50 ஆயிரம் பணமும், 4 கிராம் தங்கமும் வழங்கி வருகிறார். இது பெண்களை கல்வி கற்க ஊக்குவிப்பதற்கான திட்டமாக உள்ளது. தமிழக முதல்வர் ஜெயலலிதா பெண்களுக்கு தாயாக, தந்தையாக விளங்குகிறார் என தெரிவித்தார்.
அமைச்சர் செல்வி ராமஜெயம் தெரிவித்தது:
தமிழக முதல்வர் ஆட்சிக்கு வந்து 6 மாதத்தில் அனைத்து பயனாளிகளுக்கும் திட்டங்கள் சென்றடைந்துள்ளது. மங்களூர் ஒன்றியத்தில் பத்தாம் வகுப்பு படித்த 34 பேருக்கும், பட்டப் படிப்பு படித்த 27 பேருக்கும் வழங்கப்படுகிறது. கம்மாபுரம் ஒன்றியத்தில் 10-ம் வகுப்பு படித்த 38 பெண்களுக்கும், பட்டப் படிப்பு படித்த 5 பேருக்கும், விருத்தாசலம் ஒன்றியத்தில் 10-ம் வகுப்பு படித்த 55 பெண்களுக்கும் வழங்கப்படுகிறது. நல்லூர் ஒன்றியத்தில் 10-ம் வகுப்பு படித்த 40 பெண்களுக்கும், பட்டப் படிப்பு படித்த 2 பெண்களுக்கும் நிதி உதவி மற்றும் தங்கம் வழங்கப்படுகிறது. இதன் மொத்த மதிப்பு 83 லட்சத்து 17 ஆயிரம் ரூபாய் என தெரிவித்தார்.
நிகழ்ச்சியில் மாவட்ட சமூக நல அலுவலர் புவனேஸ்வரி வரவேற்றார். மாவட்ட ஆட்சியர் வெ.அமுதவல்லி தலைமை ஏற்றார். ஊரகத் தொழில்துறை மற்றும் சத்துணவுத் திட்டத்துறை அமைச்சர் எம்.சி.சம்பத், சமூக நலத்துறை அமைச்சர் செல்வி ராமஜெயம் சிறப்பு விருந்தினர்களாகக் கலந்துகொண்டு உதவிகளை வழங்கினர்.
