கடலூர் மாவட்டத்தில் பிளாஸ்டிக் பொருட்களை பயன்படுத்த தடை

கடலூர் :

     பிளாஸ்டிக் பொருட்கள் பயன்பாடு இல்லாத மாவட்டமாக மாற்றிட முதல் கட்டமாக அரசு அலுவலகங்களில் பிளாஸ்டிக் பொருட்களை பயன்படுத்த கலெக்டர் தடை விதித்து உத்தரவிட்டுள்ளார்.

     முன்பெல்லாம் பொருட்கள் வாங்க வேண்டும் என்றால் கடைக்கு செல்லும் போது துணிப்பை கொண்டு செல்வது வழக்கம். ஆனால், இன்று எண்ணெய் கூட பாலித்தின் கவரில் வாங்கிச் செல்லும் நிலைக்கு மாறிவிட்டது. இவ்வாறு பயன்படுத்தப்படும் பிளாஸ்டிக் பொருட்களை வீதிகளில் எறியப்படுகிறது. இவை எளிதில் மக்குவதில்லை. இதனால் மண்ணில் மழை நீர் இறங்குவதை தடை செய்வதால் நிலத்தடி நீர் மட்டம் குறைந்து வருவதோடு, மண்ணின் வளமும் குறைந்து வருகிறது. இயற்கை வளத்தை மாசுபடுத்தும் எளிதில் மக்காத பிளாஸ்டிக் பொருட்களுக்கு தடை விதிக்க வேண்டும் என இயற்கை வள ஆர்வலர்கள் தொடர்ந்து கோரிக்கை விடுத்து வருகின்றனர். இந்நிலையில் கடலூர் மாவட்ட கலெக்டராக பொறுப்பேற்றுள்ள ராஜேந்திர ரத்னு, மாவட்டத்தில் சுற்றுச் சூழலை மேம்படுத்த பல்வேறு நடவடிக்கை மேற்கொண்டுள்ளார்.

     அதனையொட்டி சுற்றுச் சூழலையும், மண் வளத்தையும் பாழ்படுத்தி வரும் மக்கா தன்மை கொண்ட பிளாஸ்டிக் பொருட்களை பயன்படுத்தாத மாவட்டமாக மாற்ற திட்டமிடப்பட்டுள்ளது. அதன் முதல் கட்டமாக மாவட்டத்தில் உள்ள அனைத்து அரசு அலுவலகங்களிலும் பிளாஸ்டிக் பொருட்களை பயன்படுத்தத் தடை விதித்து நேற்று முன்தினம் உத்தரவிட்டுள்ளார். அதனையொட்டி அனைத்து அரசு அலுவலக வளாகங்களிலும் பிளாஸ்டிக் பொருட்கள் தடை செய்யப்பட்ட பகுதியாக அறிவிப்பு நோட்டீஸ் மற்றும் ஒருமுறை பயன்படுத்தக் கூடிய பிளாஸ்டிக் பொருட்களை பயன்படுத்த வேண்டாம் என பொதுமக்களுக்கு வேண்டுகோள் விடுத்தும் நோட்டீஸ் ஒட்டப்பட்டுள்ளது. அடுத்த கட்டமாக பள்ளி, கல்லூரி வளாகங்களிலும், அதனைத் தொடர்ந்து பொதுமக்கள் கூடும் இடங்களான கோவில், பீச், பஸ் நிலையங்களில் தடை விதிக்க நடவடிக்கை எடுக்கப்பட்டு வருகிறது.

              அதற்கு முன்பாக பிளாஸ்டிக் பொருட்களை பயன்படுத்தி விட்டு எறிவதால் ஏற்படும் சுற்றுச் சூழல் பாதிப்பை மக்கள் உணரும் வகையில் பள்ளி கல்லூரி மாணவர்களை கொண்டு விழிப்புணர்வு பிரசாரம் மேற்கொள்ள திட்டமிடப்பட்டுள்ளது. கலெக்டரின் இந்த அதிரடி நடவடிக்கையை இயற்கை ஆர்வலர்கள் வெகுவாக பாராட்டுகின்றனர்.  மேலும், பிளாஸ்டிக் பொருட்கள் பயன்பாடு இல்லாத மாவட்டமாக்கிட கலெக்டர் மேற்கொள்ளும் இந்த முயற்சிக்கு பொதுமக்கள் தானாக முன்வந்து ஆதரவு அளிக்க வேண்டும் என வேண்டுகோள் விடுத்துள்ளனர்.

Read more »

மக்கள் நலப்பணியாளர் 13 ஆயிரம் பேரை பணி நீக்கம்: கடலூரில் திமுகவினர் ஆர்ப்பாட்டம்

          மக்கள் நலப்பணியாளர் 13 ஆயிரம் பேரை பணி நீக்கம் செய்ததை கண்டித்து தமிழகம் முழுவதும் மாவட்ட தலைநகரங்களில் நேற்று ஆர்ப்பாட்டம் நடைபெற்றது. கடலூரில் மாவட்ட இளைஞர் அணி செயலாளர் பண்ருட்டி தணிகை செல்வன் தலைமையில், மாவட்டச் செயலாளரும், முன்னாள் அமைச்சருமான எம்.ஆர்.கே.பன்னீர்செல்வம், முன்னாள் எம்பி கணேசன், சபா.ராஜேந்திரன் உள்பட ஆயிரக்கணக்கானோர் மாவட்ட ஆட்சியர் அலுவலகம் முன்பு ஆர்ப்பாட்டம் நடத்தினர்.

Read more »

கடலூர் மாவட்ட திமுகவில் உட்கட்சி பூசலே சட்டமன்றத் தேர்தலில் தோல்விக்கு காரணம்

         கட்சியில் புரையோடியுள்ள ஜாதிய உணர்வு மற்றும் கோஷ்டி அரசியல் காரணமாக, தி.மு.க.,வின் கோட்டை என கூறப்பட்ட பழைய தென்னாற்காடு மாவட்டத்தில் உள்ள, 20 தொகுதிகளிலும் தி.மு.க., படுதோல்வி அடைய நேரிட்டுள்ளது' என கட்சியின் அடிமட்ட தொண்டர்கள் புலம்புகின்றனர்.

இதுகுறித்து கடலூர் மாவட்டத்தை சேர்ந்த தி.மு.க., மூத்த நிர்வாகி கூறியது:

             ஒருங்கிணைந்த தென்னாற்காடு மாவட்டமாக இருந்த தற்போதைய கடலூர், விழுப்புரம் மாவட்டம், தி.மு.க., தேர்தலை சந்தித்த காலத்தில் இருந்தே கோட்டையாக விளங்கி வந்தது.அந்த கால கட்டத்தில் தொண்டர்கள் ஜாதி, மதங்களை மறந்து கொள்கை பிடிப்போடு இருந்தனர். தொண்டர்களை வழி நடத்திய நிர்வாகிகளும் அவ்வாறே செயல்பட்டனர். கொள்கை ஈடுபாடும், ஆற்றல் மிக்கவர்கள் நிர்வாகிகளாக இருந்ததால், மாவட்டமே தி.மு.க.,வின் கோட்டையாக விளங்கியது.

           ஒருங்கிணைந்த மாவட்ட செயலராக இருந்த செஞ்சி ராமச்சந்திரன் பதவி வகித்தபோது கட்சியில் ஜாதிய உணர்வு மேலோங்கியதால், தொண்டர்கள் ஜாதி வாரியாக பிளவுபட்டனர். அதேகால கட்டத்தில், கட்சியின் பொறுப்புகளுக்கு ஏற்கனவே பொறுப்புகளில் இருந்தவர்களின் வாரிசுகளே நியமிக்கப்பட்டனர். இதனால், காலம் காலமாக கட்சிக்காக உழைத்த தொண்டர்கள் பதவிக்கு வரமுடியாததால் அவர்களின் செயல்பாடு குறைந்தது.

           இந்நிலையில் ஒருங்கிணைந்த தென்னாற்காடு மாவட்டத்தை, கட்சியின் நிர்வாக வசதிக்காக, கடலூர் மற்றும் விழுப்புரம் என இரு மாவட்டமாக பிரிக்கப்பட்டது. அதன்பிறகு கடலூர் மாவட்ட செயலர் பதவிகளுக்கு எம்.ஆர்.கே.பன்னீர்செல்வமும், விழுப்புரம் மாவட்ட செயலர் பொன்முடியும் தேர்வு செய்யப்பட்டனர். இவர்கள் இருவருமே மாவட்டத்தில் கட்சியை வலுப்படுத்தும் நடவடிக்கையில் ஈடுபடாமல், ஒருதலைப் பட்சமாக செயல்பட்டு வந்தனர். இதன் காரணமாக கடலூர் மாவட்டத்தில் வன்னியர்களும், விழுப்புரம் மாவட்டத்தில் வன்னியர்கள் அல்லாதவர்களே, கட்சிப் பதவிகளுக்கு வர முடியும் என்ற நிலையை உருவாக்கினர்.

           அனைத்திற்கும் மேலாக, மாவட்டத்தில் கட்சி பொறுப்புகளுக்கு வருபவர்கள் தங்களுக்கு கட்டுப்பட்டவர்களாகவே இருக்க வேண்டும் என்பதிலேயே குறிக்கோளாக கொண்டு செயல்பட்டனர். இவர்களை மீறி, கட்சியில் கோலோச்ச முயன்றவர்கள், மாவட்ட செயலர்களால் பல்வேறு வழிகளில் ஓரம் கட்டப்பட்டனர்.

          இவ்வாறு கட்சி ஆரம்ப கால முன்னோடிகளில் ஒருவரான, முன்னாள் அமைச்சர் கோவிந்தசாமியின் மகன் சம்பத், பழனியப்பன், கடலூர் மாவட்ட செயலராக இருந்த மருதூர் ராமலிங்கம், துரை கிருஷ்ணமூர்த்தியின் மகன் சரவணன், முன்னாள் எம்.எல்.ஏ., குழந்தை தமிழரசன் உள்ளிட்ட பலர் ஓரம் கட்டப்பட்டனர். இவர்களுக்கு கட்சி பதவி முதல் எம்.எல்.ஏ., சீட் பெற முடியாமல் மாவட்ட செயலர்கள் தடை ஏற்படுத்தி வந்தனர். இதே பாணியை கடந்த தேர்தலிலும் கையாண்டனர். தனது எதிர்ப்பாளர்களுக்கு தேர்தலில் வாய்ப்பு கிடைத்து விடக்கூடாது என்பதற்காகவே, வெற்றி பெற வேண்டிய தொகுதிகளை கூட்டணி கட்சிகளுக்குத் தள்ளி விட்டனர்.

        இவர்களால் ஓரம் கட்டப்பட்ட நிர்வாகிகள், கட்சியில் தங்கள் செல்வாக்கை நிரூபிக்க சொந்த கட்சி வேட்பாளர்களையே தோற்கடிக்க, உள்ளடி வேலைகளில் ஈடுபடத் துவங்கியதால் கோட்டையில் ஓட்டை விழத் துவங்கியது. இதே நிலைதான் நடந்து முடிந்த தேர்தலிலும் நீடித்தது.

          கடலூர் எம்.எல்.ஏ.,வாக இருந்த அய்யப்பனுக்கு "சீட்' மறுக்கப்பட்டது. அந்த விரக்தியில் அவர் கட்சி வேட்பாளரை தோற்கடிக்க உள்ளடி வேலை செய்தார். அவரை அழைத்து சமாதானம் செய்வதற்கு பதிலாக, அவரை கட்சியை விட்டு நீக்கச் செய்தனர். அவர் வேறு வழியின்றி தேர்தலுக்கு இரண்டு நாட்களுக்கு முன்பாக அ.தி.மு.க.,வில் இணைந்து தேர்தல் பிரசாரத்தில் ஈடுபட்டார். இதன் காரணமாக மாவட்டத்தின் தலைநகர் தொகுதியான, கடலூரில் தி.மு.க., வேட்பாளர் வரலாறு காணாத வகையில் படுதோல்வி அடைய நேரிட்டது.

           பண்ருட்டி தொகுதியில் போட்டியிட்ட சபா ராஜேந்திரன், மாவட்ட செயலரின் எதிரணி என்பதால், அவரை தோற்கடிக்க உள்ளடி வேலைகள் படு ஜோராக நடந்தது. இதேபோன்று மாவட்ட செயலரான எம்.ஆர்.கே.பன்னீர்செல்வம் போட்டியிட்ட, குறிஞ்சிப்பாடி தொகுதியில் அவரால் பாதிக்கப்பட்ட அனைவரும் ஒன்று சேர்ந்து முழுவீச்சில் உள்ளடி வேலைகளை செய்தனர். இதில் உச்சகட்டமாக பன்னீர்செல்வத்தை தோற்கடிக்க விழுப்புரம் மாவட்ட செயலரான பொன்முடியும், அவரை தோற்கடிக்க மற்றொரு மாவட்டத்தைச் சேர்ந்த கட்சியின் முன்னோடி அமைச்சர் ஒருவரும் உள்ளடி வேலை செய்துள்ளதாக கூறப்படுகிறது. 

        இதே உள்ளடி வேலை விழுப்புரம் மாவட்டத்தில் தி.மு.க., போட்டியிட்ட அனைத்து தொகுதிகளிலும் அரங்கேறியது. இழந்த பெருமையை மீட்க, கட்சியின் தலைமை உறுதியான நடவடிக்கை எடுக்க வேண்டும் என்பதே, எங்களைப் போன்ற மூத்த தொண்டர்களின் எண்ணமாக உள்ளது. இவ்வாறு தி.மு.க., மூத்த நிர்வாகி கூறினார்.

Read more »

பண்ருட்டி சட்டமன்ற தொகுதி தி.மு.க. வேட்பாளர் சபா.ராஜேந்திரன் வாக்கு சேகரிப்பு

நெல்லிக்குப்பம்:

             பண்ருட்டி தொகுதி சட்டமன்ற தி.மு.க. வேட்பாளர் சபா.ராஜேந்திரன், நெல்லிக்குப்பம் நகராட்சிக்குட்பட்ட விஸ்வாதபுரத்தில் வீதி வீதியாக சென்று ஓட்டு கேட்டார். பின்னர் வான்பாக்கம், கீழ்பட்டாம்பாக்கம், காமராஜர் நகர், அண்ணா நகர் உள்பட 15 வார்டுகளில் வாக்கு சேகரித்தார்.

அப்போது பண்ருட்டி தொகுதி சட்டமன்ற தி.மு.க. வேட்பாளர் சபா.ராஜேந்திரன்  பேசியது:- 



               தமிழ்நாட்டில் கடந்த 5 ஆண்டு கால தி.மு.க. ஆட்சியில் சொன்னதையும், சொல்லாததையும் சேர்த்து திட்டப்பணிகளை செய்தவர் முதல்-அமைச்சர் கருணாநிதி. தமிழ்நாட்டில் தொலை நோக்கு பார்வையில் திட்டங்களை செய்தவர் முதல்-அமைச்சர் கலைஞர். நெல்லிக்குப்பம் நகராட்சி பகுதிக்கு மட்டும் இதுவரை ரூ.10 கோடி நிதி உதவி திட்டங்களை செய்தவர் முதல்-அமைச்சர். தமிழ்நாட்டில் மீண்டும் திட்டப்பணிகள் தொடர்ந்து நடைபெற 6-வது முறையாக கலைஞர் முதல்-அமைச்சராகி பணிகள் செய்திட உதயசூரியன் சின்னத்தில் வாக்களித்து வெற்றிப்பெற செய்ய வேண்டுகிறேன். இவ்வாறு தி.மு.க. வேட்பாளர் சபா.ராஜேந்திரன் பேசினார்.



             வேட்பாளருடன் நகரமன்ற தலைவர்கள் கெய்க்வாட்பாபு, பச்சையப்பன், நகர தி.மு.க. செயலாளர் மணிவண்ணன், காந்திராஜ், நகர தலைவர் திலகர், பா.ம.க. நகர செயலாளர் வேலாயுதம், விடுதலை சிறுத்தைகள் கட்சி மாவட்ட துணை செயலாளர் முல்லைவேந்தன், மாவட்ட நெசவாளர் அணி துணை அமைப்பாளர் பழனிசாமி, தி.மு.க. நிர்வாகிகள் ஜெயசீலன், முகமது அனீப், சம்பத், தனகோடி, நந்தகோபால் மற்றும் பலர் கலந்து கொண்டனர்.

Read more »

கடலூர் மாவட்டத்தில் தி மு.க.கூட்டணி மற்றும் ஐ.ஜே.கே. வேட்பாளர்கள் மனு தாக்கல் செய்தனர்

கடலூர்:

           கடலூர் மாவட்டத்தில் தி.மு.க., கூட்டணி மற்றும் ஐ.ஜே.கே., வேட்பாளர்கள் நேற்று மனு தாக்கல் செய்தனர். 

 குறிஞ்சிப்பாடி, பண்ருட்டி

            கடலூர் மாவட்டத்தில் தி.மு.க., சார்பில் குறிஞ்சிப்பாடி தொகுதியில் அமைச்சர் பன்னீர்செல்வம், பண்ருட்டியில் சபா ராஜேந்திரன், கடலூரில் புகழேந்தி போட்டியிடுகின்றனர். 

              மூவரும் நேற்று 12.45 மணிக்கு கடலூர் நகர தி.மு.க., அலுவலகத்திலிருந்து கூட்டணி கட்சி நிர்வாகிகளுடன் வந்தனர். தேர்தல் நடத்தும் அலுவலர் ஆர்.டி.ஓ., முருகேசனிடம் புகழேந்தி மனுத்தாக்கல் செய்தார். அவரை தொடர்ந்து அமைச்சர் பன்னீர்செல்வம் கூட்டணி கட்சி நிர்வாகிகளுடன் சென்று குறிஞ்சிப்பாடி தொகுதி தேர்தல் நடத்தும் அதிகாரி துணை கலெக்டர் (முத்திரைத்தாள்) நடராஜனிடம் பகல் 1.10 மணிக்கு மனு தாக்கல் செய்தார். பண்ருட்டி வேட்பாளர் சபா ராஜேந்திரன் ,தேர்தல் நடத்தும் அதிகாரியும், மாவட்ட ஆதிதிராவிடர் நல அதிகாரியுமான திருவேங்கடத்திடம் மனு தாக்கல் செய்தார். 

சிதம்பரம்

                 சிதம்பரம் தி.மு.க., கூட்டணி வேட்பாளர் மூவேந்தர் முன்னேற்றக்கழக ஸ்ரீதர் வாண்டையார் கூட்டணி கட்சியினருடன் தெற்கு வீதியில் இருந்து ஊர்வலமாக வந்தார். வேட்பாளர் ஸ்ரீதர் வாண்டையார் கூட்டணி கட்சி நிர்வாகிகளுடன் ஆர்.டி.ஒ., அலுவலகத்தில் தேர்தல் அதிகாரி இந்துமதியிடம் மனு தாக்கல் செயதார். 

விருத்தாசலம்

              விருத்தாசலம் தொகுதியில் ஐ.ஜே.கே., (இந்திய ஜனநாயக கட்சி) வேட்பாளர் சென்னை ஆழ்வார் திருநகர் பகுதியைச் சேர்ந்த, மாநில இளைஞர் அணி செயலர் கிருஷ்ணமூர்த்தி கட்சி நிர்வாகிகள் மற்றும் கூட்டணி கட்சியினருடன் விருத்தகிரீஸ்வரர் கோவிலில் வழிபட்டார். பின் ஊர்வலமாக சென்று நேற்று மதியம் 12.40 மணிக்கு தொகுதி தேர்தல் அலுவலர் ஆர்.டி.ஓ., முருகேசனிடம் மனு தாக்கல் செய்தார். 

ஐ.ஜே.கே. வேட்பாளர் கிருஷ்ணமூர்த்தி கூறுகையில்,

             " நான் தேர்தலில் வெற்றி பெற்றவுடன் தொகுதி வளர்ச்சிக்கு நிச்சயம் பாடுபடுவேன். பொழுது போக்கு பூங்கா மற்றும் நகரை அழகு படுத்தும் திட்டம் செயல்படுத்தி விருத்தாசலத்தை அழகு நகரமாக மாற்றுவேன்' என்றார்.

Read more »

பண்ருட்டி தொகுதி திமுக வேட்பாளர் சபா.ராஜேந்திரன் பிரசாரம் தொடக்கம்

பண்ருட்டி:

          பண்ருட்டி தொகுதி திமுக வேட்பாளராக அறிவிக்கப்பட்டுள்ள சபா.ராஜேந்திரன், திமுக, கூட்டணிக் கட்சி முக்கிய பிரமுகர்களை சந்தித்து ஆதரவு திரட்டும் பணியை வெள்ளிக்கிழமை மேற்கொண்டார்.

               பண்ருட்டி தொகுதி திமுக வேட்பாளராக அறிவிக்கப்பட்டுள்ள சபா.ராஜேந்திரன் 2006-ம் ஆண்டு நடைபெற்ற சட்டப் பேரவைத் தேர்தலில் நெல்லிக்குப்பம் தொகுதியில் போட்டியிட்டு வெற்றி பெற்றார்.கடலூர் மாவட்டச் செயலரும், மக்கள் நல்வாழ்வுத் துறை அமைச்சருமான எம்.ஆர்.கே. பன்னீர்செல்வத்துடன் கருத்து வேறுபாடு ஏற்பட்டதால் இரு பிரிவினராக செயல்பட்டு வந்தனர்.தொகுதி மறுசீரமைப்புக் காரணமாக நெல்லிக்குப்பம் தொகுதி பண்ருட்டி தொகுதியுடன் சேர்த்தும், பண்ருட்டி தொகுதியில் இருந்த 30 பஞ்சாயத்துக்களை புதிதாக உருவான நெய்வேலி தொகுதியில் சேர்க்கப்பட்டது.

                தற்போது நடைபெற உள்ள தேர்தலில் பண்ருட்டி தொகுதியில் சபா.ராஜேந்திரனும், மாவட்ட அமைச்சர் எம்.ஆர்.கே.பன்னீர்செல்வத்தின் ஆதரவாளர்களான டாக்டர் நந்தகோபாலகிருஷ்ணன், அண்ணாகிராம ஒன்றியச் செயலர் வி.கே.வெங்கட்ராமன் ஆகியோர் விருப்ப மனு செய்தனர். இதில் கடும் போட்டிகளுக்கு இடையே சபா.ராஜேந்திரனுக்கு வாய்ப்பு கிடைத்ததாக அக்கட்சியை சேர்ந்தவர்கள் கூறினர். இந்நிலையில் வெள்ளிக்கிழமை பண்ருட்டி வந்த திமுக வேட்பாளர் சபா.இராஜேந்திரன் அண்ணா, காமராஜர், அம்பேத்கர் சிலைகளுக்கு மாலை அணிவித்து மரியாதை செலுத்திய பின்னர் கட்சி நிர்வாகிகளை சந்தித்து ஆதரவு திரட்டி வருகிறார்.

Read more »