காட்டுமன்னார்கோவில் பகுதியில் முதியோர் உதவித்தொகை பெறுபவர்கள் புகைப்படம் எடுக்கும் பணி

காட்டுமன்னார்கோவில் : 

             காட்டுமன்னார்கோவில் பகுதியில் முதியோர் உதவித் தொகை பெறுபவர்களை புகைப்படம் எடுக்கும் பணியை கலெக்டர் ஆய்வு செய்தார். 

              காட்டுமன்னார்கோவில் தாலுகாவிற்குட்பட்ட பகுதிகளில் வசிக்கும் முதியோர்களுக்கு சமூக நல பாதுகாப்பு பிரிவின் கீழ் முதியோர் உதவித் தொகை வழங்கப்பட்டு வருகிறது. இதில் கடந்த மாதம் வரை 10 ஆயிரத்து 269 பேர் பயன்பெற்று வருகின்றனர். இவர்களுக்கு மாதம் தோறும் வழங்கப்படும் உதவித் தொகையில் முறைகேடுகளை தடுக்க வங்கிகளின் மூலம் நேரடியாக வழங்க அரசு உத்தரவிட்டுள்ளது. அதன் அடிப்படையில் இந்தியன் வங்கி, ஸ்டேட் வங்கி, இந்தியன் ஓவர்சீஸ் வங்கி உட்பட தேசிய வங்கிகளில் அந்த பகுதியில் கணக்கு துவங்கப்படுகிறது.

               கடலூர் மாவட்டத்தில் முதன் முறையாக காட்டுமன்னார்கோவில் பகுதியில் இப்பணி துவங்கியுள்ளது. இப்பணியை கலெக்டர் அமுதவல்லி நேற்று ஆய்வு செய்தார். தாலுகா அலுவகத்திற்கு வந்த கலெக்டர், முதியோர் உதவித் தொகை பெற வங்கிகளில் கணக்கு துவங்குவதற்காக பணிகள் எந்த நிலையில் உள்ளது. அந்தந்த கிராமங்களில் முதியோர்களுக்கு புடைப்படம் எடுக்கும் பணி எப்படி நடந்து வருகிறது என கேட்டறிந்து ஆய்வு மேற்கொண்டார். குமராட்சி ஒன்றியத்தில் நடைபெறும் ஒன்றிய பணிகளை பார்வையிட்டு ஆய்வு செய்தார்.

Read more »

சிதம்பரம் பகுதியில் 7 நாட்களாக வெள்ளத்தில் மிதக்கும் 50 ஆயிரம் ஏக்கர் நெற்பயிர்: பொது மக்களின் இயல்பு வாழ்க்கை பாதிப்பு

சிதம்பரம்:

                  புயல் சின்னம் காரணமாக கடலூர் மாவட்டம் சிதம்பரம், காட்டுமன்னார்கோவில் தாலுகாவில் வரலாறு காணாத மழை பெய்துள்ளது.

              காட்டுமன்னார்கோவில் பகுதியில் ஒரே நாளில் 220 மி.மீ மழை கொட்டியதால் வீராணம் ஏரிக்கு நீர்வரத்து அதிகரித்தது. இதனால் ஏரியின் பாதுகாப்பு கருதி வெள்ளியங்கால் ஓடை, சேத்தியாத்தோப்பு மதகு வழியாக 12 ஆயிரம் கனஅடி நீர் வெளியேற்றப்பட்டதால் பல கிராமங்களை வெள்ளம் சூழ்ந்தது.

                கடந்த 2 நாட்களாக ஏரியிலிருந்து தண்ணீர் வெளியேற்றப்பட்டதால் ஏரியின் நீர் மட்டம் குறைந்துள்ளது. இதன் காரணமாக வெள்ளியங்கால் ஓடை மதகு மூடப்பட்டது. வீராணம் ஏரியிலிருந்து நீர் வெளியேற்றுவது நிறுத்தப்பட்டதால் கிராமங்களில் புகுந்த வெள்ள நீர் படிப்படியாக குறைந்து வருகிறது. இதனால் சிதம்பரம், காட்டுமன்னார்கோவில் பகுதிக்கு வெள்ள அபாயம் நீங்கியது.

               மேட்டூர் அணை நீர்வரத்தை பொறுத்தும் மழை நீர் வந்தால் ஒழிய மீண்டும் வெள்ள அபாயம் ஏற்பட வாய்ப்பு உள்ளது. என்றாலும் காட்டு மன்னார்கோவில், சிதம்பரம், குமராட்சி, குறிஞ்சிப்பாடி பகுதியில் சுமார் 50 ஆயிரம் ஏக்கர் நெற்பயிர் தண்ணீரில் மூழ்கியபடி உள்ளது. கடந்த 7 நாட்களாக நெற்பயிர்கள் முழுவதும் வெள்ளத்தில் மிதப்பதால் விவசாயிகள் ஆழ்ந்த கவலை அடைந்துள்ளனர்.

                நந்திமங்கலம், திருநாரையூர் உள்ளிட்ட 10-க்கும் மேற்பட்ட கிராமங்களை இன்னும் வெள்ளம் சூழ்ந்தபடி உள்ளது. இந்த பகுதிக்கு கிராம மக்கள் படகு மூலம் சென்று வருகின்றனர்.வெள்ளம் வடியாததால் இந்த பகுதியில் பொது மக்களின் இயல்பு வாழ்க்கை கடுமையாக பாதிக்கப்பட்டுள்ளது. இந்த கிராமங்கள் தீவுபோல காட்சி அளிப்பதால் மாவட்ட நிர்வாகத்தினர் நிவாரண பணிகளை மேற்கொள்ள முடியாமல் தவிக்கின்றனர்.

                தொடர்ந்து தண்ணீர் குடியிருப்பு பகுதியில் தேங்கி உள்ளதால் கொள்ளிடம் ஆற்று படுகையில் உள்ள முதலைகள் ஊருக்குள் புகுந்துள்ளது. மேலும் விஷ பூச்சிகளும் சர்வ சாதாரணமாக நடமாடுவதால் பொது மக்கள் பீதியில் உரைந்து போய் உள்ளனர். தொடர் மழை காரணமாக சிதம்பரம் பகுதியில் காய்கறி விலைகள் 2 மடங்காக உயர்ந்துள்ளது. காட்டுமன்னார்கோவில் தாலுகாவில் மல்லிகை பூ, சாமந்தி பூ, வெற்றிலை உள்ளிட்ட தோட்ட பயிர்களான சுமார் 500 ஏக்கர் அடியோடு நாசமாகி உள்ளது. எனவே அரசு நேரில் பார்வையிட்டு உரிய நிவாரணம் வழங்க வேண்டும் என்று விவசாயிகள் கோரிக்கை விடுத்துள்ளனர்.

Read more »

கடலூரில் இலவச நோட்டுகள் வழங்குவதில் அதிகாரிகள் அலட்சியம்! காலதாமதத்தால் மாணவர்களுக்கு பயனில்லை

சிதம்பரம் : 

               சிதம்பரம், காட்டுமன்னார்கோவில் தாலுகா பள்ளிகளில் படிக்கும் ஆதிதிராவிட மாணவ, மாணவிகளுக்கு காலாண்டு தேர்வு முடிந்து தற்போதுதான் இலவச நோட்டுகள் வழங்கப்படுகிறது. இதுவரை மூன்றில் ஒரு பகுதி பள்ளிக்கு கூட நோட்டுகள் கிடைக்கவில்லை.

                 மத்திய மற்றும் மாநில அரசுகள் கல்விக்காக பல கோடி ரூபாய் நிதி ஒதுக்கீடு செய்து கல்வியில் முன் னேற வேண்டும் என முழு வீச்சில் செயல்படுகிறது. இதற்காக மதிய உணவு, மாணவ, மாணவிகளுக்கு இலவச புத்தகங்கள், பஸ் பாஸ், சைக்கிள்கள் என வரிசையாக பல்வேறு உதவிகளை அரசு செய்து வருகிறது. ஆனால் அதிகாரிகள் அலட்சியத்தால் ஒதுக்கீடு செய்யப்படும் நிதி முறையாக பயன்படாமல் சம்பந் தப்பட்டவர்களுக்கு உரிய நேரத்தில் சென்றடையாமல் வீணடிக்கப்படுகிறது.

                    ஆண்டுதோறும் ஆதிதிராவிடர் நலத்துறை பள்ளிகள் மற்றும் பொது பள்ளிகளில் 3ம் வகுப்பு முதல் 8ம் வகுப்பு வரை படிக்கும் ஆதிதிராவிட மாணவ, மாணவிகளுக்கு அரசு இலவச நோட்டுகள் வழங்கி வருகிறது. 3ம் வகுப்பு முதல் 5ம் வகுப்பு வரை ஐந்து ரூல்டு நோட்டு, இரண்டு அன்ரூல்டு நோட்டு, 6ம் வகுப்பு முதல் 8 வரை நான்கு ரூல்டு நோட்டும், ஒரு கணிதம் நோட்டு, ஒரு அன்ரூல்டு நோட்டு, இரண்டு பெரிய நோட்டுகள் வழங்கப்பட்டு வருகிறது.

                  இந்த ஆண்டு ஜூன் மாதம் பள்ளி திறந்தது முதல் ஆதிதிராவிட நலத்துறை மூலம் முன்னுரிமை அடிப்படையில் முதலில் ஆதிதிராவிட நலத்துறை பள்ளிகளுக்கும், அதன் பிறகு பொது பள்ளிகளில் படிக்கும் ஆதிதிராவிட மாணவர்களுக்கும் இலவச நோட்டுகள் வழங்கப்பட்டு வருகிறது. வழக்கம் போல் ஜூன் மாதம் பள்ளி துவங்கியதும் ஆதிதிராவிட நலத்துறை பள்ளிகளுக்கு நோட்டுகள் வழங்கப்பட்டு விட்டது. ஆனால் பொதுப் பள்ளிகளில் படிக்கும் மாணவர்களுக்கு வழங்கப் படாமல், காலம் தாழ்த்தி காலாண்டு தேர்வுகள் முடிந்த நிலையில் தற்போதுதான் நோட்டுகள் வழங் கும் பணி துவங்கியுள்ளது.

                     சிதம்பரம், காட்டுமன்னார்கோவில் தாலுகா பகுதிகளில் மூன்றில் ஒரு பங்கு பள்ளிகளுக்குக் கூட இதுவரை நோட்டுகள் சரியாக சென்று சேரவில்லை. பெரும்பாலான பொது பள்ளிகளில் ஆதிதிராவிட மாணவர்கள் எண்ணிக்கை குறித்து விவரங்கள் கூட தற்போதுதான் கேட்கப்படுகிறது. அனைத்து பள்ளிகளுக்கும் முழுமையாக வினியோகிக்க எப்படியும் இன்னும் ஒருமாத காலம் ஆகும். பயன்கள் ஏழை, எளியோருக்கு சென்றடைய வேண்டும் என்ற நல்ல நோக்கத்தில் திட்டங்களை உருவாக்கினாலும் அதனை மக்களிடையே கொண்டு செல்வது அதிகாரிகளின் கைகளில்தான் உள்ளது. அவர்களின் அலட்சியத்தால் தற்போது வழங்கப்படும் நோட்டுகளால் எந்த பயனும் இல்லை. இனி வரும் காலங்களிலாவது உரிய நேரத்தில் உதவிகள் சென்றடைய அதிகாரிகள் பாடுபட வேண்டும்.

Read more »

ஸ்ரீமுஷ்ணம் ஆர்.ஐ., அலுவலகத்தை கிராம மக்கள் முற்றுகையிட்டு தர்ணா

ஸ்ரீமுஷ்ணம் : 

            ஸ்ரீமுஷ்ணம் ஆர்.ஐ., அலுவலகத்தை கிராம மக்கள் முற்றுகையிட்டு தர்ணா செய்தனர்.

              ஸ்ரீமுஷ்ணம் குறுவட்டத்தை சேர்ந்த ராமாபுரம், கொளத்தங்குறிச்சி, வாலீஸ்பேட்டை, தண்டகாரங்குப்பம் கிராமங்களை சேர்ந்த 60க்கும் மேற்பட்டோர் தங்கள் பிள்ளைகளின் கல்வி உதவித் தொகை பெறுவதற்காக ஜாதி, வருமான, இருப்பிடச்சான்று கேட்டு ஸ்ரீமுஷ்ணத்தில் உள்ள வருவாய் ஆய்வாளர் (ஆர்.ஐ.,) அலுவலகத்தில் நேற்று முன்தினம் மனு கொடுத்தனர்.

               மனுவைப் பெற்றுக் கொண்ட ஆர்.ஐ., சுந்தரம் மறுநாள் காலை வந்து மனுக்களை வாங்கிச் செல்லுமாறு கூறினார். அதன்படி 60 பேரும் நேற்று காலை 9 மணிக்கு ஆர்.ஐ., அலுவலகத்திற்கு வந்தனர். அதற்கு முன்பாக ஆர்.ஐ., காட்டுமன்னார்கோவில் தாலுகா அலுவலகத்திற்கு சென்றுவிட்டார். வெகுநேரம் ஆகியும் ஆர்.ஐ., வராததால் ஆத்திரமடைந்த பொதுமக்கள் ஆர்.ஐ., அலுவலகம் முன் தர்ணா செய்தனர். தகவலறிந்த ஆர்.ஐ., சுந்தரம் மாலை 3 மணிக்கு ஸ்ரீமுஷ்ணத்திற்கு வந்து, சான்றிதழில் கையெழுத்திட்டு கொடுத்தார்.

Read more »