தமிழக அரசின் மாணவர்களுக்கான சலுகைகள் தகவல் பலகையில் எழுதும் பணி

பண்ருட்டி:

    பள்ளிகளில் அரசின் திட்டங்கள் குறித்து விளம்பரப் பலகைகளில் எழுதும் பணி நடந்தது.தமிழக அரசு மாணவி, மாணவிகள் படிப்பறிவு அதிகப்படுத்த அரசு பள்ளி முதல் கல்லூரி வரை படிக்கும் மாணவ, மாணவிகளுக்கு பல்வேறு அரசின் சலுகைகள் அறிவித்து செயல்படுத்தி வருகிறது.

            இதில் விலையில்லா பாட நூல்கள், நோட்டுப் புத்தகங்கள், மடிக்கணினி, புத்தகப்பை, சீருடை, மதிய உணவு திட்டம், காலணி, இலவச பஸ் பாஸ், பிளஸ் 1 மாணவர்களுக்கு மிதிவண்டி, 1ம் வகுப்பு முதல் 5 வகுப்பு மாணவர்களுக்கு வண்ண பென்சில்கள், 6ம் வகுப்புகளுக்கு கணித உபகரணப் பெட்டி, விலையில்லா புவியியல் வரைபட நூல்கள். 10ம் வகுப்பு, பிளஸ் 1, பிளஸ் 2 இடைநின்றல் குறைப்பதற்கு சிறப்பு ஊக்கத்தொகை, வருவாய் ஈட்டும் குடும்பத் தலைவரை இழந்தவர் குடும்ப குழந்தைகளுக்கு நிதியுதவி என அரசு சார்பில் வழங்கப்படுகிறது. இதனைபள்ளி கல்வித்துறை உத்தரவின் பேரில் பண்ருட்டி அடுத்த திருத்துறையூர் அரசு மேல்நிலைப்பள்ளியில் தகவல் பலகை எழுதும் பணி நடந்தது

Read more »

தமிழகத்தில் பள்ளி மாணவர்களுக்கு ஸ்மார்ட் கார்டு

             மாணவர்களின் முழு விவரங்கள் பதிவுசெய்யப்பட்ட ஸ்மார்ட் கார்டு வழங்கப்படும் என்று தமிழக அரசு அறிவித்துள்ளது. 

 பேரவையில் திங்கள்கிழமை நடைபெற்ற பள்ளிக் கல்வித் துறை மானியக் கோரிக்கை மீதான விவாதத்துக்குப் பதிலளிக்கும்போது அமைச்சர் சி.வி. சண்முகம் வெளியிட்ட அறிவிப்புகள்:  

         மாணவர்களுக்கான ஸ்மார்ட் கார்டில் ஒவ்வொரு மாணவரின் பெயர், முகவரி, பிறப்பு, பள்ளிச் சேர்க்கை, தேர்ச்சி, நடத்தை, பெற்றோர் பெயர், பெற்றோர் வருமானம் போன்ற அனைத்து விவரங்களும் பதிவு செய்யப்படும். இதன்மூலம் மாணவர்கள் குடும்பச் சூழ்நிலை காரணமாக இடம்பெயர நேரும்போது இதில் பதிவு செய்துள்ள விவரங்களின் அடிப்படையில் எந்தப் பள்ளியிலும் சேர முடியும்.  இதன் மூலம் மாணவர்களின் இடைநிற்றல் துல்லியமாகக் கண்டறியப்பட்டு பள்ளிகளில் சேர்க்க வழிவகை செய்யப்படும். 

 ஸ்மார்ட் வகுப்புகள்:

               முதல்கட்டமாக, 5 அரசுப் பள்ளிகளில் ரூ.1.25 கோடி மதிப்பீட்டில் ஸ்மார்ட் வகுப்புகள் தொடங்கப்படும். வகுப்பறையில் கணினி முறையில் பாடம் நடத்தப்படும். இதயம் குறித்து பாடம் நடத்தும்போது, ஒலி, ஒளி அமைப்பில் வெண் திரையில் இதயம் தோன்றும். இதன்மூலம், பாடங்கள் மாணவர்கள் மனதில் நீண்ட நாள்கள் நிற்கும். 

கல்வித் தகவல் மேலாண்மை: 

            கல்வித் தகவல் மேலாண்மைத் திட்டத்தின் மூலம் தொடக்கப் பள்ளிகள், நடுநிலைப் பள்ளிகள், உயர்நிலை, மேல்நிலைப் பள்ளிகளின் அமைப்பு, அமைவிடம், கட்டட வசதி போன்றவை பதிவு செய்யப்படும். அந்தப் பள்ளிகளில் பணியாற்றும் தலைமையாசிரியர், ஆசிரியர்கள், ஆசிரியரல்லாத பணியாளர்களின் பெயர், பணி, பணியில் சேர்ந்த நாள், வயது, ஓய்வு பெறும் நாள் போன்ற எல்லா விவரங்களும் முழுமையாகப் பதிவு செய்யப்படும்.  இந்த முறையில் பள்ளிக் கல்வித் துறையில் பயிலும் மாணவர்கள் எண்ணிக்கை, இடைநிற்றல், தேர்வுகள், தேர்ச்சி போன்றவை பதிவு செய்யப்படும். இதில் பள்ளியில் பயிலும் மாணவர் ஒவ்வொருவருக்கும் தர எண் அளிக்கப்பட்டு ஆண்டுதோறும் அந்த மாணவரின் நிலை கண்காணிக்கப்படும்.

Read more »

தமிழகத்தில் 29 மாவட்டங்களில் 100பள்ளிகள் மேல்நிலைப் பள்ளிகளாக உயர்த்தப்படுகிறது

                  தமிழகத்தில் 29 மாவட்டங்களில் 100 பள்ளிகள் மேல்நிலைப் பள்ளிகளாக நிலை உயர்த்தப்படுகின்றன. எந்தெந்தப் பள்ளிகள் என்பது குறித்தும், ஆசிரியர்களுக்கான ஊதிய விகிதம் பற்றியும் பள்ளிக் கல்வித் துறை செயலாளர் சபிதா உத்தரவிட்டுள்ளார். 

                 அதில், பள்ளிக் கல்வித் துறை அமைச்சர் சி.வி.சண்முகத்தின் சொந்த மாவட்டமான விழுப்புரத்தில் மட்டும், அதிகபட்சமாக 12 பள்ளிகள் நிலை உயர்த்தப்படுவது குறிப்பிடத்தக்கது.  நடப்புக் கல்வியாண்டில் 100 அரசு, நகராட்சி, மாநகராட்சி உயர்நிலைப் பள்ளிகளை மேல்நிலைப் பள்ளிகளாக நிலை உயர்த்த தமிழக அரசு அனுமதி அளித்துள்ளது.  

எந்தெந்த மாவட்டங்கள்: 

                தரம் உயர்த்தப்படும் பள்ளிகளின் எண்ணிக்கையில் விழுப்புரம் மாவட்டம் முதலிடம் வகிக்கிறது. 

               இந்த மாவட்டத்தில் 12 உயர்நிலைப் பள்ளிகள், மேல்நிலைப் பள்ளிகளாக நிலை உயர்த்தப்படுகின்றன. 

            இதேபோன்று, காஞ்சிபுரத்தில் ஆறு பள்ளிகளும், 

             திருவள்ளூர், பெரம்பலூர், அரியலூர், தஞ்சை, நாகை, திருவாரூரில் தலா 2 பள்ளிகளும், 

          கடலூரில் நான்கு பள்ளிகளும், வேலூரில் ஏழு பள்ளிகளும் நிலை உயர்த்தப்படுகின்றன.  

              திருவண்ணாமலை, திருச்சி, கரூர், புதுக்கோட்டை, மதுரையில் தலா நான்கும், 

தருமபுரியில் ஐந்து பள்ளிகளும், 

கிருஷ்ணகிரி, ஈரோடு, திண்டுக்கல்லில் தலா மூன்று பள்ளிகளும், 

சேலத்தில் ஐந்து பள்ளிகளும், 

நாமக்கல், திருப்பூரில் தலா ஒரு பள்ளியும், 

கோவையில் ஆறு பள்ளிகளும் நிலை உயர்த்தப்படுகின்றன. 

 தேனியில் நான்கு பள்ளிகளும், 

சிவகங்கையில் இரண்டு பள்ளிகளும், 

விருதுநகர், தூத்துக்குடியில் தலா ஒரு பள்ளியும்,

திருநெல்வேலியில் மூன்று பள்ளிகளும்,  

கன்னியாகுமரியில் ஒரு பள்ளியும் மேல்நிலைப் பள்ளியாக நிலை உயர்த்தப்படுகின்றன. 

 900 புதிய ஆசிரியர்கள் நியமனம்: 

            நிலை உயர்த்தப்படும் பள்ளிகளுக்கு புதிய ஆசிரியர்கள் நியமிக்கப்பட உள்ளனர். 

இந்தப் பள்ளிகளில் ரூ.9,300-ரூ.34,800 மற்றும் நிலை ஊதியம் ரூ.4,800 என்ற ஊதிய விகிதத்தில் 9 முதுகலை ஆசிரியர் பணியிடங்கள் வீதம் 900 பணியிடங்கள் நிரப்பப்பட உள்ளன. 

       அவை நிரப்பப்படும் நாளில் இருந்து ஓராண்டு காலத்துக்கு தாற்காலிகமாக அந்தப் பணியிடங்களுக்கு ஒப்புதல் அளிக்கப்படுகிறது. 

 எந்தெந்தப் பாடங்களுக்கு நியமனம்: 

                 தமிழ், ஆங்கிலம், கணிதம், இயற்பியல், வேதியியல், உயிரியல், வரலாறு, பொருளியல் மற்றும் வணிகவியல் பாடப் பிரிவுகளுக்கு புதிய ஆசிரியர்கள் நியமிக்கப்பட உள்ளனர். பள்ளிகள் நிலை உயர்த்தப்பட்டு, ஆசிரியர்கள் நியமிக்கப்படுவதன் மூலம், புதிதாக படித்த பட்டதாரி மாணவ-மாணவிகளுக்கு அரசு வேலைவாய்ப்பு கிடைக்கும் நிலை உருவாகியுள்ளது. நிலை உயர்த்தப்படும் பள்ளிகளில் பெரும்பாலானவை கிராமப்புறங்களில் உள்ளவை என்பதால், அங்குள்ள மாணவர்களும் பயன்பெறுவர்.  

Read more »

கடலூர் மாவட்ட அளவில் இளம் விஞ்ஞானி மாணவன் அன்பசரனுக்கு பாராட்டு விழா

கிள்ளை : 

          சிதம்பரம் அருகே எம்.ஜி.ஆர் இருளர் குடியிருப்பு நடுநிலைப் பள்ளியில் இளம் விஞ்சானிக்கு பாராட்டு விழா நடந்தது. 

              தமிழக அரசின் கல்வித்துறை மாணவர்களை அறிவியல் மற்றும் கணிதத்துறையில் ஆர்வத்தை தூண்டிட பல்வேறு வகையில் ஊக்கப்படுத்தி வருகிறது. சிதம்பரம் அருகே கிள்ளை எம்.ஜி.ஆர் நகர் இருளர் குடியிருப்பு நடுநிலைப்பள்ளி மாணவன் அன்பசரன் மாவட்ட அளவில் இளம் விஞ்சானி விருது பெற்றுள்ளார்.கடலூரில் நடக்க உள்ள அறிவியல் கண்காட்சியில் அவரது படைப்பை வெளிபடுத்த சான்றிதழ் மற்றும் 5 ஆயிரம் ரொக்கத்தை மாவட்ட கல்வி அலுவலர் அமுதவல்லி வழங்கினார்.

             பள்ளியில் மாணவனுக்கு நடந்த பாராட்டு விழாவிற்கு தலைமை ஆசிரியர் சிவக்குமார் வேல் தலைமை தாங்கினார். ஆசிரியர் மணிமாறன் வரவேற்றார். ஆசிரியர்கள் சிவகுருநாதன், மணிமொழி சரவணாஸ்ரீ, ஜான்சி முன்னிலை வகித்தனர். கூடுதல் உதவி தொடக்கக்கல்வி அலுவலர் சரஸ்வதிலட்சுமி சிறப்பு விருந்தினராக பங்கேற்று விருது பெற்ற மாணவனை பாராட்டி நினைவு பரிசு வழங்கினர். பின்னர் பெற்றோரை இழந்த மாணவர்களுக்கு இலவச சீருடைகள் மற்ற மாணவர்களுக்கு இலவச குறிப்பேடுகள் வழங்கப்பட்டது. ஆசிரியர் செல்வராஜ் நன்றி கூறினார்.

Read more »

தனியார் பள்ளி கல்விக் கட்டணம் இணைய தளத்தில் வெளியீடு

             திருத்தப்பட்ட தனியார் பள்ளி கல்விக் கட்டணம் வெள்ளிக்கிழமை (ஜூன் 17) இணைய தளத்தில் வெளியிடப்பட்டது.

              இதன்படி சென்னை மாவட்டத்தில் எல்.கே.ஜி.-யில் குழந்தையைச் சேர்க்க அதிபட்சமாக ரூ. 24 ஆயிரம் கட்டணம் நிர்ணயிக்கப்பட்டுள்ளது. பிளஸ்-2 வகுப்புக்கு அதிகபட்ச கட்டணமாக ரூ. 25 ஆயிரம் நிர்ணயிக்கப்பட்டுள்ளது. 

            சென்னை சீதாபதி நகரில் உள்ள சன்ஷைன் மான்டிசோரி நர்சரி மற்றும் தொடக்கப் பள்ளியில் எல்.கே.ஜி., யு.கே.ஜி. வகுப்புகளுக்கான கட்டணமாக ரூ. 24 ஆயிரம் நிர்ணயிக்கப்பட்டுள்ளது.

           இதற்கு அடுத்தபடியாக சென்னை கோட்டூர்புரத்தில் உள்ள ஏ.எம்.எம். மெட்ரிக் மேல்நிலைப் பள்ளியில் எல்.கே.ஜி. வகுப்புக்கு ரூ. 20,150 கட்டணம் நிர்ணயிக்கப்பட்டுள்ளது. பிளஸ்-2 வகுப்புக்கு ரூ. 24,800 என நிர்ணயிக்கப்பட்டுள்ளது.

             அண்ணா நகரில் உள்ள எஸ்.பி.ஓ.ஏ. பள்ளியில் பிளஸ்-2 வகுப்புக்கு சென்னையிலேயே அதிகபட்சமாக ரூ. 25 ஆயிரம் கட்டணம் நிர்ணயிக்கப்பட்டுள்ளது. 

             இந்தப் பள்ளியில் எல்.கே.ஜி.-க்கு ரூ. 15,400 கட்டணம் நிர்ணயிக்கப்பட்டுள்ளது.

          சூளைமேட்டில் உள்ள டி.ஏ.வி. பள்ளியில் எல்.கே.ஜி.-க்கு ரூ. 17,150 கட்டணமும், பிளஸ்-2 வகுப்புக்கு ரூ. 24,100 கட்டணமும் நிர்ணியக்கப்பட்டுள்ளது. 

           இதுபோல் தமிழகம் முழுவதும் 32 மாவட்டங்களில் உள்ள தனியார் பள்ளிகளுக்கான திருத்தப்பட்ட கட்டண விவரம் 

www.pallikalvi.in

http://www.pallikalvi.in/schools/schoolfeesstructure.htm

http://www.pallikalvi.in/schools/Fees/CUDDALORE.pdf

            இணையதளத்தில் வெளியிடப்பட்டுள்ளது.

Read more »

பிளஸ் 2 தேர்வு முடிவுகள் மே 9-ம் தேதி வெளியிடப்படுகிறது

                 பிளஸ் 2 தேர்வு முடிவுகள் மே 9-ம் தேதி (திங்கள்கிழமை) வெளியிடப்படுகிறது. இதை பள்ளிக் கல்வித்துறை அமைச்சர் தங்கம் தென்னரசு சனிக்கிழமை அறிவித்தார்.  

              மாணவர்கள் தங்கள் பள்ளிகள் மூலமாகவும் அரசுத் தேர்வுகள் துறையினரால் அறிவிக்கப்படும் இணையதளம், எஸ்எம்எஸ், தொலைபேசி எண்கள் மூலமாகவும் தேர்வு முடிவுகளைத் தெரிந்து கொள்ள ஏற்பாடுகள் செய்யப்பட்டுள்ளன.  "மதிப்பெண்கள் கம்ப்யூட்டரில் பதிவு செய்யும் பணிகள் கிட்டதட்ட முடிவடைந்துவிட்டன. கம்ப்யூட்டரில் பதிவான மதிப்பெண்களில் உள்ள தவறுகளைத் திருத்தும் பணிகள் இப்போது நடைபெற்று வருகின்றன. அனைத்துப் பணிகளும் மே 8-ல் தான் முடிவடையும். எனவே வரும் திங்கள்கிழமை (மே 9-ம் தேதி) முடிவுகள் அறிவிக்கப்படும்' என்று அமைச்சர் அறிவித்துள்ளார். 

                 பிளஸ் 2 தேர்வு முடிவு மே 14-ம் தேதியும், பத்தாம் வகுப்புத் தேர்வு முடிவு மே 25-ம் தேதியும் வெளியிடப்படலாம் என்று பள்ளி கல்வித்துறை செயலர் டி. சபிதா கடந்த வாரம் தெரிவித்தார். இந்த அறிவிப்பு அரசைக் கலந்து ஆலோசிக்காமல் பள்ளிக் கல்வித்துறையே தன்னிச்சையாக அறிவித்தது என்றும் அமைச்சர் தங்கம் தென்னரசு குற்றம் சாட்டினார்.  "தேர்வு முடிவு தேதிகளை அறிவிப்பது தொடர்பாக பள்ளிக் கல்வித் துறையின் அதிகாரிகள், அதன் அமைச்சரைக் கலந்து ஆலோசித்து விட்டு முதல்வரின் ஒப்புதலைப் பெறுவர். அவர் அனுமதி அளித்த பிறகு, பள்ளிக் கல்வித்துறை அமைச்சர் மூலமாகத் தேர்வு முடிவு தேதி அறிவிக்கப்படும். 

               இதுவே நடைமுறை. ஆனால், இதற்கு மாறாக, பள்ளிக் கல்வித்துறை செயலரே தேர்வு முடிவு தேதியை அறிவித்துள்ளார். இந்த விஷயத்தில் பள்ளிக் கல்வித்துறை இயக்குநரகம் தன்னிச்சையாக செயல்பட்டுள்ளது. தேர்தல் தேதி முடிவு அறிவிப்புக்கும், தேர்தல் நடத்தை நெறிமுறைகளுக்கும் தொடர்பில்லை'' என்று அமைச்சர் தெரிவித்தார்.  அமைச்சரின் எதிர்ப்பால், பிளஸ் 2 முடிவுகள் வெளியாகும் தேதியை முடிவு செய்வதில் குழப்பம் நிலவியது. சட்டப்பேரவைத் தேர்தல் முடிவுகள் வெளிவந்த பிறகு பிளஸ் 2 தேர்வு முடிவுகள் வெளியாகும் என்றும் எதிர்பார்க்கப்பட்டது. இந்த நிலையில் மே 9-ம் தேதி பிளஸ் 2 தேர்வு முடிவுகள் அறிவிக்கப்படும் என்று அமைச்சர் தங்கம் தென்னரசு திடீரென அறிவித்துள்ளார்.

 

 10 வகுப்புத் தேர்வு முடிவு:  

                 பத்தாம் வகுப்புத் தேர்வு விடைத்தாள்கள் திருத்தும் பணி இப்போது நடைபெற்றுவருகிறது. பணி முடிந்ததும் தேர்வு முடிவுகள் வெளியாகும் தேதி அறிவிக்கப்படும்.

Read more »

வரும் கல்வி ஆண்டு 1வது முதல் 10வது வகுப்பு வரை அனைவருக்கும் சமச்சீர்கல்வி

       மெட்ரிகுலேசன், மாநில கல்வி வாரியமுறை, ஓ.எஸ்.எல்.சி., ஆங்கிலோ இந்தியன் ஆகிய 4 முறையான கல்வி முறை ஒழிக்கப்பட்டு அனைவருக்கும் ஒரே கல்வி முறையாக சமச்சீர் கல்வி முறை வருகிற கல்வி ஆண்டு முதல் அமல்படுத்தப்படுகிறது.

            தமிழ்நாட்டில் சமச்சீர் கல்வி திட்டம் என்ற புதிய திட்டத்தை தமிழக அரசு கடந்த ஆண்டு அமல் படுத்தியது. அதாவது 1வது வகுப்பு மற்றும் 6வது வகுப்பு ஆகியவற்றுக்கு மட்டும் இந்த சமச்சீர் கல்வி அறிமுகப்படுத்தப்பட்டது. வருகிற கல்வி (2011 2012) ஆண்டு முதல் 1வது முதல் 10வது வகுப்பு வரை அனைவருக்கும் சமச்சீர்கல்வி முறை கொண்டுவரப்படுகிறது. அதாவது ஏற்கனவே நடைமுறையில் உள்ள மெட்ரிகுலேசன் முறை, மாநில கல்வி முறை, ஆங்கிலோ இந்தியன், ஓரியண்டல் முறை (ஓ.எஸ்.எல்.சி.) ஆகிய 4 முறையான கல்வி முறை இருந்தது.

            இதில் ஓரியண்டல் பள்ளிகள், ஆங்கிலோ இந்தியன் பள்ளிகள் மிக மிக குறைவானவை. ஆனால் மெட்ரிகுலேசன் பள்ளிகள் அதிகம். மெட்ரிகுலேசன் பள்ளிகளில் பல பள்ளிகள் சி.பி.எஸ்.சி. என்ற மத்திய அரசின் கல்விமுறைக்கு மாறி வருகின்றன. காரணம் சமச்சீர் கல்வி கொண்டுவரப்படுவதால் நடுத்தர மக்கள் மெட்ரிகுலேசன் பள்ளிகளில் இருந்து அரசு பள்ளிக்கு தங்கள் குழந்தைகளை மாற்ற திட்டமிட்டுள்ளதாக கூறப்படுகிறது.

             திங்கட்கிழமை  எஸ்.எஸ்.எல்.சி. மற்றும் மெட்ரிகுலேசன் தேர்வுகள் முடிவடைந்தன. இந்த வருடம் தான் எஸ்.எஸ்.எல்.சி., மெட்ரிகுலேசன், ஆங்கிலோ இந்தியன், ஓரியண்டல் முறை ஆகியவற்றிற்கு கடைசி தேர்வாகும். இனிமேல் தமிழ்நாட்டில் ஒரே தேர்வு முறைதான்.

Read more »

பிளஸ் 2 கணித பாட கேள்வித் தாளில் குளறுபடி

ராசிபுரம் அருகே தேசிய நெடுஞ்சாலையில் சாலை மறியலில் ஈடுபட்ட பிளஸ் 2 மாணவர்கள்.

              ப்ளஸ் 2 கணித பாட கேள்வித் தாளில் குளறுபடிகள் ஏற்பட்டுள்ளதாக மாணவர்கள் புகார் தெரிவித்து வியாழக்கிழமை சாலை மறியலில் ஈடுபட்டனர்.  

                  ப்ளஸ் 2 கணிதத் தேர்வு வியாழக்கிழமை நடைபெற்றது. இதில் கணித பாட கேள்வித் தாளில் உள்ள சில கேள்விகளில் குளறுபடிகள் ஏற்பட்டதால் மதிப்பெண்கள் குறையும் வாய்ப்புள்ளதாக மாணவ மாணவியர்கள் புகார் தெரிவித்தனர்.  ராசிபுரம் அருகே கீரனூரில் உள்ள தனியார் பள்ளியில் தேர்வு மையத்தில் வழங்கப்பட்ட வினாத்தாள்களை பெற்ற மாணவ மாணவியர்கள் அதிர்ச்சி அடைந்தனர். 

              இதில் பி டைப் கணித பாட கேள்வித் தாளில் பல்வேறு குளறுபடிகள் ஏற்பட்டதால் மாணவ மாணவிகள் குழம்பி போய் பதில் அளிக்க தடுமாறினர். ஒரு மார்க் 11-வது கேள்வியில் டிவைடர் குறி மறைந்துள்ளது.  அதேபோல் 16-வது கேள்வியில் மைனஸ் குறி பிரிண்ட் ஆகவில்லை. 27-வது கேள்வியில் பை இல்லை. 28வது கேள்வியில் பேக்டோரியல் எண் இல்லை.  6 மார்க் கேள்வியில் 41-வது கேள்வியில் மைனஸ் இல்லை. 42-வது கேள்வியில் சமன் குறி இல்லை. 51-வது கேள்வியில் 16 என்ற எண் இல்லை. 55-வது கேள்வியில் மைனஸ் குறி இல்லை. 10 மார்க் கேள்வியில் 57-வது கேள்வியில் சமன் குறி இல்லை. 

                அதேபோல் 64 மற்றும் 70-வது கேள்விகள் சரியாக பிரிண்ட் ஆகவில்லை.  மொத்தம் 58 மதிப்பெண்களுக்கான கேள்விகளில் பல குறியீடுகள் மற்றும் எழுத்துகள் சரியாக பிரிண்ட் ஆக வில்லை என மாணவர்கள் குறிப்பிட்டனர்.  இதனால் மதிப்பெண்கள் பெறுவது பாதிக்கும் என்பதால் மாணவர்கள் தேர்வு எழுதியபின், மல்லூர் அருகே தேசிய நெடுஞ்சாலையில் அமர்ந்து மறியல் போராட்டம் நடத்தினர். 

              பல மணி நேர மறியலால் போக்குவரத்து பாதித்தது. பின்னர் மாவட்ட முதன்மைக் கல்வி அலுவலர் விஜயராகவன் மற்றும் காவல்துறையினர் மாணவர்களிடம் சமரசப் பேச்சு நடத்தினர். இந்த பிரச்சினையில் பள்ளிக் கல்வி துறை உயர் அதிகாரிகளிடம் பேசி உரிய நடவடிக்கை எடுக்கப்படும் என கூறியதையடுத்து மாணவர்கள் மறியலை கைவிட்டனர்.

Read more »

கல்வித்துறை விதிகளை மீறும் கடலூர் பள்ளிகள்?

கடலூர்:

                  கடலூர் மெட்ரிக் பள்ளிகளின் நடவடிக்கைகள் தொடர்ந்து கல்வித்துறை விதிகளை மீறுவதாக உள்ளது.  

              மெட்ரிக் பள்ளிகளில் எல்.கே.ஜி., யூ.கே.ஜி. வகுப்புகளுக்கு மாணவர்கள் சேர்க்கை மே மாதத்தில்தான் நடத்த வேண்டும் என்றும், அதற்கு முன்னரே விண்ணப்பப் படிவங்களை விநியோகிப்பதும், பெற்றோரை நேர்காணலுக்கு அழைப்பதும் கூடாது என்று, 2009-ம் ஆண்டு பிறப்பிக்கப்பட்ட அடிப்படைக் கல்வி உரிமைச் சட்டம் தெளிவாகத் தெரிவிக்கிறது.  ஆனால் கடலூரில் சில மெட்ரிக் பள்ளிகள் எல்.கே.ஜி., யூ.கே.ஜி. வகுப்புகளுக்கு விண்ணப்பப் படிவங்களை இப்போதே விநியோகித்து வருகின்றன.

             விண்ணப்பப் படிவங்களை வழங்கும்போதே, பெற்றோரை நேர்காணலுக்கு அழைத்து, அவர்கள் பட்டம் படித்தவர்களாகவும், பள்ளி முதல்வரின் கேள்விகளுக்கு மிகவும் பௌய்வியமாக பதில் அளிப்பவர்களாக இருந்தால் மட்டுமே விண்ணப்பப் படிவங்கள், வழங்கப்படுகின்றன.  பிப்ரவரி முதல் வாரத்தில் விண்ணப்பப் படிவங்கள் வழங்குவது, கடைசி தேதி என்றும் அறிவித்து உள்ளன. அதைத் தொடர்ந்து மாணவர்களுக்கு நேர்காணல் தேதி அறிவிக்கப்படும் என்றும் சில மெட்ரிக் பள்ளி நிர்வாகங்கள் அறிவித்து உள்னன.  

             சில பள்ளிகள் இப்போதே மாணவர்கள் சேர்க்கையை முடித்துக் கொள்கின்றன. பள்ளிகளில் ஜாதிச் சான்றிதழ், பிறந்த தேதிக்கான சான்றிதழ்களும் கேட்கப்படக் கூடாது என்றும், அடிப்படைக் கல்வி உரிமைச் சட்டம் தெரிவிக்கிறது. ஜாதிச் சான்றிதழ்களைப் பெற்றுக் கொண்டு இப்பள்ளிகள் ஒன்றும், எல்.கே.ஜி. யிலேயே இட ஒதுக்கீட்டைக் கடைபிடிக்கப் போவதில்லை.   தாழ்த்தப்பட்ட வகுப்பைச் சேர்ந்தவர்கள் மற்றும் பிற்படுத்தப்பட்ட வகுப்பைச் சேர்ந்தவர்களுக்கு, இந்தக் கட்டணக் கல்விக் கூடங்கள், சலுகைகளை வாரி வழங்கப்போவதும் இல்லை.  கல்வி உதவித்தொகைகளை பெற்றுத்தரப் போவதும் இல்லை. அப்படி இருக்க இந்தக் கல்வி நிலையங்கள், ஜாதிச் சான்றிதழைக் கேட்டு பெற்றோரை ஏன் துன்புறுத்த வேண்டும் என்று தெரியவில்லை என்கிறார்கள் பெற்றோர்.   மேலும் பிறந்த தேதிக்கான சான்றிதழ்களையும், மாணவர்களைச் சேர்க்கும் போது வழங்கக் தேவையில்லை என்றும் கல்வி உரிமைச் சட்டம் தெரிவிக்கிறது.

            பெற்றோர் தாங்களாக எழுதிக் கொடுத்தால் போதும் என்றும் சட்டம் கூறுகிறது. சட்டம் இவ்வாறு இருக்க, ஜாதிச் சான்றிதழையும், பிறப்புச் சான்றிதழையும் கேட்டு பெற்றோரை மிரட்டி வருகின்றன கடலூர் மெட்ரிக் கட்டணக் கல்விக் கூடங்கள்.÷இதனால் பெற்றோர் தாலுகா அலுவலகங்களுக்கும் நகராட்சி உள்ளிட்ட ஏனைய அரசு அலுவலங்களுக்கும் நடையாய் நடக்கும் நிலைக்கும், படாதபாடுபடும் நிலைக்குத் தள்ளப்பட்டு இருக்கிறார்கள்.  கொஞ்சம் கல்வி நன்றாக இருக்கிறதே என்று நினைத்து இப்பள்ளிகளை நாடினால், ஏதேனும் ஒன்றைக் கேட்டு பெற்றோரை அலைக்கழிக்க வேண்டும்.  தாங்கள் அரசுக் கல்விக் கூடங்களைவிட உயர்ந்தவர்கள் என்று, காட்டிக் கொள்ள வேண்டும் என்பதே இவர்களின் குறிக்கோளாக இருப்பதாகப் பெற்றோர் குமுறுகிறார்கள். 

               இது குறித்துக் கல்வித்துறை கடும் நடவடிக்கை எடுக்க வேண்டும் என்று கடலூர் மக்கள் எதிர்பார்க்கிறார்கள்.   இப்பிரச்னை தொடர்பாக தமிழ்நாடு நுகர்வோர் கூட்டமைப்பின் பொதுச் செயலர் எம்.நிஜாமுதீன், கல்வித்துறை அமைச்சர் மற்றும் அதிகாரிகளுக்கு வெள்ளிக்கிழமை கோரிக்கை மனு ஒன்றை அனுப்பி உள்ளார். அரசின் கட்டாயக் கல்விச் சட்டத்துக்கு முரணான, மெட்ரிக் பள்ளிகளின் இச்செயல்களை உடனடியாகத் தடுத்து நிறுத்த வேண்டும்.  சம்மந்தப்பட்ட பள்ளிகள் மீது கடும் நடவடிக்கை எடுக்க வேண்டும் என்றும் மனுவில் கோரியுள்ளார்.  

இது குறித்து கல்வித்துறை அதிகாரி ஒருவர் கூறுகையில், 

               இத்தகைய புகார்கள் கல்வித் துறைக்கு வந்துள்ளன. சட்டப்படி நடவடிக்கை எடுக்கப்படும் என்றார்.

Read more »

கனவாகிப்போன கல்விச் சுற்றுலா!

சிதம்பரம்:

          கல்வித்துறை அதிகாரிகளின் முன் அனுமதியோடு கல்விச்சுற்றுலாவை ஏற்பாடு செய்ய வேண்டும் என்ற நிபந்தனையால், கல்விச் சுற்றுலா என்பது மாணவர்கள் மத்தியில் வெறும் கனவாகவே உள்ளது.

             தமிழ், அறிவியல் மற்றும் வரலாறு பாடங்களை எளிதில் புரிந்து கொள்வதற்காகவும், பொதுதகவல் தெரிந்து கொள்ளவும் பள்ளி மாணவ, மாணவியர்களை ஆண்டுதோறும்  கல்விச் சுற்றுலா அழைத்துச் செல்வது வழக்கம். வரலாற்றுப் பாடங்களில் இடம் பெற்றுள்ள தஞ்சை பெரிய கோயில் மற்றும் சென்னை, மாமல்லபுரம், புதுச்சேரி, ஊட்டி, கொடைக்கானல் உள்ளிட்ட பல்வேறு சுற்றுலா தலங்களுக்கு பஸ்கள் மற்றும் வேன்கள் மூலம் கல்விச் சுற்றுலா சென்று வந்தனர்.

           கல்விச் சுற்றுலா செல்ல பஸ்களுக்கு முன்பணம் கொடுத்து ஒரு மாதத்துக்கு முன்பாகவே பதிவு செய்ய வேண்டியுள்ளது. இதற்கு பிறகுதான் மாணவர்கள் ஒவ்வொருவராக கட்டணம் செலுத்தி பெயர் பதிவு செய்து கொள்வது வழக்கம். தீவிபத்து, நீரில் மூழ்கி இறத்தல் போன்ற பல அசம்பாவிதங்கள் காரணமாக அரசு, கடந்த சில ஆண்டுகளாக சுற்றுலா செல்லும் மாணவர்களின் பெயர்ப் பட்டியல், உடன் செல்லும் ஆசிரியர்கள் குறித்த முழுவிவரத்துடன் மாவட்ட கல்வித்துறை அலுவலகத்துக்கு விண்ணப்பித்து அனுமதி கிடைத்த பின்னரே கல்விச்சுற்றுலா செல்ல வேண்டும் என்ற நிபந்தனை விதித்தது. 

              இந்த உத்தரவினால் பல பள்ளிகளில் கல்விச்சுற்றுலாவுக்கு ஏற்பாடு செய்யாமல் விட்டுடுகின்றனர். இதனால் மாணவர்கள் ஏமாற்றம் அடைந்துள்ளனர். பள்ளிகள் சார்பில் கல்வித்துறைக்கு கொடுத்த விண்ணப்பம் நிராகரிக்கப்பட்டாலோ அல்லது அனுமதி மறுக்கப்பட்டாலோ பஸ்களுக்கு கொடுத்த முன் பணம் திரும்பப் பெற இயலாமல் போய்விடுகிறது. இதனால் பல பள்ளி தலைமை ஆசிரியர்கள் கல்விச் சுற்றுலாவை ஏற்பாடு செய்வதில்லை. 

               கல்விச்சுற்றுலா செல்லும் மாணவ, மாணவியர்கள் மற்றும் ஆசிரியர்கள் குறித்த பெயர்ப் பட்டியல் மட்டும் அனுப்பிவிட்டு சுற்றுலா மேற்கொள்ளலாம் என்றும், முன்அனுமதி பெற வேண்டிய அவசியம் இல்லை என்ற கெடுபிடிகளை தளர்த்தினால் மட்டுமே மாணவர்களின் கல்விச்சுற்றுலா கனவு நனவாகும். எனவே கல்விச்சுற்றுலா அனுமதி பெற கல்வித்துறை அதிகாரிகள் கெடுபிடிகளை தளர்த்தி சுற்றறிக்கை அனுப்ப வேண்டும் என்பதே பெற்றோர்களின் எதிர்பார்ப்பாகும்.

Read more »

சில நூறுக்காக பல ஆண்டுகள் காத்திருக்கும் ஓய்வூதியர்கள்

கடலூர்:

               உச்ச நீதிமன்றம் தீர்ப்பு வழங்கி 12 ஆண்டுகள் ஆகியும், கல்வித்துறை அமைச்சுப் பணியாளர்கள் 500 பேர், ஊதியப் பலன்கள் கிடைக்காமல் அவதிப்படுகிறார்கள். இவர்களில் பெரும்பாலானோர் 70 வயதைக் கடந்தவர்கள்.

             தமிழ்நாட்டில் 1970-க்கு முன்னர் அரசு உயர்நிலைப் பள்ளிகள் என்றும், மாவட்ட நாட்டாண்மைக் கழக உயர்நிலைப் பள்ளிகள் என்றும் இருபிரிவுகளாக இருந்தன. இவற்றை ஒருங்கிணைத்தபோது, அவற்றில் பணிபுரிவோரை 1-4-74 தேதியை அடிப்படையாகக் கொண்டு பணிமூப்பை நிர்ணயிக்க வேண்டும் என்று அரசு உத்தரவிட்டது. அவற்றில் பணிபுரிந்த ஆசிரியர்களுக்கும் கல்வி அதிகாரிகளுக்கும் அவ்வாறு பணிமூப்புப் பட்டியல் தயாரித்து, முன் தேதியிட்டு பதவி உயர்வுகள் அளித்து ஊதியப் பயன்கள் வழங்கப்பட்டன.

             ஆனால் அமைச்சுப் பணியாளர்களுக்கு மேற்கண்ட தேதியை அடிப்படையாகக் கொண்டு பணிமூப்புப் பட்டியல் தயாரிக்கவில்லை என்று கூறப்படுகிறது. எனவே அவர்கள் உச்ச நீதிமன்றம் வரை சென்றதில் அமைச்சுப் பணியாளர்களுக்கும் 1-4-70 தேதியை அடிப்படையாகக் கொண்டு பணிமூப்புப் பட்டியல் தயாரித்து, ஊதிய வித்தியாசத் தொகைகளை வழங்க வேண்டும் என்று உத்தரவிடப்பட்டது.

               ஆனால் உச்ச நீதிமன்ற உத்தரவு வெளியாகி 12 ஆண்டுகள் ஆகியும் இந்தப் பணிமூப்புப் பட்டிலைத் தயாரித்து, முன்தேதியிட்டு பதவி உயர்வுகள் வழங்கி, ஊதியப் பயன்களை அளிக்க, தமிழகக் கல்வித்துறை தயக்கம் காட்டி வருவதாகவும், பல்வேறு சாக்குப் போக்குகளை தெரிவித்து வருவதாகவும், தமிழ்நாடு கல்வித்துறை ஓய்வு பெற்ற அமைச்சுப் பணியாளர் சங்கம் குற்றம் சாட்டுகிறது.  இந்த ஊதியப் பயன்களைப் பெறத் தகுதியானவர்கள் தமிழகத்தில் 500 பேர் மட்டுமே உள்ளதாகவும், நீதிமன்றத் தீர்ப்பை அமல்படுத்தினால் அவர்களது ஓய்வூதியத்தில் சில | 100-க்கள் கூடுதலாகக் கிடைக்கும் என்றும், அவர்களில் பெரும்பாலானேர் 70 வயதைக் கடந்தவர்கள் என்றும் சங்கத் தலைவர் பி.விஸ்வநாதன் தெரிவிக்கிறார்.

Read more »

புகைப்படத்துடன் சான்றிதழ் தமிழக அரசு ஆலோசனை

      போலி மதிப்பெண் சான்றிதழ் ஊடுருவலை தடுக்கும் வகையில், மாணவர்களின் புகைப்படத்துடன் கூடிய மதிப்பெண் சான்றிதழை வழங்குவது குறித்து, தமிழக அரசு ஆலோசித்து வருகிறது. 

              பொறியியல் மற்றும் மருத்துவ படிப்புகளில் சேர்வதற்கு விண்ணப்பம் செய்த மாணவர்களில், பலர், போலி மதிப்பெண் சான்றிதழ்களை சமர்ப்பித்த விவகாரம், பெரிய சர்ச்சையை எழுப்பியுள்ளது. இது குறித்து, போலீசார் தீவிர விசாரணை நடத்தி வருகின்றனர். போலி சான்றிதழ் பிரச்னை, கல்வித்துறைக்கும் பெரிய தலைவலியை ஏற்படுத்தியிருப்பதால், வரும் காலங்களில் இதுபோன்ற பிரச்னை எழாமல் இருப்பதற்கு என்னென்ன மாற்றங்கள் கொண்டு வரலாம் என்பது குறித்து, தமிழக அரசு தீவிரமாக ஆலோசித்து வருகிறது. 

               பள்ளிக் கல்வித்துறை அமைச்சர் தங்கம் தென்னரசு, நேற்று மாலை தலைமைச் செயலகத்தில் உயர் அதிகாரிகளுடன் ஆலோசனை நடத்தினார். இதில், துறையின் செயலர் குற்றாலிங்கம், தேர்வுத்துறை இயக்குனர் மற்றும் டேட்டா சென்டர் அதிகாரிகள் உட்பட பலர் கலந்து கொண்டனர். போலி சான்றிதழை தடுப்பது குறித்து, கூட்டத்தில் விரிவாக ஆலோசனை நடத்தப்பட்டது. வரும் ஆண்டுகளில் மாணவர்களின் புகைப்படத்துடன் கூடிய மதிப்பெண் சான்றிதழை வழங்குவது உட்பட பல்வேறு அம்சங்கள் குறித்து, கூட்டத்தில் ஆலோசிக்கப்பட்டதாக, துறை வட்டாரங்கள் தெரிவித்தன.

Read more »

அரசுத் தேர்வுகள் துறையில் தேங்கி கிடக்கும் 15 லட்சம் மதிப்பெண் சான்றிதழ்கள்

            போலி மதிப்பெண் சான்றிதழ் விவகாரம் ஒட்டுமொத்தக் கல்வித்துறையைப் புரட்டி போட்டுள்ளது. அது ஒரு புறமிக்க, மதிப்பெண் சான்றிதழ்களின் உண்மைத் தன்மையை அறிவதற்கு அரசு தேர்வுகள் துறைக்கு விண்ணப்பிக்கப்பட்ட 15 லட்சம் சான்றிதழ்கள், அப்படியே தேங்கி கிடக்கின்றன என்று கூறப்படுகிறது.

              போதிய பணியாளர்கள் இல்லாததால், ஒவ்வொரு ஆண்டும் சான்றிதழ் சரிபார்ப்புக்கு வரும் விண்ணப்பங்கள் தேங்கி கொண்டே போகின்றன என்று தெரியவந்துள்ளது.சென்னையில் உள்ள அரசு தேர்வுகள் துறை மூலம் 10-ம் வகுப்பு, 12-ம் வகுப்பு மதிப்பெண் சான்றிதழ்கள் சரிபார்க்கப்பட்டு வருகின்றன. போலி மதிப்பெண் சான்றிதழ்கள் மூலம் மாணவர் சேர்க்கையைத் தடுக்கும் வகையில் பல்கலைக்கழகங்கள், பொறியியல் கல்லூரிகள், மருத்துவக் கல்லூரிகள், ஆசிரியர் பயிற்சி நிறுவனங்கள் சார்பில் சான்றிதழின் உண்மைத் தன்மையை அறிவதற்கு அரசு தேர்வுகள் துறைக்கு விண்ணப்பம் செய்கின்றன.மத்திய-மாநில அரசு பணிகளுக்கு தேர்வு செய்யப்படுபவர்கள், ராணுவம், ஆசிரியர் பணியிடம், கருணை அடிப்படையில் வேலைக்குத் தேர்வு செய்யப்பட்டவர்கள், பொறியியல், மருத்துவம் மற்றும் வெளிநாடுகளுக்கு உயர் கல்விக்குச் செல்லும் மாணவர்களுக்கு முன்னுரிமை அளிக்கப்பட்டு சான்றிதழ்கள் சரிபார்க்கப்படுகின்றன.

               அரசு தேர்வுகள் துறைக்கு மட்டும் ஆண்டு ஒன்றுக்கு சுமார் 5 லட்சத்துக்கும் அதிகமான மதிப்பெண் சான்றிதழ்கள், உண்மைத்தன்மை அறிவதற்கு வருகின்றன.ஆனால், இப்படி லட்சக்கணக்கில் வரும் மதிப்பெண் சான்றிதழ்களை சரிபார்க்க வெறும் 20 பேர் மட்டுமே பணிபுரிந்து வருகின்றனர். இப்பணியை கண்காணித்து, ஒருங்கிணைத்து செயல்பட அதிகாரிகள் அளவில் ஒருவர் மட்டுமே உள்ளார். மூன்று அதிகாரிகள் இருக்க வேண்டிய இடத்தில் ஒரு அதிகாரியே பணிபுரிந்து வருகிறார் என்று அரசு தேர்வுகள் துறை வட்டாரங்கள் தெரிவித்தன. இத்துடன் ஒவ்வொரு ஆண்டும் பத்தாம் வகுப்பு மற்றும் பிளஸ் 2 தேர்வை சுமார் 15 லட்சம் பேர் எழுதுகின்றனர். இவர்களுக்கான மதிப்பெண் சான்றிதழ்களை சரிபார்த்தல், தேர்வு பணிகளை மேற்கொள்ளுதல் போன்ற இதர பணிகளை செய்வதால், மதிப்பெண் சான்றிதழ் சரிபார்ப்பு பணியில் தொய்வு ஏற்படுகிறது.

              சென்னையில் உள்ள அரசு தேர்வுகள் துறை தலைமை அலுவலகத்தில் மட்டும் இளநிலை உதவியாளர் பணியிடங்கள் உள்பட 200 காலிப் பணியிடங்கள் உள்ளன. எனவே, சான்றிதழ் சரிபார்ப்பு பணிகளை செய்வதில் தொய்வு ஏற்படுகிறது. இதனால், ஒவ்வொரு ஆண்டும் சான்றிதழ் சரிபார்ப்பு பணியில் தேக்கம் ஏற்படுகிறது.  5 ஆண்டுகளுக்கு முன் ஆசிரியர் பணியில் சேர்ந்தவர்களின் சான்றிதழ்கள்கூட இன்னும் உண்மைத் தன்மை உறுதிப்படுத்தப்படவில்லை. இப்படி லட்சக்கணக்கில் சான்றிதழ்கள் தேக்கமடைந்துவிடுகின்றன. தேக்க நிலையை சரிசெய்ய வேண்டுமெனில் போதிய பணியாளர்களை அரசு நியமிக்க வேண்டும். அப்போது தான் இதுபோன்ற நிலைமை தவிர்க்கப்படும் என்று அந்த வட்டாரங்கள் தெரிவித்தன.

            இதுபோல கடந்த சில ஆண்டுகளாக தேங்கி கிடக்கும் மதிப்பெண் சான்றிதழ்களின் எண்ணிக்கை மட்டும் 15 லட்சம் என கணக்கிடப்படுகிறது. சான்றிதழ் சரிபார்ப்புக்கு விண்ணப்பிக்கும் கல்லூரிகள், சான்றிதழ்களின் உண்மைத்தன்மை குறித்து அரசு தேர்வுகள் துறையிடம் இருந்து எவ்வித பதிலும் வராதது கண்டு, இப்போது சான்றிதழ் சரிபார்ப்புக்கு விண்ணப்பிப்பதே இல்லை என்று கூறப்படுகிறது. மதிப்பெண் சான்றிதழ்களை சரிபார்த்து அவை போலியானதா? உண்மையானதா? என கண்டறிந்து சொல்ல வேண்டிய அரசு தேர்வுகள் துறையில் நிலவும் ஆள்பற்றாக்குறை பற்றி அரசு கண்டும் காணாமல் இருப்பதுதான் இப்பிரச்னைக்கு மூல காரணம் என தெரியவந்துள்ளது. கல்வி வியாபாரமாகிவிட்ட நிலையில், போலி மதிப்பெண் சான்றிதழ்களை கொண்டு கல்லூரிகளில் சேரும் மாணவர்கள் எண்ணிக்கை எத்தனை என தெரியவில்லை.

                   போதிய நேரத்தில் மதிப்பெண் சான்றிதழ்கள் சரிபார்த்து உண்மைத்தன்மையை தெரிவிக்க முடியாமல் போவதால், தனியார் பொறியியல், கலை அறிவியல் கல்லூரிகளில் போலி மதிப்பெண் சான்றிதழ் கொடுத்து படித்து பட்டம் பெற்று செல்லும் மாணவர்களை எப்படி அரசால் கண்டறிய முடியும் என்பதே கல்வியாளர்களின் கேள்வியாக உள்ளது.

Read more »

இந்த ஆண்டில் 8,903 புதிய ஆசிரியர்கள் நியமனம்

 தமிழகத்தில் 2010-2011 ஆம் கல்வியாண்டில், பள்ளிக் கல்வி இயக்ககம் மற்றும் தொடக்கக்கல்வி இயக்ககத்தில் புதியதாக மொத்தம் 8,903 ஆசிரியர் பணியிடங்கள் நேரடி நியமனம் மூலம் நிரப்பப்படும் என்று பள்ளிக் கல்வித்துறை அமைச்சர் தங்கம் தென்னரசு அறிவித்தார். மேற்கண்ட பணியிடங்கள் வேலைவாய்ப்பு அலுவலகங்களில் பதவிமூப்பின் அடிப்படையில் நிரப்பப்படும் என அதிகாரிகள் தெரிவித்தனர்.  

 

சட்டப்பேரவையில் வெள்ளிக்கிழமை நடைபெற்ற பள்ளிக் கல்வித்துறை மீதான மானியக் கோரிக்கை விவாதத்துக்குப் பிறகு அமைச்சர் தங்கம் தென்னரசு வெளியிட்ட அறிவிப்புகள்:

 

                   2010-2011 ஆம் கல்வியாண்டில் பள்ளிக்கல்வி இயக்ககம் மற்றும் தொடக்கக் கல்வி இயக்ககத்தில் காலியாக உள்ள 8,903 ஆசிரியர் பணியிடங்கள் நேரடி நியமனம் மூலம் நிரப்பப்படும். 

 

புதிய மாவட்டக் கல்வி அலுவலகம் துவக்கம்: 

 

                    விருதுநகர் மாவட்டம் ஸ்ரீ வில்லிபுத்தூரை தலைமையிடமாகக் கொண்டு மாவட்டக் கல்வி அலுவலகம் புதிதாகத் துவக்கப்படும்.        புதிதாக உருவாக்கப்பட்டுள்ள திருப்பூர் மாவட்டத்தில் திருப்பூரை தலைமையிடமாகக் கொண்டு மாவட்ட தொடக்க கல்வி அலுவலகம் புதிதாக துவக்கப்படும்.  தற்போது அரியலூரில் இயங்கி வரும் பெரம்பலூர் மாவட்டத் தொடக்கக் கல்வி அலுவலகமாகச் செயல்படும். பெரம்பலூர் மாவட்டத்தில் புதிய மாவட்டத் தொடக்கக் கல்வி அலுவலகம் தொடக்கப்படும். தமிழ்நாடு கல்வி மேலாண்மை மற்றும் பயிற்சிக் கட்டடத்தில் தொடக்கக் கல்வி இயக்ககத்துக்கு கூடுதலாக ரூ.92 லட்சம் செலவில் இரண்டாவது தளம் அமைக்கப்படும் என்று அவர் தெரிவித்தார்.

downlaod this page as pdf

Read more »