மேட்டூர் அணை திறப்பதில் தாமதம்: 16 லட்சம் ஏக்கர் நெல் சாகுபடி கேள்விக்குறி

கடலூர்:

            மேட்டூர் அணை திறப்பதில் தாமதமாகியுள்ளதால், தமிழகத்தின் நெல் தேவையில் பெரும்பகுதியைப் பூர்த்தி செய்யும் காவிரி டெல்டா பாசனப் பகுதிகளின் 16 லட்சம் ஏக்கர் நெல் உற்பத்தி, தற்போது கேள்விக்குறியாகி உள்ளது.

             பாசனத்துக்கு மேட்டூர் அணையை திறந்த பின்னர்தான், இந்த 16 லட்சம் ஏக்கரிலும் வேளாண் பணிகளே தொடங்கும். 20 ஆண்டுகளுக்கு முன்பு வரை டெல்டா பாசனப் பகுதிகளில் சம்பா நெல் ரகங்கள் என்றால் 6 மாதப் பயிர்கள்தான். அப்போது பயிரிடப்பட்டு வந்த  குதிரைவாலி, கொத்தமல்லி, கட்டச்சம்பா, அம்பாசமுத்திரம், வெள்ளந்தாங்கி, கோவைச்சம்பா போன்ற நீண்டகால சம்பா நெல் ரகங்கள் இன்று காணாமல் போய்விட்டன.

            அவற்றின் விதைநெல் இன்று எங்கும் தேடினாலும் கிடைக்காத பொருளாகி விட்டது.  அவற்றுக்கு மாற்றாக இன்று, டெல்டா பாசனப் பகுதிகளில் பொன்மணி, பிபிடி, சி.ஆர்.1009, வெள்ளைப் பொன்னி, ஏடிடி 38,39, 43, 45 ரகங்கள், கோ 43, கோ 50 போன்ற 120 முதல் 140 நாள்களுக்குள் அறுவடைக்குத் தயாராகும் குறுகியகால நெல் ரகங்கள்தான் சாகுபடி செய்யப்படுகின்றன. பூச்சி, பூஞ்சாணங்களின் தாக்குதலில் இருந்து பயிர்களைக் காப்பாற்ற நிறைய பூச்சிக் கொல்லி மருந்துகளைப் பயன்படுத்த வேண்டும் என்கிறார் பாசிமுத்தான் ஓடை விவசாயிகள் சங்கத் தலைவர் பி.ரவீந்திரன். 

               இந்த ரக அரிசியை வேறுவழியின்றிச் சாப்பிடுவோருக்கு, அவற்றில் இருந்து கிடைக்கும் சத்தும் குறைவுதான் என்றும் அவர் கூறுகிறார். நீண்டகால ரக சம்பா அரிசியை சமைத்தால் சாதம் நீண்ட நேரம் கெட்டுப் போகாது. தண்ணீர் ஊற்றி வைத்தால் தற்போதைய சம்பா அரிசிகளைப் போல் நாற்றம் அடிக்காமலும் கெட்டுப் போகாமலும் இருக்கும்.நீண்டகால ரக சம்பா நெல்லில், மாடுகள் விரும்பிச் சாப்பிடும் வைக்கோல் அதிகமாகக் கிடைக்கும். குறுகிய காலத்தில், அதிகமான ரசாயன உரங்களையும் பூச்சிக்கொல்லி மருந்துகளையும் பயன்படுத்தி உற்பத்தி செய்யப்படும் சம்பா அரிசியைச் சாப்பிடுவதால்தான் மக்களுக்கு ஏராளமான நோய்கள் வருகின்றன என்றார்.

            மேட்டூர் அணை திறக்கப்பட்டால் கொள்ளிடம் கீழணைக்கு (கடலூர் மாவட்ட டெல்டா பாசனப் பகுதிகளுக்கு) தண்ணீர் வந்து சேர 20 நாள்கள் ஆகும்.அதன்பிறகு சம்பா சாகுபடிப் பணிகளைத் தொடங்கினால், அக்டோபர் 20-ம் தேதிதான் நடவுப் பணிகள் முடிவடையும். பயிர்கள் பிப்ரவரி 20-ம் தேதிக்கு மேல்தான் அறுவடைக்குத் தயாராகும். ஆனால் மேட்டூர் அணையோ ஜனவரி 28-ம் தேதி மூடப்பட்டு விடும் என்கிறார்கள் விவசாயிகள். காவிரி நதிநீர்ப் பிரச்னை தமிழக சம்பா நெல் விவசாயத்தையும், அதன்முலம் கிடைக்கும் அரிசியைச் சாப்பிடும் தமிழக மக்களின் உடல் நலத்தையும் தலைகீழாக மாற்றிவிட்டது என்கிறார்கள் டெல்டா விவசாயிகள்.

Read more »

மேட்டூரிலிருந்து தாமதமாக தண்ணீர் திறக்கப்படுவதால் காவிரி டெல்டா விவசாயிகள் பாதிப்பு

சிதம்பரம்:

         மேட்டூரிலிருந்து தாமதமாக தண்ணீர் திறக்கப்படுவதால், தமிழ்நாட்டின் நெற்களஞ்சியமாக விளங்கும் காவிரி டெல்டா பாசன விவசாயம் பெரும் பாதிப்புக்குள்ளாகும் என வீராணம் பாசன விவசாயிகள் சங்கத் தலைவர் கே.வி.இளங்கீரன் தெரிவித்துள்ளார்.

இது குறித்து வீராணம் பாசன விவசாயிகள் சங்கத் தலைவர் கே.வி.இளங்கீரன் தெரிவித்தது:

            "டெல்டா பாசனப் பகுதியில் குறுவைச் சாகுபடி பருவமாக விளங்கி வருகிறது. கடந்த காலங்களில் மேட்டூர் அணைகளில் தண்ணீர் தாமதமாக திறக்கப்படுகிறது.1999-ம் ஆண்டு ஆகஸ்டு 15-ம் தேதியும், 2000-ம் ஆண்டு ஆகஸ்ட் 1-ம் தேதியும், 2001-ம் ஆண்டு ஜூலை 15-ம் தேதியும், 2002-ம் ஆண்டு மிகவும் காலதாமதமாக அக். 22-ம் தேதியும், 2003-ம் ஆண்டு ஆக்ஸ்ட் 29-ம் தேதியும், 2004-ம் ஆண்டு ஆகஸ்ட் 15-ம் தேதியும், 2005-ம் ஆண்டு ஆகஸ்ட் 4-ம் தேதியும், 2006-ம் ஆண்டு ஜூன் 12-ம் தேதியும் தண்ணீர் திறக்கப்பட்டுள்ளது.

             ஆனால் தமிழக அரசு கர்நாடக அரசிடமிருந்து பெற வேண்டிய ஜூன் மாதம் அளவு நீரான 10 டிஎம்சியும், ஜூலை மாதத்துக்கான 34 டிஎம்சி நீரையும் பெற்று தருவதற்கு எந்த முயற்சியும் மேற்கொள்ளவில்லை என்பது காவிரி டெல்டா பாசன விவசாயிகளின் கவலையாக உள்ளது. மேட்டூர் அணை 1934-ம் ஆண்டு கட்டி முடிக்கப்பட்டு பின்னர், 76 ஆண்டுகள் ஆன நிலையில் இதுவரை 38 முறை மட்டுமே ஜூன் மாதங்களில் தண்ணீர் திறந்துவிடப்பட்டுள்ளது. பருவமழை தொடங்கி விட்ட நிலையில் காலம்தாழ்ந்து தண்ணீர் திறந்து விடப்பட்டு, மழைநீருடன் சேர்ந்து வெள்ளச் சேதத்தையும் விவசாயிகள் சந்திக்க நேரிடும் சூழல் உருவாகியுள்ளது' என கே.வி.இளங்கீரன் தெரிவித்துள்ளார்.

Read more »

மேட்டூர் அணை 28-ல் திறப்பு

              மேட்டூர் அணை ஜூலை 28-ம் தேதி திறக்கப்படும் என்று தமிழக அரசு அறிவித்துள்ளது.

இதுகுறித்து, அரசு வெள்ளிக்கிழமை வெளியிட்ட செய்தி:

           தமிழகத்தில் ஆடிப் பெருக்கு விழா ஆகஸ்ட் 3-ம் தேதி கொண்டாடப்படுகிறது. இந்த விழாவை ஒட்டி, மேட்டூரில் இருந்து காவிரியில் ஜூலை 28-ம் தேதி தண்ணீர் திறந்து விடப்படும். அதனைத் தொடர்ந்து, விவசாயிகளுக்கு சாகுபடி பணிகளை மேற்கொள்வதற்காக தண்ணீர் விடப்படும் என்று முதல்வர் கருணாநிதி அறிவித்துள்ளார். 

நீர்மட்டம்: 

                மேட்டூர் அணையின் நீர்மட்டம் 82.02 அடியாக உள்ளது. 43.99 டி.எம்.சி. தண்ணீர் இருப்பு உள்ளது. அணைக்கு நீரவரத்து வினாடிக்கு 1,003 கன அடியாக உள்ளது. அதேசமயம் 1,004 கன அடி நீர் வெளியேற்றப்படுகிறது.

Read more »

உளுந்துப் பயிருக்கு வீராணம் நீர் திறப்பு

கடலூர்:

               கடலூர் மாவட்டத்தில் காவிரி டெல்டா பகுதிகளில் உளுந்துப் பயிருக்கு வீராணம் ஏரியில் இருந்து வாய்க்கால்களில் தண்ணீர் திறந்து விடப்படப்பட இருக்கிறது. கடலூர் மாவட்டத்தில் காவிரி டெல்டா பாசனப் பகுதிகள் 1.5 லட்சம் ஏக்கரில் சம்பா சாகுபடி செய்யப்படுகிறது. சம்பா நெல் அறுவடைக்கு 10 தினங்களுக்கு முன், வயல்களில் ஊடுபயிராக உளுந்து விதைத்து விடுவார்கள். வயலில் உள்ள ஈரப்பதத்திலும், பனியிலும் 90 நாள்களில் விளைந்து அறுவடைக்குத் தயாராகி விடும் உளுந்து. இந்த ஆண்டு சம்பா பயிருக்கு காவிரி நீர் தாமதமாகக் கிடைத்ததாலும், உளுந்து விதை, தேவையான அளவுக்கு கிடைக்காததாலும், 70 ஆயிரம் ஏக்கரில் மட்டுமே உளுந்து விதைக்கப்பட்டு உள்ளது. அண்மையில்தான் டி-9 உளுந்து விதையை, வேளாண் துறை தருவித்து வேளாண் விரிவாக்க மையங்களில் விற்பனைக்கு வைத்து உள்ளது. வழக்கம்போல் மேட்டூர் அணை ஜனவரி 28-ம் தேதியுடன் பாசனத்துக்கு மூடப்பட்டு விட்டது. வீராணம் ஏரியின் அனைத்து பாசன வாய்க்கால்களும் மூடப்பட்டு விட்டன. எனவே தற்போது பயிரிடப்பட்டு 30 முதல் 40  நாள்கள் ஆகி இருக்கும் உளுந்து பயிருக்கும், புதிதாக உளுந்து விதைக்க விரும்பும் விவசாயிகளுக்கும், வீராணம் ஏரி நீர் விட்டு விட்டு 3 நாள்கள்கள் வழங்கினால், உளுந்து உற்பத்தியை பெருக்க முடியும் என்று விவசாயிகள் அரசுக்குத் தெரிவித்து இருந்தனர். விவசாயிகளின் கோரிக்கையை தமிழக அரசு ஏற்றுக் கொண்டு இருப்பதாக விவசாய சங்கங்களின் கூட்டமைப்பின் கடலூர் மாவட்ட அமைப்புச் செயலாளர் பி.ரவீந்திரன் ஞாயிற்றுக்கிழமை தெரிவித்தார். 

விவசாய சங்கங்களின் கூட்டமைப்பின் கடலூர் மாவட்ட அமைப்புச் செயலாளர் பி.ரவீந்திரன்  கூறியது: 

                உளுந்துப் பயிருக்கு  வீராணம் ஏரி நீர் வழங்துவது குறித்து, பொதுப் பணித்துறை அதிகாரிகள் விவாதித்தனர். அந்தந்த பகுதி விவசாயிகளின் கோரிக்கைக்கு இணங்க, வாய்க்கால்களில் 20 கன அடி நீர் திறக்க சம்மதித்து இருக்கிறார்கள். இதன் மூலம் முக்கிய வாய்க்கால்களில் தண்ணிரைத் தேக்கி வைத்து, அதில் இருந்து தேவைப்படும் நீரை விவசாயிகள் எடுத்து, டி.ஏ.பி. நுண்ணூட்டச் சத்துக் கரைசலை, கைத் தெளிப்பான்கள் மூலம் தெளிக்க வசதியாக இருக்கும். இதனால் உளுந்து மகசூல் அதிகரிக்க வாய்ப்பு ஏறப்பட்டு உள்ளது. டி.ஏ.பி. உரம் 50 சதவீதம் மானிய விலையில் மத்திய உணவுப் பாதுகாப்புத் திட்டத்தில் வழங்கப்படுகிறது. புதிதாக உளுந்து பயிரிடுவோரும், இந்த நீரைச் சிக்கனமாகப் பயன்படுத்தினால் 40 ஆயிரம் ஏக்கரில் உளுந்து பயிரிட்டு, நல்ல மகசூலைப் பெறமுடியும். விவசாயிகள் தங்கள் பகுதி பொதுப் பணித் துறை அலுவலர்களை அணுகி தண்ணீரைக் கேட்டுப் பெற்று, இந்த வாய்ப்பைப் பயன்படுத்திக் கொள்ள வேண்டும் என்றார் ரவீந்திரன்.

Read more »

நவரை சாகுபடிக்கு தண்ணீர் கிடைக்குமா? சிதம்பரம் கடலோர கிராம விவசாயிகள் எதிர்பார்ப்பு!

கிள்ளை : 

                நவரை சாகுபடிக்கு போதிய தண்ணீரை வழங்க மாவட்ட நிர்வாகம் நடவடிக்கை எடுக்க வேண்டும் என சிதம்பரம் கிழக்கு பகுதி விவசாயிகள் எதிர்பார்க்கின்றனர்.

                 சிதம்பரம், காட்டுமன்னார்கோவில் தாலுகாவில் காவிரி கடைமடையை ஒட்டி ஒரு லட்சத்து 50 ஆயிரம் ஏக்கர் நிலத்தில் வவசாயம் செய்யப்படுகிறது. கர்நாடகாவில் இருந்து மேட்டூர் அணைக்கு வரும் தண்ணீர் காவிரி டெல்டா மாவட் டங்களான திருச்சி, தஞ்சை, நாகை மாவட் டங்களுக்கு பகிர்ந்தளிக்கப்படுகிறது.மேட்டூரில் திறந்து விடப்படும் தண்ணீர் கல் லணை, அணைக்கரை, கீழணை வழியாக தெற்கு ராஜன், வடக்குராஜன் வாய்க்கால்கள், குமுக்கியாறு, மண்ணியாறு மற் றும் வடவாறு மூலம் வரும் தண்ணீரை சிதம்பரம், காட்டுமன்னார்கோவில் தாலுகா விவசாயிகள் பயன்படுத்துகின்றனர்.மேட்டூரில் திறக்கப்படும் 10 ஆயிரத்து 160 கன அடி தண்ணீரில்1016 கன அடி தண்ணீரை காவிரி டெல்டாவின் கடைமடைபகுதியான கடலூர் மாவட்டத்திற்கு வழங்க வேண்டும். ஆனால் 441 கன அடி தண்ணீர் மட்டும் வழங்கப்படுகிறது. இதில் 75 கனஅடி தண்ணீர் சென்னை கூட்டு குடிநீர்திட்டத்திற்காக வீராணம் ஏரியிலிருந்து சென்னைக்கு கொண்டு செல்லப்படுகிறது. மீதமுள்ள 341 கன அடி தண்ணீர் மட்டுமே விவசாயத்திற்கு பயன்படுத்தப்படுகிறது. இதில் 37 கன அடி தண்ணீர் வடவாற்றிலும், 25 கன அடி குமுக்கியாறு மற்றும் மண்ணியாற்றிலும், 43 கன அடி வடக்கு ராஜன் வாய்க் காலிலும்,41 கன அடி தெற்கு ராஜன் வாய்க்காலிலும் திறந்து விடப்படுகிறது.

                      இப்பகுதிக்கு வரும் தண்ணீர் நாளுக்கு நாள் குறைந்து வருவதால் விவசாயிகள் கவலையடைந் துள்ளனர். சிதம்பரம் அருகே கான்சாகிப் வாய்க்கால் மூலம் 40க்கும் மேற்பட்ட கிராமங்களை சேர்ந்த விவசாயிகள் 8 ஆயிரத்து 344 ஏக்கரில் விவசாயம் செய் கின்றனர். இப்பகுதியில் நிலத்தடி நீர் உவர்ப்பாக இருப்பதால் போர்வெல் அமைத்தோ, கிணற்று பாசனத்தின் மூலமும் விவசாயம் செய்ய முடியாத நிலையால், காவிரி தண்ணீரை மட்டுமே நம்பியுள்ளனர். இப்பகுதியில் விவசாயிகள், மேட்டுப்பகுதியில் "தை' மாதத்தில் அறுவடைக்கும், பள்ளத்தில் இருப்பவர்கள் "சித்திரை' (நவரை) பட்டத்திற்கும் (தண்ணீர் தட்டுப்பாடு ஏற் பட்ட காலம் முதல்) தங்களுக்குள் ஒப்பந்தம் செய்து விவசாயம் செய்து வருகின்றனர்.

                     இந்நிலையில் சிதம்பரம் அடுத்த கிள்ளை, நஞ்சைமகத்துவாழ்க்கை, பொன்னந்திட்டு, சிங்காரக்குப்பம், மானம்பாடி, தைக்கால், குச்சிப்பாளையம், வடக்குச்சாவடி உள் ளிட்ட கடற்கரை பகுதி விவசாயிகள் நவரை சாகுபடியை நம்பியுள்ளனர். தற்போது விதைகால் (நிலத்தில் விதை தூவுதல்) விட்டுள்ள நிலையில் தண்ணீர் வரத்து குறைந்து வருவதால், தொடர்ந்து தண்ணீர் வருமா என்ற அச்சத்தில் இப்பகுதி விவசாயிகள் உள்ளனர். இப்பகுதி விவசாயிகள் மழைகாலத்தில் தண்ணீர் தேங்கியும், கோடையில் போதுமான தண்ணீர் கிடைக்காமலும் பாதிக்கப் பட்டு வருகின்றனர். எனவே, மாவட்டத் திற்கு ஒதுக்கப்பட்ட பத்து சதவீத தண்ணீர் முழுமையாக கிடைக்கவும், தற் போது நவரை சாகுபடிக்கு தேவையான தண்ணீர் தட்டுப்பாடின்றி கிடைக்க நடவடிக்கை எடுப்பதுடன், முத்தையா நகரில் இருந்து காரைக்காட்டுச்சாவடி வரை கான்சாகிப் வாய்க்காலில் உள்ள ஆகாயத்தாமரைகளை அகற்ற மாவட்ட நிர்வாகம் நடவடிக்கை எடுக்க வேண்டும்.

Share
|

Read more »