ஓய்வு பெற்ற என்எல்சி ஊழியர்களுக்கு மருத்துவ உதவித் தொகை உயர்வு

நெய்வேலி நவ .17:

என்எல்சி நிறுவனத்தில் பணியாற்றி ஓய்வுபெற்ற ஊழியர்களுக்கு நிறுவனம் அளித்துவரும் மருத்துவ உதவித் தொகை அதிகபட்சம் ரூ. 6 ஆயிரமாக உயர்த்தப்பட்டுள்ளது.
என்எல்சி நிறுவனத்தில் பணியாற்றி ஓய்வுபெற்ற ஊழியர்களின் நலன்கருதி நிர்வாகம் ஊழியருக்கும், அவரது மனைவிக்கும் 1995-ம் ஆண்டு முதல் ஆண்டு தோறும் உதவித் தொகை வழங்கி வருகிறது.
இந்தத் தொகையை உயர்த்தி வழங்கவேண்டும் என்று ஓய்வுபெற்ற ஊழியர்கள் கடந்த சில ஆண்டுகளாக நிர்வாகத்திற்கு வேண்டுகோள் விடுத்திருந்தனர்.
இந்நிலையில் ஓய்வுபெற்ற ஊழியர்களின் நலனை பரிசீலித்த நிறுவனத் தலைவர் ஏ.ஆர்.அன்சாரி, அவர்களின் மருத்துவ உதவித்தொகையை அதிகபட்டம் ரூ.6 ஆயிரமாக உயர்த்தி வழங்க உத்தரவிட்டுள்ளார்.
இதையடுத்து ரூ.3500 பெற்றுவந்த ஊழியர்களுக்கு ரூ.6000-ம், ரூ.2300 பெற்றுவந்தவர்களுக்கு ரூ.4000-ம், ரூ.1700 பெற்றுவந்தவர்களுக்கு ரூ.3000-ம், ரூ.1200 பெற்றுவந்தவர்களுக்கு ரூ.2000-ம் வழங்க நிர்வாகம் முடிவுசெய்து அதற்கான உத்தரவையும் பிறப்பித்துள்ளது.
இந்த உயர்த்தப்பட்டத் தொகைககள் 2009-10-ம் நிதியாண்டைக் கணக்கிட்டு வழங்கப்படும் எனவும் அறிவிக்கப்பட்டுள்ளது.
இதைத்தொடர்ந்து ஓய்வுபெற்றத் தொழிலாளர்கள் நிறுவனத்தலைவருக்கு தங்களது நன்றியையும் தெரிவித்துள்ளனர்.

Read more »

பாழாகி வரும் கடலூர் சாலைகள்

கடலூர்,நவ.17:

பாதாளச் சாக்கடைத் திட்டத்துக்காக கடலூரில் சாலைகள் தோண்டப்படுவதால் சாலைகள் பாழாகி வருகின்றன. இதனால் மக்கள் பெரிதும் அவதிக்கு ஆளாகிறார்கள்.
ரூ. 44 கோடி செலவில் கடலூரில் பாதாளச் சாக்கடைத் திட்டம் நிறைவேற்றப்பட்டு வருகிறது. இதனால் தேசிய நெடுஞ்சாலை தவிர ஏனைய சாலைகள் அனைத்தும் தோண்டப்பட்டு குண்டும் குழியுமாகக் கிடக்கின்றன. பாதாளச் சாக்கடைத் திட்டத்துக்காக தோண்டப்படும் பள்ளங்களை, வேறு மணல் கொண்டு முறையாக நிரப்பி சாலை அமைக்க ஏதுவாக மாற்றி ஒப்படைக்க வேண்டும் என்பதுதான் பாதாளச்சாக்கடைத் திட்ட ஒப்பந்தத்தில் குறிப்பிடப்பட்டு உள்ளது.
ஆனால் குழிகளை நிரப்புவதில்தான் தொடர்ந்து சிக்கல் நீடித்து வருகிறது. தோண்டி எடுக்கப்பட்ட சேறும் சகதியுமான களிமண்ணைக் கொண்டே குழிகளை நிரப்புவதுதான் பிரச்னையாக உள்ளது. மாவட்ட ஆட்சியர், நகராட்சித் தலைவர், நெடுஞ்சாலைத்துறை அதிகாரிகள் மற்றும் பொதுமக்கள் தொடர்ந்து புகார் தெரிவித்தும், இப் பணியைக் ஒப்பந்தம் எடுத்து இருக்கும் நிறுவனம் கண்டு கொள்வதே இல்லை. எந்த உத்தரவையும் காதில் போட்டுக் கொள்வதும் இல்லை, மதிப்பதும் இல்லை எனப் பொதுமக்கள் குற்றம் சாட்டுகிறார்கள்.
பாதாளச் சாக்கடைப் பள்ளங்களை, தொடர்ந்து சேற்றால் நிரப்பி வருவதுதான் மக்களை மேலும் கவலையில் ஆழ்த்தி வருகிறது. இவ்வாறு செய்வதால் இரு சக்கர வாகனங்கள் கஷ்டப்பட்டு சென்று கொண்டு இருந்த சாலைகள்கூட மறுநாள் எந்த வாகனமும் செல்ல முடியாத அளவுக்கு மாறிவிடுகின்றன. மக்கள் நடந்து செல்வதுகூட ஆபத்தான நிலையாகி விடுகிறது.
பள்ளங்களில் ஆற்று மணல் அல்லது கருங்கல் ஜல்லி கிரஷர்களில் வீணாகக் கிடக்கும் கருப்பு மணல் கொண்டு நிரப்ப வேண்டும் என்று உதரவிட்டும், பின்பற்றப் படவில்லை என்று பொதுமக்கள் புகார் தெரிவிக்கிறார்கள். இதன் விளைவாக சாலைகளில் மக்கள் விழுந்து காயம் அடையாத நாளே இல்லை. பள்ளங்களில் வாகனங்கள் சிக்கிக் கொள்ளாத நாளே இல்லை.
இதுகுறித்து என்ன நடவடிக்கை எடுப்பது என்றே தெரியாமல் மாவட்ட நிர்வாகமும் சம்பந்தப்பட்ட துறை அதிகாரிகளும் கைகளைப் பிசைந்து கொண்டு இருக்கிறார்கள்.
பாதாளச் சாக்கடைக்கு தோண்டப்பட்ட சாலைகளில் மண்டிக் கிடக்கும் சேற்றை முற்றிலுமாக அகற்றிவிட்டு, பள்ளங்களில் கருங்கல் ஜல்லித் துகள்களைக் கொண்டு நிரப்பினாலன்றி, இப்பிரச்சினைக்குத் தீர்வு கிடையாது என்று நெடுஞ்சாலைத் துறைக்கும் நகராட்சி நிர்வாகத்துக்கும் தெரிந்து இருந்தும், அது உத்தரவாக ஒப்பந்ததாரரிடம் ஏனோ தெரிவிக்கப்படவில்லை. மழை நின்றால் எல்லாம் சரியாகிவிடும், அதற்கு முன் ஏன் இவ்வளவு செலவு செய்ய வேண்டும் என்பதுதான் சம்பந்தப்பட்ட துறை அலவலர்கள் மற்றும் ஒப்பந்ததாரரின் கணிப்பு. அதற்குள் மக்கள் படும் அவதிக்கு தீர்வு காண்பது யார்.

Read more »

திட்டக்குடி நூலகத்தில் கட்டணத்தில் கணினிச் சேவை

கடலூர், நவ.17:

திட்டக்குடி அரசு நூலகத்தில் வாசகர்களுக்கு குறைந்த கட்டணத்தில் (மணிக்கு ரூ.10) பிராட்பேண்ட் வசதியுடன் கணினிச் சேவை தொடங்கப்பட இருப்பதாக மாவட்ட நூலக அலுவலர் அசோகன் தெரிவித்தார்.
திட்டக்குடி அரசு நூலகத்தில் நமது உலகம் நூலக எழுச்சி ஆண்டு விழா புதன்கிழமை கொண்டாடப்பட்டது. விழாவில் மாவட்ட நூலக அலுவலர் அசோகன் கலந்து கொண்டு பேசியது:
நமது உலகம் நூலக ஆண்டு விழாவை முன்னிட்டு, கடலூர் மாவட்டத்தில் புரவலர் சேர்க்கை நடந்து வருகிறது. திட்டக்குடியில் ரூ.12 லட்சத்திலும், டி.நெடுஞ்சேரியில் ரூ.6 லட்சத்திலும், நூலகக் கட்டடங்கள் கட்டி முடிக்கப்பட்டு உள்ளன. மேல்பட்டாம்பாக்கத்தில் ரூ.9 லட்சத்தில் நூலகக் கட்டடம் கட்டும் பணி நடந்து கொண்டு இருக்கிறது.
திட்டக்குடி நூலகத்தில் பெண்கள், முதியவர்கள், சிறுவர்களுக்கு எனத் தனித் தனி பிரிவுகள் அமைக்கப்பட இருக்கிறது. மேலும் வாசகர்களுக்கு மணிக்கு ரூ.10 கட்டணத்தில் பிராட்பேண்ட் வசதியுடன் கணினிச் சேவை விரைவில் தொடங்கப்படும் என்றார் அசோகன்.
விழாவுக்கு கிளை நூலகர் ராஜசேகரன் தலைமை வகித்தார். தொ.மு.ச. தலைவர் காமராஜ், இளைஞரணிச் செயலாளர் துரை முன்னிலை வகித்தனர். நகர தி.மு.க. செயலர் பரமகுரு புரவலராகச் சேர்ந்தார். நூலகர் சங்கர் வரவேற்றார். உதவி நூலகர் தங்கவேல் நன்றி கூறினார்.

Read more »