ஆலப்பாக்கம் மேம்பாலத் திட்டம் கைவிடப்பட்டது ஏன்?

சிதம்பரம், நவ. 17:

சிதம்பரத்திலிருந்து கடலூருக்கு இடையே விழுப்புரம்-புதுவை-நாகப்பட்டினம் செல்லும் தேசிய நெடுஞ்சாலையில் ஆலப்பாக்கத்தில் ரயில்வே கேட் உள்ளது.
அகல ரயில்பாதை அமைக்கும் திட்டத்தில் இங்கு ரூ.17.50 கோடி செலவில் மேம்பாலம் அமைக்க இடம் பெற்றுள்ளது.
ஆனால் தற்போது அகல ரயில் பாதை அமைக்கும் பணி முடிவுற்று ஆலப்பாக்கம் ரயில்வே கேட்டில் மேம்பாலம் அமைக்காமலேயே சாலையை உயர்த்தி அமைக்கும் பணி நடைபெற்று வருகிறது.
அகல ரயில் பாதை அமைக்கப்பட்டு வரும் இவ்வேளையில் ரயில்கள் ஓடாத நேரத்தில் இங்கு ரயில்வே மேம்பாலத்தை எளிதாக அமைத்திருக்கலாம். தற்போது ரயில்வே நிர்வாகத்தால் மேம்பாலம் அமைக்கும் திட்டம் கைவிடப்பட்டது எதனால்? எனத் தெரியவில்லை.
அகல ரயில்பாதையில் ரயில்கள் இயக்கப்பட்டால் அடிக்கடி ஆலப்பாக்கம் ரயில்வே கேட் மூடப்படும் நிலை உருவாகும். இதனால் கடலூர் மார்க்கத்திலிருந்து ஆலப்பாக்கம் கேட் வழியாக தேசிய நெடுஞ்சாலையில் சிதம்பரம், சீர்காழி, மயிலாடுதுறை, காரைக்கால், நாகை, நாகப்பட்டினம், வேதாரண்யம் ஆகிய ஊர்களுக்கு செல்லும் போக்குவரத்து கடுமையாக பாதிக்கும்.
தற்போது கும்பகோணம் அருகே உள்ள அணைக்கரை பாலம் சேதமடைந்ததால் கனரக வாகனங்கள் போக்குவரத்து நிறுத்தப்பட்டு அவ் வாகனங்கள் ஆலப்பாக்கம் கேட் வழியாக சிதம்பரம் நகருக்குள் புகுந்து செல்கிறது.
இது குறித்து சிதம்பரத்தைச் சேர்ந்த சமூகசேவகர் ஜி.கலியமூர்த்தி விழுப்புரம் கோட்ட நெடுஞ்சாலைத்துறை கோட்டப் பொறியாளருக்கு தகவல் அறியும் உரிமை சட்டத்தின் கீழ் தகவல் கேட்டு டிசம்பர் 2008-ம் ஆண்டு கடிதம் அனுப்பினார்.
அதற்கு கோட்டப் பொறியாளர் டி.ராஜேந்திரன் பதில் தெரிவித்து அனுப்பியுள்ள கடிதத்தில் விழுப்புரம்-புதுச்சேரி- நாகப்பட்டினம் தேசிய நெடுஞ்சாலையில் உள்ள ஆலப்பாக்கம் ரயில்வே கேட்டில் ரூ.17.50 கோடி செலவில் மேம்பாலம் அமைக்க திட்டம் தயாரிக்கப்பட்டு அரசின் பரிசீலனையில் உள்ளது என பதில் தெரிவித்துள்ளார்.
விழுப்புரம்-மயிலாடுதுறை வரை புதிதாக அமைக்கப்பட்டுள்ள அகல ரயில்பாதையில் ஜனவரி 15-ம் தேதி முதல் ரயில்கள் இயக்கப்படும் என திருச்சி கோட்ட ரயில்வே மேலாளர் தெரிவித்துள்ளார். இந்நிலையில் பயணிகள் ரயில்கள் இப்பாதையில் இயக்கப்பட்டால் சிதம்பரத்துக்கும், கடலூருக்கும் இடையே உள்ள ஆலப்பாக்கம் ரயில்வே கேட்டில் 20 நிமிடங்களுக்கு ஒருமுறை கேட் மூடப்பட்டு தேசிய நெடுஞ்சாலை போக்குவரத்து வெகுவாக பாதிக்கும் என பஸ் ஓட்டுநர்கள் தெரிவித்தனர்.

Read more »

சுகாதாரப் பணிகள் இல்லாததால் வைரஸ் காய்ச்சல் பரவும் அபாயம்

பண்ருட்டி,நவ.17:

கன மழையின் காரணமாக தொற்று நோய் மற்றும் வைரஸ் காய்ச்சல் பரவி வரும் நிலையில், பண்ருட்டி நகரம், அண்ணா கிராம ஒன்றியப் பகுகளில் சுகாதாரப் பணிகள் மேற்கொள்ளப்படவில்லை என பொது நல ஆர்வலர்கள் தெரிவித்துள்ளனர்.
தமிழகத்தில் வடகிழக்கு பருவ மழை தீவிரம் அடைந்துள்ள நிலையில் கடந்த ஒரு வாரமாக மாவட்டத்தின் பல பகுதியில் பலத்த மழை பெய்தது. இந்நிலையில் பண்ருட்டி வட்டத்தில் கடந்த வாரத்தில் பெய்த கனமழையால் பல்வேறு இடத்தில் மழை நீர் கழிவு நீருடன் கலந்து தாழ்வானப் பகுதியில் தேங்கி நின்றது. தேங்கிய நீரில் இருந்து நோய் பரவும் கிருமிகள் உற்பத்தியானதால் பொதுமக்கள் தொற்று நோய் மற்றும் வைரஸ் காய்ச்சலால் பாதிக்கப்பட்டனர்.
இதனால் அரசு மருத்துவமனையில் வழக்கத்தை விட கூடுதலான நோயாளிகள் சிகிச்சைக்காக வருகின்றனர்.
இந்நிலையில் கடந்த இரு தினங்களாக விடுபட்டிருந்த மழை வெள்ளிக்கிழமை இரவு முதல் மீண்டும் தொடர்ந்து பெய்து வருகிறது. இதனால் பண்ருட்டி நகரின் முக்கிய முக்கிய சாலைகள், பஸ் நிலையம், வீதிகள் தண்ணீர் தேங்கி நிற்கின்றது. பல வீடுகளில் மழை நீர் புகுந்துள்ளது.
மேலும் இப்பகுதியில் உள்ள மேல்நிலை நீர்த்தேக்கத் தொட்டிகளைச் சுத்தம் செய்து, தண்ணீரில் முறையாக குளோரின் பவுடர் கலப்பதில்லை என்றும் தொட்டிகளை சுத்தம் செய்து பல ஆண்டுகள் ஆகிறது என்றும் அப்பகுதியில் வசிப்பவர்கள் தெரிவித்தனர்.
பண்ருட்டி மற்றும் சுற்று வட்டப் பகுதியில் முறையான கழிவு நீர் கால்வாய் இல்லாததாலும், தேங்கியுள்ள மழை மற்றும் கழிவு நீரில் நோய் பரவும் கிருமி உற்பத்தியாவதாலும், பாதுகாக்கப்பட்ட குடிநீர் இல்லாததாலும் பொதுமக்கள் தொற்று நோய் மற்றும் வைரஸ் காய்ச்சலால் பாதிக்கப்பட்டுள்ளனர்.
இந்நிலையில் மழையால் பாதிக்கப்பட்ட நகர மற்றும் ஒன்றியப் பகுதி மக்களுக்கு தேவையான சுகாதாரப் பணிகள் முழுமையாக, முறையாக அளிக்கப்படவில்லை என தெரியவருகிறது. எனவே பாதிக்கப்பட்ட மக்களுக்கு சுகாதார பணிகளை செய்ய நகர சுகாதாரத் துறை, வட்டார மருத்துவ அலுவலர் மற்றும் சுகாதார குழுக்களை முடுக்கிவிட்டு சுகாதாரப் பணிகளை மேற்கொள்ள மாவட்ட நிர்வாகம் நடவடிக்கை எடுக்க வேண்டும் என பொது மக்கள் கோரிக்கை விடுத்துள்ளனர்.

Read more »

தேர்தல் ஆணையர் சந்திரசேகரன் விசாரணை

சிதம்பரம்,நவ.17:

கடலூர் மாவட்டத்தில் 3 கூட்டங்களுக்கு மேல் பங்கேற்காத ஊராட்சி மன்றத் துணைத்தலைவர்கள், வார்டு உறுப்பினர்கள் மற்றும் தவறு செய்தவர்களிடம் தமிழக தேர்தல் ஆணையர் சந்திரசேகரன் செவ்வாய்க்கிழமை விசாரணை மேற்கொண்டார்.
3 கூட்டங்களுக்கு மேலாக பங்கேற்காத துணைத்தலைவர்கள், வார்டு உறுப்பினர்கள் மற்றும் தவறு செய்தவர்கள் மீது நடவடிக்கை எடுக்க வேண்டும் கடலூர் மாவட்ட ஆட்சியர் தமிழக அரசுக்கு அறிக்கை அனுப்பினார். அந்த அறிக்கையின்படி தேர்தல் அதிகாரி சந்திரசேகரை நீதிபதியாக நியமித்து விசாரணை நடத்த அரசு உத்திரவிட்டுள்ளது.
அதன்பேரில் சந்திரசேகரன் செவ்வாய்க்கிழமை சிதம்பரம் வந்தார்.
சிதம்பரம் நகராட்சி அலுவலகத்தில் பிச்சாவரம், காட்டுபரூர், சித்தேரிகுப்பம் ஆகிய ஊராட்சி தலைவர்கள், துணைத்தலைவர்கள் மற்றும் வார்டு உறுப்பினர்களிடம் விசாரணை மேற்கொண்டார்.
புதன்கிழமை மங்களூர் ஒன்றியத்தைச் சேர்ந்த மங்களூர், ஆலம்பாடி, திருமுலை, வையங்குடி, நெடுங்குளம், கோடங்கு ஆகிய 6 ஊராட்சிகளில் விசாரணை மேற்கொள்கிறார்.
விசாரணை முடிவுற்று 15 தினங்களுக்குள் அரசுக்கு விசாரணை அறிக்கையை தாக்கல் செய்ய உள்ளதாக சந்திரசேகரன் தெரிவித்தார்.

Read more »