தனியார் தோண்டிய பள்ளத்தால் "ஹைமாஸ்' கேபிள் துண்டிப்பு

கடலூர் : 

               தனியார் தோண்டிய பள்ளத்தால் ஹைமாஸ் விளக்குகளின் கேபிள் துண்டிக்கப்பட்டதால் கடலூர் மஞ்சக்குப்பம் மைதானம் கடந்த 40 நாட்களாக இருளில் மூழ்கியுள்ளது.

                   கடலூர் கலெக்டர் அலுவலகம் எதிரில் உள்ள நகராட்சி மைதானத்தில் மாலை நேரங்களில் முதியோர்கள் நடை பயிற்சி மேற்கொண்டு வருவதோடு, இளைப்பாறியும் வருகின்றனர். பொதுமக்கள் பயன் பாட்டில் உள்ள மைதானம் இருள் சூழ்ந்து காணப்பட் டதால் இரவு நேரங்களில் மது அருந்துதல் உள்ளிட்ட சமூக விரோத செயல்கள் அறங் கேறின. இதனை தடுக்கும் பொருட்டு நகராட்சி ஐந்தாண்டிற்கு முன் "ஹைமாஸ்' விளக்கு அமைத்தது. இதனால் சமூக விரோத செயல்கள் குறைந்தன. மேலும் மைதானத்திற்கு மாலை நேரத்தில் இளைப்பாற வருபவர்களின் எண்ணிக்கையும் அதிகரித்தது. இந்நிலையில் கடந்த ஏப்ரல் மாதம் தனியார் நிறுவனம் ஒன்று நகராட்சியின் அனுமதி பெற்று மைதானத்தில் பொருட்காட்சி நடத்தியது.

                      அரங்குகள் மற்றும் சிறுவர்கள் விளையாடுவதற்கான சாதனங் கள் மட்டுமே அமைக்க அனுமதி பெற்ற தனியார் நிறுவனம் படகு சவாரி நடத்துவதற்காக மைதானத்தில் ஒரு பகுதியில் மிகப் பெரிய அளவில் பள்ளம் தோண்டியது. அதில் மைதானத்தில் உள்ள "ஹைமாஸ்' விளக் கிற்காக பூமிக்கடியில் கொண்டு செல்லப்பட்ட மூன்று கேபிள்கள் அறுந்ததால், பள்ளம் தோண்டும் பணி நிறுத்தப்பட்டது. கேபிள்கள் துண்டிக்கப்பட்டதால் அன்று முதல் "ஹைமாஸ்' விளக்கு எரியாமல் கடந்த 40 நாட்களுக்கு மேலாக நகராட்சி மைதானம் இருளில் மூழ்கி கிடக்கிறது. துண்டிக்கப்பட்ட கேபிள்களை இணைக்க முடியாது என்பதால் புதிதாக மாற்ற வேண்டும். இதற்கு குறைந்தபட்சம் 60 ஆயிரம் ரூபாய் செலவாகும் எனக் கூறப்படுகிறது. இதனால் "ஹைமாஸ்' விளக்கு பழுது நீக்க தாமதமாகும் எனக் கூறப்படுகிறது.

இது குறித்து சேர்மன் தங்கராசிடம் கேட்டபோது 

                     "கேபிள் சேத தொகை பொருட்காட்சி நடத்தியவர்களிடமிருந்து வசூலிக்கப்படும்' என்றார்.

Read more »

கடலூர் அருகே மினி லாரி கவிழ்ந்து 50 பேர் படுகாயம்

கடலூர் : 

                  கடலூர் அருகே மினி லாரி கவிழ்ந்து 50க்கும் மேற்பட்டவர்கள் காயமடைந்தனர்.

             கடலூர் அடுத்த சமுட்டிக்குப்பத்தைச் சேர்ந்தவர் வீரப்பன். குறவன்பாளையத்தில் உள்ள இவரது உறவினர் வீடு கிரகப்பிரவேசம் நேற்று நடந்தது. விசேஷத்தில் கலந்து கொள்ள நேற்று முன்தினம் இரவு 9 மணிக்கு வீரப்பன் மற்றும் சமுட்டிக்குப்பத்தைச் சேர்ந்த 70க்கும் மேற்பட் டோர் மினி லாரியில் குறவன்பாளையம் சென்றனர். லாரியை குள்ளஞ்சாவடியைச் சேர்ந்த கிருஷ்ணமூர்த்தி ஓட்டினார். ஒதியடிக்குப்பம் அருகே வரும் போது டிரைவரின் கட்டுப்பாட்டை இழந்த மினி லாரி நிலை தடுமாறி கவிழ்ந்தது. அதில் மினி லாரியில் பயணம் செய்த சமுட்டிக்குப்பத்தைச் சேர்ந்த சவுந்தலா (50), அஞ்சம்மாள் (40), தேவசுந்தரி (50), காந்திமதி (35), அம்சவள்ளி (27), இளஞ்சியம்(55), கல்பனா (25), செல்வராணி (45), பாக்கியம், ஆரியமாலா, காந்திமதி, புஷ்பா உட்பட 50க்கும் மேற்பட்டவர்கள் காயமடைந்தனர். காயமடைந்த அனைவரும் கடலூர் அரசு மருத்துவமனையில் சேர்க்கப்பட்டனர். தகவலறிந்த கலெக்டர் சீத்தாராமன் மருத்துவமனைக்கு நேரில் சென்று பாதிக்கப்பட்டவர்களுக்கு ஆறுதல் கூறினார். டி.ஆர்.ஓ., நடராஜன், தாசில்தார் தட்சணாமூர்த்தி ஆகியோர் உடனிருந்தனர். 

அமைச்சர் சார்பில் ஆறுதல்: 

                     அமைச்சர் சார்பில் அவரது உதவியாளர் பாலமுருகன், ஒன்றிய செயலாளர் சிவக்குமார் உள்ளிட்டோர் சந்தித்து ஆறுதல் கூறினர். விபத்து குறித்து நடுவீரப்பட்டு போலீசார் விசாரித்து வருகின்றனர்.

Read more »

துணை முதல்வர் வழங்கிய காசோலை : அலைகழித்த அதிகாரி "சஸ்பெண்ட்'

பண்ருட்டி : 

                   மகளிர் சுய உதவிக்குழுக்களுக்கு துணை முதல்வரால் வழங்கப்பட்ட கடனுதவியை கொடுக்காமல், அலைக்கழித்த கூட்டுறவு சங்க செயலர் "சஸ்பெண்ட்' செய்யப்பட்டார்.

                  பண்ருட்டியை அடுத்த கணிசப்பாக்கம் ஊராட்சியிலுள்ள 11 மகளிர் சுய உதவிக்குழுக்களுக்கு, கடந்த மார்ச் 6ம் தேதி காட்டுமன்னார் கோவிலில் நடந்த விழாவில், துணை முதல்வர் ஸ்டாலின் 22 லட்ச ரூபாய்க்கான காசோலையை வழங்கினார். காசோலையை பணமாக மாற்ற சுய உதவிக்குழுவினர், சித்திரைச்சாவடி தொடக்க வேளாண்மை கூட்டுறவு வங்கிக்கு சென்றனர். பலமுறை நடையாய் நடந்தும், பணமாக மாற்ற முடியாமல் அலைக்கழிக்கப்பட்டனர். இதுகுறித்து நேற்று முன்தினம் தினமலரில் விரிவாக செய்தி வெளியிடப்பட்டது. இதனையடுத்து, கலெக்டர் சீத்தாராமன் உத்தரவின் பேரில், உடனடியாக சுய உதவிக்குழுவினருக்கு பணம் பட்டுவாடா செய்யப்பட்டது. பணம் பட்டுவாடா செய்யாமல் காலம் தாழ்த்திய, தொடக்க வேளாண்மை கூட்டுறவு வங்கி செயலர் தனசங்கரை "சஸ்பெண்டு' செய்து, இணை பதிவாளர் வெங்கடேசன் உத்தரவிட்டுள்ளார்.

Read more »