உங்கள் கருத்துக்களை இங்கே

இன்றைய செய்திகள்:

கடலூர் மாவட்ட செய்திகள்




திங்கள், ஜூன் 06, 2011

கடலூர் மாவட்டத்தில் வெள்ளரிக்காய் அமோக விளைச்சல்

கடலூர்:

            அக்னி நட்சத்திரம் என்னும் கத்தரி வெயில் முடிந்த பிறகும், தமிழகத்தில் கடலூர் உள்ளிட்ட பல மாவட்டங்களில் கோடை வெயில் தகித்துக் கொண்டு இருக்கிறது. 

          பல ஊர்களில் இன்னமும் 100 டிகிரியில் இருந்து வெப்பம் குறைந்த பாடில்லை. வெயிலின் தாக்கத்தில் இருந்து விடுபட மக்கள் இளநீர், நுங்கு, பதநீர், பழங்கள் மற்றும் வெள்ளரிக்காய் போன்றவற்றை சாப்பிடுகின்றனர். ஏழை எளிய மக்களும் வாங்கிச் சாப்பிடும் விலையில் கிடைப்பது வெள்ளரிக்காய்தான். இளநீருக்கு இணையானது வெள்ளரிக்காய் என்று இந்திய மருத்துவம் தெரிவிக்கிறது.
 

           வெள்ளரிக்காய் தமிழ்நாட்டில் பெரும்பாலான மாவட்டங்களில் கோடைகாலப் பயிராக விளைகிறது. அதிக தண்ணீர் தேவையின்றி, பராமரிப்புச் செலவுகள் இன்றி, விவசாயிகளுக்கு லாபம் தரும் பயிர் வெள்ளரிக்காய். திண்டிவனம், மதுராந்தகம் உள்ளிட்ட வடமாவட்டப் பகுதிகளில் ஜெர்க்கி என்ற புதியரக வெள்ளரிக்காய் அதிகம் பயிரிடப்படுகிறது. இதில் நீர்ச்சத்து அதிகம். ஆனால் பெருவாரியாக நாட்டு ரகமே பயிரிடப்படுகிறது. நாட்டு ரக வெள்ளரிக்காய்தான் மக்களால் விரும்பி சாப்பிடப்படுகிறது.
 

           கடலூர் மாவட்டத்தில், சம்பா சாகுபடி முடிவுற்றதும், வயல்களில் பெருவாரியாக, தர்பூசணி, வெள்ளரிக்காய் போன்றவற்றை விவசாயிகள் பயிரிட்டு உள்ளனர். புவனகிரி, முட்லூர், புதுச்சத்திரம், ஆண்டிக்குழி, வடலூர், காட்டுமன்னார்கோவில் உள்ளிட்ட பகுதிகளில் இந்த ஆண்டு வெள்ளரி விளைச்சல் அமோகமாக உள்ளது. வெள்ளரித் தோட்டங்களில் 10 கிலோ கொண்ட கூடை ரூ. 100 முதல் ரூ. 150 வரை விற்பனை செய்யப்படுகிறது.
 
             ஏக்கருக்கு 2 ஆயிரம் கிலோ வரை வெள்ளரிக்காய் கிடைப்பதாக விவசாயிகள் தெரிவிக்கிறார்கள். சிறுவியாபாரிகள் வெள்ளரிக்காய் மற்றும் வெள்ளரிப் பழங்களை வாங்கி வந்து நகர்ப் புறங்களில் விற்பனை செய்கிறார்கள். வெள்ளரிப் பழங்கள் கூடை கூடையாக தற்போது விற்பனைக்கு வருகின்றன. வெள்ளரிப் பழங்களைவிட, காய்க்கே அதிக கிராக்கி உள்ளது.  
           இந்த ஆண்டு கோடை காலம் தொடங்கியபோது 3 நாள்கள் மழை பெய்ததன் காரணமாக, வெள்ளரிச் செடிகள் தண்ணீரில் மூழ்கி அழுகி சேதம் அடைந்தன. அதன்பிறகு விவசாயிகள் மீண்டும் வெள்ளரி சாகுபடி செய்து, தற்போது வெள்ளரிக்காய் வெள்ளரிப்பழம் அறுவடை ஆகிக் கொண்டு இருக்கிறது. வெள்ளரிக்காய் சிறந்த நீரிளக்கி. தொடர்ந்து சாப்பிட்டால் உடல் பருமனைக் குறைக்கும். பசியைத் தூண்டும். ஈரல், கல்லீரல் சூட்டைத் தணிக்கும். பித்தத்தைத் தணிக்கும். தலைச் சுற்றலைத் தடுக்கும்.

              மூட்டுவலி வீக்கம், சிறுநீரகக் கோளாறுகளைப் போக்கும். ரத்தத்தில் சிவப்பு அணுக்களை அதிகரிக்கத் தேவையான ரசாயனப் பொருள் வெள்ளரிக்காயில் உள்ளது. புகைப்பிடிப்போருக்கு குடலில் படியும் நிகோடின் விஷத்தை நீக்கும்.




Read more »

பெண்ணாடம் சர்க்கரை ஆலைக்குக் கரும்பு சப்ளை செய்த 10 ஆயிரம் விவசாயிகளுக்கு ரூ.42 கோடி பாக்கி

கடலூர்:

              கடலூர் மாவட்டம் பெண்ணாடம் சர்க்கரை ஆலைக்குக் கரும்பு சப்ளை செய்த 10 ஆயிரம் விவசாயிகளுக்கு, ரூ. 42 கோடி வரை ஆலை நிர்வாகம் பாக்கி வைத்து உள்ளது. இதனால் விவசாயிகள் பெரிதும் பாதிப்புக்கு உள்ளாகி இருக்கிறார்கள்.  

               கடலூர் மாவட்டக் கரும்பு விவசாயிகளுக்கு ஆண்டுதோறும் பயிர்க் கடனாக, கூட்டுறவு வங்கி ரூ. 30 கோடியும், வர்த்தக வங்கிகள் ரூ. 60 கோடியும் வழங்குகின்றன.  வட்டிக்குக் கடன் வாங்கி கரும்பு விளைவித்து, ஆலைக்கு சப்ளை செய்துவிட்டு, ஆலை உரிய நேரத்தில் பணம் வழங்காமல், இன்று நாளை என்று விவசாயிகளை இழுத்தடிக்கும் நிலை, கடலூர் மாவட்டத்தில் காலம் காலமாக நீடித்து வருகிறது.  4 சர்க்கரை ஆலைகள் கடலூர் மாவட்டத்தில் உள்ளன. பெண்ணாடம் சர்க்கரை ஆலை நாளொன்றுக்கு 7,500 டன் கரும்பு அரைவைத் திறன் கொண்டது. 

              இந்த ஆலைக்கு 32 ஆயிரம் ஏக்கர் நிலங்களில் உள்ள கரும்பு பதிவு செய்யப்பட்டு உள்ளது. ஆலையில் கடந்த டிசம்பர் மாதம் தொடங்கப்பட்ட கரும்பு அரைவை, இன்னும் 10 நாள்களில் முடிவடைய இருக்கிறது.  இந்த அரைவைப் பருவத்தில் இதுவரை, 7.40 லட்சம் டன் கரும்பு அரைக்கப்பட்டு உள்ளது. இறுதியாக 31-3-2011 அன்று எந்தெந்த நிலங்களில் முழுமையாகக் கரும்பு வெட்டு முடிவடைந்ததோ, அந்த விவசாயிகளுக்கு ஆலைநிர்வாகம் 11-5-2011 அன்று பணம் வழங்கி உள்ளது. ஆலைக்கு சப்ளை செய்யப்பட்ட சுமார் 2 லட்சம் டன் கரும்புக்கு, இதுவரை பணம் பட்டுவாடா செய்யவில்லையாம். 

             சுமார் 10 ஆயிரம் விவசாயிகளுக்கு ரூ. 42 கோடி வரை, இந்த சர்க்கரை ஆலை பாக்கி வைத்து இருப்பதாக விவசாயிகள் கூறுகிறார்கள்.  கரும்பு சப்ளை செய்யப்பட்ட நாளில் இருந்து 14 தினங்களுக்குள், விவசாயிகளுக்கு ஆலை நிர்வாகம் பணம் வழங்கிவிட வேண்டும்  என்று, சர்க்கரை கட்டுபாடுச் சட்டத்தில்  இருந்தும், பல விவசாயிகளுக்கு 70 நாள்கள் ஆகியும் பணம் வழங்கவில்லையாம்.  14 நாள்களுக்குள் கரும்புப் பணம் வழங்கா விட்டால், விவசாயிகளுக்கு வட்டியுடன் ஆலை நிர்வாகம், பாக்கித் தொகையை வழங்க வேண்டும் என்றும் சர்க்கரைக் கட்டுப்பாடு சட்டம் தெரிவிக்கிறது. 

                 அந்த வகையில் கரும்புப் பணம் பாக்கிக்காக, ஆலை நிர்வாகம் வழங்க வேண்டிய வட்டி மட்டும், ரூ. 86 லட்சம் என்கிறார்கள் விவசாயிகள்.  கூட்டுறவு வங்கிகளில் பயிர்க் கடன் பெற்ற விவசாயிகள், கடனை உரியகாலத்தில் திருப்பிச் செலுத்தினால், கடனுக்கு வட்டி இல்லை. பெண்ணாடம் சர்க்கரை ஆலைக்குக் கரும்பு சப்ளை செய்தவர்களுக்கு, ஆலை நிர்வாகம் உரிய காலத்தில் பணம் வழங்காததால், விவசாயிகள் கடனைத் திருப்பி செலுத்த முடியாத நிலை ஏற்பட்டு உள்ளது. இதனால் அரசு அறிவித்து இருக்கும் வட்டிச் சலுகையையும் விவசாயிகள் பெறமுடிய வில்லை. மேலும் கூட்டுறவு வங்கிகளில் வாங்கிய பயிர்க் கடனுக்கு, அபராத வட்டியாக 8.5 சதம் செலுத்த வேண்டிய பரிதாப நிலைக்கு, விவாசாயிகள் தள்ளப்பட்டு உள்ளனர்.  

இதுகுறித்து வெலிங்டன் ஏரி பாசன விவசாயிகள் சங்கச் செயலாளர் பெண்ணாடம் சோமசுந்தரம் கூறுகையில், 

               "பெண்ணாடம் சர்க்கரை ஆலை, கரும்பு விவசாயிகளுக்கு,  ரூ. 42 கோடி வரை பாக்கி வைத்து உள்ளது.  இதனால் விவசாயிகள் கூட்டுறவு வங்கிகளில் பெற்ற பயிர்க் கடனை, உரிய காலத்தில் திருப்பிச் செலுத்த முடியாமலும், அரசு அறிவித்து இருக்கும் வட்டிச் சலுகையைப் பெறமுடியாமலும் உள்ளனர்.  மே மாதம் வெட்டிய 1.38 லட்சம் டன் கரும்புக்கு, டன்னுக்கு ரூ. 250 வீதம் வழங்க வேண்டிய வெட்டுக் கூலி கூட ஆலை நிர்வாகம் வழங்க வில்லை. கடனை திருப்பிச் செலுத்தாததால், விவசாயிகளுக்கு புதிய பயிர்க் கடன் வாங்க முடியவில்லை.

            கடலூர் மாவட்ட ஏனைய சர்க்கரை ஆலைகள், விவசாயிகளுக்குப் பாக்கியின்றி பணம் வழங்கி விட்டன.  கரும்புப் பணம் பாக்கி குறித்து, மாவட்ட ஆட்சியர், வருவாய் மீட்பு சட்டத்தில் நடவடிக்கை எடுத்து, விவசாயிகளுக்குப் பணம் பெற்றுத் தரவேண்டும்.  ஆனால் மாவட்ட ஆட்சியர், வேளாண் இணை இயக்குநர், சர்க்கரைத்துறை இயக்குநர் உள்ளிட்டோருக்குக் கோரிக்கை மனு அளித்தும், நடவடிக்கை இல்லை என்றார்.  

இதுகுறித்து மாவட்ட வேளாண் இணை இயக்குநர் இளங்கோவன் கூறியது 

                   பெண்ணாடம் சர்க்கரை ஆலை விவசாயிகளுக்கு வழங்க வேண்டிய கரும்புப் பணம் பாக்கி குறித்து, ஆலை நிர்வாகத்துடன் பேசிக்கொண்டு இருக்கிறோம். அடுத்த வாரம் மாவட்ட ஆட்சியர் மூலம், முத்தரப்புக் கூட்டத்தை கூட்ட முடிவு செய்து இருக்கிறோம். தேதி இன்னும் முடிவாகவில்லை என்றார்.






Read more »

கடலூர் வெள்ளிக் கடற்கரைக்கு (சில்வர் பீச்) சுற்றுலா வந்த இளைஞர் கடலில் மூழ்கி சாவு

கடலூர்:

      கடலூர் சில்வர் பீச்சுக்கு ஞாயிற்றுக்கிழமை சுற்றுலா வந்த இளைஞர், கடலில் மூழ்கி இறந்தார்.
 
        பெங்களூர் நாராயணபுரத்தைச் சேர்ந்த சேகரின் மகன் பாரத் (23). பெங்களூரில் தனியார் நிறுவனம் ஒன்றில் பணிபுரிந்து வந்தார்.பாரத்தும் அவரது நண்பர்கள் சிலரும், தமிழ்நாட்டில் பல்வேறு ஊர்களுக்குச் சுற்றுலா சென்றனர். ஞாயிற்றுக்கிழமை கடலூர் வந்த அவர்கள், தேவனாம்பட்டினம் சில்வர் பீச்சில் குளிக்கச் சென்றனர். கடலில் குளித்துக் கொண்டு இருந்தபோது பாரத், அலைகளில் சிக்கி தண்ணீரில் மூழ்கினார். உடன் வந்தவர்கள் முயன்றும் அவரைக் காப்பாற்ற முடியவில்லை. சிறிது நேரத்தில் பாரத் உடல் கரை ஒதுங்கியது. சடலத்தை தேவனாம்பட்டினம் போலீசார் கைப்பற்றி, பிரேதப் பரிசோதனைக்காக கடலூர் அரசு மருத்துவமனைக்கு அனுப்பி வைத்தனர்.




Read more »

நண்பர்களோடு பகிர்ந்து கொள்ள

Country wise Vistior