கடலூர் கந்தசாமி நாயுடு மகளிர் கல்லூரியில் பெற்றோர்கள் ஆலோசனைக் கூட்டம்

கடலூர் : 

        கடலூர் கந்தசாமி நாயுடு மகளிர் கல்லூரியில் மாலை நேர வகுப்பு பயிலும் மாணவிகளின் பெற்றோர்கள் ஆலோசனைக் கூட்டம் நேற்று நடந்தது.

கல்லூரி முதல்வர் மல்லிகா சந்திரன் தலைமை தாங்கி பேசுகையில், 

           "சில நாட்களுக்கு முன் கல்லூரியில் நடந்த தீ விபத்தில் எழுது பொருட்கள் மட்டுமே எரிந்து சேதமானது. முக்கிய கோப்புகள் அலுவலகத்தில் இருந்தன. மாணவிகளின் எதிர்காலம் பாதிக்கும் வகையில் எதுவும் நடக்கவில்லை' என்றார்.

பெற்றோர்கள் பேசுகையில், 

         "மாணவிகள் ஏதேனும் தவறு செய்தால் கல்லூரி நிர்வாகம் தங்களுக்கு தெரிவிக்க வேண்டும். அவ்வாறு தெரிவிக்கும் பட்சத்தில் பிள்ளைகளை கண்டிப்பதுடன் தேவையான ஆலோசனைகளை வழங்குவோம். கல்லூரியில் சுற்றுச்சுவர் கட்ட நடவடிக்கை எடுக்க வேண்டும். கல்லூரியில் ஏற்படும் சில பிரச்னைகளால் மாணவிகளின் எதிர்காலம் பாதிக்கிறது' என்றனர். கூட்டத்தில் துறைத் தலைவர்கள் மற்றும் மாணவிகள் பங்கேற்றனர். 

Read more »

"தானே" புயல் நிவாரணம் முதல்வரின் பொது நிவாரண நிதிக்கு இதுவரை ரூ.103.87 கோடி

           "தானே' புயலால் பாதிக்கப்பட்ட மாவட்டங்களில் நிவாரணப் பணிகளை மேற்கொள்ள முதல்வரின் பொது நிவாரண நிதிக்கு இதுவரை ரூ.103.87 கோடி அளிக்கப்பட்டுள்ளது.

         பல்வேறு தொழிலதிபர்கள், திரைப்பட பிரமுகர்கள் என பலரும் தாங்களாக முன்வந்து நிதியை அளித்து வருகின்றனர். தலைமைச் செயலகத்தில் முதல்வர் ஜெயலலிதாவை வியாழக்கிழமை சந்தித்து 25 பேர் நிதி அளித்தனர். வருவாய்த் துறை சார்பில் அதன் அமைச்சர் கே.ஏ.செங்கோட்டையன் ரூ.1.88 கோடியையும், தொழில் துறை சார்பில் அமைச்சர் பி.தங்கமணி ரூ.1.64 கோடியையும் முதல்வரிடம் வழங்கினர். பள்ளிக் கல்வி சார்பில் ரூ.25 கோடி அளிக்கப்பட்டது.செய்தித் துறை சார்பில் ரூ.13.23 லட்சத்தையும், திருப்பூர் ஏற்றுமதியாளர்கள் சங்கத்தின் சார்பில் இந்து சமய அறநிலையங்கள் துறை அமைச்சர் எம்.எஸ்.எம். ஆனந்தன் ரூ.10 லட்சத்தையும் அளித்தனர்.எம்.ஆர்.எப். நிறுவனத்தின் தலைவர் மற்றும் மேலாண்மை இயக்குநர் கே.எம்.மேமன் ரூ.1 கோடியும், அப்போலோ மருத்துவமனை சார்பில் ரூ.1.5 கோடியும், தொழிலதிபர் ஏ.சி.முத்தையா ரூ.1 கோடியும் அளித்தனர்.தமிழ்நாடு ஹோட்டல் உரிமையாளர்கள் சங்கத்தின் சார்பில் ரூ.75 லட்சமும், அண்ணா தொழில்நுட்பப் பல்கலைக்கழக ஊழியர்கள் சார்பில் ரூ.50 லட்சமும், எம்.பி. குழுமம் சார்பில் ரூ.25 லட்சமும், மதுரை மீனாட்சி மிஷன் மருத்துவமனை சார்பில் ரூ.20 லட்சமும் நிதி அளிக்கப்பட்டது.

                கோவை கே.ஜி. மருத்துவமனை சார்பில் ரூ.15 லட்சமும், கோவை பிரிகால் நிறுவனத்தின் சார்பில் ரூ.15 லட்சமும், மாதா குழும கல்வி நிறுவனங்களின் தலைவர் எஸ்.பீட்டர் சார்பில் ரூ.10 லட்சமும், தென்னிந்திய திரைப்பட வர்த்தக சங்கத்தின் சார்பில் ரூ.10 லட்சமும் நிதி அளிக்கப்பட்டது.சிரைன் வேளாங்கண்ணி மேல்நிலைப் பள்ளி சார்பில் ரூ.10 லட்சமும், பாரத் சஞ்சார் நிகாம் லிமிடெட் சார்பில் ரூ.10 லட்சமும், அம்மன் குழுமம் சார்பில் ரூ.7 லட்சமும், இயல், இசை, நாடக மன்றம் சார்பில் ரூ.7.10 லட்சமும் நிதி வழங்கப்பட்டது.

               பாரதியார் பல்கலைக்கழகம் ரூ.7 லட்சமும், ஆசான் மெமோரியல் சங்கம் ரூ.6 லட்சமும், திரைப்பட நடிகை நயன்தாரா ரூ.5 லட்சமும் நிதி அளித்தனர். சர்ச் பார்க் பள்ளி மாணவிகள் ஜெய்வர்ஷினி, மனிஷா, சுஜித்ரா ஆகியோர் தலா ரூ.10 ஆயிரம் வீதம் ரூ.30 ஆயிரம் அளித்தனர்.தானே புயலால் பாதிக்கப்பட்டவர்களுக்கு புதன்கிழமை ஒரே நாளில் மட்டும் ரூ.35 கோடி வழங்கப்பட்டது. நிவாரணப் பணிகளுக்காக இதுவரை ரூ.103.87 கோடி அளிக்கப்பட்டுள்ளது குறிப்பிடத்தக்கது.

Read more »

மேட்டுக்குப்பம் வள்ளலார் சித்தி வளாகத் திருமாளிகையில் திரு அறை தரிசனம்

வடலூர் மேட்டுக்குப்பம் திரு அறையைத் தரிசிக்கும் சன்மார்க்க அன்பர்கள்.

நெய்வேலி:

                              வள்ளலார் சித்திபெற்ற மேட்டுக்குப்பம் சித்தி வளாகத் திருமாளிகையில் ஆயிரக்கணக்கானோர் வியாழக்கிழமை திருஅறை தரிசனம் செய்தனர்.

             தனது வாழ்நாளில் அரும்பெரும் பணிகளை செய்துவந்த வள்ளலார் ராமலிங்க அடிகள் இறுதியாக வடலூருக்கு தெற்கே 5 கி.மீ. தொலைவில் உள்ள மேட்டுக்குப்பம் கிராமத்தில் 1870-ம் ஆண்டுமுதல் உறையத் தொடங்கினார். மேட்டுக்குப்பத்தில் அவர் வசித்த திருமாளிகைக்கு சித்தி வளாகம் என அழைக்கப்பட்டது. அங்கு வசித்த வள்ளல் பெருமானார் கார்த்திகைத் தீபத் திருநாளான்று, திருமாளிகை உள்ளிருந்த விளக்கை புறத்தில் வைத்து, இதைத் தொடர்ந்து ஆராதியுங்கள், இந்தக் கதவை சாத்திவிடப் போகிறேன், ஆண்டவர் இனி தீப முன்னிலையில் விளங்குகின்றபடியால், தெய்வ பாவனையை இந்தத் தீபத்தில் செய்யுங்கள், நான் இப்போது இந்த உடம்பில் இருக்கிறேன், இனி எல்லா உடம்பிலும் புகுந்து கொள்வேன் எனக் கூறிவிட்டு கதவை சாத்திக் கொண்டார். 1874 தைத் திங்கள் 19-ம் நாள் சித்திவளாகத் திருமாளிகையிலேயே தமது திருவறையில் பெருமானார் அருட்பெருஞ்ஜோதியானார். 

               இந்த திருமாளிகை திருவறையில் ஆண்டுதோறும் தைப்பூச தினத்துக்கு பின் 3-ம் நாள் ஒவ்வொரு ஆண்டும் திருஅறை தரிசனம் நடைபெறும்.÷இந்த திருஅறை தரிசனத்தைக் காண ஆயிரக்கணக்கானோர் வரிசையில் நின்று தரிசனம் செய்வர். அதுபோன்று இந்த ஆண்டு நடைபெற்ற தரிசனத்தில் ஆயிரக்கணக்கானோர் பங்கேற்றனர். 

Read more »