சென்னை, கோவையில் ஜூலை மாதத்தில் பாஸ்போர்ட் சேவை மையங்கள் தொடங்கத் திட்டமிடப்பட்டுள்ளது என்றார் மத்திய வெளியுறவுத் துறை அமைச்சகத்தின் பாஸ்போர்ட் சேவைத் திட்ட இயக்குநர் அனில் குமார் சோப்தி.
திருச்சியில் புதன்கிழமை மத்திய வெளியுறவுத் துறை அமைச்சகத்தின் பாஸ்போர்ட் சேவைத் திட்ட இயக்குநர் அனில் குமார் அளித்த பேட்டி:
"நாடு முழுவதும் 77 இடங்களில் பாஸ்போர்ட் சேவை மையங்கள் தொடங்கத் திட்டமிடப்பட்டது. பெங்களூர், சண்டீகர் உள்பட 7 இடங்களில் கடந்த ஆண்டு இம் மையங்கள் தொடங்கப்பட்டன.இப்போது, புதன்கிழமை (ஜூன் 29) எட்டாவதாக திருச்சியிலும், ஒன்பதாவதாக தஞ்சாவூரிலும் இந்த மையங்கள் தொடங்கப்பட்டுள்ளன.
ஜூலை மாதத்தில் சென்னையில் 3 இடங்களிலும், தில்லி, விசாகப்பட்டினம், கோவையில் தலா ஓர் இடத்திலும் என மொத்தம் 6 பாஸ்போர்ட் சேவை மையங்கள் தொடங்கத் திட்டமிடப்பட்டுள்ளது. மீதமுள்ள பாஸ்போர்ட் சேவை மையங்கள் 8 மாதங்களுக்குள் தொடங்க இலக்கு நிர்ணயிக்கப்பட்டுள்ளது .தவிர, 14 இடங்களில் சிறிய அளவிலான பாஸ்போர்ட் சேவை மையங்கள் தொடங்கும் திட்டமும் உள்ளது. இவற்றில் 5 மையங்கள் வடகிழக்கு மாநிலங்களிலும், மற்றவை ஒரிசா, கர்நாடகம், மேற்குவங்கம் ஆகிய மாநிலங்களிலும் அமைக்கப்படும்.
இந்த மையங்கள் அனைத்தும் அரசு ஊழியர்களே இயக்கும் வகையில் அமையும். இப்போது, அமைக்கப்பட்டு வரும் சேவை மையங்களில் விண்ணப்பங்கள் பெறுதல், புகைப்படம் எடுத்தல், விரல் ரேகைகள் பதிவு செய்தல் ஆகியவை மட்டுமே மேற்கொள்ளப்படும். மீதமுள்ள பணிகள் அனைத்தும் மண்டல பாஸ்போர்ட் அலுவலகத்தில்தான் மேற்கொள்ளப்படும். எனவே, பாதுகாப்பு விஷயத்தில் எந்த வித பிரச்னையும் ஏற்படாது.திருச்சி மண்டல பாஸ்போர்ட் அலுவலகத்தில் ஏற்கெனவே ஆண்டுக்கு ஏறத்தாழ 1.25 லட்சம் பாஸ்போர்ட்கள் விநியோகம் செய்யப்பட்டன.
இப்போது, பாஸ்போர்ட் சேவை மையம் ஏற்படுத்தப்பட்டுள்ளதன் மூலம் ஆண்டுக்கு சுமார் 2 லட்சம் பாஸ்போர்ட்கள் விநியோகம் செய்ய வாய்ப்பு உள்ளது. இந்த மையங்கள் அமைக்கப்பட்டுள்ளதால், மாவட்ட பாஸ்போர்ட் மையங்கள் படிப்படியாக மூடப்படும்' என்றார் அனில்குமார் சோப்தி.
