உங்கள் கருத்துக்களை இங்கே

இன்றைய செய்திகள்:

கடலூர் மாவட்ட செய்திகள்




புதன், ஜூலை 20, 2011

நடராஜர் கோயில் உண்டியல் திறப்பு: ரூ. 6 லட்சம் காணிக்கை


சிதம்பரம் நடராஜர் கோயிலில் செவ்வாய்க்கிழமை நடைபெற்ற உண்டியல் காணிக்கை எண்ணும் பணி.
 
சிதம்பரம்:

         சிதம்பரம் ஸ்ரீநடராஜர் கோயிலில் ஜூலை 19-ம் தேதி செவ்வாய்க்கிழமை 14-வது முறையாக உண்டியல் திறந்து எண்ணப்பட்டது. 

             இதில் மொத்தம் ரூ. 6 லட்சத்து 16 ஆயிரத்து 462 ரூபாய் காணிக்கையாக கிடைத்துள்ளது.  உயர்நீதிமன்ற ஆணைப்படி நடராஜர் கோயிலை கடந்த 2009-ம் ஆண்டு பிப்ரவரி 2-ம் தேதி இந்து அறநிலையத்துறை கையகப்படுத்தி நிர்வாக அலுவலரை நியமித்தது. பின்னர் பிப்ரவரி 5-ம் தேதி சித்சபை எதிரே முதன்முதலாக கோயிலில் உண்டியல் வைக்கப்பட்டது. அதன் பின்னர் படிப்படியாக கோயிலில் பல்வேறு இடங்களில் மொத்தம் 9 உண்டியல்கள் வைக்கப்பட்டன.  இப்போது செவ்வாய்க்கிழமை இந்து அறநிலையத்துறை உதவி ஆணையர் ஆர். ஜகந்நாதன், செயல் அலுவலர் க. சிவக்குமார் ஆகியோர் முன்னிலையில் 14-வது முறையாக உண்டியல் திறந்து எண்ணப்பட்டது. 

              இந்தியன் ஓவர்சீஸ் வங்கி ஊழியர்கள் மற்றும் அறிநிலையத்துறை ஊழியர்கள் உண்டியல் எண்ணும் பணியில் ஈடுபடுத்தப்பட்டனர்.  9 உண்டியல்கள் திறந்து எண்ணப்பட்டதில் ரூ. 6 லட்சத்து 16 ஆயிரத்து 462 ரூபாய் கிடைத்தது. 

மேலும் உண்டியலில் 

11 கிராம் தங்கம், 
108 கிராம் வெள்ளி, 
மலேசிய ரிங்கட் - 482,
சிங்கப்பூர் டாலர் 60, 
அமெரிக்க டாலர் 4, 
தென் ஆப்பிரிக்க ரிங்கட் - 10 ஆகியவை இருந்தன.  

             உண்டியல் வைக்கப்பட்டு 2 வருடம் 5 மாதத்தில் இதுவரை 14 முறை உண்டியல் எண்ணப்பட்டுள்ளது என்றும் இதில் மொத்தம் ரூ. 58 லட்சத்து 10 ஆயிரத்து 852 ரூபாய் கிடைத்துள்ளது எனவும் செயல் அலுவலர் க. சிவக்குமார் தெரிவித்தார். 

 ஒரே கட்டாக ரூ. 50 ஆயிரம்: 

                 நடராஜர் கோயிலில் செவ்வாய்க்கிழமை உண்டியல்கள் திறந்து எண்ணப்பட்ட போது கொடிமரத்தின் அருகில் இருந்த உண்டியலில் ஒரு பக்தர் ரூ. 50 ஆயிரம் தொகையை ரூ. 500 நோட்டுகள் கொண்ட ஒரே கட்டாக செலுத்தியுள்ளது தெரியவந்தது.














Read more »

கடலூர் சிப்காட் தொழிற்பேட்டை ஸ்பிக் பார்மா தொழிற்சாலையில் ஆள்குறைப்பு: தொழிலாளர்கள் போராட்டம்


கடலூர்:

          கடலூர் சிப்காட் தொழிற்பேட்டையில் இயங்கும் ஸ்பிக் பார்மா தொழிற்சாலையில் ஆள்குறைப்பைக் கண்டித்து, தொழிலாளர்கள் திங்கள்கிழமை தர்னா போராட்டத்தில் ஈடுபட்டனர். 

            இத்தொழிற்சாலையில் பென்ஸிலின்- ஜி என்ற மருந்து தயாரிக்கப்பட்டு, உலக நாடுகளில் விற்பனை செய்யப்படுகிறது. இந்தியாவில் பென்ஸிலின்- ஜி தயாரிக்கும் ஒரே தொழிற்சாலை ஸ்பிக் மட்டுமே. இத்தொழிற்சாலையில் நிரந்தரத் தொழிலாளர்கள் 160 பேரும், மற்றும் தினக்கூலித் தொழிலாளர்களும் வேலை செய்கிறார்கள். தொழிற்சாலையில் ஓராண்டுக்கும் மேலாக உற்பத்தி நடைபெறவில்லை. குறைந்த தொழிலாளர்களுடன் பராமரிப்புப் பணிகள் மட்டுமே நடந்து வந்தன. இந்நிலையில் ஞாயிற்றுக்கிழமை இரவு சுமார் 100 பேருக்கு, ஆள்குறைப்பு நோட்டீஸ் வழங்கப்பட்டு இருப்பதாகக் கூறப்படுகிறது. 

              மேலும் தொழிற்சாலையின் பிரதான கேட் மூடப்பட்டு உள்ளது. ஆள்குறைப்பு நோட்டீஸ் வழங்கப்பட்டதை எதிர்த்தும், கேட் மூடப்பட்டதைக் கண்டித்தும் தொழிலாளர்கள் திங்கள்கிழமை, தொழிற்சாலை முன் தர்னா போராட்டத்தில் ஈடுபட்டனர். தொழிற்சாலை நிர்வாகத்துடன் தாசில்தார் அசோகன், துணைத் தலைமை தொழிற்சாலை ஆய்வாளர் தங்கராஜ், தொழிலாளர் அலுவலர் சந்திரசேகரன் மற்றும் தொழிற்சங்கப் பிரதிநிதிகள் பேச்சுவார்த்தை நடத்தி வருகிறார்கள்."

            ஆள்குறைப்பு நடவடிக்கையைக் கைவிட வேண்டும், தொழிற்சாலை கேட்டை திறக்க வேண்டும், இந்தியாவில் பென்ஸிலின்- ஜி தயாரிக்கும் ஒரே தொழிற்சாலை இதுவாக இருப்பதால், தொழிற்சாலையை அரசே ஏற்று நடத்த வேண்டும்' என்று தொழிலாளர்கள் கோரிக்கை விடுத்தனர்.


கடலூர் சிப்காட் தொழிற்பேட்டை ஸ்பிக் பார்மா தொழிற்சாலையில் ஆள்குறைப்பு: தொழிலாளர்கள் போராட்டம் வீடியோ காட்சி
















Read more »

கடலூர் மாவட்டத்தில் விதை நெல் பதப்படுத்தும் நிலையம்

கடலூர்:

           கடலூர் மாவட்டத்தில் விதை நெல் பதப்படுத்தும் "மெகா' நிலையம் அமைக்க வேண்டும் என்று, சேத்தியாத்தோப்பு அணைக்கட்டு பாசன விவசாயிகள் சங்கம் கோரிக்கை விடுத்துள்ளது.

சேத்தியாத்தோப்பு அணைக்கட்டு பாசன விவசாயிகள் சங்கத்தின் தலைவர் கே.விஜயகுமார், செயலர் கே.சொக்கலிங்கம் ஆகியோர் அண்மையில் தமிழக முதல்வருக்கு அனுப்பிய கோரிக்கை மனு:

             விவசாயிகளின் மொத்த விதைத் தேவையில் 17 சதவீதம், அரசு வேளாண் துறை வழங்க வேண்டும் என்பது அரசின் கொள்கை.ஆனால் கடலூர் மாவட்டத்தில் சிறிய அளவில் உள்ள வண்டுராயன் பட்டு, மிராளூர் அரசு விதைப் பண்ணை மற்றும் பதப்படுத்தும் நிலையங்களால், கடலூர் மாவட்ட விவசாயிகளின் விதை நெல் தேவையை பூர்த்தி செய்ய முடியவில்லை.தேசிய விதைக் கழகம் மூலமாகவும், துடியலூர் தனியார் விதைப் பண்ணையில் இருந்தும், கடலூர் மாவட்ட வேளாண்துறை வாங்கி விநியோகிக்கும் விதைகள், தரமாக இல்லை.

             தென்னார்க்காடு மாவட்டமாக இருந்தபோது கள்ளக்குறிச்சி, இருவேல்பட்டு ஆகிய ஊர்களில் இருந்த மிகப்பெரிய விதைநெல் பதப்படுத்தும் நிலையங்கள், மாவட்டப் பிரிவினையின்போது, விழுப்புரம் மாவட்டத்துடன் சேர்ந்துவிட்டன.எனவே கடலூர் மாவட்டத்தில் பெரிய அளவில் விதைப் பதப்படுத்தும் நிலையம் அமைக்க வேண்டும். விதைப் பதப்படுத்தும் நிலையங்களுக்கு விதை நெல் வழங்கும் விவசாயிகளை ஊக்குவிக்கும் வகையில், போக்குவரத்துச் செலவு வழங்க வேண்டும். 

               விவசாயிகளுக்குóக கட்டுபடியாகும் வகையில், விலையை உயர்த்தி வழங்க வேண்டும். திருந்திய நெல் சாகுபடிக்கு விவசாயிகளுக்கு ஹெக்டேருக்கு ரூ. 1,200 மானியம் மற்றும் இடுபொருள்கள் வழங்க வேண்டும்.எண்ணெய் வித்துக்கள் சாகுபடிக்கு தனியாக இயக்குநரகம் அமைத்து, உற்பத்தியைப் பெருக்கவும், மத்திய அரசின் மானியங்களைப் பெறவும், தமிழக அரசு நடவடிக்கை எடுக்க வேண்டும். பயறு வகைகள உற்பத்தியைப் பெருக்கும் வகையில் தரமான விதைகள் உரிய நேரத்தில் வழங்க வேண்டும். பொதுப் பணித் துறையின் காவிரி பாசனப் பிரிவில் காலியாக இருக்கும் அதிகாரிகள் பணியிடங்களை நிரப்ப வேண்டும் என்றும் மனுவில் கோரியுள்ளனர்.






Read more »

நண்பர்களோடு பகிர்ந்து கொள்ள

Country wise Vistior