இணையத்தளத்தில் குடும்ப அட்டை புதுப்பிக்கலாம்

        தமிழகத்தில் குடும்ப அlட்டைகளை புதுப்பித்துக் கொள்ள வழங்கப்பட்ட கால அவகாசத்தை மேலும் ஒரு மாதம் நீட்டித்து தமிழக அரசு உத்தரவிட்டுள்ளது. 

இது குறித்து தமிழக அரசு அளித்துள்ள செய்திக் குறிப்பில், 

          தமிழகத்தில் குடும்ப அட்டைகளின் செல்லத்தக்க காலத்தை 01.01.2012 முதல் 31.12.2012 வரை ஓராண்டிற்கு நீட்டிக்கும் வகையில், குடும்ப அட்டைகளில் வருடம் குறிப்பிடாமல் உள்ள கூடுதல் தாளின் மேற் பகுதியில் 2012 என்று முத்திரையிட்டு செல்லத்தக்கதாக அறிவிக்கப்பட்டது. இவ்வாறு குடும்ப அட்டைகளை புதுப்பிப்பதற்கான கால அவகாசம் 28.02.2012 வரை அளிக்கப்பட்டது.மொத்தமுள்ள 1,97,70,682 குடும்ப அட்டைகளில் இதுவரை 1,86,58,768 குடும்ப அட்டைகள் நியாய விலைக் கடைகளில் புதுப்பிக்கப்பட்டுள்ளன. 

         மேலும் கால நீட்டிப்பு வேண்டுமென்று கேட்டு பொது மக்களிடமிருந்து கோரிக்கைகள் வந்துள்ளன. இதனை ஏற்று மேலும் ஒரு மாத காலத்திற்கு அதாவது 31.03.2012 வரை நீட்டிக்க தமிழக அரசு உத்தரவிட்டுள்ளது.  அதன்படி இருப்பிட ஆதாரமாக வழங்கப்பட்டுள்ள வெள்ளை மற்றும் மஞ்சள் நிற தட்கல் குடும்ப அட்டை வைத்திருப்போர் மற்றும் அரிசி, சர்க்கரை விருப்ப குடும்ப அட்டைகள் வைத்துள்ள உடல்நல குறைவு காரணமாக நடக்க இயலாதோர், வயது முதிர்வு காரணமாக நியாய விலைக் கடைக்கு வர இயலாத குடும்ப அட்டைதாரர்கள், புனிதப் பயணம் மற்றும் மதம் சார்ந்த உள்ளிருப்பு விரதம் மேற்கொண்டுள்ளோர் மற்றும் புதுப்பித்தல் நடைபெற்ற காலத்தில் தற்காலிகமாக வெளியூர் சென்றவர்கள் ஆகியோர் பயனடையும் வகையில் அவர்களது குடும்ப அட்டைகளை ஆன்-லைன் முறையில் புதுப்பித்துக் கொள்ளவும் இணையதள வசதி செய்து கொடுக்கப்பட்டுள்ளது.

 அதன்படி பொதுமக்கள்

http://210.212.62.90:8080/newfcp/cardvalidity.do 

     

      என்ற இணைய  தள  முகவரிக்கு சென்று புதுப்பித்துக் கொள்ளலாம்.  இதில் ரேஷன் பொருள் வேண்டுவோர் 2012 ஆண்டுக்கான கால நீட்டிப்பு தாளின் இரண்டு நகல்களை எடுத்துக் கொண்டு ஒரு நகலை குடும்ப அட்டையில் ஒட்டிக் கொண்டும், மற்றொரு நகலை உரிய கடைக்காரரிடம் அளித்து ரேஷன் பொருட்களை தொடர்ந்து பெற்றுக் கொள்ளலாம்.  

           ரேஷன் பொருள் வேண்டாதோர் மற்றும் இருப்பிட சான்றாக மட்டுமே வைத்துக் கொண்டுள்ளவர்கள் இணையதளத்தில் உள்ள 2012 ஆண்டுக்கான கால நீட்டிப்பு தாளின் ஒரு நகலை அவர்களுடைய குடும்ப அட்டையில் ஒட்டிக் கொண்டால் மட்டும் போதுமானது.  மேற்படி இணையதள வசதி 01.03.2012 முதல் 31.03.2012 வரையில் நடைமுறையில் இருக்கும். இந்த வசதியை பொது மக்கள் பயன்படுத்திக் கொள்ளுமாறு தமிழக உணவுத்துறை அமைச்சர் இரா.காமராஜ், கேட்டுக் கொண்டுள்ளார்.

முகவரி


http://210.212.62.90:8080/newfcp/cardvalidity.do

Read more »

விருத்தாசலம் கொளஞ்சியப்பர் கல்லூரியில் கணித மன்றம் துவக்க விழா

விருத்தாசலம் :

     விருத்தாசலம் கொளஞ்சியப்பர் அரசு கல்லூரியில் கணித மன்றம் துவக்க விழா நடந்தது. கல்லூரி முதல்வர் ( பொறுப்பு) செந்தமிழ்ச்செல்வி தலைமை தாங்கினார். கணிதத் துறை பேராசிரியர் ஜெயந்தி முன்னிலை வகித்தார். கணித மன்ற செயலர் முத்துலட்சுமி வரவேற்றார். சேலம் அரசு கலைக் கல்லூரி உதவி பேராசிரியர் சண்முகசுந்தரம் கணித மன்றத்தை துவக்கி வைத்து பேசினார். நிகழ்ச்சியில் கல்லூரி பேராசிரியர்கள், மாணவர்கள் பங்கேற்றனர். மன்ற இணைச் செயலர் ராஜ்குமார் நன்றி கூறினார்.

Read more »

பாட்டாளி மக்கள் கட்சி தமிழக மாணவர் சங்கம் சார்பில் லந்துரையாடல் கூட்டம்

சிதம்பரம்:

       சிதம்பரம் ஜி.எம்.வாண்டையார் திருமண மண்டபத்தில் பாட்டாளி மக்கள் கட்சி தமிழக மாணவர் சங்கம் சார்பில் மாணவ- மாணவிகள் பங்கேற்ற கலந்துரையாடல் கூட்டம் நடைபெற்றது.

கூட்டத்தில் பா.ம.க. மாநில இளைஞரணி தலைவரும், முன்னாள் மத்திய சுகாதாரத்துறை அமைச்சர்  அன்புமணி ராமதாஸ் பேசியது:-

          மாணவர்கள் எதை நினைத்தாலும் சாதிக்கலாம். கடவுள் மீது எனக்கு நம்பிக்கை இல்லை. அப்படி ஒருவர் இருந்தால் அவரிடம் நான் வரம் கேட்டால் பெரிய பணக்காரராக வேண்டும் எனவோ, பிரதமராக வேண்டும் எனவோ கேட்க மாட்டேன். எனது கல்லூரி பருவத்தை திருப்பி கொடுக்க வேண்டும் என கேட்பேன்.

           வருங்கால இந்தியர்கள் நீங்கள். இந்த இளைஞர்களை வழிநடத்தி செல்லும் வித்தியாசமான தலைவர் மருத்துவர் ராமதாஸ் ஒருவர்தான். இம்மண் சாதாரன மண் கிடையாது. 1967ல் திமுக ஆட்சிக்கு வருவதற்கு காரணமாக இருந்த அண்ணாமலைப் பல்கலை. மண். இந்தி எதிர்ப்பு மொழிப்போர் போராட்டம் இம்மண்ணில் தொடங்கி மாணவர்கள் போராடிய மண். இதன் மூலம் தி.மு.க. ஆட்சிக்கு வந்தது. இதே மண்ணில் நாம் ஒன்று கூடியுள்ளோம். ஒற்றுமையுடன் போராடுவோம் அடுத்து நிச்சயம் பா.ம.க. ஆட்சியை பிடிக்கும். ஆட்சிக்கு வரவைப்போம். திராவிடக் கட்சிகள் மாறி, மாறி 45 ஆண்டுகள் ஆண்டு குடிகார நாடாகவும், பிச்சைக்காரர்கள் நாடாகவும், இலவசங்களை கொடுத்து மக்களை சோம்பேறிகளாகவும் ஆக்கிவிட்டது. பா.ம.க. ஆட்சிக்கு வந்தால் இலவசங்கள் தராது. கல்வி, சுகாதாரம், வேளாண் இடுபொருள்களை இலவசமாக கொடுப்போம். இதுதான் மற்றவர்களுக்கும், நமக்கும் வித்தியாசம். அரசியல் வேண்டாம் என மாணவர்கள் சொல்ல முடியாது. அவசியம் அரசியலுக்கு வந்தாக வேண்டும்.

               எதிர்காலத்தை உருவாக்கும் இளைஞர்கள் நீங்கள்தான். உலக நாடுகளில் புரட்சிகள் நடைபெற்று வருபதற்கு இளைஞர்கள்தான் காரணம். அதே போன்ற புரட்சி தமிழகத்தில் ஏற்பட வேண்டும். சினிமா ஒரு பொழுது போக்கு. அதனை பார்த்துவிட்ட மறந்துவிட வேண்டும். ஆனால் நம் மக்கள் அதனை உண்மை என்று நம்பி ஏமாந்து போகின்றனர். இந்தியாவில் தமிழ் நாட்டை தவிர, எந்த மாநிலத் திலும் சினிமாக்காரகள் ஆண்டதில்லை. 45 ஆண்டு களாக சினமாவில் வேஷம் போட்டவர்களும், வசனம் எழுதியவர்களும்தான் ஆண்டு வருகின்றனர்.

          தற்போது தமிழகத்திற்கு ஒரு நடிகை முதல்வர், ஒரு நடிகர் எதிர்க்கட்சி தலைவர். அண்ணாதுரை எம்.ஏ. படித்தவர். அவருக்கு பிறகு இவர்கள் யாரும் படித்தவர்கள் கிடையாது. இனி தமிழ்நாட்டை படித்தவர்கள் ஆள வேண்டும். கல்வி, சுகாதாரம், வேலைவாய்ப்பு, வேளாண்மை குறித்து புதிய அரசியல், புதிய நம்பிக்கை என்ற செயல்திட்டத்தை பா.ம.க. புத்தகமாக வெளியிட்டுள்ளது. பா.ம.க. ஒரு வித்தியாசமான கட்சி. எங்களுக்கு ஒரு வாய்ப்பு தாருங்கள். கடந்த சட்டப்பேரவைத் தேர்தலில் அமைதி புரட்சி ஏற்பட்டது. இளைஞர்கள் அந்த புரட்சியை ஏற்படுத்தினர். அ.தி.மு.க.விற்கு ஒட்டுப்போடவில்லை. தி.மு.க.விற்கு எதிராக ஓட்டு போட்டார்கள். ஓட்டு போட வேறு யாரும் இல்லை. தி.மு.க., அ.தி.மு.க.வுடன் கூட்டணி வைத்த தவறை மீண்டும் செய்ய மாட்டோம். உறுதியாக தெரிவிக்கிறோம். பா.ம.க. தலைமையில் தனி அணி அமைப்போம். திராவிட கட்சிகள் திராவிடன் என்ற வார்த்தையை வைத்து ஏமாற்றி வருகிறார்கள்.

           திராவிடர்கள் தமிழகத்தில் மட்டுமல்ல கேரளா, ஆந்திரா, கர்நாடகா உள்ளிட்ட மாநிலங்களில் பரவலாக உள்ளனர். ஆனால் அங்கு திராவிட கட்சிகள் கிடையாது. தமிழகத்தில் திராவிட கட்சிகள் உள்ளது. கேரளாவில் நாயர்மேனன் தவிர வேறு யாரும் ஆள முடியவில்லை. ஆந்திராவில் ரெட்டி, நாயுடு தவிர வேறு யாரும் ஆளவில்லை. திராவிட கட்சிகள் தலைவர்கள் கருணாநிதி, எம்ஜிஆர்., ஜானகி, ஜெயலலிதா. வைகோ யாரும் தமிழன் கிடையாது. தமிழன் யார் என்றால் பா.ம.க. நிறுவனர் மருத்துவர் ராமதாஸ் ஒருவர்தான். பாமக ஆட்சிக்கு வந்தால் சினிமா கலாச்சாரம், மது ஆகியவற்றை ஒழிப்போம். திமுக ஆட்சியில் 85 ஆயிரம் கோடி இலவசமாக வழங்கப் பட்டுள்ளது. இதில் 20 ஆயிரம் கோடி மின்திட்டத்திற்கு ஒதுக்கியிருந்தால் மின்வெட்டு வந்திருக்காது. மின் கட்டணம் உயர்ந்திருக்காது. 20 ஆயிரம் கோடி போக்குவரத்து துறைக்கு ஒதுக்கியிருந்து பஸ் கட்டணம் உயர்ந்திருக்காது. இவ்வாறு அன்புமணி ராமதாஸ் பேசினார்.

               கூட்டத்திற்கு கடலூர் மாவட்ட தமிழக மாணவர் சங்க செயலாளர் கோபிநாத் தலைமை வகித்தார். மாநில துணைச் செயலாளர் முருகன் வரவேற்றார். பாமக மாநிலத் தலைவர் மணி மாநில இளைஞரணி செயலாளர் அறிவுச்செல்வன், தமிழக மாணவர் சங்க தலைவர் பாரிமோகன், துணைப் பொதுச்செயலாளர் திருஞானம், பா.ம.க. மாவட்டச் செயலாளர் வேணு. புவனேஸ்வரன், சமூக முன்னேற்ற சங்கம் பொதுச்செயலாளர் சிவப்பிரகாசம் பேராசிரியர் செல்வகுமார், பேராசிரியர் மணிவண்ணன் உள்ளிட் டோர் பங்கேற்று பேசினர். கூட்டத்தில் அண்ணா மலைப் பல்கலைக்கழகம், கடலூர் மற்றும் சிதம்பரம் அரசு கலைக்கல்லூரி, விருத்தாசலம் மருத்துவர் ராமதாஸ் அறிவியல் கலைக்கல்லூரி உள்ளிட்ட பல்வேறு கல்லரிகளைச் சேர்ந்த தமிழக மாணவர் சங்க நிர்வாகிகளும் பங்கேற்று பேசினர். தமிழக மாணவர் சங்க (தெற்கு) மாவட்டச் செயலாளர் செந்தில்குமார் நன்றி கூறினார்.

Read more »