உங்கள் கருத்துக்களை இங்கே

இன்றைய செய்திகள்:

கடலூர் மாவட்ட செய்திகள்




சில்வர் பீச் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
சில்வர் பீச் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

சனி, செப்டம்பர் 15, 2012

கடலூர் மாவட்டத்தில் புத்தாண்டு முதல் பிளாஸ்டிக் பொருட்களை விற்பனை செய்வோர் மற்றும் பயன்படுத்துவோருக்கு அபராதம்

கடலூர்:


    கடலூர் மாவட்டத்தில் புத்தாண்டு முதல் பிளாஸ்டிக் பொருட்களை விற்பனை செய்வோர் மற்றும் பயன்படுத்துவோருக்கு அபராதம் விதிக்கப்படும் என கலெக்டர் எச்சரித்துள்ளார்.

      சர்வதேச கடற்கரை சுத்தம் செய்யும் தினம் நாளை கடைபிடிக்கப்படுவதால், மாவட்ட நிர்வாகம் சார்பில் நேற்று முதல் வரும் 19ம் தேதிவரை சர்வதேச கடற்கரை சுத்தம் செய்யும் தினம் கடைபிடிக்கப்படுகிறது. அதனையொட்டி கடலூர் சில்வர் பீச்சை சுத்தம் செய்யும் பணியை ஊராக தொழில்துறை மற்றும் சத்துணவு துறை அமைச்சர் சம்பத் துவக்கி வைத்தார். கே.என்.சி., மற்றும் அரசு கல்லூரி, நகராட்சி மேல்நிலைப் பள்ளி மாணவர்கள் பங்கேற்றனர்.

கலெக்டர் ராஜேந்திர ரத்னு கூறுகையில்,

            சர்வதேச கடற்கரை சுத்தம் செய்யும் தினம் நமது மாவட்டத்தில் ஒருவாரம் கடைபிடிக்கப்படுகிறது. சில்வர் பீச்சில் சேகரித்த குப்பைகள் 16 வகையாக பிரித்தெடுத்துள்ளனர். கடற்கரை பகுதியில் பிளாஸ்டிக் பொருட்கள் வராதவாறு கண்காணிக்கப்படும். ஒருவாரத்திற்கு கடற்கரையொட்டியுள்ள ஊராட்சி, பேரூராட்சி, நகராட்சிகளில் குப்பைகளை அகற்ற நடவடிக்கை எடுக்கப்பட்டுள்ளது. மாவட்டத்தில் கடந்த மூன்று மாதத்தில் 27 ஆயிரம கிலோ பிளாஸ்டிக்பொருட்கள் அகற்றப்பட்டுள்ளது .மாவட்டத்தில் இதுவரை 70 சதவீதம் பிளாஸ்டிக் பொருட்கள் உபயோகம் தடுக்கப்பட்டுள்ளது. முற்றிலும் குறைப்பதற்கு வரும் ஜனவரி முதல் தேதியிலிருந்து பிளாஸ்டிக் பொருட்களை விற்போர் மற்றும் பயன்படுத்துவோருக்கு அபராதம் விதிக்கப்படும் என்றார்.

            நிகழ்ச்சியில் நகராட்சி கமிஷனர் விஜயக்குமார், இன்ஜினியர் ரவி, நகராட்சி தலைவர் சுப்ரமணியன், துணைச் சேர்மன் குமார்,அ.தி.மு.க.,ஒன்றிய செயலர் பழனிசாமி உள்ளிட்டோர் உடனிருந்தனர். தொடர்ந்து ஓருங்கிணைந்த நகர்புற வளர்ச்சி குழுமம் 2011-12 திட்டத்தின் கீழ் 29.50 லட்சம் செலவில் இரண்டு டம்பர் பிளேசர் லாரியும், 9.60 லட்சம் செலவில் 16 டம்பர் பிளேசர் பின்களை என மொத்தம் 39.10 லட்சம் செலவில் புதிதாக வாங்கப்பட்டது



Read more »

வியாழன், மே 17, 2012

கடலூர் சில்வர் பீச்சில் மே 23 முதல் கோடை விழா

கடலூர்:

கடலூர் தேவனாம்பட்டினம் சில்வர் பீச்சில் வரும் 23-ம் தேதி முதல் ஐந்து நாள்கள் கோடை விழா நடக்கவுள்ளது

.கடலூர் மாவட்ட ஆட்சியர் ராஜேந்திர ரத்னூ கூறியது:

கடலூர் சில்வர் பீச்சில் வரும் 23-ம் தேதி முதல் 27-ம் தேதி வரையில் கோடை விழா நடக்கவுள்ளது. 23-ம் தேதி மாலை நடக்கவுள்ள தொடக்க விழாவில், ஊரக தொழில் துறை மற்றும் சுற்றுலாத் துறை அமைச்சர்கள் சிறப்பிக்க உள்ளனர். ஐந்து நாள்கள் நடக்கும் விழாவில் தமிழகத்தின் பாரம்பரிய கலை நிகழ்ச்சிகளான ஒயிலாட்டம், மயிலாட்டம், சிலம்பாட்டம், கரகாட்டம், தப்பாட்டம், பம்பை போன்ற கலை நிகழ்ச்சிகள் நடக்கவுள்ளன. இதேபோல் மேற்கு வங்காளம், பஞ்சாப், ராஜஸ்தான் உள்ளிட்ட வடமாநில கிராம கலைக் குழுவினரின் கலை நிகழ்ச்சிகளும் நடக்கவுள்ளது. பீச்வாலிபால், கபடி, பள்ளி, கல்லூரி மாணவர்களின் அறிவியல் கண்காட்சி மற்றும் பொழுதுப்போக்கு சாதனங்களும் இடம்பெறும். மாலை 4 மணி முதல் 5.30 மணி வரையில் பார்வையாளர்களுக்கான போட்டிகளும், அதற்கான பரிசளிப்பு விழாவும் நடைபெறும். 6 மணி முதல் 10 மணி வரையில் கலை நிகழ்ச்சிகள் நடைபெறும்.
விழாக் குழு: விழாவுக்கான ஏற்பாடுகளை செய்ய 5 பேர் கொண்ட குழு அமைக்கப்பட்டுள்ளது. இதில் ஆட்சியர் நேர்முக உதவியாளர் உள்ளிட்ட பல்துறை அதிகாரிகளை கொண்டு குழு அமைக்கப்பட்டுள்ளது என ஆட்சியர் தெரிவித்தார்.












Read more »

செவ்வாய், ஏப்ரல் 17, 2012

கடலூர் சில்வர் பீச்சில் தீயணைப்பு கருவிகள் குறித்த கண்காட்சி

கடலூர் :

கடலூரில் தீ தொண்டு நாள் நிகழ்ச்சியின் ஒரு பகுதியாக கடலூர் தேவனாம்பட்டினம் சில்வர் பீச்சில் தீயணைப்பு கருவிகள் குறித்த கண்காட்சி நடந்தது. கடலூர் கோட்ட அலுவலர் குமாரசாமி துவக்கி வைத்தார். கண்காட்சியில் தீயணைப்பு மீட்பு மற்றும் விபத்தில் சிக்கியவர்களை மீட்கும் போது பயன்படுத்தக் கூடிய ஹைட்ராலிக், மூச்சு கருவி, புகை போக்கி உட்பட பல்வேறு விதமான கருவிகள் பொதுமக்களின் பார்வைக்கு வைக்கப்பட்டது. மேலும், கண்ணாடி விரியன், மண்ணுளி மற்றும் நல்ல பாம்புகளும் இடம் பெற்றிருந்தன. கண்காட்சியை பார்வையிட வந்த பொதுமக்களுக்கு தீ தடுப்பு வழிமுறைகள் குறித்து செயல்விளக்கப் பயிற்சி அளிக்கப்பட்டது. தீ தடுப்பு குறித்த விழிப்புணர்வு துண்டு பிரசுரங்களும் வழங்கப்பட்டது. ஏற்பாடுகளை நிலைய அலுவலர்கள் கடலூர் வீரபாகு, சிப்காட் கருணாகரன் ஆகியோர் தலைமையில் தீயணைப்பு வீரர்கள் ராஜசேகரன், நாகராஜ், திருநாவுக்கரசு, பிரபு ஆகியோர் செய்திருந்தனர்.

Read more »

செவ்வாய், ஜனவரி 10, 2012

சேலம் பெரியார் பல்கலைக்கழக மாணவர்கள் கடலூரில் தானே புயல் நிவாரணப்பணி

கடலூர் : 

           புயல் பாதித்த கடலூரில்சேலம் பெரியார் பல்கலைக் கழக என்.எஸ். எஸ்., மாணவர்கள் துப்புரவு பணிமேற்கொண்டனர். கடந்த 30ம் தேதி வீசிய புயலில் சாலையோரம் இருந்த ஏராளமான மரங்கள், மின்கம்பங்கள் மற்றும் மின்மாற்றிகள் முறிந்து கீழே விழுந்தன. சாலை யோரம் விழுந்து கிடக்கும் மரங்களை நெடுஞ்சாலைத் துறையினரும், மின்கம்பங்கள் மற்றும் மின்மாற்றிகளை மின்வாரியத்தினரும் அப்புறப்படுத்தி வருகின்றனர். இருப்பினும் அவைகள் முழுமையாக அப்புறப்படுத்தாததால் போக்குவரத்து பாதிக்கப்படுகிறது. பொதுமக்கள் சிரமத்துடன் செல்ல வேண்டிய நிலை ஏற்பட்டுள்ளது.

             இதனை அகற்றிடும் பொருட்டுசேலம் பெரியார் பல்கலைக் கழக துணைவேந்தர் முத்துச்செழியன் ஏற்பாட்டில் என்.எஸ்.எஸ்., ஒருங்கிணைப்பாளர் முத்துசாமி, ஆட்சிக்குழு உறுப்பினர்கள் சிங்காரம், ராஜவேல், திட்ட அலுவலர்கள் கனகராஜ், தங்கராஜ், வேல்ராஜ், ஜெய்ராஜ் ஆகியோர் தலைமையில் என்.எஸ்.எஸ்., மாணவர்கள் 100 பேர் கடலூர் வந்துள்ளனர். இவர்கள் கடலூர் சில்வர் பீச், அண்ணா நகர் உள்ளிட்ட பகுதிகளில் சாலையோரங்களில் விழுந்து கிடந்த மரங்கள், மின்கம்பங்கள் மற்றும் குப்பைகளை அகற்றி சுத்தம் செய்தனர். 









Read more »

வியாழன், நவம்பர் 24, 2011

கடலூர் தேவனாம்பட்டினம் வெள்ளிக் கடற்கரையில் (சில்வர் பீச்) வடமாநில சுற்றுலாப் பயணிகள் வருகை


ஆர்ப்பரிக்கும் அலைகளை பொருட்படுத்தாமல் கடலூர் தேவனாம்பட்டினம் சில்வர் பீச்சில் குளிக்கும் வடமாநில சுற்றுலாப் பயணிகள். (வலது படம்) கடல் சீற்றம் காரணமாக
கடலூர்:
            வங்கக் கடலில் அலைகளின் சீற்றம் அதிகமாக இருந்ததால், கடலூர் மீனவர்கள் புதன்கிழமை 3-வது நாளாக மீன்பிடிக்கச் செல்லவில்லை. வடகிழக்குப் பருவமழை தீவிரம் அடைந்து வருவதால் வங்கக் கடலில் அலைகளின் சீற்றம் அதிகரித்து காணப்படுகிறது. 20 அடி உயரம் வரை அலைகள் எழும்பி ஆர்ப்பரிப்பதாக மீனவர்கள் கூறுகின்றனர். கடல் நீரோட்டம் பெரிதும் மாறியுள்ளது என்றும் தெரிவித்தனர். கடந்த 3 நாள்களாக அலைகளின் சீற்றம் அதிகமாக இருந்தது. இதனால் கடலூர் மாவட்ட மீனவர்கள் புதன்கிழமை 3-வது நாளாக மீன் பிடிக்கக் கடலுக்குள் செல்ல வில்லை. 20 முதல் 30 கி.மீ. தொலைவில் ஆழ்கடலில் மீன்பிடித்துக் கொண்டிருந்த பெரிய விசைப் படகுகளும் செவ்வாய்க்கிழமை கரை திரும்பின. 
இதுகுறித்து மாவட்ட மீனவர் பேரவைத் தலைவர் சுப்புராயன் கூறுகையில்,
            கடலூர் மாவட்டத்தில் மீன்பிடித் தொழில் கடந்த 3 மாதங்களாக பெரிதும் பாதிக்கப்பட்டுள்ளது.வடகிழக்குப் பருவமழை காலம் தொடங்கிய பிறகு நிலைமை இன்னும் மோசமாகிவிட்டது. கடந்த 3 நாள்களாக கடல் சீற்றம் மிக அதிகமாக உள்ளது. வியாழக்கிழமையும் இதே நிலை நீடிக்கும் என எதிர்பார்க்கிறோம். மத்தி மீன்கள் பிடிக்கும் 100 படகுகள் மற்றும் வஞ்சரம், பாறை உள்ளிட்ட மீன்கள் பிடிக்கும் கட்டுவலைப் படகுகளும் கடந்த 3 மாதங்களாக மீன்பிடிக்கச் செல்லவில்லை. இப்போது ஏற்பட்டு இருக்கும் கடல் சீற்றம் மற்றும் நீரோட்டத்தில் ஏற்பட்ட மாற்றம் காரணமாக, சிறிய படகுகளும் மீன் பிடிக்க முடியவில்லை. இதனால் மீன் விலை உயர்ந்துள்ளது. 















Read more »

வெள்ளி, செப்டம்பர் 16, 2011

கடலூரில் அண்ணா பிறந்த தினத்தை முன்னிட்டு மாணவ-மாணவிகளுக்கு விரைவு சைக்கிள் போட்டி

கடலூர்:

              அண்ணா பிறந்த தினத்தை முன்னிட்டு கடலூரில் மாணவ-மாணவிகளுக்கு விரைவு சைக்கிள் போட்டி வியாழக்கிழமை நடத்தப்பட்டது. 

                கடலூர் தேவனாம்பட்டினம் சில்வர் பீச்சில், மாவட்ட விளையாட்டு மேம்பாட்டு ஆணையம் இப்போட்டியை நடத்தியது. மாணவ-மாணவிகளுக்கு தனித் தனியாக 3 பிரிவுகளாக போட்டி நடத்தப்பட்டது. 

              இப்போட்டியில் 450 பேர் கலந்துகொண்டனர்.  ஆண்களுக்கான போட்டியில் 13 வயதுக்கு கீழ் உள்ள மாணவர்களில் மஞ்சக்குப்பம் புனித வளனார் மேல்நிலைப் பள்ளி மாணவர் உத்தம் சந்த், 15 வயதுக்குக் கீழ் உள்ள மாணவர்களில் திருப்பாப்புலியூர் புனித வளனார் மேல்நிலைப் பள்ளி மாணவர் விக்னேஷ், 17 வயதுக்குக் கீழ் உள்ள மாணவர்களில் அதே பள்ளி மாணவர் சரண்ராஜ் முதல் இடத்தைப் பெற்றனர்.  

                பெண்களுக்கான போட்டியில் 13 வயதுக்குக் கீழ் உள்ள மாணவிகளில் புனித அன்னாள் மேல்நிலைப் பள்ளி மாணவி அட்சயா, 15 வயதுக்குக் கீழ் உள்ள மாணவிகளில் அதே பள்ளி மாணவி ஆர்த்தி, 17 வயதுக்குக் கீழ் உள்ள மாணவிகளில் அதே பள்ளி மாணவி பவித்ரா ஆகியோர் முதல் இடத்தைப் பெற்றனர்.  போட்டிக்கு மாவட்ட விளையாட்டு அலுவலர் கே.திருமுகம் தலைமை வகித்தார். தொழில் அதிபர் பாலசேகரன் தொடங்கி வைத்தார்.  வெற்றி பெற்றவர்களுக்குப் பரிசுகளை, கடலூர் புதுநகர் போலீஸ் ஆய்வாளர் சரவண தேவேந்திரன் வழங்கினார். விளையாட்டுப் பயிற்சியாளர் சைமன் நன்றி கூறினார்.






Read more »

செவ்வாய், ஆகஸ்ட் 23, 2011

கடலூர் வெள்ளிக் கடற்கரையில் (சில்வர் பீச்) தடுப்பு வேலி

கடலூர் : 

              கடலூர் சில்வர் பீச்சில் குளிப்பவர்கள் கடல் அலையில் சிக்கி உயிரிழக்கும் எண்ணிக்கை அதிகரித்து வருவதால் தடுப்பு வேலி அமைக்க வேண்டும்.

                கடலூர் தேவனாம்பட்டினம் சில்வர் பீச்சில் மாலை நேரத்தில் ஏராளமான பொது மக்கள் வருகை நாளுக்கு நாள் அதிகரித்து வருகிறது. அவர்களில் வாலிபர்கள், சிறுவர்கள், பள்ளி, கல்லூரி மாணவர்கள் குளித்து மகிழ்வது தவிர்க்க முடியாததாகி விடுகிறது. சுனாமிக்குப்பிறகு கடல் அலையில் பெரிதும் மாற்றம் நிகழ்ந்து வருகிறது. அடிக்கடி சீற்றம் ஏற்படுவதுடன் திடீரென அலையில் சிக்கியவர்களை உள்ளிழுக்கவும் செய்கிறது. இந்நிலையில் உள்ளூர் மக்கள் அல்லாமல் வெளியூர்களில் இருந்து வருபவர்கள் குளிப்பதற்காக கடலில் இறங்குகின்றனர். 

               ஆழமில்லை என கருதி கடலில் சிறிது தூரம் சென்று விடுகின்றனர். அப்போது நீச்சல் தெரியாதவர்கள் திடீரென வரும் அலையில் சிக்கி இறக்க நேரிடுகிறது. எங்கிருந்தோ வருபவர்களெல்லாம் முகவரி தெரியாமல் மடிந்து விடுகின்றனர். இதைத் தடுப்பதற்காக பரந்த கடற்கரையில் போலீசார் காவல் பணியில் காத்திருந்தும் பலனில்லை. இருப்பினும் ஏதாவது ஒரு மூளையில் இச்சம்பவம் நடந்து விடுகிறது. எனவே இதுபோன்ற உயிரிழப்பு சம்பவங்கள் நடக்காத வண்ணம் கடற்கரையில் குறிப்பிட்ட பகுதியில் தடுப்பு வேலி அமைத்து விட்டால் குளிப்பவர்களுக்கு இடையூறு இல்லாமலும், உயிரிழப்பு இல்லாமலும் தடுக்க முடியும். எனவே பல லட்ச ரூபாய் செலவில் சில்வர் பீச்சை அழகுபடுத்தும் அரசு தடுப்பு வேலி அமைக்கவும் நடவடிக்கை எடுக்க வேண்டும்.







Read more »

செவ்வாய், ஜூன் 28, 2011

கடலூர் வெள்ளிக் கடற்கரை (சில்வர் பீச்) ரூ.1 கோடியில் அழகுபடுத்த திட்டம்

கடலூர்:
 
            கடலூர் சில்வர் பீச்சை அழகுபடுத்த ரூ. 1 கோடி மதிப்பில் திட்டம் தயாரிக்கப்பட்டு சுற்றுலாத் துறையிடம் இருந்து நிதிபெற அரசுக்கு அனுப்பப்பட்டு உள்ளதாக மாவட்ட ஆட்சியர் வே.அமுதவல்லி திங்கள்கிழமை தெரிவித்தார்.  

கடலூர் மாவட்ட ஆட்சியர் வே.அமுதவல்லி   கூறியது:  

              கடலூர் மாவட்டத்தில் அனைத்து துறைகளும் ஆய்வு செய்யப்பட்டு நடைமுறையில் உள்ள திட்டங்களை விரைவுப்படுத்த, நடவடிக்கை எடுக்கப்பட்டுள்ளது. சாதிச் சான்றிதழ் உள்ளிட்ட சான்றிதழ்கள் மக்களுக்கு விரைந்து கிடைக்க நடவடிக்கை மேற்கொள்ளப்பட்டு உள்ளது.  

             கடலூர் ஜவான்ஸ் பவன்- கம்மியம்பேட்டை சாலைத் திட்டத்துக்கான தடையில்லாச் சான்று, பொதுப் பணித் துறையில் இருந்து, நெடுஞ்சாலைத் துறையால் பெறப்பட்டு உள்ளது. ரூ. 1.3 கோடியில் இச்சாலை விரைவில் போடப்படும்.  இத்திட்டத்துக்கு 3 நிதி ஆதாரங்களில் இருந்து நிதி பெற, முயற்சி மேற்கொள்ளப்பட்டு உள்ளது. 

                 வண்டிப்பாளையம் சாலை சரவணன் நகர் இணைப்புச் சாலை திட்டம், இறுதி ஒப்புதலுக்காக நகராட்சிகளின் ஆணையருக்கு அனுப்பி வைக்கப்பட்டுள்ளது.  கல்விக் கட்டணம் தொடர்பாக அனைத்து பள்ளிகளையும் ஆய்வு செய்ய, முதன்மைக் கல்வி அலுவலருக்கு உத்தரவிடப்பட்டு உள்ளது. முதியோர் உதவித் தொகை கோரி அதிக அளவில், விண்ணப்பங்கள் வரத் தொடங்கி இருக்கின்றன.  இந்த விண்ணப்பங்களை 100 சதவீதம் ஆய்வு செய்ய, அரசு வழிகாட்டுதல் எதிர்பார்க்கப்படுகிறது.  

              கடலூர் சில்வர் பீச்சை அழகுபடுத்த ரூ. 1 கோடியில் திட்டம் தயாரிக்கப்பட்டு சுற்றுலாத் துறைக்கு அனுப்பப்பட்டுள்ளது. பிச்சாவரம் சுற்றுலா தலத்தில் அடிப்படை வசதிகளை மேம்படுத்த திட்டம் தயாரித்து அனுப்பி இருக்கிறோம்.  கடலூர் பாதாளச் சாக்கடைத்தில் தோண்டப்படும் சாலைகள் சீரமைப்புப் பணிகள், வடகிழக்கு பருவமழை காலம் தொடங்குமுன் முடிக்கப்படும் என்றார் ஆட்சியர்.







Read more »

வெள்ளி, ஜூன் 17, 2011

கடலூர் வெள்ளிக் கடற்கரை (சில்வர் பீச்) வனப்பகுதியில் திடீர் தீ

கடலூர்:
 
            கடலூர் கடற்கரை வனப் பகுதியில் வியாழக்கிழமை திடீரென தீப்பற்றி பரவியது.  

            கடலூர் கடற்கரையில் தேவனாம்பட்டினம் முதல் அக்கரை கோரி வரை, வனத்துறைக்குச் சொந்தமான வனப்பகுதி உள்ளது. இங்கு சவுக்கு மரங்கள் அதிக அளவில் உள்ளன.  தேவனாம்பட்டினம் அருகில் உள்ள சவுக்குத் தோப்பில், வியாழக்கிழமை திடீரெனத் தீப்பற்றிக் கொண்டது. சவுக்கு மரங்களில் இருந்து உதிர்ந்து கிடக்கும் இலைகள், சருகுகளில் தீப்பற்றி கொழுந்து விட்டு எரியத் தொடங்கியது. 

              சுமார் 5 ஏக்கர் பரப்பளவில் உதிர்ந்து கிடக்கும் சருகுகளில் தீப்பற்றி, மரங்களுக்கும் பரவி வருகிறது.  சவுக்குத் தோப்புக்குள் தீயணைப்பு வண்டிகளும் செல்ல முடியவில்லை. எனவே வனத்துறை ஊழியர்கள், தோப்புக்குள் புகுந்து, கடற்கரை மணலைத் தூவி தீயணை அணைக்கும் முயற்சியில் ஈடுபட்டனர். மற்ற பகுதிகளுக்கு தீ பரவாதவாறு தடுத்து நிறுத்தும் முயற்சியிலும் அவர்கள் ஈடுபட்டனர்.



Read more »

திங்கள், ஜூன் 06, 2011

கடலூர் வெள்ளிக் கடற்கரைக்கு (சில்வர் பீச்) சுற்றுலா வந்த இளைஞர் கடலில் மூழ்கி சாவு

கடலூர்:

      கடலூர் சில்வர் பீச்சுக்கு ஞாயிற்றுக்கிழமை சுற்றுலா வந்த இளைஞர், கடலில் மூழ்கி இறந்தார்.
 
        பெங்களூர் நாராயணபுரத்தைச் சேர்ந்த சேகரின் மகன் பாரத் (23). பெங்களூரில் தனியார் நிறுவனம் ஒன்றில் பணிபுரிந்து வந்தார்.பாரத்தும் அவரது நண்பர்கள் சிலரும், தமிழ்நாட்டில் பல்வேறு ஊர்களுக்குச் சுற்றுலா சென்றனர். ஞாயிற்றுக்கிழமை கடலூர் வந்த அவர்கள், தேவனாம்பட்டினம் சில்வர் பீச்சில் குளிக்கச் சென்றனர். கடலில் குளித்துக் கொண்டு இருந்தபோது பாரத், அலைகளில் சிக்கி தண்ணீரில் மூழ்கினார். உடன் வந்தவர்கள் முயன்றும் அவரைக் காப்பாற்ற முடியவில்லை. சிறிது நேரத்தில் பாரத் உடல் கரை ஒதுங்கியது. சடலத்தை தேவனாம்பட்டினம் போலீசார் கைப்பற்றி, பிரேதப் பரிசோதனைக்காக கடலூர் அரசு மருத்துவமனைக்கு அனுப்பி வைத்தனர்.




Read more »

ஞாயிறு, மே 29, 2011

கடலூர் செம்மண்டலத்தில் புதிய பேருந்து நிலையம்: ஊரக தொழில் துறை அமைச்சர் எம்.சி.சம்பத்

கடலூர் : "

            "கடலூர் செம்மண்டலத்தில் புதிய பஸ் நிலையம் அமைப்பது குறித்து நடவடிக்கை மேற்கொள்ளப்படும்'' என ஊரக தொழில் துறை அமைச்சர் சம்பத் கூறினார். 

கடலூரில் ஊரக தொழில் துறை அமைச்சர் சம்பத் கூறியது: 

              முதல்வர் ஜெயலலிதா ஏழை, எளிய மக்கள் நலன் கருதி 20 கிலோ இலவச அரிசி வழங்கும் திட்டத்தை வரும் 1ம் தேதி துவக்கி வைக்கிறார். கடலூர் மாவட்டத்தில் 6 லட்சத்து 60 ஆயிரம் ரேஷன் கார்டுகள் உள்ளது. இதில் 6 லட்சத்து 38 ஆயிரத்து 525 பேர் 20 கிலோ அரிசி பெறும் பயனாளிகள் ஆவர். இத்திட்டம் கடலூர் மாவட்டத்தில் முதற்கட்டமாக பாதிரிக்குப்பம் ஊராட்சியில் அரசு விழாவாக வரும் 1ம் தேதி நடக்கிறது. 

         கடலூர் நகரில் நடைபாதை சீரமைக்கப்படும். தேவனாம்பட்டினம் சில்வர் பீச்சில் வாகனங்களுக்கு கட்டணம் வசூலிப்பது தவிர்க்கப்படும். ஏற்கனவே அ.தி.மு.க., ஆட்சியில் இருந்தது போல் சில்வர் பீச் புதுப்பித்து படகு குழாம் சீரமைக்கப்படும். கோடை விழா அடுத்த ஆண்டு நடத்த நடவடிக்கை மேற்கொள்ளப்படும். கடலூர் செம்மண்டலத்தில் புதிய பஸ் நிலையம் அமைப்பது குறித்து நடவடிக்கை எடுக்கப்படும். இவ்வாறு அமைச்சர் சம்பத் கூறினார்.



Read more »

வெள்ளி, மே 20, 2011

கடலூர் வெள்ளிக் கடற்கரையில் (சில்வர் பீச்) உடைந்த விளையாட்டு உபகரணங்கள்: சிறுவர்கள் ஏமாற்றம்

 கடலூர் : 

          கடலூர் சில்வர் பீச்சில் உடைந்து கிடக்கும் விளையாட்டு உபகரணங்களை சரி செய்ய அதிகாரிகள் நடவடிக்கை எடுக்க வேண்டும். 

             கடலூர் நகர மக்கள் பொழுது போக்கும் இடமாக தேவனாம்பட்டினம் சில்வர் பீச்சில் உள்ளது. இங்கு சிறுவர்களுக்காக சறுக்கு மரம், ஊஞ்சல் உட்பட பல்வேறு விதமான விளையாட்டு உபகரணங்கள் உள்ளது. இந்த உபகரணங்கள் அனைத்தும் உடைந்த நிலையில் உள்ளது. தற்போது சுட்டெரிக்கும் கத்திரி வெயிலை சமாளிக்க பொதுமக்கள் சில்வர் பீச்சில் மாலை நேரங்களில் குவிந்த வண்ணம் உள்ளனர். கடலின் அழகை குடும்பத்துடன் கண்டு ரசித்து பொழுதை உற்சாகமாக கழித்துச் செல்கின்றனர். ஆனால் பெற்றோருடன் ஆர்வத்துடன் வரும் குழந்தைகள், விளையாட்டு உபகரணங்கள் உடைந்து கிடப்பதால் ஏமாற்றுத்துடன் வீட்டிற்கு செல்கின்றனர்.
 
          சிறுவர்களின் ஏமாற்றத்தை தவிர்க்கும் வகையில் உடைந்து காணப்படும் விளையாட்டு உபகரணங்களையும், ஹைமாஸ் விளக்கையும் சரி செய்ய வேண்டும். பொதுமக்கள் தாங்கள் கொண்டு வரும் திண்பண்டங்களை சாப்பிட்டு விட்டு, அவைகளை எடுத்து வர பயன்படுத்திய பேப்பர், பிளாஸ்டிக் பைகளை அங்கேயே போட்டு விடுகின்றனர். பிளாஸ்டிக் பொருட்கள் காற்றில் பறந்து ஆங்காங்கே சிதறிக் கிடப்பது பொதுமக்களை முகம் சுளிக்க வைக்கிறது. குப்பைகளை அகற்ற நகராட்சி அதிகாரிகள் நடவடிக்கை எடுக்க வேண்டும்.

Read more »

செவ்வாய், மே 03, 2011

கடலூர் வெள்ளிக் கடற்கரையில் (சில்வர் பீச்) கோடை விழா நடத்தப்படுமா?


சில்வர் பீச் உப்பங்கழிப் பகுதியில், சேதமடைந்து காணாமல் போன சுற்றுலாப் படகுத்துறை இருந்த இடம் இதுதான் என அடையாளம் காண்பிக்கும் பனைமரத் தூண்கள்.
கடலூர்:
 
           கடலூர் சில்வர் பீச்சில் இந்த ஆண்டாவது கோடைவிழா நடத்தப்படுமா என்பது கேள்விக்குறியாக உள்ளது. 

              சென்னை மெரீனா கடற்கரைக்கு அடுத்தபடியாக அழகான, நீளமான கடற்கரை என்று வர்ணிக்கப்படுவது சில்வர் பீச். தமிழ்நாடு சுற்றுலாத் துறையின், சுற்றுலாத் தலங்கள் பட்டியலில் கடலூர் தேவனாம்பட்டினம் சில்வர் பீச் இடம்பெறவில்லை. இருப்பினும், கடலூர் மாவட்ட நிர்வாகம் சில்வர் பீச்சை சுற்றுலாத் தலமாக மேம்படுத்தும் முயற்சியில் தொடர்ந்து ஈடுபட்டு வந்திருக்கிறது.  

               அலைகள் தாலாட்டும் நீலநிற வங்கக் கடல், அதன் கரையில் ஆங்காங்கே அமைந்துள்ள மணல் திட்டுகள் மேல் இயற்கையாக வளர்ந்து உள்ள கொடிகளில் கண் சிமிட்டும் ஊதா நிறப் பூக்கள், படகுச் சவாரிக்கு ஏற்ற உப்பங்கழிப் பகுதி, அதன் அருகே சவுக்குத் தோப்புகள், வனத்துறையால் நடப்பட்டு, பராமரிப்பு இன்மையால் சிதைந்து கொண்டு இருக்கும் மாங்ரோவ் காடுகள், இதையடுத்து சிதைந்து கிடக்கும் புனித டேவிட் கோட்டை உள்ளிட்ட ஆங்கிலேயர் காலத்து கட்டடங்கள்.

                இவைகள் தான் வண்ண ஓவியமாய் காட்சி அளிக்கும் சில்வர் பீச்.  சுற்றுலா படகுத் துறை, குழந்தைகள் விளையாட்டுப் பூங்கா, கலையரங்கம், காட்சிக் கோபுரம், அலங்கார செயற்கை நீரூற்று, ஹைமாஸ் விளக்குகள், குடிநீர் வசதி எனப் பல்வேறு பணிகளுக்காக, 2008-ம் ஆண்டு வரை சுமார் ரூ. 1 கோடிக்கு மேல் இங்கு செலவிடப் பட்டது.  2004-ம் ஆண்டு சுனாமியின்போது கடற்கரையியில்  இருந்த காட்சிக் கோபுரம் மண்ணில் புதையுண்டது. 2005-ம் ஆண்டு அது புதுப்பிக்கப்பட்டது. எனினும் தற்போது சிதைந்து பயனற்றுக் கிடக்கிறது. குழந்தைகள் விளையாட்டு பூங்காவில் உள்ள விளையாட்டு உபகரணங்கள் உடைந்து கிடக்கின்றன.

               கடற்கரையில் காற்று வாங்க அமர்வதற்கு வசதியாக போடப்பட்ட இருக்கைகள் சேதம் அடைந்து விட்டன.  ரூ. 10 லட்சத்தில் சுற்றுலா படகுத்துறையில் மரத்தால் அமைக்கப்பட்டு இருந்த இறங்கு தளங்கள் முற்றிலும் சிதைந்து, அதற்காக நடப்பட்ட பனை மரங்கள் மட்டும் வரலாற்றுச் சின்னங்கள் போல் காட்சி அளிக்கின்றன. ÷சுற்றுலாப் படகுகள் அனைத்தும் உப்பங்கழி அருகே கவிழ்த்துப் போடப்பட்டுள்ளன. பல ஆண்டுகளுக்கு முன் என்.எல்.சி. நிர்வாகம் அமைத்துக் கொடுத்த மின் விளக்கு கோபுரங்கள் பராமரிப்பு இன்மையால், வெளிச்சத்துக்குப் பதில் இருளை அள்ளித் தெளித்துக் கொண்டு இருக்கின்றன. 

            2001-ம் ஆண்டு ரூ.5 லட்சத்தில் என்.எல்.சி. நிர்வாகம் அமைத்துக் கொடுத்த பூங்கா இருந்த இடம் தெரியாமல் மறைந்து போயிற்று.  சுனாமியில் சிதைந்து போன சில்வர் பீச் புறக்காவல் நிலையத்துக்குப் பதில், அழகான புறக்காவல் நிலையம், மாடியில் சிற்றுண்டிச் சாலை, அதற்கு மேல் கடலின் அழகை ரசிக்க, காட்சிக் கோபுரம் என ராஜஸ்தான் அரசு கட்டிக் கொடுத்து இருந்தது. தற்போது இக் கட்டடத்தை காவல் துறை முழுமையாக ஆக்கிரமித்துக் கொண்டு, போலீஸ் அதிகாரிகளின் ஓய்வறையாக மாற்றி இருப்பதன் மூலம் சில்வர் பீச் கேட்பாரற்றுக் கிடக்கிறது என்பதை உறுதிப்படுத்த முடிகிறது. 

               ஆண்டுதோறும் 5 நாள் வரை விமரிசையாகக் கொண்டாடப்பட்டு வந்த சில்வர் பீச் சுற்றுலா கோடை விழாவும், 2008-ம் ஆண்டுடன் நின்று போயிற்று. இந்த ஆண்டாவது கோடை விழா நடைபெறுமா என்று அரசு அதிகாரிகளைக் கேட்டதற்கு, தேர்தல் பணியில் இருந்து விட்டால் போதும் என்ற நிலையில் இருக்கிறோம். அரசு அலுவலகங்கள் எதுவும் இயங்கவில்லை. நிலைமை இப்படியிருக்க, கோடை விழா பற்றி சிந்திக்க எங்கே நேரம் இப்போதைக்கு வாய்ப்பே இல்லை. புதிய அரசு அமையட்டும் அதன்பிறகு பார்க்கலாம் என்று தெரிவிக்கிறார்கள்.  இந்நிலையில் சில்வர் பீச்சுக்கு வரும் பொதுமக்களிடம், வாகனக் கட்டணம் வசூல் மட்டும் எவ்விதத் தடையும் இன்றி நடந்து கொண்டிருக்கிறது. 

Read more »

செவ்வாய், ஏப்ரல் 19, 2011

கடலூர் கடற்கரையில் சித்ரா பவுர்ணமியையொட்டி மக்கள் நிலா சோறு சாப்பிட்டனர்



சித்ரா பவுர்ணமியையொட்டி கடற்கரையில் குவிந்த மக்கள்; 

குடும்பத்துடன் நிலா சோறு சாப்பிட்டனர்
 
கடலூர்:

             சித்திரை மாதம் வரும் பவுர்ணமி சிறப்பு வாய்ந்த ஒன்றாகும். மனிதர்களின் பாவம், புண்ணிய கணக்கினை எழுதும் சித்திர, குப்தன் ஆகியோரின் பிறந்தநாளாகவும் இந்நாள் குறிப்பிடப்படுகிறது. இத்தகைய நாளில் அவரை வழிப்பட்டால் மனிதர்களின் பாவங்கள் நீங்கும் என்பது ஐதீகமாகும். மேலும் இந்நாளில் ஈஷ்வரனுக்கு மரிக்கொழுந்தை கொண்டு அபிஷேகம் செய்தால் நன்மைகிடைக்கும்.
 
                       எனவே இந்நாளை முன்னிட்டு கடலூர் நகரில் உள்ள பெரும்பாலான கோவில்களில் சிறப்பு பூஜைகள் நடைபெற்றது. இதில் ஏராளமானவர்கள் கலந்து கொண்டு தங்களது வேண்டுதல் நிறைவேறுவதற்காக பால்குடம், மாவிளக்கு, காவடி போன்றவைகளை எடுத்து தங்களது நேர்த்திக்கடனை செலுத்தியதை காணமுடிந்தது.

               கடலூர் தேவனாம்பட்டினம் கடல் நீர் மட்டத்தில் இருந்து எழும் நிலவினை பார்ப்பதற்காக மாலையில் இருந்தே ஏராளமானவர்கள் தங்களது குடும்பத்துடன் சில்வர் பீச்சுக்கு வந்திருந்தனர். இதனால் நேற்று கடற்கரையில் திருவிழா கூட்டம் போல் மக்கள் கூட்டம் இருந்தது. மேலும் பொதுமக்களோடு கடலூர் மாவட்ட கலெக்டர் சீத்தாராமனும் குடும்பத்துடன் வந்து கலந்து கொண்டார்.

               அவர் கடற்கரை மணலில் அமர்ந்தபடி சித்திரை பவுர்ணமியை கண்டுகளித்தார். சித்ராபவுர்ணமியின் போது கடற்கரையில் அமர்ந்து நிலா சோறு சாப்பிடுவது வழக்கம். எனவே இங்கு வந்தவர்களின் பெரும்பாலானவர்கள் நிலா சோறு சாப்பிடுவதற்காக வீட்டில் இருந்தே தங்களது கையில் இரவு உணவை எடுத்து வந்திருந்தார்கள்.

               இவர்கள் அனைவரும் தங்களது குடும்பத்துடன் கடற்கரையில் ஒன்றாக உட்கார்ந்து நிலவொளியில் உணவினை சாப்பிட்டதை காணமுடிந்தது. கடற்கரையில் கூட்டம் அதிகமாக இருந்ததால் இதனை கட்டப்படுத்துவதற்காக போலீசார் பாதுகாப்பு பணியில் ஈடுபட்டுத்தப் பட்டிருந்தனர்.

Read more »

வியாழன், பிப்ரவரி 24, 2011

களையிழந்த கடலூர் சில்வர் பீச்

கடலூர்:

              நகராட்சி உள்ளிட்ட துறைகளின் அலட்சியம் காரணமாக, கடலூர் சில்வர் பீச் களையிழந்து காணப்படுகிறது.  

                கடலூர் மாவட்டத்தின் சுற்றுலாத் தலங்களில் சில்வர் பீச்சும் ஒன்றாகக் கருதப்படுகிறது. இதன் காரணமாகத்தான் 4 ஆண்டுகளுக்கு முன்பு வரை, கடலூர் சில்வர் பீச் வளர்ச்சிப் பணிகளுக்காக, ஆண்டுதோறும் லட்சக்கணக்கான பணம், பல்வேறு துறைகள் சார்பில் செலவிடப்பட்டு வந்தது. ஆனால் அண்மைக் காலமாக ஏற்கெனவே செய்யப்பட்ட பணிகளை முறையாக பராமரிக்காமலும், புதிய திட்டங்கள் எதுவும் செயல்படுத்தாமலும், சில்வர் பீச் புறக்கணிக்கப்பட்டும் கேட்பாரற்றும் கிடக்கிறது.  

                ஆனால் கடற்கரைப் பக்கம் தலைகாட்டும் இரு சக்கர, நான்கு சக்கர வாகனங்களுக்கு கட்டணம் வசூலிப்பதில் மட்டும் நகராட்சி நிர்வாகம் தொடர்ந்து மும்முரமாக ஈடுபட்டு வருகிறது. கடற்கரையை வந்து எட்டிப் பார்த்துத் திரும்பினாலே போதும் கட்டணத்தக் கரந்து விடுகிறார்கள்.  இங்கு கடைபோடும் வணிகர்களுக்கும் கட்டணம் உண்டு. கடலூர் மக்களின் ஒரே பொழுதுபோக்கு அம்சம் தேவனாம்பட்டினம் சில்வர் பீச் தான். அதுவும் கோடைக்காலம் நெருங்கி விட்டால், கடலூர் மக்கள் பலரும் நாடும் ஒரே இடம் இக்கடற்கரைதான்.  

                      அண்மைக் காலமாக சில்வர் பீச் பராமரிப்புக்கு அப்பார்ப்பட்ட இடமாகக் காட்சி அளிக்கிறது. 18-ம் தேதி மாசி மகத் திருவிழாவுக்கு வந்த மக்கள் கூட்டம், அவர்களை நம்பி பொருள்களை கடைவிரித்த சிறு வணிகர்கள் அனைவரும் சேர்ந்து, கடற்கரையை அசுத்தத்தின் உயர் எல்லைக்குக் கொண்டு சென்று விட்டனர்.  இதனால் மெரீனாவுக்கு அடுத்த அழகான கடற்கரை என்ற பெயர் பெற்ற சில்வர் பீச் இன்று, அலங்கோலமாகக் காட்சி அளித்துக் கொண்டு இருக்கிறது. சுற்றுலாப் பயணிகளுக்கான படகு குழாம், இருந்த இடம் தெரியாமல் சிதைந்து கிடக்கிறது.  

              குப்பைகளை அகற்ற தற்போது புதிய கலாசாரம் சில்வர் பீச்சில் உருவாகி இருக்கிறது. கரும்புச்சாறு பிழிந்த சக்கைகள், பாலித்தீன் பைகள் போன்றவற்றை ஆங்காங்கே போட்டு தீயிட்டு எரிக்கத் தொடங்கி இருக்கிறார்கள்.  இதனால் சில்வர் பிச் விரைவில் எரி சாம்பல்கள் நிறைந்த கருப்பு நிறக் கடற்கரையாக மாறும் அபாயம் உருவாகிக் கொண்டு இருக்கிறது. கடலூர் நகருக்கு உள்ளேயே நகராட்சி துப்புரவுத் தொழிலாளர்கள், விதிகளுக்கு மாறாகக் குப்பைகளை தெருக்களிலேயே எரிக்கும் வேலைதான் செய்கிறார்கள்.  

               அந்தக் கலாசாரம்தான் சில்வர் பீச்சுக்கும் பரவியிருப்பதாக பொதுமக்கள் கவலை தெரிவிக்கிறார்கள். அவ்வப்போது சில்வர் பீச் அசுத்தம் அடையும் போதெல்லாம், ஏதேனும் தொண்டு நிறுவனங்கள்தான் முன்வந்து, சுத்தம் செய்து வருகின்றன. தற்போதும் மாசி மகத் திருவிழாவுக்குப் பின் அலங்கோலமாகக் காட்சிதரும் சில்வர் பீச், தன்னை அழகுபடுத்திக் கொள்ள, மீண்டும் ஒரு தொண்டு நிறுவனத்தைத் தேடிக் கொண்டு இருக்கிறதோ?

Read more »

செவ்வாய், ஜனவரி 25, 2011

கடலூர் தேவனாம்பட்டினம் சில்வர் பீச்சைசுத்தம் செய்த கந்தசாமி நாயுடு மகளிர் கல்லூரி மாணவிகள்

கடலூர்:

            கடலூர் தேவனாம்பட்டினம் சில்வர் பீச்சை, கடலூர் கல்லூரி மாணவிகள் சனிக்கிழமை சுத்தம் செய்தனர்.  

           உப்பங்கழிகள், சவுக்குத் தோப்புகள், மணல் குன்றுகள், பூங்கா, குழந்தைகளுக்கான விளையாட்டு உபகரணங்கள் மற்றும் படகுத் துறையுடன் அழகிய தோற்றம் கொண்டது, கடலூர் தேவனாம்பட்டினம் சில்வர் பீச்.  வடகிழக்குப் பருவமழை காலத்தில் இக்கடற்கரை கெடிலம் ஆற்று வெள்ளப்பெருக்காலும் ராட்சத அலைகளாலும் சிதைந்து காணப்பட்டது.  

          அத்துடன் பொங்கல் பண்டிகையின் வரவைத் தொடர்ந்து, கடற்கரைக்கு வரும் மக்கள் கூட்டம் அதிகரித்ததால், கடற்கரை முற்றிலும் அசுத்தமாகி விட்டது. பாலித்தீன் பைகள், காகிதக் குப்பைகள் நிறைந்து காணப்பட்டன.  இதைச் சுத்தம் செய்யும் பணியை கடலூர் இளைஞர் எக்ஸ்னோரா சனிக்கிழமை மேற்கொண்டது.  இப்பணியை மாவட்டக் காவல் கண்காணிப்பாளர் அஸ்வின் கோட்னீஸ் தொடங்கி வைத்தார். 

            நிகழ்ச்சிக்கு, மாவட்ட தொழில் வர்த்தக சங்கத் தலைவர் டி.சண்முகம் முன்னிலை வகித்தார்.  புனித வளனார் கல்லூரி பேராசிரியை ஜெயந்தி ரவிச்சந்திரன், சி.கந்தசாமி நாயுடு மகளிர் கல்லூரி நாட்டு நலப்பணித்திட்ட அலுவலர் பேராசிரியை சாந்தி உள்ளிட்டோர் கலந்து கொண்டனர்.  ÷கடற்கரையைச் சுத்தம் செய்யும் பணியில், கந்தசாமி நாயுடு மகளிர் கல்லூரி மாணவிகள் 100 பேர் ஈடுபட்டனர்.

Read more »

புதன், ஜனவரி 05, 2011

கடலூர் சில்வர் பீச் புதுப்பிக்கப்பட்ட புறக்காவல் நிலையம் திறப்பு

கடலூர்:

             புதுப்பிக்கப்பட்ட கடலூர் சில்வர் பீச் புறக்காவல் நிலையத்தை, கடலூர் மாவட்டக் காவல் கண்காணிப்பாளர் அஸ்வின் கோட்னீஸ் அண்மையில் திறந்து வைத்தார். 

              கடலூர் சில்வர் பீச் புறக்காவல் நிலையம், தரைத்தளத்திலும் முதல் தளத்தில் ஹோட்டலும் இருந்தது. சுனாமியின்போது புறக்காவல் நிலையம் பலத்த சேதமடைந்தது. அதன்பிறகு புதுப்பிக்கப்பட்டது. முதல் தளம் பயன்படுத்தப்படாமல் இருந்தது.  இந்த முதல் தளம் தற்போது நவீனப்படுத்தப்பட்டு, போலீஸ் அதிகாரிகள் தங்கும் விடுதியாக மாற்றி அமைக்கப்பட்டு உள்ளது.

                புறக்காவல் நிலையம் முன் அழகிய  புல்வெளி அமைக்கப்பட்டு உள்ளது. தங்கும் விடுதியுடன் கூடிய புதுப்பிக்கப்பட்ட சில்வர் பீச் புறக்காவல் நிலையத்தை, மாவட்டக் காவல் கண்காணிப்பாளர் வெள்ளிக்கிழமை திறந்து வைத்தார்.  நிகழ்ச்சியில் கடலூர் போலீஸ் துணைக் கண்காணிப்பாளர் பாண்டியன் உள்ளிட்டோர் கலந்துகொண்டனர்.

Read more »

திங்கள், டிசம்பர் 27, 2010

கடலூர் மாவட்டத்தில் சுனாமியால் பாதித்த சிறுவர்களின் கல்விக்கு ரூ.1.13 கோடி செலவிடப்பட்டுள்ளது: கலெக்டர் சீத்தாராமன்

கடலூர்:
 
            சுனாமியில் பெற்றோரை இழந்த 222 ஆதரவற்ற சிறுவர்களின் கல்விக்காக இதுவரை ஒரு கோடிய 13 லட்சத்து 22 ஆயிரம் ரூபாய் உதவித் தொகை வழங்கப்பட்டுள்ளது என கலெக்டர் தெரிவித்துள்ளார்.

              மாவட்ட நிர்வாகம் சார்பில் நேற்று கடலூர் தேவனாம்பட்டினம் சில்வர் பீச்சில் உள்ள சுனாமி நினைவு தூணில் கலெக்டர் சீத்தாராமன் மலர் வளையம் வைத்து அஞ்சலி செலுத்தினார்.நிகழ்ச்சியில் எஸ்.பி., அஷ்வின் கோட்னீஸ், டி.ஆர்.ஓ., நடராஜன், சேர்மன் தங்கராசு, துணை சேர்மன் தாமரைச்செல்வன், நகராட்சி கமிஷனர் இளங்கோவன், டி.எஸ்.பி., பாண்டியன், மாவட்ட செய்தி மக்கள் தொடர்பு அதிகாரி முத்தையன் உள்ளிட்டோர் உடனிருந்தனர்.பின்னர் கடலூர் அரசு சேவை இல்ல வளாகத்தில் உள்ள சுனாமி காப்பகத்தில் தங்கி படித்து வரும் சுனாமியில் பெற்றோரை இழந்த ஆதரவற்ற சிறுவர்களுடன் அஞ்சலி செலுத்தினர். காப்பக சிறுவர்களுக்கு கலெக்டர் சீத்தாராமன் தனது சொந்த செலவில் சால்வை மற்றும் புத்தகங்களை வழங்கினார்.

பின்னர் கலெக்டர் சீத்தாராமன் கூறுகையில், 

                "சுனாமியால் பாதிக்கப்பட்ட குடும்பங்களுக்கு மத்திய, மாநில அரசுகள் சார்பில் தலா ஒரு லட்சம் ரூபாய் இழப்பீட்டு தொகை வழங்கப்பட்டது. சுனாமியில் வீடு உள்ளிட்ட உடமைகளை இழந்தவர்களுக்கு ராஜிவ்காந்தி மறுவாழ்வு புனரமைப்பு திட்டத்தில் 1,589 வீடுகளும், பல்வேறு தொண்டு நிறுவனங்கள் மூலம் 5,090 வீடுகள் கட்டிக் கொடுக்கப்பட்டுள்ளது. பெற்றோரை இழந்த 222 ஆதரவற்ற சிறுவர்களின் கல்விக்காக இதுவரை ஒரு கோடிய 13 லட்சத்து 22 ஆயிரம் ரூபாய் உதவித் தொகை வழங்கப்பட்டுள்ளது.

                மேலும், கடற்கரைக்கு 1,000 மீட்டருக்குள் இயற்கை இடர்பாடுகளை தாங்க முடியாத நிலையில் உள்ள 351 வீடுகளை உலக வங்கி நிதியுதவியுடன் கான்கிரீட் வீடு கட்டிக் கொடுக்கப்பட உள்ளது. ஐதராபத்தில் உள்ள சுனாமி ஆய்வு மையம் சுனாமி எச்சரிக்கை விடுத்தால் அதனை உடனடியாக மீனவ கிராமங்களுக்கு தகவல் தெரிவிக்க ஒயர்லஸ் கருவி வசதி ஏற்படுத்தப்பட்டுள்ளது. மேலும், தடையில்லா தகவல் பரிமாற்றத்திற்கு வசதியாக நெய்வேலியில் பன்பலை வானொலி நிலையம் அமைக்க அரசுக்கு பரிந்துரைக்கப்பட்டுள்ளது' என்றார்.

Read more »

புதன், டிசம்பர் 08, 2010

நெடுஞ்சாலைத் துறை வளாகத்தில் நண்டுவாக்களிகள் பிடிபட்டன



கடலூர் : 

             கடலூர் நெடுஞ்சாலைத் துறை வளாகத்தில், தினமலர் செய்தி எதிரொலியால் புதர்கள் அகற்றப்பட்ட போது நண்டுவாக்களி மற்றும் பாம்புகள் பிடிபட்டன.

              கடலூர் பீச் ரோட்டில் உள்ள நெடுஞ்சாலைத்துறை வளாகத்தில் கோட்டப் பொறியாளர், உதவி கோட்டப் பொறியாளர், உதவி பொறியாளர் அலுவலகங்கள் இயங்கி வருகின்றன. இதில் கோட்டப் பொறியாளர் அலுவலகம் பழமையான கட்டடம் என்பதாலும், மேல் தளத்தில் அதிகளவில் இலைச் சருகுகள் இருந்ததாலும் தண்ணீர் தேங்கி கட்டடத்தினுள் கசிந்தது. மேலும், இக்கட்டடத்தைச் சுற்றிலும் மரங்கள், செடி, கொடிகள் வளர்ந்து புதர் மண்டிக் கிடந்தன. 

                   புதர்களில் இருந்து வரும் பாம்புகள் அலுவலகத்தில் படையெடுக்க துவங்கியதால் அதிகாரிகள் மற்றும் ஊழியர்கள் அச்சத்திலேயே பணிபுரிந்து வந்தனர். இதையடுத்து, பொறியாளர் அலுவலக வளாகத்தை சுற்றிலும் இருந்த மரங்கள், செடி, கொடிகளை பொக்லைன் இயந்திரம் மூலம் அதிரடியாக அகற்றும் பணியில் ஈடுபட்டனர். பின், பாம்புகளை பிடிக்க கடலூர் மஞ்சக்குப்பத்தைச் சேர்ந்த பூனம் சந்த் வரவழைக்கப்பட்டார். இவர் எட்டு காளியாங்குட்டி பாம்புகளை பிடித்தார். இவை அனைத்தும் இரண்டரை அடி முதல் மூன்றடி நீளம் வரை இருந்தன. மேலும், 40 நண்டுவாக்களிகளும் பிடிபட்டன.

Read more »

வியாழன், டிசம்பர் 02, 2010

தேவனாம்பட்டினம் சில்வர் பீச் புறக்காவல் நிலையம் அழகுப்படுத்தும் பணி

கடலூர் : 

            தேவனாம்பட்டினம் சில்வர் பீச் புறக்காவல் நிலையம் அழகுப்படுத்தும் பணி நடந்து வருகிறது. கடலூர் தேவனாம்பட்டினம் சில்வர் பீச் வளாகத்தில் புறக்காவல் நிலையம் இயங்கி வந்தது. 

                  கடந்த 2004ம் ஆண்டு ஏற்பட்ட சுனாமி ஆழிப்பேரலையின் போது, இந்த புறக்காவல் நிலையம் முற்றிலுமாக சேதமடைந்தது. பின், அதே இடத்தில் புறக்காவல் நிலையம் புதியதாக அமைக்கும் பணி முடிவடைந்து, மீண்டும் செயல்படத் துவங்கின. இதையடுத்து புறக்காவல் நிலையத்தை அழகுப்படுத்த எஸ்.பி., அஷ்வின் கோட்னீஸ் முயற்சி மேற்கொண்டார். இதன் ஒரு பகுதியாக காவல் நிலைய வளாகத்தில் புற்கள் பதிக்கும் பணி நடந்து வருகிறது. மேலும், நுழைவு வாயிலில் இரண்டு பீரங்கிகள் அமைக்கப்பட்டு, அழகுப்படுத்தும் பணி தீவிரமாக நடந்து வருகிறது.

Read more »

நண்பர்களோடு பகிர்ந்து கொள்ள

Country wise Vistior