விருத்தாசலத்தில் கரும்பு சாறிலிருந்து பானம் தயாரித்தல் பயிற்சி

விருத்தாசலம் : 

        விருத்தாசலம் வேளாண்மை அறிவியல் நிலையத்தில் கரும்பு சாறிலிருந்து பதப்படுத்தப்பட்ட பானம் தயாரித்தல் பயிற்சி வழங்கப்பட உள்ளது.

இதுகுறித்து விருத்தாசலம் வேளாண்மை அறிவியல் நிலைய தலைவர் சுப்ரமணியன் விடுத்துள்ள செய்திக்குறிப்பு: 

         விருத்தாசலத்தில் தமிழ்நாடு வேளாண் பல்கலைக் கழகத்தின் கீழ் அமைந்துள்ள வேளாண்மை அறிவியல் நிலையத்தில் இம்மாதம் இரண்டாம் வாரத்தில் கரும்பு சாறிலிருந்து பதப்படுத்தப்பட்ட பானம் தயாரித்தல் பயிற்சி வழங்கப்பட உள்ளது. 

                கடலூர் மாவட்டத்தைச் சேர்ந்த பண்ணை சுயஉதவிக் குழுக்கள், சுயதொழில் செய்ய ஆர்வமுள்ளவர்கள், தொழில் முனைவோர் ஆகியோருக்கு இப்பயிற்சி அளிக்கப்படுகிறது. பயிற்சிக்கு முதலில் வரும் நபர்கள் மட்டுமே தேர்வு செய்யப்படுவதால், கலந்து கொள்ள ஆர்வம் உள்ளவர்கள் விருத்தாசலம் வேளாண்மை அறிவியல் நிலையத்திற்கு நேரிடையாக வந்து தங்களது பெயரை பதிவு செய்யுமாறு கேட்டு கொள்ளப்படுகிறார்கள். இவ்வாறு செய்திக்குறிப்பில் கூறப்பட்டுள்ளது.

Read more »

அசோலா உற்பத்தி முறைகள்

விருத்தாசலம் வேளாண் அறிவியல் நிலையத்தில், தொட்டியில் வளர்க்கப்படும் அசோலா.

 

விருத்தாசலம்: 

 

             அசோலா ஓர் உன்னத கால்நடை மற்றும் கோழித்தீவனமாக பயன்படுத்தப்பட்டு வருகிறது. விவசாயிகள் அசோலாவைத் தங்கள் தோட்டங்களிலேயே வளர்த்து கால்நடை மற்றும் கோழிகளுக்கு தீவனமாக வழங்குவதன் மூலம் நல்ல உற்பத்தி பெறலாம். 

 

 இதுகுறித்து விருத்தாசலம் வேளாண்மை அறிவியல் நிலைய தலைவர் க. சுப்பிரமணியன் மற்றும் உதவிப் பேராசிரியர் வெ. தனுஷ்கோடி கூறியது: 

 

              "அசோலா தண்ணீரில் மிதக்கக்கூடிய பெரணி வகையைச் சேர்ந்த தாவரமாகும். இதை விவசாயிகள் உயிர் உரமாக நெல் வயலுக்கு பயன்படுத்தி வருகின்றனர்.  சமீபகாலமாக அசோலா ஓர் உன்னத கால்நடை மற்றும் கோழித்தீவனமாகவும் பயன்படுத்தப்பட்டு வருகிறது. இதில் 25 முதல் 30 விழுக்காடு வரை புரதச்சத்து உள்ளது. கால்நடைகளுக்குத் தேவையான அமினோ அமிலங்கள், தாது உப்புகள், வைட்டமின்கள் மற்றும் பீட்டாகரோடின் ஆகிய சத்துகள் இதில் உள்ளன. பீட்டாகரோடின் நிறமியானது வைட்டமின் ஏ உருவாவதற்கு மூலப்பொருளாக உள்ளது. இச்சத்து உள்ளமையால் கோழிகளுக்கு நோய் எதிர்ப்புச் சத்து அதிகரிப்பதோடு மட்டுமல்லாமல் அசோலா சாப்பிட்ட கோழியின் முட்டைகளை நாம் உண்பது கண்பார்வைக்கு நல்லது.  

 

அசோலா உற்பத்தி முறைகள்: 

 

             நிழல்பாங்கான இடத்தில் 10 அடி நீளம், 2 அடி அகலம், 1 அடி ஆழம் கொண்ட பாத்தி அமைத்து, பாத்தியின் அடித்தளத்தில் சில்பாலின் காகிதத்தை சீராக விரிக்கவும். பாலீத்தீன் காகிதத்தின் மேல் 2 செ.மீ. அளவுக்கு மண் இட்டு சமப்படுத்தவும். இதன்மேல் 2 செ.மீ. அளவுக்கு தண்ணீர் ஊற்றவும். பின் பாத்தி ஒன்றுக்கு 100 கிராம் சூப்பர் பாஸ்பேட் மற்றும் 5 கிலோ அசோலா தாய் வித்து இடவேண்டும். நாள்தோறும் காலை அல்லது மாலை வேளையில் பாத்தியில் உள்ள மண்ணை நன்கு கலக்குவதால் மண்ணில் உள்ள சத்துகள் தண்ணீரில் கரைத்து அசோலாவிற்கு எளிதாக கிடைக்கும்.  15 நாள்களில் ஒரு பாத்தியில் (10ஷ் 2ஷ் 1 அடி) 30 முதல் 50 கிலோ அசோலா தாயாராகி விடும். மூன்றில் ஒரு பங்கு அசோலாவை பாத்தியிலேயே விட்டு எஞ்சிய 2 பகுதியை அறுவடை செய்யலாம். 10 நாள்களுக்கு 1 முறை பசுஞ்சாணம் கரைப்பது நல்லது. பூச்சித்தொல்லை வந்தால் 5 மில்லி வேப்பெண்ணையை 1 லிட்டர் தண்ணீரில் கலந்து பாத்தியில் தெளிக்கவும். அசோலாவின் உற்பத்தி கோடை காலங்களில் சிறிது குறைந்தும், மழைக்காலங்களில் அதிகரித்தும் காணப்படும். மூன்று அல்லது நான்கு பாத்திகள் அமைத்து தினமும் அசோலாவை அறுவடை செய்து கால்நடை மற்றும் கோழிகளுக்குச் சத்து நிறைந்த சுவைமிகுந்த உணவாகப் பயன்படுத்தலாம்.  அசோலாவை பச்சையாகவோ அல்லது உலர் தீவனமாகவோ கால்நடை மற்றும் கோழிகளுக்குப் பயன்படுத்தலாம். அசோலாவை பச்சைத் தீவனமாக முதன் முதலாகப் பயன்படுத்தும் பொழுது கால்நடைகள் அவற்றை உண்பதற்கு தயக்கம் காட்டலாம். ஆகையால் ஆரம்பகட்டத்தில் அசோலாவைத் தவிடு, புண்ணாக்கு அல்லது பிற அடர் தீவனத்துடன் கலந்து மாடுகளுக்குத் தீவனமாகப் பழக்கப்படுத்த வேண்டும்.  

 

அசோலாவின் பயன்கள்: 

 

             அசோலாவை உண்ணும் கோழி முட்டையின் எடை, அல்புமின், குளோபுலின் மற்றும் கரோடின் அளவு, அடர் தீவனம் மட்டும் இடப்பட்ட கோழி முட்டையின் சத்தைவிட அதிகமாக உள்ளது.  இந்தியாவில் வேளாண்மையும் கால்நடை வளர்ப்பும் ஒருங்கிணைந்து பின்பற்றப்படுகிறது. அசோலா குறைந்த செலவுள்ள இடுபொருளாக கால்நடை வளர்ப்பில் பயன்படுகிறது. மேலும், நெல் விளைச்சலில் இயற்கை உரமாக செயல்பட்டு மண்ணின் தரத்தை மேம்படுத்துகிறது. 

 

             எனவே, அசோலா ஒருங்கிணைந்த பண்ணையத்தில் மிக முக்கியமான இடு பொருளாகும். பெரணி தாவரமான அசோலாவின் வளர்ச்சிக்கு மிதமான வெப்பநிலையான 35-36 டிகிரி செல்சியஸ் வெப்பம் தேவைப்படுகிறது. ஆகையால் உயர்ந்த வெப்பநிலையில் அசோலாவின் வளர்ச்சி தடைபடுவதால் உற்பத்தி குறைகிறது. ஆகவே, மிகவும் வறண்ட பகுதியில் இந்த தொழில்நுட்பத்தைப் பின்பற்றுவது கடினமாகும்.  

 

 

 

Read more »

மஞ்சள் சாகுபடி முறை

கடலூர் மாவட்டம் அடரியை அடுத்த கொளவாய் கிராமத்தில் அறுவடை செய்யப்பட்டுள்ள மஞ்சள்.

 

விருத்தாசலம்:

 

              நீர்வள, நிலவள திட்டத்தின்கீழ் கோமுகி நதி உபவடி நிலப் பகுதி விவசாயிகளுக்கு மஞ்சள் பயிர் சாகுபடிக்கு அரசு 65% மானியமாக வழங்குகிறது.

 

இதுகுறித்து கடலூர் மாவட்டம் விருத்தாசலம் வேளாண்மை அறிவியல் நிலைய உதவிப் பேராசிரியர் அருட்செந்தில் தெரிவித்தது:

 

             தமிழகத்தில் உள்ள 63 ஆற்றுப்படுகை பகுதியில் பாசனப் பரப்பை அதிகப்படுத்தும் வகையில் உலக வங்கி நிதி உதவியுடன் தமிழ்நாடு அரசு நீர்வள, நிலவள திட்டத்தை செயல்படுத்தி வருகிறது. அதன்படி கோமுகி நதி பாயும் கடலூர், விழுப்புரம், சேலம் மாவட்டப் பகுதிகளில் மஞ்சள் உற்பத்தியை அதிகப்படுத்தும் வகையில் அரசு 65 சதவீத மானியம் வழங்குகிறது.

 

நேர்த்தி முறைகள்: 

 

               நல்ல வடிகால் வசதியுள்ள, மணற்பாங்கான செம்மண், வண்டல் மண் ஆகியன மஞ்சள் பயிரிட ஏற்ற மண்ணாகும். களர் அல்லது நீர் தேங்கும் மண் நிலங்கள் மஞ்சள் பயிரிடுவதற்கு ஏற்ற மண் அல்ல.

 

நடவு வயல் தயாரிப்பு முறைகள்: 

 

              மஞ்சள் பயிரிடும் நிலத்தை உளி கலப்பையால் நன்கு உழவு செய்து இதை தொடர்ந்து சட்டிக் கலப்பை மூலம் உழுது, கொக்கி கலப்பை கொண்டு 3 முறை உழவு செய்யவேண்டும்.1 ஹெக்டேருக்கு 30 டன்கள் என்ற அளவில் தொழு உரம், சூப்பர் பாஸ்பேட் 281 கிலோ ஆகியவற்றை கலந்து அடி உரமாக இடவேண்டும். அசோஸ்பைரில்லம், பாஸ்போ பாக்டீரியா இரண்டும் முறையே 10 கிலோ வீதம் 100 கிலோ தொழு உரத்துடன் கலந்து இடவேண்டும். வேப்பம் பிண்ணாக்கு அல்லது கடலைப் பிண்ணாக்கு ஒரு ஹெக்டேருக்கு 200 கிலோ என்ற அளவிலும், பெரஸ் சல்பேட் 30 கிலோ மற்றும் துத்தநாக சல்பேட் 15 கிலோ என்ற அளவிலும் அடி உரமாக இடுவது சிறப்பானதாகும். 4 அடி அகலமும், 1 அடி உயரமும் கொண்ட மேட்டுப் பாத்திகளை அமைத்து சொட்டுநீர்ப் பாசன பக்கவாட்டு இணை குழாய்கள் மேட்டுப் பாத்தியின் மையத்தில் இருக்குமாறு வைக்க வேண்டும். 

 

விதை ஊன்றுதல், நடவு இடைவெளி முறை: 

 

            மஞ்சள் பயிர் ஒரு ஹெக்டேருக்கு, நன்கு முதிர்ச்சியடைந்த ஆரோக்கியமான நோய்த் தாக்குதல் இல்லாத விதை மஞ்சள் 2,000 கிலோ தேவை. கிழங்குகளை அசோஸ்பைரில்லம், பாஸ்போ பாக்டீரியா ஒவ்வொன்றும் 10 கிலோ என்ற அளவில் பயன்படுத்தி விதை நேர்த்தி செய்யவேண்டும்.விதை நடுவதற்கு அரை மணி நேரத்துக்கு முன்பாக கார்பன்டாசிம், 1 கிலோ விதைக்கு 10 கிராம் என்ற அளவில் நனைத்து பின்பு உலர்த்தி நடவு செய்யவேண்டும். விதை ஊன்றுவதற்கு 8-12 மணி நேரம் முன்பாக மேட்டுப் பாத்திகளை சொட்டுநீர்ப் பாசனம் மூலம் முழுவதுமாக நனைக்க வேண்டும். விதைகளை மேட்டுப்பாத்தியில் 3 வரிசை முறையில் 60ஷ்45ஷ்15 செ.மீ. என்ற இடைவெளியில் 4 செ.மீ. ஆழத்தில் ஊன்ற வேண்டும். 

 

மஞ்சள் அறுவடை: 

 

         மஞ்சள் விதைத்த 9-வது மாதம் இலைகள் பழுத்து காய்ந்து மடியத் தொடங்கும்போது அறுவடை செய்ய வேண்டும். 1 ஹெக்டேருக்கு 7முதல் 9 டன்கள் வரை பதப்படுத்தப்பட்ட மஞ்சள் கிடைக்கும். இதுகுறித்து மேலும் தகவலுக்கு விருத்தாசலம் வேளாண்மை அறிவியல் நிலையத்தை தொடர்புகொள்ளலாம் என அறிவிக்கப்படுகிறது.

 

 

 

Read more »