தமிழகத்தில் 42 லட்சம் சர்க்கரை நோயாளிகள்

             தமிழகத்தில் 42 லட்சம் பேருக்கு சர்க்கரை நோய் பாதிப்பு உள்ளது என சென்னை சர்க்கரை நோய் ஆராய்ச்சி மையத்தின் ஆய்வு மூலம் தெரியவந்துள்ளது.

                 இந்திய மருத்துவ ஆராய்ச்சிக் கவுன்சிலுடன் (ஐசிஎம்ஆர்) இணைந்து கோபாலபுரம் டாக்டர் மோகன்ஸ் சர்க்கரை நோய் சிறப்பு மருத்துவமனையின் சென்னை சர்க்கரை நோய் ஆராய்ச்சி மையம், தமிழகம் உள்பட நான்கு மாநிலங்களில் ஆய்வு மேற்கொண்டது. இந்த ஆய்வு முடிவுகளை ஆராய்ச்சிக் குழுவின் தலைவர் டாக்டர் ஆர்.எம். அஞ்சனா திங்கள்கிழமை நடைபெற்ற நிகழ்ச்சியில் வெளியிட்டார். 

ஆராய்ச்சிக் குழுவின் தலைவர் டாக்டர் ஆர்.எம். அஞ்சனா கூறியது:

                    தமிழகம், மகாராஷ்டிரம், ஜார்க்கண்ட், சண்டீகர் யூனியன் பிரதேசம் ஆகியவற்றில் தலா 4,000 பேரிடம் சர்க்கரை நோய்க்கான பரிசோதனை ஆய்வு  மேற்கொள்ளப்பட்டது. தமிழகத்தில் நடத்தப்பட்ட ஆய்வின்படி, 42 லட்சம் பேருக்கு சர்க்கரை நோய் பாதிப்பு உள்ளது. அதாவது நகர்ப்புறங்களில் சர்க்கரை நோயால் பாதிக்கப்பட்டுள்ளோரின் விகிதம் 13.5 சதவீதம். கிராமப்புறங்களில் சர்க்கரை நோயால் பாதிக்கப்பட்டுள்ளோர் விகிதம் 6.9 சதவீதம். ஆக, தமிழக மக்கள்தொகையில் சர்க்கரை நோயால் பாதிக்கப்பட்டுள்ளோரின் விகிதம் 9.8 சதவீதம் என்பது குறிப்பிடத்தக்கது.

30 லட்சம் பேருக்கு...: 

                       இந்த ஆய்வின்படி, தமிழகத்தில் 30 லட்சம் பேருக்கு சர்க்கரை நோய் வருவதற்கான வாய்ப்பு உள்ளதும் தெரியவந்துள்ளது. நகர்ப்புறங்களில் வசிப்பவர்களில் 8 சதவீதம் பேருக்கும் கிராமப்புறங்களில் வசிப்பவர்களில் 6.4 சதவீதம் பேருக்கும் சர்க்கரை நோய் வர வாய்ப்பு உள்ளது.

சர்க்கரை நோய் கட்டுப்பாடு: 

                   தமிழகத்தில் சர்க்கரை நோய் உள்ளவர்களில் மூன்றில் ஒரு பங்கினர் ரத்த சர்க்கரை அளவை நல்ல கட்டுப்பாட்டில் வைத்திருப்பதாகவும், மூன்றில் ஒரு பங்கினர் ரத்த சர்க்கரை அளவை சராசரியாக கட்டுப்பாட்டில் வைத்திருப்பதாகவும், மீதமுள்ள மூன்றில் ஒரு பங்கினர் ரத்த சர்க்கரை அளவை கட்டுப்பாட்டில் வைத்திருப்பதில்லை எனவும் ஆய்வு முடிவுகள் தெரிவிக்கின்றன.

1.2 கோடி பேருக்கு உயர் ரத்த அழுத்த நோய்: 

                   உயர் ரத்த அழுத்த நோய், ரத்த கொழுப்புச் சத்து அளவுகள், உடல் பருமன் ஆகியவை குறித்தும் இந்த ஆய்வின்போது பரிசோதனைகள் செய்யப்பட்டன. 

                தமிழகத்தில் 1.2 கோடி பேருக்கு உயர் ரத்த அழுத்த பிரச்னை உள்ளது தெரியவந்துள்ளது. அதாவது, நகர்ப்புறங்களில் வசிப்பவர்களில் 32.6 சதவீதம் பேருக்கும், கிராமப்புறங்களில் வசிப்பவர்களில் 23.8 சதவீதம் பேருக்கும் உயர் ரத்த அழுத்த நோய் பிரச்னை உள்ளது. 

உடல் பருமனும், பெண்களும்...: 

                  இந்த ஆய்வின் அடிப்படையில், தமிழகத்தில் 76 லட்சம் பெண்களுக்கும் 50 லட்சம் ஆண்களுக்கும் உடல் பருமன் பிரச்னை உள்ளது. 86 லட்சம் பேருக்கு ரத்தத்தில் அதிக கொழுப்புச் சத்து பிரச்னை உள்ளது.

கிராமப்புறங்களுக்கும்... 

                 முன்பெல்லாம் தமிழக நகர்ப்புறங்களில் வசிப்போரிடையே மட்டும் அதிக அளவில் காணப்பட்ட சர்க்கரை நோய் பாதிப்பு, இப்போது கிராமப்புற மக்களிடமும் அதிகரித்து வருவதை ஆய்வு முடிவுகள் வெளிப்படுத்தியுள்ளன'' என்றார் டாக்டர் அஞ்சனா. 

                    இந்த நிகழ்ச்சிக்கு சுகாதாரத் துறை முதன்மைச் செயலர் வி.கு. சுப்புராஜ் தலைமை வகித்தார். வடகிழக்கு மாநிலங்களில் செய்யப்பட உள்ள இரண்டாவது கட்ட சர்க்கரை நோய் குறித்த ஆய்வுத் திட்டத்தை இந்திய மருத்துவ ஆராய்ச்சிக் கவுன்சிலின் வடகிழக்குப் பிராந்திய உதவி இயக்குநர் டாக்டர் தன்வீர் கௌர் தொடங்கி வைத்தார். வடகிழக்கு பிராந்திய இயக்குநர் டாக்டர் ஜெ.மகந்தா உள்ளிட்டோரும் இந்த நிகழ்ச்சியில் கலந்து கொண்டனர்.

Read more »

சிதம்பரத்தை அடுத்த வல்லம்படுகையில் நள்ளிரவில் வீட்டுக்குள் புகுந்த முதலை

 
சிதம்பரம்
 
                 நேற்று நள்ளிரவு சிதம்பரத்தை அடுத்த வல்லம்படுகை பாரதிதாசன் தெருவில் வசிக்கும் ரமேஷ் என்பவரது வீட்டுக்குள் ஒரு முதலை புகுந்தது. அதனைக்கண்டு அந்த வீட்டு நாய் குரைத்ததால், படிகள் வழியாக மாடிக்கு முதலை விரைந்தது.
 
               எனினும் நாய் தொடர்ந்து குரைத்ததால், ரமேஷ் மற்றும் அவரது குடும்பத்தினர் கண்விழித்தனர். மாடிப்படியை நோக்கி நாய் குரைத்ததால், “திருடன் புகுந்திருக்கலாமோ?” என்ற சந்தேகம் ஏற்பட்டது. உருட்டுக்கட்டை, கம்பி உள்ளிட்ட ஆயுதங்களுடன் சகிதமாக மாடிக்கு சென்ற போது, ஒரு மூலையில் முதலை பதுங்கியிருந்தது தெரிய வந்தது.
 
                  இது பற்றி ஊருக்குள் சேதி பரவியதால் பீதியடைந்த கிராமத்தினர் ரமேஷ் வீட்டுக்கு திரண்டு சென்றனர். நீண்டநேரம் போராடி, போக்குகாட்டிய முதலையை பிடித்து கயிற்றில் கட்டிய பிறகுதான் நிம்மதியடைந்தனர். பிடிபட்டமுதலை வனத்துறையினரிடம் ஒப்படைக்கப்பட்டது.

1 1

Read more »

பண்ருட்டியில் கலைஞர் வீடு வழங்கும் திட்டத்தின் கீழ் அட்டைகள் வழங்கும் விழா

பண்ருட்டி:

                கடலூர் மாவட்டம் பண்ருட்டி தாலுகாவுக்கு உள்பட்ட மருங்கூரில் ரூ.60 லட்சம் செலவில் புதிதாக கட்டப்பட்டுள்ள மேம்படுத்தப்பட்ட அரசு ஆரம்ப சுகாதார நிலைய கட்டிடம் மற்றும் 4 கோடியே 92 லட்சம் ரூபாய் மதிப்பீட்டில் கீழ் குப்பத்தில் அமைக்கப்பட்டு உள்ள துணைமின்நிலையம் திறப்பு விழா, கலைஞர் வீடு வழங்கும் திட்டத்தின் கீழ் 3,593 பேருக்கு தகுதி அட்டைகள் வழங்கும் விழா ஆகிய முப்பெரும் விழாக்கள் மருங்கூர் அரசு மேல்நிலைப்பள்ளி வளாகத்தில் நேற்று நடந்தது.
 
                விழாவுக்கு அமைச்சர் எம்.ஆர்.கே.பன்னீர் செல்வம் தலைமை தாங்கினார். கலெக்டர் சீத்தாராமன், வேல்முருகன் எம்.எல்.ஏ. ஆகியோர் முன்னிலை வகித்தனர். மின் துறை அமைச்சர் ஆற்காடு வீராசாமி மேம்படுத்தப்பட்ட அரசு ஆரம்ப சுகாதார நிலையத்தையும், துணை மின்நிலையத்தையும் திறந்து வைத்து, கலைஞர் வீடு வழங்கும் திட்ட பயனாளிகளுக்கு தகுதி அட்டைகளை வழங்கி பேசியதாவது:-

                தமிழகத்தில் கலைஞர் வீடு வழங்கும் திட்டத்தின் கீழ் 6 ஆண்டுகளில் 21 லட்சம் வீடுகள் கட்டப்பட உள்ளது. இந்த ஆண்டு 3 லட்சம் வீடுகள் கட்டப்படுகிறது. இதில் கடலூர் மாவட்டத்தில் நடப்பு ஆண்டில் 26,119 வீடுகள்கட்டப்படுகிறது. இதற்காக 195 கோடி ரூபாயை அரசு ஒதுக்கி உள்ளது. பண்ருட்டி தொகுதியில் அடுத்த 5 ஆண்டுகளில் வீடு பெற உள்ள 15,267 பேரில் 3593 பேருக்கு இந்த விழாவில் தகுதி அட்டைகள் வழங்கப்பட்டு உள்ளது.
  

அமைச்சர் எம்.ஆர்.கே.பன்னீர் செல்வம் பேசியது 

 

                  வருகிற தேர்தலில் வேறு கட்சி ஆட்சிக்கு வந்தால் வீடு கட்டி கொடுக்க மாட்டார்கள் என்று சொன்னார். அவர் சந்தேகப்படவேண்டாம். 6-வது தடவையாக கலைஞர் தான் ஆட்சிக்கு வருவார்.

வேல்முருகன் எம்.எல்.ஏ. பேசுகையில், 

 

                   இந்த ஆட்சியில் இத்தொகுதி பெற்றிருக்கிற துணைமின்நிலையம், மேம்படுத்தப்பட்ட அரசு ஆரம்ப சுகாதார நிலையம் பற்றியெல்லாம் எடுத்து சொல்லி நன்றி தெரிவித்தார். அவர் ஒவ்வொன்றையும் சொல்லி நன்றி தெரிவித்த போது, எனக்கு என்ன நினைவுக்கு வந்தது என்றால், நீங்கள் ஓட்டுப் போட்டு என்னை தேர்ந்து எடுத்தீர்கள், நான் உங்களுக்கு இவ்வளவு செய்திருக்கிறேன், அடுத்து நான் உங்களுடன் இருப்பேனா, இருக்க மாட்டேனா? அல்லது வேறு தொகுதிக்கு போய்விடுவேனா? என்பது தெரியவில்லை என்பது போல் இருந்தது.  அவர் இந்த விழாவுக்கு வந்து, மனதில் ஒளிவு, மறைவு இல்லாமல் நன்றி கூறியது, அந்த கட்சியே நன்றி கூறியது போல் இருக்கிறது.

                   பண்ருட்டி தொகுதியில் உள்ள கீழ்குப்பம் கிராமத்தில் துணைமின்நிலையம் கொண்டு வரவேண்டும் என்று வேல்முருகன் எம்.எல்.ஏ. சட்டமன்றத்தில் கேட்டார். அதை நான் ஏற்றுக்கொண்டு நிறைவேற்றி தந்து இருக்கிறேன். மருங்கூர் அரசு ஆரம்ப சுகாதார நிலையமும் 30 படுக்கைகள் கொண்ட மருத்துவமனையாக மேம்படுத்தப்பட்டு உள்ளது. இனிமேல் அங்கு 24 மணி நேரமும் மருத்துவ வசதி கிடைக்கும். கலைஞர் காப்பீட்டு திட்டம் மூலம் ஏழை எளிய மக்களும், டாடா, பிர்லா சிகிச்சை எடுக்கும் மருத்துவமனைகளில் சிகிச்சை பெறும் வசதியை கலைஞர் ஏற்படுத்தி தந்து இருக்கிறார்.

                     அதேபோல் அரசு ஊழியர்கள், ஆசிரியர்களுக்கு மத்திய அரசு ஊழியர்களுக்கு இணையான சம்பளம் கொடுத்து இருக்கிறார். எனவே நம் நாட்டில் யாருக்கும் எந்த குறையும் இல்லை என்று சொல்லக்கூடிய அளவுக்கு சாதனைகளை கலைஞர் அரசு செய்திருக்கிறது.  இவ்வாறு அமைச்சர் ஆற்காடு வீராசாமி பேசினார்.
  

 முன்னதாக அமைச்சர் எம்.ஆர்.கே.பன்னீர் செல்வம் பேசியது:-

                    அ.தி.மு.க. கூட்டணியில் அவர்கள்(பா.ம.க.) இருந்த போது, ஒரு மாதம் தான் தாக்குபிடித்தார்கள், அதன் பிறகு வெளியே வந்து விட்டார்கள். அந்த ஆட்சியில் ஏதாவது ஒரு திட்டத்தையாவது பண்ருட்டி தொகுதிக்கு பெற முடிந்ததா? இல்லை. ஆனால் எங்கள் கூட்டணியில் அவர்கள் இருந்த போது, இழுத்து பிடித்து நின்றார்கள், அதற்கு அமைச்சர் ஆற்காடு வீராசாமியும் ஒரு காரணம். ஆனால் எங்கள் ஆட்சியில் எண்ணற்ற திட்டங்களை நிறைவேற்றி கொடுத்து இருக்கிறீர்கள் என்று வேல் முருகன் புகழ்ந்து பேசினார். அதற்கு அவர் இப்போது நன்றி சொல்ல வேண்டாம். இன்னும் 4 மாதங்களில் தேர்தல் வரப் போகிறது. அப்போது அவர் நன்றி காட்ட வேண்டும்.  இவ்வாறு அமைச்சர் பன்னீர் செல்வம் பேசினார்.

முன்னதாக வேல்முருகன் எம்.எல்.ஏ. பேசுகையில், 

 

                  அரசியல் தட்ப வெப்ப நிலைகள் ஒருமாதிரியாக இருக்கிறதால், நான் அமைச்சர் பன்னீர் செல்வம் அழைத்தும் கூட அரசு நிகழ்ச்சிகளில் பங்கேற்காமல் இருந்தேன். என் தொகுதியில் நிறைவேற்றப்பட்ட திட்டங்களுக்கு நன்றி சொல்வதற்காக இந்த விழாவுக்கு வந்து இருக்கிறேன். முதல்-அமைச்சர் கருணாநிதியை முன்அனுமதி பெறாமல் சந்திக்கக் கூடிய ஒரே எம்.எல்.ஏ. நான்தான்.

                  கடலூர் மாவட்டத்துக்கு முதல்-அமைச்சர் கருணாநிதி வந்த போது, வேல்முருகனுக்காக தமிழ்நாட்டின் முதல் அரசு பொறியியல் கல்லூரியை பண்ருட்டி தொகுதியில் அமைக்கிறேன் என்று அறிவித்தார். இந்த 5 ஆண்டுகளில் ஒரே தொகுதியில் 177 ஊட்டச்சத்து மையங்கள் உருவாக்கப்பட்ட தொகுதி எனது தொகுதி யாகும். இதனால் நான் முழுமனதிருப்தியோடு இருக்கிறேன். முதல்-அமைச்சருக்கும், அமைச்சர்களுக்கும் நன்றி தெரிவித்துக்கொள்கிறேன் என்றார்.

                      விழாவில் முன்னாள் எம்.எல்.ஏ. டாக்டர் கோபாலகிருஷ்ணன், மருத்துவம் மற்றும் ஊரக நலப்பணிகள் இயக்குனர் டாக்டர் என்.ராஜா. பஞ்சாயத்து தலைவர் ராஜேந்திரன் ஆகியோர் வாழ்த்தி பேசினார்கள்.  பண்ருட்டி ஒன்றியக்குழு தலைவர் எழிலரசி ரவிச்சந்திரன், மாநில தி.மு.க. தலைமை செயற்குழு உறுப்பினர் ஜெயராமன், பண்ருட்டி நகர செயலாளர் ராஜேந்திரன், புலவர் ராமலிங்கம், முன்னாள் மாவட்ட கவுன்சிலர் அரிராமச்சந்திரன், சுந்தரமூர்த்தி, ஊராட்சிமன்ற தலைவர்கள் சீனுவாசன், தனலட்சுமி சண்முகம், சூடாமணி ராதாகிருஷ்ணன், சிவசண்முகம், கதிர்வேல் கடலூர் நகர பா.ம.க. செயலாளர் ஆனந்த், செய்திமக்கள் தொடர்பு அதிகாரி முத்தையா, உதவிமக்கள் தொடர்பு அதிகாரி சாய்பாபா, சுகாதாரபணிகள் துணை இயக்குனர் டாக்டர் மீரா மற்றும் பயனாளிகள், அரசு அதிகாரிகள், பொதுமக்கள் கலந்து கொண்டனர்.

Read more »