கடலூர் மாவட்டத்தில் 108 ஆம்புலன்சில் பணி: 115 பேர் தேர்வு

கடலூர் : 

                கடலூர் மாவட்டத்தில் 108  ஆம்புலன்சில் பணிபுரிவதற்கான நேர்காணலில் 115 பேர் தேர்வு செய்யப்பட்டுள்ளனர். கடலூர் மாவட்ட வேலைவாய்ப்பு அலுவலகம், 108 ஆம்புலன்ஸ் சேவை நிறுவனம் சார்பில் 108 ஆம்புலன்சில் பணிபுரிவதற்கான நேர்காணல் கடந்த 11ம் தேதி வேலைவாய்ப்பு அலுவலகத்தில் நடந்தது. 108 ஆம்புலன்ஸ் சேவை மாவட்ட ஒருங்கிணைப்பாளர் ஜெயக்குமார் வரவேற்றார். 

                108 ஆம்புலன்சில் பணிபுரிவதற்கான  நடந்த நேர்காணலில் குறித்த விவரங்களை மண்டல மேலாளர் பிரபுதாஸ் மற்றும் மனித வள மேம்பாடு  நிறுவனர் அப்பாதுரை ஆகியோர் எடுத்துக் கூறினர். பின்னர் நடந்த நேர்காணலில் மெடிக்கல் டெக்னீஷியன் பதவிக்கு 52 பேரும், ஆம்புலன்ஸ் டிரைவர் பதவிக்கு 63 பேரும் தேர்வு செய்யப்பட்டனர்.  தேர்வு செய்யப்பட்ட அனைவரும் வரும் ஜனவரி 3ம் தேதி 108 ஆம்புலன்ஸ் சென்னை அலுவலகத்தில் பயிற்சி வழங்கப்பட்டு பின் பணி நியமனம் வழங்கப்படும். தேர்வு செய்யப்பட்ட 115 பேருக்கு மாவட்ட வேலைவாய்ப்பு அலுவலர் (பொறுப்பு) வைத்தியநாதன் வாழ்த்து தெரிவித்தார். 

Read more »

கடலூர் மாவட்டத்தில் பிளஸ் 2 மாணவர்களின் பெயர் பட்டியல் சரிபார்க்கும் பணி

கடலூர் : 

               பிளஸ் 2 தேர்வு எழுத உள்ள மாணவர்களின் பெயர் பட்டியல் மற்றும் பிறந்த தேதி சரிபார்ப்பு ஆலோசனைக் கூட்டம் நேற்று நடந்தது. 

              கடலூர் மாவட்டத்தில் வரும் மார்ச் மாதம் துவங்க உள்ள பிளஸ் 2 பொதுத் தேர்வில் கடலூர் கல்வி மாவட்டத்தில் 19 ஆயிரம் மாணவ, மாணவிகளும்,  விருத்தாசலம் கல்வி மாவட்டத்தில் 8 ஆயிரம் மாணவ, மாணவிகள் உட்பட 27 ஆயிரம் பேர் பங்கேற்கின்றனர்.  இதற்கான பெயர் பட்டியல் தயாரிக்கப்பட்டு தேர்வுத்துறைக்கு அனுப்பப்பட்டுள்ளது. மாணவர்கள் இறுதி பெயர் பட்டியல் சரிபார்க்கும் பணி நேற்று கடலூர் மஞ்சக்குப்பம் செயின்ட் ஜோசப் பள்ளியில் நடந்தது.  

                மாவட்ட முதன்மைக் கல்வி அலுவலர் அமுதவல்லி தலைமை தாங்கினார்.  நேர்முக உதவியாளர் ராஜேந்திரன், செயின்ட் ஜோசப் மேல்நிலைப் பள்ளி முதல்வர் ஆக்னல் முன்னிலை வகித்தனர். கூட்டத்தில் இரு கல்வி மாவட்டங்களிலிருந்தும் 170 தலைமையாசிரியர்கள் பங்கேற்றனர்.  மாணவர்களின் பெயர் மற்றும் பிறந்த தேதி சரியாக உள்ளதா என சரிபார்க்கப்பட்டது.  இதனைத் தொடர்ந்து மாணவர்களின் இறுதி பெயர் பட்டியல் அனுப்பப்படும்.

Read more »

சிறுபான்மை மாணவர்களுக்கு உதவித் தொகை வழங்கும் திட்டம் தொடக்கம்

              பள்ளிப்படிப்பு, பள்ளி மேற்படிப்பு மற்றும் தொழிற்கல்வி பயிலும் சிறுபான்மையின மாணவ, மாணவிகளுக்கு 2010-11 ஆம் ஆண்டுக்கான கல்வி உதவித்தொகைகளை வழங்கும் திட்டத்தை துணை முதல்வர் மு.க.ஸ்டாலின்  தொடங்கி வைத்தார்.

 

இதுகுறித்து அரசு வெளியிட்டுள்ள செய்திக்குறிப்பு:

 

                  நடப்பு 2010-11 ஆம் ஆண்டில் ஒரு லட்சத்து 71 ஆயிரத்து 643 மாணவ, மாணவியர்கள் பயன் பெறும் வகையில், பள்ளி படிப்பு கல்வி உதவித் தொகை திட்டத்தின் கீழ் ரூ.19.02 கோடியும், 30 ஆயிரத்து 79 மாணவ, மாணவியர்கள் பயன்பெறும் வகையில் பள்ளி மேற்படிப்பு உதவித் தொகை திட்டத்தின் கீழ் ரூ.8.66 கோடியும், 1809 மாணவ, மாணவியர்கள் பயன்பெறும் வகையில் தகுதி மற்றும் வருவாய் அடிப்படையிலான கல்வி உதவித் தொகை திட்டத்தின் கீழ் ரூபாய் 4.73 கோடியும் நிதி ஒதுக்கப்பட்டுள்ளது.   இத்திட்டத்தின் மூலம் மொத்தம் ரூ. 32.41 கோடி கல்வி உதவித்தொகையாக 2 லட்சத்து 3 ஆயிரத்து 531 சிறுபான்மையின மாணவ, மாணவியருக்கு வழங்கப்பட்டு பயனடையவுள்ளார்கள்.  

 

                   இது  கடந்த ஆண்டை விட ரூ.5.91 கோடி  கூடுதலாகும்.ஓன்றாம் வகுப்பு முதல் பத்தாம்  வகுப்பு வரை  பள்ளிப்படிப்பு பயிலுபவர்களுக்கு குறைந்தபட்சம் ரூ. 1000 முதல் ரூ. 5000 வரையிலும், விடுதியில் தங்கி பயில்பவராக இருப்பின் அதிகபட்சமாக ரூ. 10,000 வரையிலும், 11 ஆம் வகுப்பு முதல் ஆராய்ச்சி படிப்பு வரை (ஐடிஐ, ஐடிசி, பாலிடெக்னிக், இளங்கலை-முதுகலை பட்டபடிப்பு வரை, ஆசிரியர் பயிற்சிகள் உட்பட) பள்ளி மேற்படிப்பு பயிலுபவர்களுக்கு அதிகபட்சமாக ரூ. 12,350/- வரை பள்ளி மேற்படிப்பு கல்வி உதவித் தொகையாகவும், நான்காண்டு மற்றும் அதற்கு மேல் தொழிற் கல்வி-தொழில்நுட்ப கல்வி பயிலும் சிறுபான்மையின மாணவ, மாணவியருக்கு அதிகபட்சமாக ரூ. 30,000 வரை தகுதி மற்றும் வருவாய் அடிப்படையிலான கல்வி உதவித்தொகையும் வழங்கப்பட்டு வருகிறது. 

 

                     கடந்த 2007-08 முதல் 2009-10 ஆம் ஆண்டு வரை பள்ளி படிப்பு கல்வி உதவித் தொகை திட்டத்தின்கீழ் ரூ.21.96 கோடியும், பள்ளி மேற்படிப்பு உதவித் தொகை திட்டத்தின் கீழ் ரூ.14.50 கோடியும் மற்றும் தகுதி மற்றும் வருவாய் அடிப்படையிலான கல்வி உதவித் தொகை திட்டத்தின் கீழ் ரூ. 13.16 கோடியும் கல்வி உதவித்தொகையாக வழங்கப்பட்டு, இதன் மூலம் 2 லட்சத்து 21 ஆயிரத்து 27 சிறுபான்மையின மாணவ, மாணவியர் பயனடைந்துள்ளார்கள் என அரசு வெளியிட்டுள்ள செய்திக்குறிப்பில் தெரிவிக்கப்பட்டுள்ளது.

Read more »