கடந்தாண்டில் கடலூர் மாவட்டத்தில் நடந்த 3,484 சாலை விபத்துகளில் 548 பேர் இறந்துள்ளனர்

கடலூர் முதுநகர் :

         சாலை பாதுகாப்பு மற்றும் போக்குவரத்து விதிமுறைகள் குறித்த விழிப்புணர்வு இல்லாததால் மாவட்டத்தில் சாலை விபத்துகளும், அதில் உயிரிழப்போர்களின் எண்ணிக்கையும் ஆண்டுக்கு ஆண்டு அதிகரித்து வருகிறது. கடந்தாண்டில் மாவட்டத்தில் நடந்த 3,484 விபத்துகளில் 548 பேர் இறந்துள்ளனர்.

         மாவட்டத்தில் தேசிய நெடுஞ்சாலை 340 கி.மீ., மாநில நெடுஞ்சாலை 1,816 கி.மீ., பிற சாலைகள் 5,511 கி.மீ., என மொத்தம் 7667 கி.மீ., தூர சாலைகள் உள்ளன. ஆனால், மாவட்டத்தில் போக்குவரத்து வாகனங்களின் எண்ணிக்கை ஆண்டிற்கு ஆண்டு அதிகரித்து வருகிறது. வாகனங்களின் பயன்பாடு அதிகரித்துள்ள போதிலும், பாதுகாப்பான முறையில், போக்குவரத்து விதிகளை பின்பற்றி வாகனம் ஓட்டுவது குறித்த விழிப்புணர்வு குறைவாகவே உள்ளது.

              இதன் காரணமாகவே, மாவட்டத்தில் சாலை விபத்துகளும், அதனால் உயிர் இழப்போரின் எண்ணிக்கையும் அதிகரித்து வருகிறது. கடந்த 2008ம் ஆண்டில் 2,896 விபத்துகளில் 450 பேரும், 2009ல் 2,811 விபத்துகளில் 483 பேரும், 2010ம் ஆண்டில் 2,695 விபத்துகளில் 466 பேரும், 2011ல் 3,092 விபத்துகளில் 523 பேர் இறந்தனர். பெருகி வரும் சாலை விபத்துகளையும், அதனால் ஏற்படும் உயிரிழப்புகளையும் தவிர்த்திட தமிழக அரசு ஆண்டுதோறும் ஜனவரி 1ம் தேதி முதல் 7ம் தேதி வரை சாலை பாதுகாப்பு வார விழா நடத்தி வருகிறது. அதன்படி போக்குவரத்து துறை சார்பில் கடந்த 1ம் தேதி முதல் சாலை பாதுகாப்பு குறித்து பல்வேறு விழிப்புணர்வு பிரசாரம் மேற்கொள்ளப்பட்டது.

         இறுதி நாளான  கடலூர், கேப்பர் மலையில் உள்ள வட்டார போக்குவரத்து அலுவலகத்தில் இலவச கண் சிகிச்சை முகாம் நடந்தது.  முகாமை வட்டார போக்குவரத்து அலுவலர் ஜெய்சங்கர் துவக்கி வைத்தார். இன்ஸ்பெக்டர்கள் ஜெய்சங்கர், முருகேசன், காளியப்பன், நல்லத்தம்பி உள்ளிட்டோர் பங்கேற்றனர். ஓட்டுனர் பயிற்சிப் பள்ளி உரிமையாளர்கள், ஓட்டுனர்கள் கண் பரிசோதனை செய்து கொண்டனர்.

பின்னர் வட்டார போக்குவரத்து அலுவலர் ஜெய்சங்கர் கூறியது:

               மாவட்டத்தில் கடந்த 2010ம் ஆண்டு 2,695 விபத்துகள் நடந்துள்ளன. இதில்,உயிரிழப்பை ஏற்படுத்திய447 விபத்துகளில் 466 பேர் இறந்துள்ளனர்.  3,453 பேர் காயமடைந்துள்ளனர். கடந்த 2011ம் ஆண்டில் மொத்தம் நடந்த 3,092 விபத்துகளில், உயிரிழப்பை ஏற்படுத்திய 498 விபத்துகளில் 523 பேர் இறந்துள்ளனர். 3,790 பேர் காயமடைந்துள்ளனர். கடந்தாண்டு 3,484 விபத்துகள் நடந்துள்ளன. அதில், உயிரிழப்பை ஏற்படுத்திய 524 விபத்துகளில் 548 பேர் இறந்துள்ளனர். 4,938 பேர் காயமடைந்துள்ளனர்.

          சாலை பாதுகாப்பு மற்றும் போக்குவரத்து விதிமுறைகள் குறித்த விழிப்புணர்வு இல்லாததாலும், குடிபோதையில் வாகனங்களை ஓட்டுவதன் காரணமாக அதிக விபத்துகள் ஏற்படுகின்றன. இதனை தவிர்த்திட வட்டார போக்குவரத்து துறையினர் அவ்வப்போது போலீசாருடன் இணைந்து வாகன சோதனை நடத்தி வருகிறோம். குடிபோதையில் வாகனம் ஓட்டி விபத்து ஏற்படுத்துவோர் மீது கடும் நடவடிக்கை எடுத்து வருகிறோம். அதன்படி கடந்தாண்டு குடிபோதையில் வாகனம் ஒட்டி விபத்து ஏற்படுத்தியது தொடர்பாக 5 பேரின் ஒட்டுனர் உரிமம் ரத்து செய்யப்பட்டுள்ளது. 46 பேரின் ஓட்டுனர் உரிமங்கள் தற்காலிகமாக தடை செய்யப்பட்டுள்ளது.

          வாகன உரிமம், ஓட்டுனர் உரிமம் வழங்குதல், வாகன உரிமங்களை புதுப்பித்தல் போன்ற பல்வேறு பணிகளின் மூலம் கடந்தாண்டு 61.92 கோடி ரூபாய் வருவாய் கிடைத்துள்ளது. மேலும், பதிவு பெறாத வாகனங்களுக்கு அபராதம், நிர்ணய அபராதம் போன்றவற்றின் மூலம் 1.36 கோடி ரூபாய் வருவாய் கிடைத்துள்ளது. வட்டார போக்குவரத்து அலுவலர் ஜெய்சங்கர் நன்றி கூறினார்.

Read more »

சிதம்பரம் நகர் பகுதிகளில் மாணவர்களின் அதிவேக பயணம் தொடரும் விபத்துகள்

அண்ணாமலைநகர் மேம்பாலம் அருகே மோட்டார் சைக்கிளில் அதிவேகத்தில் சென்ற மாணவர்கள், மற்றொரு மோட்டார் சைக்கிள் மீது மோதியதால் ஏற்பட்ட விபத்து.

சிதம்பரம்:

       சிதம்பரம் அண்ணாமலை நகர் பகுதிகளில் மாணவர்களின் அதிவேக மோட்டார் சைக்கிள் பயணத்தால் அடிக்கடி விபத்துகள் தொடர்கின்றன. இதனைக் கட்டுப்படுத்த போக்குவரத்து போலீஸார் துரித நடவடிக்கை எடுக்கவேண்டும் என பொதுமக்கள் கோரிக்கை விடுத்துள்ளனர்.

  சிதம்பரம், அண்ணாமலைப் பல்கலைக்கழகத்தில் பயிலும் 10 ஆயிரத்திற்கும் மேற்பட்ட மாணவர்கள் விடுதிகளிலும், சுற்றுப்புற பகுதிகளில் வீடு எடுத்தும் தங்கியுள்ளனர். இதில் வெளிமாநிலங்களைச் சேர்ந்த மாணவர்கள் சுமார் 5 ஆயிரம் பேர் பயிலுகின்றனர். வெளிமாநிலங்களிலிருந்து வந்துள்ள பெரும்பாலான மாணவர்கள் விலை உயர்ந்த, அதிவேகத்தில் செல்லும் மோட்டார் சைக்கிள்களை வைத்துள்ளனர். இம்மாணவர்கள் கல்லூரியிலிருந்து தாங்கள் தங்கியிருக்கும் இடத்துக்கு குறிப்பிட்ட நிமிடத்தில் செல்வதாக மற்ற மாணவர்களிடம் பந்தயமிட்டு வேகமாக செல்கின்றனர்.

    இவையல்லாமல் இம்மாணவர்கள் எதிரிலும், அக்கம், பக்கத்தில் வரும் வாகனங்களை பற்றி சிறிதுகூட கவலைப்படாமல் அதிவேகத்தில் செல்வதால் தினம் ஒரு விபத்து ஏற்படுகிறது. அண்மையில் சிதம்பரம்-அண்ணாமலைநகர் ரயில்வே மேம்பாலத்தில் மோட்டார் சைக்கிளில் அதிவேகத்தில் சென்ற மாணவர்கள், எதிரே வந்த மற்றொரு மோட்டார் சைக்கிள் மீது நேருக்கு நேர் மோதியுள்ளனர். இதில் இருவர் படுகாயமுற்றனர்.

மாணவர்கள் அதிவேகத்தில் மோட்டார் சைக்கிளில் செல்வதால் பல்கலைக்கழகத்துக்கு வாகனங்களில் செல்லும் ஆசிரியர்கள், ஊழியர்கள், மாணவியர்கள் பெரும் அவதிக்குள்ளாகின்றனர். வட்டார போக்குவரத்து துறையும், போக்குவரத்து காவல்துறையும் இணைந்து மாணவர்கள் மோட்டார் சைக்கிள்களில் அதிவேகத்தில் செல்வதைக் கட்டுப்படுத்த நடவடிக்கை மேற்கொள்ள வேண்டும் என்பதே பொதுமக்களின் எதிர்பார்ப்பாகும்.

Read more »

கடலூர் ரெட்டிச்சாவடி அருகே சாலை விபத்து : இருவர் பலி

 

கடலூர்:

               சிதம்பரம் லால்புரம் பெரிய தெருவை சேர்ந்தவர் அரசன் (வயது 61). இவர் கிராம உதவி அலுவலராக பணிபுரிந்து ஓய்வு பெற்றவர். இவரது மகள் சாந்தி. இவர் இருதய நோயால் பாதிக்கப்பட்டு இருந்தார். அங்குள்ள டாக்டர்களிடம் காண்பித்தபோது அறுவை சிகிச்சை செய்ய வேண்டும் என்று அறிவுறுத்தியதால் சாந்திக்கு அறுவை சிகிச்சை செய்வதற்காக புதுவை அரசு ஆஸ்பத்திரிக்கு நேற்று  காலை காரில் சாந்தியை அழைத்து வந்தனர். காரில் அரசன், அவரது மனைவி ராசாயி (55), மகள் சாந்தி (38), மருமகன் செங்குட்டுவன் (45), மகன் இளையராஜா ஆகியோர் வந்தனர்.

                     காரை இளைய ராஜா ஓட்டிவந்தார்.  கார் புதுவையை அடுத்த ரெட்டிச்சாவடி அருகே பெரிய காட்டுப்பாளையம் என்ற இடத்தில் வந்தபோது சென்னையில் இருந்து தஞ்சாவூருக்கு பெட்ரோல் ஏற்றி சென்ற டேங்கர் லாரி எதிர்பாராத விதமாக கார் மீது மோதியது.  இதில் சம்பவ இடத்திலேயே சாந்தி உடல்நசுங்கி இறந்துபோனார். படுகாயம் அடைந்த அரசன், ராசாயி, செங்குட்டுவன், இளைய ராஜா ஆகிய 4 பேரும் சிகிச் சைக்காக கடலூர் அரசு ஆஸ்பத்திரிக்கு கொண்டு செல்லப்பட்டனர். ஆனால் வழியிலேயே அரசன் பரிதாபமாக இறந்து போனார்.

               மற்ற 3 பேரும் ஆபத்தான நிலையில் சிகிச்சை பெற்று வருகின்றனர். இந்த விபத்து குறித்து ரெட்டிச்சாவடி போலீசார் வழக்கு பதிவு செய்து விசாரணை நடத்தி வருகின்றனர்.

 

 

 

 

 

 

Read more »

வாய்க்காலில் கவிழ்ந்தது டேங்கர் லாரி பண்ருட்டி அருகே கிளீனர் பலி; டிரைவர் காயம்

பண்ருட்டி : 

                     பண்ருட்டி அருகே கிளீனர் ஓட்டி வந்த டேங்கர் லாரி, வாய்க்காலில் கவிழ்ந் ததில் அவர் இறந்தார்.

                       புதுச்சேரியிலிருந்து நேற்று முன்தினம் இரவு, டேங்கர் லாரி ஒன்று, சோப் ஆயில் ஏற்றிக் கொண்டு கோவைக்கு புறப்பட்டது. சிவகங்கை மாவட்டம் இளையான்குடி டிரைவர் சந்திரன் (42) லாரியை ஓட்டி வந்தார். அவருடன் இளையான்குடி அடுத்த கருஞ் சித்தி ரஷீத்கான் (44) கிளீனராக இருந்தார். லாரி கடலூர் வந்ததும், கிளீனர் ரஷீத்கான் லாரியை ஓட்டி வந்தார். டிரைவர் சந்திரன் அருகில் படுத்து தூங்கிக் கொண்டு வந்தார்.இரவு 11.30 மணி அளவில் பண்ருட்டி திருவதிகை வளைவில் டேங்கர் லாரி வந்தபோது, எதிரில் கரும்பு டிராக்டர் வந்துக் கொண்டிருந்தது. அதை பார்த்த கிளீனர் ரஷீத்கான், லாரியை இடது பக்கமாக திருப்ப முயன்ற போது சாலையோரத்தில் உள்ள வாலாஜா வாய்க்காலில் லாரி தலைக்குப்புற கவிழ்ந் தது. பண்ருட்டி போலீசார், தீயணைப்பு படையினர் மீட்பு பணியில் ஈடுபட்டனர். இருப்பினும், லாரியை ஓட்டி வந்த கிளீனர் ரஷீத் கான் இடிபாடுகளுக்குள் சிக்கி இறந்தார். டிரைவர் சந்திரன் படுகாயமடைந் தார். அவரை போலீசார் மீட்டு பண்ருட்டி அரசு மருத் துவமனையில் சேர்த் தனர். கவிழ்ந்த டேங்கர் லாரி நேற்று காலை கிரேன் மூலம் மீட்கப்பட்டது. இதனால், காலை 7 மணி முதல் 8 மணி வரை கடலூர்-பண் ருட்டி சாலையில் போக்குவரத்து தடைபட்டது. வாகனங்கள் பாலூர் வழியில் திருப்பி விடப்பட்டது.

பொறுப்பற்ற போலீஸ் : 

                     பண்ருட்டி அருகே டேங்கர் லாரி கவிழ்ந்த விபத்தில், போலீசாரிடையே ஏற்பட்ட போட்டி காரணமாக மீட்பு பணி தாமதமானது. நள்ளிரவில் நடந்த விபத்து பற்றி தகவலறிந்த பண்ருட்டி சப்- இன்ஸ்பெக்டர் சம்பவ இடத்திற்கு வந்தார். லாரியில் எழுதியிருந்த மொபைல் போன் எண் உதவியுடன் சம்பந்தப்பட்டவர்களுடன் தொடர்பு கொண்டார். சற்று நேரத்தில் அவ்வழியே வந்த நெடுஞ்சாலை ரோந்து போலீசார் விபத்து பகுதியை பார்வையிட்டனர். பணியில் இருந்த சப் -இன்ஸ்பெக்டர் தமக்கு இரவு பணி முடிந்துவிட்டதாக கூறி, ரோந்து போலீசாரிடம் பொறுப்பை ஒப்படைத்துவிட்டு கழன்று கொண்டார். "சாலை விபத்திற்கு தான் நாங்கள் பொறுப்பு. பள்ளத்தில் லாரி கவிழ்ந்துள்ளதற்கு நாங்கள் எப்படி பொறுப்பேற்க முடியும்?' என புலம்பினர். போலீசாரின் போட்டியால் மீட்பு பணி தாமதமானது.

Read more »