பரவனாற்று வெள்ளத் தடுப்புப் பணிக்கு ரூ. 150 கோடி நிதி ஒதுக்கக் கோரிக்கை

நெய்வேலி:

          பரவனாற்றில் நிரந்தர வெள்ளத் தடுப்புப் பணியை மேற்கொள்ள மத்திய அரசு ரூ. 150 கோடி நிதி ஒதுக்கவேண்டும் என வாலாஜா ஏரி பாசன விவசாயிகள் சங்க நிர்வாகிகள் கோரிக்கை விடுத்துள்ளனர். 

இதுதொடர்பாக வாலாஜா ஏரி பாசன விவசாயிகள் சங்கம் சார்பில் அதன் தலைவர் ராஜசேகரன் மற்றும் ராமானுஜம் ஆகியோர் கூட்டாக வெளியிட்டுள்ள அறிக்கை: 

                பரவனாற்றில் செங்கால் ஓடை கலக்கும் இடத்தில் தடுப்புச் சுவர் கட்டுவதுடன், பராமரிப்பு வாகனங்கள் திரும்பிச் செல்வதற்கு ஏதுவாக திடல் உருவாக்க வேண்டும். மிடில் பரவனாற்றை ஆழப்படுத்தி, 12.கி.மீ. நீள இருபக்க கரைகளை அகலப்படுத்தி, உயர்த்தி தார்சாலையாக ஆடூர் அகரம் பாலம் வரை சாலை உருவாக்கி, போக்குவரத்தும், கண்காணிப்பையும் தீவிரப்படுத்தவேண்டும்,   மிடில் பரவனாற்றின் தலைப்பில் மருவாய் கிராமத்தின் அருகில் உள்ள 5 கண் மதகை அப்புறப்படுத்தி, மேம்பாலம் கட்டும் பட்சத்தில் மருவாய், அரங்கமங்கலம், கல்குணம், திருவெண்ணெய்நல்லூர், பூதம்பாடி உள்ளிட்ட கிராமங்களில் ஏற்படும் வெள்ளத்தை தவிர்க்கமுடியும். 

             அருவா மூக்கு வடிகால் திட்டத்தை உருவாக்கி கடலில் வெள்ளநீர் வடிய ரெகுலேட்டர் திட்டத்தை அமைக்கவேண்டும்.உப்பனாறு கடலில் கலக்குமிடத்தில் உள்ள மண்மேடுகளை அகற்றி, அவ்விடத்தில் மீண்டும் மண்மேடு உருவாகாத வகையில் திட்டமிடல் வேண்டும். வாலாஜா ஏரி தூர்ந்து போகாமல் இருக்க, ஏரியின் மேற்குப் பகுதியில் என்எல்சி நிலப்பரப்பில், சுரங்க கழிவுநீரை தேக்கி, வடிகட்டிய சுத்தமான நீரைப் பாசனத்திற்கு விடவேண்டும். இப்பணிகளை மேற்கொள்ள மத்திய அரசு ரூ. 150 நிதி ஒதுக்கி மாவட்ட நிர்வாகம் மூலம் இப்பணிகளை மேற்கொள்ளவேண்டும் என அவர்கள் அந்த அறிக்கையில் தெரிவித்துள்ளனர்.

Read more »

கடலூர் மாவட்டத்தில் வெள்ளத்தால் உடைப்பு ஏற்பட்ட பரவனாறு சீரமைப்பு பணியை கடலூர் கலெக்டர் ஆய்வு

கடலூர்

          கடலூர் மாவட்டத்தில் மழை வெள்ளத்தால் பரவனாற்றில் உடைப்பு ஏற்பட்டு சில கிராமங்களில் தண்ணீர் புகுந்தது இது பற்றி அறிந்த கலெக்டர் சீத்தாராமன் பொதுப் பணித்துறையினர் போர்க்கால அடிப்படையில் அந்த ஆற்றின் உடைப்பை அடைக்கும் பணியை செய்ய உத்தரவிட்டார். அதன்பேரில் பரவனாற்றில் ஏற்பட்டுள்ள உடைப்பினை சீரமைக்கும் பணி தீவிரமாக நடைபெற்று வருகிறது.

                அதனைத்தொடர்ந்து திருவெண்ணைநல்லூர், ஓனாங்குப்பம் ஆகிய இடங்களில் பரவனாற்றில் நடந்த சீரமைப்பு பணியை கலெக்டர் சீத்தாராமன் 3 கி.மீ. தூரம் நடந்து சென்று பார்வையிட்டு ஆய்வு செய்தார். பூதம்பாடி கிராமத்தில் 2 இடங்களிலும், கல்குணம், ஆடூர் அகரத்தில் 3 இடங்களிலும் நடைபெறும் சீரமைப்பு பணிகளையும் அவர் பார்வையிட்டார். பின்னர் கல்குணம், பூரங்குடி, ஆடூர், அகரம் ஆகிய இடங்களில் மழை வெள்ளத்தால் பாதிக்கப்பட்ட பயிர்களை ஆய்வு செய்தார்.
 

 சீரமைப்பு பணி குறித்து கலெக்டர் சீத்தாராமன் கூறியது:-
 
                   மழை வெள்ளத்தால் பரவனாற்றில் 10 இடங்களில் உடைப்பு ஏற்பட்டுள்ளதை சீரமைக்கும் பணி பொதுப்பணித்துறை மூலம் பணி நடைபெற்று வருகிறது. 3 தினங்களில் அனைத்து உடைப்புகளையும் அடைக்கும் பணி முடிவுற வேண்டும் என உத்தரவிடப்பட்டுள்ளது. இவ்வாறு அவர் கூறினார்.
                ஆய்வின்போது பொதுப்பணித்துறை செயற்பொறியாளர்கள் செல்வராஜ், பழனிக்குமார், உதவி செயற்பொறியாளர்கள் கலியமூர்த்தி, பெரியசாமி, செய்தி-மக்கள் தொடர்பு அலுவலர் முத்தையா, வேளாண்மை இணை இயக்குனர் மணி ஆகியோர் உடன் இருந்தனர்.

Read more »

பரவனாற்று கரை சீரமைப்பு: என்.எல்.சி. நடவடிக்கை

என்எல்சி நிறுவனம் சார்பில் நடைபெறும் பரவனாற்று கரை பலப்படுத்தும் பணி.

 

நெய்வேலி:

 

             மழை வெள்ளத்தால் பாதிப்படைந்த பரவனாற்று கரையை என்எல்சி அதிகாரிகள் போர்க்கால அடிப்படையில் சீர்செய்து, சென்னை-கும்பகோணம் சாலையில் போக்குவரத்து பாதிப்பு ஏற்படாதவாறு நடவடிக்கை மேற்கொண்டனர்.

 

              அண்மையில் பெய்த மழையால், நெய்வேலிக்கு அருகிலுள்ள பரவனாற்றில் பெருக்கெடுத்த வெள்ளம், வடலூரை அடுத்த மருவாய் அருகே கரையை முற்றிலும் உடைத்துக் கொண்டு, சென்னை- கும்பகோணம் சாலையை அரித்துக்கொண்டு சென்றது. இதனால் இச் சாலையில் போக்குவரத்து துண்டிக்கப்பட்டது.அண்மையில் வடலூர் வந்த துணை முதல்வர் மு.க.ஸ்டாலினும், சாலை துண்டிக்கப்பட்ட பகுதியை பார்வையிட்டுச் சென்றார். 

 

               இந்நிலையில் மாவட்ட ஆட்சியர் சீதாராமன், என்எல்சி நிர்வாகத்தின் துணையுடன் அப்பகுதியை சீரமைக்க முயற்சி மேற்கொண்டு, என்எல்சி சுரங்கத்துறை இயக்குநர் பி.சுரேந்திரமோகனுடன் பேசினார். இதைத்தொடர்ந்து என்எல்சி 2-ம் சுரங்க அதிகாரிகள் மேற்பார்வையில், பரவனாற்று கரை பலப்படுத்தும் பணி முடுக்கிவிடப்பட்டது. போர்க்கால அடிப்படையில் நடந்த இப் பணி, ஒரே நாளில் முடிக்கப்பட்டு, கரைப் பலப்படுத்தப்பட்டதுடன், சாலையில் வெள்ள அரிப்பு ஏற்படுவதும் தடுக்கப்பட்டது.

Read more »

கடலூர் மாவட்டத்தில் 200 கிராமங்களுக்கு வெள்ள அபாய எச்சரிக்கை

கடலூர் : 

                   கடலூர் மாவட்டத்தில் நீடித்து வரும் கன மழை காரணமாக வீராணம் உள்ளிட்ட நீர் நிலைகள் நிரம்பி வழிவதால், 200க்கும் மேற்பட்ட கிராமங்களுக்கு வெள்ள அபாய எச்சரிக்கை விடுக்கப்பட்டுள்ளது. 

                 கடலூர் மாவட்டத்தில் கடந்த வாரம் வடகிழக்கு பருவ மழை காரணமாக வீராணம், பெருமாள், வெலிங்டன் ஏரிகள் உள்ளிட்ட அனைத்து நீர் நிலைகளும், கடந்த 26ம் தேதி நிரம்பின. உபரி நீர் வெளியேற்றப்பட்டதால் வெள்ளாறு, பரவனாறு, கெடிலம் மற்றும் பெண்ணையாறுகளில் வெள்ளப் பெருக்கு ஏற்பட்டது. கடந்த 27ம் தேதி முதல் மழையின் தீவிரம் குறைந்து, நீர் நிலைகளுக்கு தண்ணீர் வரத்து குறைந்ததால், கிராமங்களில் சூழ்ந்திருந்த மழைநீர் வடிய துவங்கியது. இந்நிலையில் வங்கக் கடலில் மீண்டும் உருவான புதிய புயல் சின்னத்தால் மீண்டும் மழை தீவிரமடைந்தது.

                  கடந்த 30ம் தேதி தமிழகத்திலேயே அதிகபட்சமாக பரங்கிப்பேட்டையில் 22 செ.மீ., அளவு மழை கொட்டியது. ஏற்கனவே நீர் நிலைகள் நிரம்பி வழிந்த நிலையில், கன மழையால் நீர் வடிய வழியின்றி கிராமங்களிலும், வயல்வெளிகளிலும் புகுந்ததால் மாவட்டத்தின் பெரும் பகுதி வெள்ளக்காடானது. குறிப்பாக காவிரி ஆற்றின் வடிகால் பகுதியான காட்டுமன்னார்கோவில், சிதம்பரம் தாலுகாக்கள் பெரும் பாதிப்பிற்குள்ளானது. 

                வெள்ளாற்றின் குறுக்கே உள்ள சேத்தியாத்தோப்பு அணைக்கட்டு ஏற்கனவே முழு கொள்ளளவை எட்டிய நிலையில், கூடுதலாக வரும் நீர் தொடர்ந்து வெளியேற்றப்படுகிறது. நேற்று முன்தினம் மதியம் 12 மணிக்கு 22 ஆயிரம் கன அடி நீர், படிப்படியாக நேற்று காலை 10 மணிக்கு 86 ஆயிரத்து 675 கன அடியாக அதிகரித்து, வெள்ளாற்றில் வெள்ளம் பெருக்கெடுத்ததில் பல இடங்களில் கரை உடைந்து கிராமங்களில் புகுந்துள்ளது.

                      இதனால் புவனகிரி - சேத்தியாத்தோப்பு, கீரப்பாளையம் - சேத்தியாத்தோப்பு போக்குவரத்து முற்றிலும் துண்டிக்கப்பட்டது. வெள்ளாறு கரையோரத்தில் உள்ள 200க்கும் மேற்பட்ட கிராமங்களில் வெள்ளம் சூழ்ந்தது. ஏற்கனவே பரவானாறில் உடைப்பு ஏற்பட்டு பாதித்த பகுதிகளில், மீண்டும் தண்ணீர் உட்புகுந்ததால், அப்பகுதி மக்கள் அருகில் உள்ள பள்ளிகள், கோவில்கள், சமுதாய நலக்கூடங்களில் தஞ்சமடைந்துள்ளனர். 

                 வயல்வெளிகள் முழுமையாக மூழ்கி கடல் போல் காட்சியளிக்கிறது. வெள்ளாற்றில் ஏற்பட்ட வெள்ளப் பெருக்கு மற்றும் வீராணம், பெருமாள் ஏரிகள் நிரம்பி வழிவதை பார்வையிட்ட கலெக்டர் சீத்தாராமன், சிதம்பரம் மற்றும் காட்டுமன்னார் கோவில் தாலுகாக்களுக்கு வெள்ள அபாய எச்சரிக்கை விடுத்துள்ளார்.

Read more »

கடலூர் மாவட்டத்தில் கன மழை பரவனாற்றில் வெள்ளப் பெருக்கு : அடித்துச் செல்லப்படும் மணல் குன்றுகள்

பரவனாற்றில் ஏற்பட்டுள்ள வெள்ளப் பெருக்கால், கடலூரை அடுத்த திருச்சோபுரம் பகுதியில் ஆற்று நீரில் அடித்துச் செல்லப்படும் புகழ்பெற்ற மணல் குன்றுகள்.

கடலூர்:

             பரவனாற்றில் வெள்ளப் பெருக்கு ஏற்பட்டுள்ளதால், கடலூர் அருகே புகழ் வாய்ந்த மணல் குன்றுகள் ஆற்றில் அடித்துச் செல்லப்படுகின்றன.

               வடகிழக்குப் பருவமழை தீவிரம் அடைந்துள்ளதால், கடலூர் மாவட்டத்தில் கன மழை பெய்து வருகிறது. கடந்த ஒரு வாரமாக பெரும்பாலும் இரவு நேரங்களில் பலத்த மழை பெய்து வந்தது. வியாழக்கிழமை பகல் முழுவதும் தொடர்ந்து மழை பெய்து கொண்டே இருந்தது. கன மழை காரணமாக நீர் நிலைகள் நிரம்பி, உபரிநீர் பெருமளவு வெளியேற்றப்பட்டு வருகிறது. திட்டக்குடி வெலிங்டன் ஏரி நீர்மட்டம் வியாழக்கிழமை 21.5 அடியாக இருந்தது. மொத்த உயரம் 29.7 அடி. ஏரிக்கு 1060 கனஅடி நீர் வந்து கொண்டு இருக்கிறது.

                      கொள்ளிடம் கீழணை மொத்த உயரம் 9 அடி. வியாழக்கிழமை அணை நிரம்பி விட்டது. அணைக்கு 19,929 கனஅடி நீர் வந்து கொண்டு இருக்கிறது. அணையில் இருந்த, 23,270 கனஅடி நீர், கொள்ளிடத்தில் திறந்து விடப்பட்டு கடலுக்குச் செல்கிறது. சேத்தியாத்தோப்பு அணைக்கட்டில் இருந்து 5,291 கனஅடி நீர் வெள்ளாற்றில் திறந்து விடப்பட்டு, கடலுக்குச் சென்று கொண்டு இருக்கிறது. வாலாஜா ஏரியில் இருந்து, 1,520 கனஅடி நீரும், பெருமாள் ஏரியில் இருந்து 2,215 கனஅடி நீரும் திறந்து விடப்படுகிறது.

               இந்த உபரி நீர் முழுவதும் பரவானாற்றில் திறந்து விடப்பட்டு, கடலுக்குச் சென்று கொண்டு இருக்கிறது. பரவனாற்றில் வெள்ளப் பெருக்கு ஏற்பட்டுள்ளதால், கடலூரை அடுத்த திருச்சோபுரம் பகுதியில் உள்ள, மணல் குன்றுகள் பெருமளவு அடித்துச் செல்லப்படுகின்றன. பல நூறு ஆண்டுகளுக்கு முன் சுனாமி போன்ற இயற்கை சீற்றத்தால் உருவான இந்த மணல் குன்றுகளில் சில, 100 அடி உயரம் கொண்டவை. பல திரைப் படங்கள் இங்கு எடுக்கப்பட்டு உள்ளன.

                    இயற்கை எழில் கொஞ்சும் இந்த மணல் குன்றுகள், முந்திரிக் காடுகள் அழிக்கப்பட்டதாலும், பரவனாறு வெள்ளப் பெருக்காலும் தொடர்ந்து அழிவைச் சந்தித்து வருகின்றன. தற்போது ஏற்பட்டுள்ள வெள்ளப் பெருக்கால், மணல் குன்றுகள் பெரிதும் சேதம் அடைந்து வருகின்றன. கன மழை காரணமாகவும் பரவனாற்றில் ஏற்பட்டுள்ள வெள்ளப் பெருக்காலும் தீர்த்தனகரி, தாணூர் உள்ளிட்ட பெருமாள் ஏரி பசனப் பகுதிகளில், 100 ஏக்கர் நெல் பயிர்கள் தண்ணீரில் மூழ்கி உள்ளன. நொச்சிக்காடு, நடுத்திட்டு பகுதிகளில் 300 ஏக்கரில் வெட்டி வேர் பயிரிடப்பட்டு உள்ளது. இதில் 100 ஏக்கர் தண்ணீரில் மூழ்கி உள்ளது.

Read more »

கடலூர் மாவட்ட ஏரிகளில் உபரி நீர் வெளியேற்றம்

சிதம்பரம் : 

              பருவமழை தீவிரமடைந்து வருவதால் வீராணம் உட்பட கடலூர் மாவட்டத்தில் உள்ள பல்வேறு ஏரிகளில் இருந்து உபரி நீர் வெளியேற்றப்படுகிறது. 

               கடலூர் மாவட்டத்தில் கடந்த ஒரு வாரகாலமாக தொடர்ந்து மழை பெய்து வருவதால் மாவட்டத்தில் உள்ள பல்வேறு நீர் நிலைகள், குளங்கள், ஏரிகள் மழை நீரால் நிரம்பி வருகிறது. வீராணம் ஏரியில் மழை துவங்கியதையடுத்து ஏரியின் மொத்த கொள்ளளவான 1,465 மில்லியன் கன அடியில் 978.20 மில்லியன் கன அடி தொடர்ந்து இருப்பு வைக்கப்பட்டுள்ளது. செங்கால் ஓடை, பாப்பாக்குடி, கருணாகரநல்லூர் வாய்க்கால்கள் மூலம் ஏரிக்கு வரும் 500 கன அடி தண்ணீர் அதே அளவில் வெளியேற்றப்படுகிறது.

                  மேலும் மாவட்டத்தில் தொடர்ந்து மழை பெய்து வருவதால்  வாலாஜா ஏரியில் இருந்து பரவனாறு வழியாக 3,600 கன அடி தண்ணீர் வெளியேற்றப்படுகிறது. பெருமாள் ஏரியில் இருந்து 2,000 கன அடி நீர் வெளியேற்றப்படுகிறது. சேத்தியாத்தோப்பு அணைக்கட்டில் இருந்து வெள்ளாற்றில் 4,000 கன அடி தண்ணீர் வெளியேற்றப்படுகிறது. வீராணம் ஏரியில் இருந்து சென்னை குடிநீருக்கு 74 கன அடியும், சேத்தியாத்தோப்பு வெள்ளாற்று வடி கால் மூலம் 350 கன அடியும் வெளியேற்றப்படுகிறது.

Read more »