கடலூர் மாவட்டத்தில் பூஞ்சானக் கொல்லி மருந்து தயாரிப்பு சுய உதவிக்குழுவினரின் வித்தியாச முயற்சி

கிள்ளை : 

                தில்லைவிடங்கனில் டான்வா பண்ணை மகளிர் சுய உதவிக் குழுவினர் தயாரிக்கும் உயிர் பூஞ்சானக்கொல்லி மருந்து விவசாயிகளிடையே வரவேற்பை பெற்றுள்ளது.

                அரசு மூலம் கடன் பெற்று மகளிர் சுய உதவிக் குழுவினர் அவரவர்கள் திறமைக்கேற்ப மெஸ், மெழுவர்த்தி தயாரிப்பு, சந்தனம் வில்லை தயாரிப்பு என பல்வேறு தொழில்கள் மூலம் வருமானம் ஈட்டி வருகின்றனர். சில உதவிக் குழுக்கள் மினி பஸ், லாரிகளுக்கு உரிமையாளர்களாக கூட நிர்வகித்து வருகின்றனர்.

               இவர்களுக்கு மத்தியில் சிதம்பரம் அடுத்த தில்லைவிடங்கன் டான்வா பண்ணை மகளிர் சுய உதவிக்குழுவினர் சற்று வித்தியாசமாக விவசாயத்தை பாதுகாக்கும் வகையில், உயிர் பூஞ்சானக் கொல்லி மருந்துகள் தயாரிக்கின்றனர். "சூடோ மோனாஸ் புளூரன்ஸ்' மற்றும் "ரைக் கோடெர்மா விரிடி' மருந் துகள் தயாரித்து வேளாண் துறை உதவியுடன் உற்பத்தி செய்து விற்பனை செய்கின்றனர்.

                     மண்ணிற்கும், மனிதருக்கும் தீங்கு விளைவிக்காத வகையில் விவசாயத்தை பாதுகாப்பதுடன் போதிய லாபமும் அடைகின்றனர். பரங்கிப்பேட்டை வேளாண் துறை மூலம் கோவையில் உள்ள வேளாண் பல்கலைக் கழகத்தில் குழு தலைவர் வனஜா, பொருளாளர் லட்சுமி ஆகியோருக்கு சிறப்பு பயிற்சி அளித்து சான்று வழங்கப்பட்டுள்ளது. இங்கு உற்பத்தி செய்யப்பட்ட மருந்து வகைகள்கோவை வேளாண் பல்கலைக் கழகத்தில் ஆய்வு செய்து தரச்சான்று அளிக்கப்பட்டுள்ளது.

                  முதல் முதலாக 2.50 லட்சம் ரூபாய் செலவில் மூலப்பொருட்கள் மற்றும் இயந்திரங்களை சென்னையில் கொள்முதல் செய்து தில்லைவிடங்கனில் ஒரு வீட்டில் ஆய்வு கூடம் அமைத்து உற்பத்தி செய்து வருகின்றனர். இதற்கு பரங்கிப்பேட்டை ஒன்றிய வேளாண் துறை 1.25 லட்சம் ரூபாய் மானியம் வழங்கியுள்ளது.

                    இந்த மருந்துகளால் நெல், வாழை, பருத்தி, கரும்பு, மணிலா, உளுந்து, பயிர், கேழ்வரகு, கம்பு, சோளம், வெள்ளரி, இஞ்சி, தக்காளி, வெண்டை, உருளை மற்றும் தென்னை உள்ளிட்ட பயிர் வகைகளை நோய் தாக்குதலில் இருந்து கட்டுப்படுத்த முடியும். மேலும் விதைகளை இந்த மருந்துடன் கலந்து விதை நேர்த்தி செய்வதால் விவசாயிகளிடம் அமோக வரவேற்பை பெற்றுள்ளது.