உலக அளவில் 19 ஆயிரத்து 700 கோடி டன் நிலக்கரி வளத்துடன் இந்தியா 4ம் இடம்

 

நெய்வேலி : 

       ""இந்தியாவில் ஆண்டுக்கு 6 கோடியே 70 லட்சம் டன் நிலக்கரி இறக்குமதி செய்யப்படுகிறது'' என என்.எல்.சி., சுரங்கத் துறை இயக்குனர் சுரேந்தர் மோகன் பேசினார்.

         கடலூர் மாவட்டம், நெய்வேலியில் இந்தியப் பொறியாளர் கழகம் சார்பில் சுரங்கத் துறையில் பின்பற்றப்படுவதற்காக, சமீபத்தில் வகுக்கப்பட்ட விதிமுறைகள் மற்றும் நடைமுறை குறித்த ஆய்வரங்கம் நேற்று முன்தினம் நடந்தது. என்.எல்.சி., திட்ட இயக்குனர் கந்தசாமி தலைமை தாங்கினார்.

கருத்தரங்கில் என்.எல்.சி., சுரங்கத்துறை இயக்குனர் சுரேந்தர் மோகன் பேசியது: 

          உலக அளவில் 19 ஆயிரத்து 700 கோடி டன் நிலக்கரி வளத்துடன் இந்தியா 4ம் இடத்தில் உள்ளது. ஆண்டுக்கு 53 கோடி டன் நிலக்கரி உற்பத்தி செய்வதன் மூலம் இந்தியா 3ம் இடத்தைப் பெற்றுள்ளது. இந்தியாவில் ஆண்டுக்கு 6 கோடியே 70 லட்சம் டன் நிலக்கரி இறக்குமதி செய்யப்படுகிறது. இந்தியாவின் 67 சதவீத மின் தேவைகள் நிலக்கரியை பயன்படுத்தி தயாரிக்கப்படும் அனல்மின் சக்தி வாயிலாக பெறப்படுகிறது. இந்திய நிலக்கரி உற்பத்தியில் 81 சதவீதம் திறந்த வெளி சுரங்கங்கள் மூலம் கிடைக்கிறது.

           வரும் 20 ஆண்டுகளில் நம் நாட்டின் நிலக்கரி தேவை 3 மடங்காக உயரும் வாய்ப்பு உள்ளது. 2014ம் ஆண்டில் நாட்டின் நிலக்கரி உற்பத்திக்கும் தேவைக்கும் இடையேயான இடைவெளி 15 கோடி டன்னாக இருக்கும். மேலும் 12வது திட்டத்தின் முடிவில் பழுப்பு நிலக்கரி மூலம் பெறப்படும் மின் உற்பத்தி, 7,491 மெகா வாட்டாகவும் 13வது திட்ட காலத்தின் முடிவில் 11 ஆயிரத்து 91 மெகா வாட்டாகவும் இருக்கும் வகையில் திட்டமிடப்பட்டுள்ளது. என்.எல்.சி.,யில் விரைவில் இரண்டாம் அனல்மின் நிலைய விரிவாக்கத்தின், வாயிலாக 500 மெகாவாட் மின்சாரம் மற்றும் தமிழக அரசுடன் இணைந்து, மேற்கொள்ளப்பட்டு வரும் தூத்துக்குடி அனல்மின் திட்டத்தின் வாயிலாக 1,000 மெகா வாட் மின்சாரமும் கூடுதலாகக் கிடைக்கும். இவ்வாறு சுரேந்தர் மோகன் பேசினார்.

Read more »

என்எல்சியில் மண்வெட்டும் இயந்திரம் ரூ.3.35 கோடி செலவில் புதுப்பிப்பு

நெய்வேலி:

             என்எல்சி சுரங்கத்தில் தொடர்ந்து 8 ஆண்டுகள் பயன்படுத்தப்பட்ட மண்வெட்டும் இயந்திரம் ரூ.3.35 கோடி செலவில் புதுப்பிக்கப்பட்டு மீண்டும் சுரங்கப் பணியில் ஈடுபடுத்தப்பட்டுள்ளது.

                  என்எல்சி முதல் சுரங்கத்தில் மண் மற்றும் பழுப்பு நிலக்கரியை வெட்டியெடுக்க பக்கெட்வீல் எனும் சுரங்க இயந்திரம் பயன்படுத்தப்படுகிறது.  சுரங்கப் பயன்பாட்டுக்காக கடந்த 2002-ம் ஆண்டு சுரங்கப் பணியில் ஈடுபடுத்தப்பட்ட மண்வெட்டும் இயந்திரம் தொடர்ந்து இயங்கிவந்தது. இந்நிலையில் அதன் பாகங்கள் தேய்மானம் ஆனதை அடுத்து இயந்திரத்தை புதுப்பிக்கும் பணியை சுரங்க நிர்வாகம் மேற்கொண்டது.  அதனடிப்படையில் ரூ.3 கோடியே 35 செலவில் அதன் உதிரிபாகங்கள் மாற்றியமைக்கப்பட்டு, காரைக்குடியில் உள்ள மத்திய மின் வேதியியல் ஆராய்ச்சி மையத்தால் பரிந்துரைக்கப்பட்ட வர்ணம் பூசப்பட்டு, மீண்டும் சுரங்க செயல்பாட்டுக்காக தயார்படுத்தப்பட்டது. 

               இதைடுத்து புதுப்பிக்கப்பட்ட இயந்திரத்தை என்எல்சி சுரங்க இயக்குநர் பி.சுரேந்திரமோகன் வியாழக்கிழமை இயக்கிவைத்தார்.  மேலும் சுரங்கம் 1ஏ பகுதியில் பணிபுரியும் தொழிலாளர்களின் நலனைக் கருத்தில் கொண்டு அவர்களுக்கு குடிநீர் வழங்குவதற்காக புதிய குடிநீர் திட்டம் செயல்படுத்தப்பட்டு, அது முறைப்படி வியாழக்கிழமை தொழிலாளர்களின் பயன்பாட்டுக்கு விரிவுப்படுத்தப்பட்டது. இதையும் சுரங்க இயக்குநர் பி.சுரேந்திரமோகன் தொடங்கிவைத்தார். 

                மேலும் சுரங்க 1ஏ-வின் அடித்தளத்துக்கு செல்ல சிறப்பு சரிவுப் பாதைகள் அமைக்கப்பட்டு, அவையும் சுரங்க இயக்குநரால் செயல்படுத்தப்பட்டது.  இந்நிகழ்ச்சியில் சுரங்க செயல் இயக்குநர்கள் ராமகிருஷ்ணன்,ராமலிங்கம், முதன்மைப் பொதுமேலாளர்கள் வீரபிரசாத், வைத்தீஸ்வரன் ஆகியோர் கலந்துகொண்டனர்.

Read more »

கடலூர் தேவன்குடியில் புதிய பழுப்பு நிலக்கரி சுரங்கம்

நெய்வேலி:

              கடலூர் மாவட்டம் தேவன்குடியில் அமையவுள்ள புதிய சுரங்கத்திலிருந்து வெட்டியெடுக்கப்படும் பழுப்பு நிலக்கரி முழுவதும், அதைப் பயன்படுத்தும் சிறிய, பெரிய நிறுவன வாடிக்கையாளர்களுக்கு விற்பனை செய்யப்படும் என என்எல்சி தலைவர் ஏ.ஆர்.அன்சாரி தெரிவித்தார்.  

                மண்டல நிலக்கரி உபயோகிப்பாளர்கள் குழுவின் 2-வது கூட்டம் நெய்வேலியில் என்எல்சி தலைவர் ஏ.ஆர்.அன்சாரி தலைமையில் நடந்தது. 

இக்கூட்டத்தில் அன்சாரி பேசுகையில், 

               என்எல்சி நிறுவனம் தனது தேவை போக எஞ்சியிருக்கும் பழுப்பு நிலக்கரியை விற்பனை செய்வதற்காக மேற்கொண்டுவரும் கொள்கைகளையும், நடைமுறைகளையும் விவரித்தார்.  மேலும் என்எல்சி அனல்மின் நிலையங்களுக்கு பழுப்பு நிலக்கரி வழங்குவதற்காகத் தான், பழுப்பு நிலக்கரிச் சுரங்கங்கள் செயல்படுத்தப்படுகின்றன. எனவே தங்களது பிரதான நோக்கத்துக்காக பயன்படுத்தியது போக எஞ்சிய பழுப்பு நிலக்கரியை மட்டும் தான் பிற உபயோகிப்பாளர்களுக்கு வழங்கமுடியும். 

                 எனவே எரிபொருள் வழங்கும் ஒப்பந்தங்களை பிற நிறுவனங்களுடன் மேற்கொள்ள முடியாது என்றார்.  இருப்பினும் என்எல்சி நிறுவனம், 2-ம் சுரங்கத்தின் தென்பகுதியில் உள்ள தேவன்குடி கிராமத்தில் புதிதாக சுரங்கம் அமைக்கவிருக்கிறது. இச்சுரங்கத்திலிருந்து வெட்டியெடுக்கப்படும் பழுப்பு நிலக்கரியிலிருந்து ஆண்டுக்கு 20 லட்சம் டன் பழுப்பு நிலக்கரியை பிற உபயோகிப்பாளர்களுக்கு வழங்கத் திட்டமிடப்பட்டுள்ளது.  மேலும் ஜெயங்கொண்டத்தில் பழுப்பு நிலக்கரி வெட்டியெடுக்கும் பணி துவங்கியவுடன், அங்கிருந்து 5 சதவீதம் உபயோகிப்பாளர்களுக்கு வழங்கப்படும் எனவும் அன்சாரி தெரிவித்தார். 

               இக்கூட்டத்தில் நிலக்கரி உபயோகிப்பாளர் குழுவைச் சேர்ந்த சி.டி.மெய்யப்பன், டி.பாணிமகேஷ், என்.ஜெயப்ரகாஷ். எஸ்.பி.சும்சுதீன், பி,ராயலு, மப்பண்ணா கஞ்ச்கிரி மற்றும் டால்மியா நிறுவனத்தின் செயல் இயக்குநர் ஏ.சங்கர் நடராஜ் உள்ளிட்டோர் பங்கேற்றனர்.  முன்னதாக என்எல்சி சுரங்க இயக்குநர் பி.சுரேந்தரமோகன் வரவேற்றார். விற்பனைத் துறை பொதுமேலாளர் மோகன் நன்றி கூறினார்.

Read more »

என்.எல்.சி.சார்பில் மின் உற்பத்தியை 1 கோடி யூனிட்டாக அதிகரிக்க நடவடிக்கை

            நெய்வேலி பழுப்பு நிலக்கரி நிறுவனத்தின் (என்.எல்.சி.) சார்பில், ஒரு மணிக்கு ஒரு கோடி யூனிட்டாக மின் உற்பத்தியை அதிகரிக்கும் பணிகள் நடைபெற்று வருவதாக நிறுவனத்தின் தலைவர் ஏ.ஆர்.அன்சாரி தெரிவித்தார். என்.எல்.சி. நிறுவன தின விழா நிறுவனத்தின் தலைமை அலுவலகத்தில் வெள்ளிக்கிழமை நடைபெற்றது.

நிகழ்ச்சியில் ஏ.ஆர்.அன்சாரி பேசியது:

          உலகின் தலைசிறந்த 500 நிறுவனங்களில் என்.எல்.சி. 59-வது இடத்தில் உள்ளது. இந்தியாவில் நவரத்னா தகுதி பெற்றுள்ள  19-வது நிறுவனம் என்.எல்.சி. ஆகும். அதற்கு உயர்ந்த நிலையான மகாரத்னா நிலையை விரைவில் இந்த நிறுவனம் அடையும். இப்போது மணிக்கு சுமார் 25 லட்சம் யூனிட் மின்சாரம் உற்பத்தி செய்யப்படுகிறது. அதை ஒரு கோடி யூனிட்டாக அதிரிக்கும் பணிகள் நடைபெற்று வருகின்றன.

            இதை மணிக்கு 2 கோடி யூனிட்டாக அதிகரிக்கும் பட்சத்தில் மகாரத்னா இலக்கை அடைய முடியும். 2009-10-ம் நிதியாண்டில் நிறுவனம் ரூ. 1,247 கோடி நிகர லாபம் ஈட்டியுள்ளது. பழுப்பு நிலக்கரிக்கு மாற்றாக நிலக்கரியில் இயங்கும் புதிய நிலையங்களை என்.எல்.சி. அமைக்க உள்ளது. இதற்காக நிலக்கரி சுரங்கங்களை தொடங்கவும் திட்டமிடப்பட்டுள்ளது.மிகக் குறைந்த விலையில் மின்சாரத்தை உற்பத்தி செய்யும் நிறுவனங்கள்தான் இனி நிலைத்து நிற்க முடியும். எனவே உற்பத்தி செலவைக் குறைக்க நடவடிக்கை எடுக்க வேண்டும் என்றார் அவர்.

               நிறுவனத்தின் இயக்குநர்கள் பி.சுரேந்தர் மோகன், ஆர்.கந்தசாமி, கே.சேகர், ஜெ.மகிழ்செல்வன், எஸ்.கே.ஆச்சார்யா உள்ளிட்ட பணியாளர்கள், தொழிற் சங்கங்கள், பொறியாளர் சங்கங்களின் பிரதிநிதிகள் கலந்து கொண்டனர்.

Read more »

என்.எல்.சி.க்கு வைகோ பாராட்டு

மதிமுக பொதுச்செயலர் வைகோ வெளியிட்ட அறிக்கையில்,

               "இந்திய பொதுத்துறை நிறுவனங்களில் சிறப்பான வளர்ச்சி பெற்று விளங்கும் நெய்வேலி பழுப்பு நிலக்கரி நிறுவனம், தமிழ்நாட்டுக்குப் பெருமை சேர்த்து வருகிறது. நாட்டின் உயிர்நாடியான மின்உற்பத்தித் துறையில் என்.எல்.சி. நிறுவனம் தொடர்ந்து சாதனையைப் படைத்து வருகிறது.

                கடந்த நிதி ஆண்டில் 1788 கோடி யூனிட் மின்சார உற்பத்தி செய்து சிறப்பான இடத்தைப் பெற்றதுடன் ரூ. 1,247 கோடி லாபம் ஈட்டி என்.எல்.சி. நிறுவனம் சாதனை புரிந்து உள்ளது. எனவே, என்.எல்.சி. நிறுவனத்தின் வெற்றி மகுடத்தில் நவரத்னா என்னும் ரத்தினக்கல் இந்திய அரசால் பொறிக்கப்பட்டு இருக்கிறது.

               பொதுத்துறை நிறுவனங்களின் மதிப்புமிக்க உயரிய நவரத்னா விருதைப் பெற்றுள்ள என்.எல்.சி. நிறுவனத்தின் அதிபர், இயக்குனர்கள் மற்றும் என்.எல்.சி. வளர்ச்சிக்காக உழைத்து வரும் தொழிலாளர்கள், பொறியாளர்கள், ஒப்பந்தத் தொழிலாளர்கள் அனைவருக்கும் வாழ்த்துகளையும், பாராட்டுகளையும் தெரிவித்துக் கொள்கிறேன். என்.எல்.சி. மென்மேலும் வளர்ந்து மகாரத்னா விருதையும் பெற்றிட வாழ்த்துவதுடன், என்.எல்.சி. பொதுத்துறை நிறுவனமாக ஒளிவீசித் திகழ்ந்திட மதிமுக உறுதுணையாக இருக்கும் என்பதையும் தெரிவித்துக் கொள்கிறேன்’’ என்று குறிப்பிட்டுள்ளார்.

Read more »

என்.எல்.சி. பாராமுகமாக இருப்பது ஏன்?: கி.வீரமணி

நெய்வேலி:

 திராவிடர் கழகத் தலைவர் கி. வீரமணி வெளியிட்டுள்ள அறிக்கையில்,

               நெய்வேலி நிலக்கரி நிறுவனத்தில் 30 ஆண்டுகள், 40 ஆண்டுகள் பணியாற்றியிருந்தும் ஓய்வூதியம் இன்றி வெறுங்கையோடு திரும்பியோர்களின் நிலை கவனிக்கப்படவேண்டும். இவ்வளவுக்கும் என்.எல்.சி. என்பது இலாபம் கொழிக்கச் செய்யும் நவரத்தினங்களுள் ஒன்றாகும்.

           இந்த நிலைக்குக் காரணம் அந்நிறுவனத்தில் அயராது பணியாற்றிய தோழர்களின் விலை மதிக்கமுடியாதபேருழைப்பாகும். 1995 ஓய்வூதிய திட்டத்தில் என்.எல்.சி. நிறுவனமும், திருச்சி பிராவிடண்ட் ஃபண்டு ஆணையமும் உரியகாலத்தில் ஊழியர்களைச் சேர்க்காதது ஊழியர்களின் குற்றமல்ல; அவர்கள் செய்த தவறுக்குப் பாதிப்பினைச்சந்திப்பவர்கள் ஊழியர்களா? என்ற கேள்வி எழுந்துள்ளது.

                  ஓய்வூதியம் பெற்றிட இயலாமல் வயது 70 முதல்80 வயதுவரை கடந்துகொண்டு இருப்பவர்களுக்கு ஓய்வூதியம் என்பது அவர்களின் வயோதிகக் காலத்திற்கு உதவும் கைத்தடியாக இருக்கும். நீதிமன்ற தீர்ப்பு கிடைத்தும்கூட என்.எல்.சி. பாராமுகமாக இருப்பது - ஏன்? மற்ற மற்ற பொதுத்துறை நிறுவனங்களில் (ஓ.என்.ஜி.சி. போன்றவைகளில்) ஓய்வு பெற்றோருக்கு ஓய்வூதியம் வழங்கப்படும் நிலையில், என்.எல்.சி., ஊழியர்களுக்கு மட்டும் அது கிடைக்காதது ஏன் என்பது நியாயமான கேள்வியாகும்!

                  ஓய்வூதியமோ, உதவித் தொகையோ அல்லது கருணைத் தொகையோ ஏதோ ஒரு பெயரில் பல்லாண்டுகாலம் உழைத்தோருக்கு அளிக்கப்படுவதுதான் நியாயமும், மனிதநேயமும் ஆகும்.  மத்திய அரசு ஆவன செய்யவேண்டும். நமது முதலமைச்சர் அவர்களும் பாதிக்கப்பட்டுள்ள என்.எல்.சி.ஊழியர்களின் இந்தப் பிரச்சினையைக் கவனிக்கவேண்டும். மத்திய அரசுக்குத் தெரிவித்து ஆவனசெய்யவேண்டுமாய்க் கேட்டுக்கொள்கிறோம்’’ என்று தெரிவித்துள்ளார்.

Read more »

நிலக்கரியை இறக்குமதி செய்ய என்எல்சி திட்டம்: அன்சாரி

நெய்வேலி:

 

           என்எல்சியின் புதிய அனல்மின் திட்டங்களுக்கு தேவையான நிலக்கரியை இறக்குமதி செய்ய நடவடிக்கை மேற்கொண்டுவருவதாக அதன் தலைவர் ஏ.ஆர்.அன்சாரி  நெய்வேலியில் நடைபெற்ற சுதந்திர தின விழாவில் குறிப்பிட்டார்.

 

            என்எல்சி நிறுவனம் சார்பில் நடைபெற்ற சுதந்திர தினவிழாவுக்கு நிர்வாகத் துறை இயக்குநர் பி.பாபுராவ் தலைமை வகித்தார். விழாவில் பங்கேற்ற நிறுவனத் தலைவர் ஏ.ஆர்.அன்சாரி நெய்வேலி விருந்தினர் மாளிகை எதிரே உள்ள காந்தி சிலைக்கு மாலை அணிவித்து மரியாதை செலுத்தினார்.

 

பின்னர் பாரதி விளையாட்டரங்கில் தேசியக் கொடியை ஏற்றிவைத்து அவர் பேசியது: 

 

              நாட்டின் நிலக்கரித் தேவை, உற்பத்தியைக் காட்டிலும் அதிகமாகிக் கொண்டிருக்கிறது. மின்சக்தியின் தேவையும் நாளுக்குநாள் அதிகரித்துவரும் வேளையில், மின்துறை மிகப்பெரிய அளவில் வளர்ச்சி பெறுவதற்கான வாய்ப்புகள் உள்ளது. எனவே என்எல்சியின் விரிவாக்கத் திட்டங்களுக்குத் தேவையான நிலக்கரியைப் பெறும் வகையில் நீண்டகால ஏற்பாடுகளைச் செய்ய வேண்டியது அவசியமாகிறது.

 

                 தடங்கல் இன்றி எரிபொருள் வழங்கும் வகையில் வெளிநாடுகளில் இருந்து நிலக்கரி இறக்குமதி செய்ய வேண்டும். இதற்காக தகுதியான நிறுவனத்துடன் இணைந்து கூட்டு முயற்சியில் வெளிநாடுகளில் சுரங்கம் அமைக்க வழிவகை செய்ய வேண்டும்.

 

             இந் நோக்கத்துடன் என்எல்சி ஏற்கெனவே சில பூர்வாங்க பணிகளை மேற்கொண்டுள்ளது. அவற்றுக்கு இந்திய அரசின் அனுமதியைப் பெறுவதற்காக பல்வேறு முயற்சிகளை மேற்கொண்டுள்ளோம் என்றார் அன்சாரி.தொடர்ந்து நிறுவனத்தில் நீண்டகாலம் பணியாற்றிய தொழிலாளியை கௌரவித்தல், 15 ஆண்டுகளுக்கு மேல் பணியாற்றிய ஊழியர்களுக்கு நினைவுப் பரிசு வழங்குதல், விளையாட்டுகளில் பதக்கம் வென்ற மாணவ, மாணவியரை கௌரவிக்கும் நிகழ்ச்சிகள் நடைபெற்றன. நெய்வேலி பள்ளிகளின் மாணவ, மாணவியர் பங்கேற்ற வண்ணமிகு கலை நிகழ்ச்சிகள் நடைபெற்றன. 

 

                  இக்கலை நிகழ்ச்சியில் பங்கேற்ற மாணவ, மாணவிகளுக்கு |3.5 லட்சம் வெகுமதியாக வழங்கப்படும் என அன்சாரி அறிவித்தார்.நிகழ்ச்சியில் நிறுவன இயக்குநர்கள் பி.சுரேந்திரமோகன், ஆர்.கந்தசாமி, கே.சேகர், ஜே.மகிழ்செல்வன் உள்ளிட்ட பலர் பங்கேற்றனர்.

Read more »

என்எல்சி ஸ்டிரைக்: இன்று பேச்சுவார்த்தை

நெய்வேலி:

 

               என்எல்சி தொழிலாளர்களின் ஊதியமாற்று ஒப்பந்தத்துக்கான நிலுவைத் தொகைகளை 01-01-2007 முதல் வழங்க வலியுறுத்தி என்எல்சி தொழிலாளர்கள் புதன்கிழமை (ஜூன் 30) இரவுப் பணி முதல் மேற்கொண்ட காலவரையற்ற வேலைநிறுத்தப் போராட்டம் வெள்ளிக்கிழமையும் நீடிக்கிறது. வியாழக்கிழமை, மத்திய தொழிலாளர் நல ஆணையர் எம்.எம்.ஜகன்னாதராவ் மற்றும் உதவி ஆணையர் சிவசங்கரன் முன்னிலையில் என்எல்சி நிர்வாகத்துறை அதிகாரிகள் டி.லூர்தஸ்,  ஓ.எஸ்.அறிவு, தொழிற்சங்க நிர்வாகிகள் ஆர்.கோபாலன், வீ.ராமச்சந்திரன், எ.காத்தவராயன், எ.பெருமாள், வீ.திலகர், ஏஞ்சலின் மோனிகா, சுப்பிரமணியன் உள்ளிட்டோர் சமரசப் பேச்சுவார்த்தையில் ஈடுபட்டனர். பேச்சுவார்த்தை வியாழக்கிழமை இரவு வரை நீடித்த போதிலும் எவ்வித தீர்வும் எட்டப்படவில்லை. இதையடுத்து சென்னையில் வெள்ளிக்கிழமை சமரசப் பேச்சுவார்த்தை தொடரும் என மத்திய தொழிலாளர் நல ஆணையர் தெரிவித்தார். 

 

மின் உற்பத்தில் பாதிப்பில்லை 

 

                   ""சுரங்கங்களில் இருந்து அனல்மின் நிலையங்களுக்கு வழங்கப்படும் 30 ஆயிரம் டன் பழுப்பு நிலக்கரி வழக்கம்போல் தடையின்றி அனுப்பப்படுகிறது. அனல்மின் நிலையங்களில் வழக்கம் போல் மின்னுற்பத்தி நடைபெறுகிறது. என்.எல்.சி.யின் 3 அனல்மின் நிலையங்களில் இருந்து ஒரு மணி நேரத்திற்கு 2490 மெகாவாட் மின்னுற்பத்தி செய்யப்படுகிறது. இதில் தற்போது 2200 மெகாவாட்டுக்கு குறையாமல் மின்னுற்பத்தி செய்யப்படுகிறது. 5 நாள்களுக்குத் தேவையான  பழுப்பு நிலக்கரி கிடங்குகளில் சேமித்து வைக்கப்பட்டுள்ளது. இதைக்கொண்டு அனல்மின் நிலையங்களில் தடையின்றி மின்சார உற்பத்தி செய்ய முடியும்'' என என்.எல்.சி. நிர்வாகத் தரப்பில் தெரிவிக்கப்பட்டுள்ளது.

Read more »

பழுப்பு நிலக்​கரி லாரி​கள் வேலை​நி​றுத்​தம்

நெய்வேலி:

 

            நெய்வேலியில் இருந்து பழுப்பு நிலக்கரி ஏற்றிச்செல்லும் தனியார் லாரி உரிமையாளர்கள் வியாழக்கிழமை முதல் காலவரையற்ற வேலைநிறுத்தப் போராட்டத்தில் ஈடுபட்டுள்ளனர்.நெய்வேலியில் இருந்து தமிழகம், ஆந்திர மாநிலத்திலுள்ள சிமென்ட் மற்றும் செங்கல் உற்பத்திக் கூடங்களுக்கு பழுப்பு நிலக்கரி எடுத்தும் செல்லும் பணியில் 80-க்கும் மேற்பட்ட லாரிகள் ஈடுபட்டுள்ளன. பெட்ரோல்-டீசல் விலை உயர்வு, லாரியின் உதிரி பாகங்கள் விலை உயர்வு, சுங்க வரி அதிகரிப்பு, டிரைவர் மற்றும் கிளீனர் படி போன்றவை அதிகரித்துவிட்ட நிலையில், லாரிகளுக்கான வாடகையை சம்பந்தப்பட்ட சிமென்ட் மற்றும் செங்கல் உற்பத்திக் கூட நிறுவனங்கள் உயர்த்தித் தரவேண்டும் என லாரி உரிமையாளர்கள் பலமுறை வலியுறுத்தினர்.ஆனால், தனியார் நிறுவனங்கள் வாடகையை உயர்த்தவில்லை. இதையடுத்து தனியார் லாரி உரிமையாளர்கள் காலவரையற்ற வேலைநிறுத்தப் போராட்டத்தில் ஈடுபட்டுள்ளனர்.

 

போராட்டம் குறித்து நெய்வேலி பாடி லாரி உரிமையாளர் சங்கப் பொருளாளர் இப்ராகிம் கூறுகையில்,

 

                "தமிழகம் முழுவதும் 20 சதவீத வாடகைக் கட்டணம் உயர்த்தப்பட்டுள்ள நிலையில் சிமென்ட் நிறுவனங்கள் இதுவரை எங்களுக்கான வாடகையை உயர்த்தாததால் நாங்கள் மிகுந்த நஷ்டத்துக்குத் தள்ளப்பட்டுள்ளோம். இதனால்தான் போராட்டத்தில் ஈடுபட வேண்டிய நிலை ஏற்பட்டுள்ளது. இரு தினங்களுக்குள் சம்பந்தப்பட்ட நிறுவனங்கள் லாரி வாடகையை உயர்த்தாவிட்டால், காலவரையற்ற உண்ணாவிரதப் போராட்டத்தில் ஈடுபடுவோம் என்றார் அவர்.

Read more »