பண்ருட்டி:
சிமென்ட், செங்கல் விலை எந்த முகாந்தரமும் இல்லாமல் உயர்ந்துள்ளதற்கு ஆலை உரிமையாளர்கள் கூட்டணி அமைத்து கொள்ளை லாபம் ஈட்ட வேண்டும் என்ற நோக்கில் விலை ஏற்றத்தை ஏற்படுத்தியுள்ளனர் என கட்டுமானத் தொழிலாளர் நலவாரியத் தலைவர் பொன்.குமார் கூறினார்.
பண்ருட்டியில் வியாழக்கிழமை நடந்த நிகழ்ச்சி ஒன்றில் கலந்து கொண்ட கட்டுமானத் தொழிலாளர் நலவாரியத் தலைவர் பொன்.குமார் பேசியது:
கட்டுமான உயர் பயிலரங்கம் கட்டுவதற்கான அடிக்கல் நாட்டு விழா சென்னை நேரு உள் விளையாட்டு அரங்கில் அக்டோபர் 30-ம் தேதி நடக்கவுள்ளது. இவ்விழாவில் தமிழக முதல்வர் கலந்து கொண்டு அடிக்கல் நாட்டி, தொழிலாளர்களுக்கு பல்வேறு நலத்திட்ட உதவிகளை வழங்கி சிறப்புரையாற்றவுள்ளார். இதில் தமிழகத்தில் இருந்து 50,000 பேர் கலந்து கொள்வர்.இந்த கட்டுமான உயர் பயிலரங்கத்தின் மூலம் ஏற்கெனவே கட்டுமானத் தொழிலில் உள்ளவர்களின் பணித் திறனை மேம்படுத்தவும், நவீன வளர்ச்சிக்கு ஏற்ப கட்டுமானத் தொழிலில் பயிற்சி பெற உதவும்.
இதன் மூலம் ஆண்டுக்கு ஒரு லட்சம் வேலை இல்லாத இளைஞர்களுக்கு பிளம்பர், எலக்ட்ரீஷியன், கார்பென்டர், கொத்தனார், பெயிண்டர் என பயிற்சி அளிக்கப்பட்டு அரசு சான்றிதழ் அளிக்கப்படும்.இந்த சான்றிதழ் பெற்றவர்கள் பெரிய கட்டுமான நிறுவனத்தில் பணியில் சேரவும், வெளிநாடு செல்லவும் உதவும், சுயத்தொழில் செய்ய வங்கிக்கடனும் கிடைக்கும்.கட்டுமான மற்றும் அமைப்புச் சாரா தொழிலாளர்கள் நலவாரிய அட்டையை கொண்டு மருத்துவ சிகிச்சை பெறலாம் என அறிவித்த தமிழக முதல்வருக்கு விழாவில் நன்றி தெரிவிக்கவுள்ளோம்.
மேலும் தொழிலாளர்களின் எதிர்பார்ப்புகள் மற்றும் கோரிக்கைகளை இந்த விழாவில் முதல்வர் நிறைவேற்றுவார் என நம்புகிறோம்.கட்டுமான பொருள்களின் விலை உயர்ந்துள்ளது. கடந்த 25 நாள்களுக்கு முன்னர் 150 விற்பனையான சிமென்ட் தற்போது 290 விற்பனையாகிறது.மின் கட்டணம் உயரவில்லை, புதிய வரிவிதிப்பு இல்லை, டீசல், பெட்ரோல் விலை உயரவில்லை, தொழிலாளர் சம்பளம் உயரவில்லை.ஆனால் கொள்ளை லாபம் ஈட்ட வேண்டும் என்ற நோக்கில் ஆலை அதிபர்கள் கூட்டணி வைத்து விலை ஏற்றம் செய்துள்ளனர் என பொன்.குமார் கூறினார்.
0 கருத்துகள்:
கருத்துரையிடுக