கடலூர்:
கடலூர் சட்டப் பேரவைத் தொகுதி பாஜக வேட்பாளர் குணா என்ற குணசேகரன் வெள்ளிக்கிழமை தனது தேர்தல் பிரசாரத்தைத் தொடங்கினார்.
கடலூர் தொகுதி பாஜக வேட்பாளராக கடலூர் மார்க்கெட் காலனியைச் சேர்ந்த குணசேகரன் (36) நியமிக்கப்பட்டுள்ளார். அவர் பாஜக மாவட்ட நிர்வாகக் குழு உறுப்பினராகவும், தொகுதி பொறுப்பாளராகவும் இருந்து வருகிறார். குணசேகரன் தனது தேர்தல் பிரசாரத்தை மார்க்கெட் காலனியில் வெள்ளிக்கிழமை தொடங்கினார். அவருடன் பாஜக நகரத் தலைவர் வெங்கடேசன், முன்னாள் நகரத் தலைவர் தேவநாதன் உள்ளிட்ட கட்சி நிர்வாகிகள் வாக்கு சேகரிப்பில் ஈடுபட்டனர்.
கடலூர் மாவட்டத்தில் பாஜக வேட்பாளர்களாக பண்ருட்டி தொகுதிக்கு, தொகுதி பொறுப்பாளர் செல்வகுமார், குறிஞ்சிப்பாடி தொகுதிக்கு வைரக்கண்ணு, நெய்வேலி தொகுதிக்கு மாநில மகளிரணி அமைப்பாளர் கற்பகம் மோகன், விருத்தாசலம் தொகுதிக்கு வேல்முருகன் ஆகியோர் அறிவிக்கப்பட்டு உள்ளனர்.
0 கருத்துகள்:
கருத்துரையிடுக