சிதம்பரம், டிச. 9:
கேரளத்தைப் போல் பிட்டி பருத்தி உள்ளிட்ட மரபணு மாற்றப் பயிர்களை தமிழ்நாட்டில் தடை செய்ய வேண்டும் என தமிழக உழவர் முன்னணி வேண்டுகோள் விடுத்துள்ளது.
இதுகுறித்து அந்த முன்னணியின் ஆலோசகர் கி.வெங்கட்ராமன் வெளியிட்டுள்ள அறிக்கை:
மரபணுக்களின் தன்மையையும், வரிசையையும் மாற்றியமைத்து உருவாக்கப்படும் மரபீனி மாற்றப் பயிர்களை உரிய ஆய்வின்றி இந்திய அரசு அனுமதித்து வருகிறது. இது ஆபத்தானது. மரபீனி மாற்றப் பயிர்கள் சாகுபடிச் செலவு பன்மடங்கு அதிகரித்து, உழவர்களை கடனாளியாக்கி, கடும் பாதிப்பை ஏற்படுத்துகிறது. மராட்டிய மாநிலம் விதர்ப்பாவிலும், ஆந்திரத்திலும் மரபீனி மாற்றப்பயிரான பிட்டி பருத்தியை சாகுபடி செய்த உழவர்கள் கழுத்து முட்டும் கடனில் சிக்கி, பல ஆயிரம் பேர் தற்கொலை செய்து கொண்டனர்,
தமிழகத்தில் தர்மபுரி, சேலம் மாவட்டங்களில் பிட்டி பருத்தி சாகுபடி செய்த உழவர்கள் பேரிழப்புக்கு உள்ளாகியுள்ளனர். ஏனெனில் மரபீனி மாற்றப்பயிர்களின் விதையிலிருந்து அதற்கென்று தயாரிக்கப்படும் பூச்சிக்கொல்லி, ஊக்கிகள் வரை அனைத்தும் அதிகம் செலவு கொண்டவை. அந்த அளவிற்கு உரிய விளைச்சலும், விலையும் உழவர்களுக்கு கிடைப்பதில்லை. மரபணு பயிர்கள் ஓவ்வாமை, மலட்டுத்தன்மை, கருச்சிதைவு, ரத்த உறைவைக் குறைப்பது, சிறுநீரகக் கோளாறு போன்ற பாதிப்புகளை உண்டாக்குகிறது என ஆய்வில் கண்டறியப்பட்டுள்ளது÷மேற்கு தொடர்ச்சி மலையின் பல்லுயிர் பன்மையை மரபீன பயிர்கள் ஒழித்துவிடும் என்ற காரணதக்தை எடுத்துக் காட்டி எம்.எஸ்.சுவாமிநாதன் தலைமையிலான வேளாண்மையில் உயிரித் தொழில்நுட்ப பயன்பாடு குறித்த செயல்பாட்டுக்குழு இப்பயிர்களை அங்கு அனுமதிக்கக்கூடாது என எச்சரித்துள்ளது. மேற்கண்ட அனைத்து உண்மைகளையும் ஏற்றுக்கொண்ட கேரள அரசு தங்கள் மாநிலத்தில் மரபணு மாற்றப் பயிர்களின் ஆய்வுப் பண்ணைகளையும், விற்பனையையும் தடை செய்துள்ளது. இதனை கேரள முதல்வர் 30-11-09 அன்று பிரதமருக்கு எழுதியுள்ள கடிதத்தில் உறுதிப்படுத்தியுள்ளார்.
எனவே இதேபோல் அழிவை ஏற்படுத்தும் மரபணு மாற்றப் பயிர்கள் அனைத்தையும் தமிழ்நாட்டிலும் தடை செய்ய வேண்டும் என தமிழக அரசை கேட்டுக்கொள்கிறோம் என கி.வெங்கட்ராமன் தெரிவித்துள்ளார்.
0 கருத்துகள்:
கருத்துரையிடுக