பூஞ்சானக்கொல்லி மருந்து தயாரிக்கும் பண்ணை மகளிர்

பூஞ்சானக்கொல்லி மருந்து தயாரிக்கும் பண்ணை மகளிர்.

சிதம்பரம்:

 

              சிதம்பரம் அருகே பண்ணை மகளிர் சுய உதவிக் குழுவினர் புதிய முயற்சியாக வேளாண் பாசனத்துக்காக உயிர் பூஞ்சானக்கொல்லி மருந்துகள் தயாரித்து விற்பனை செய்து வருகின்றனர்.  

 

                    மகளிர் சுய உதவிக் குழுவினர் சோப்பு, மெழுகுவர்த்தி, துணிமணிகள் உள்ளிட்ட பொருள்கள் தயாரித்து வருகின்றனர். இந்நிலையில் சிதம்பரத்தை அடுத்த தில்லைவிடங்கன் கிராமத்தில் டான்வா பண்ணை மகளிர் சுய உதவிக் குழுவினர் சற்று வித்தியாசமாக விவசாயத்தை பாதுகாக்கும் வகையில் உயிர் பூஞ்சானக்கொல்லி மருந்துகளை தயாரித்து விற்பனை செய்து வருகின்றனர்.  

 

                  குறிப்பாக மண்ணுக்கும், மனிதர்களுக்கும் தீங்கு விளைவிக்காத வகையில் சூடோமோனாஸ் புளூரன்ஸ் மற்றும் ரைக்கோடெர்மா விரிடி மருந்துகளை தயாரித்து வேளாண்துறை உதவியுடன் விற்பனை செய்து வருகின்றனர்.  இந்த பூச்சி மருந்துகள் தயாரிக்க கோவை வேளாண் பல்கலைக்கழகத்தில் மகளிர் சுய உதவிக் குழுத் தலைவர் வனஜா, பொருளர் லட்சுமி ஆகியோர் சிறப்பு பயிற்சி பெற்று வந்துள்ளனர். இங்கு உற்பத்தி செய்யப்படும் பூஞ்சானக்கொல்லி மருந்து கோவை வேளாண் பல்கலைக்கழகத்தில் ஆய்வு செய்யப்பட்டு தரச்சான்று வழங்கப்பட்டுள்ளது.  

 

                  தமிழகத்திலேயே முதல்முதலாக பண்ணை மகளிர் ரூ.  2.50 லட்சம் செலவில் மூலப்பொருள்கள் மற்றும் இயந்திரங்களை சென்னையில் கொள்முதல் செய்து தில்லைவிடங்கனில் ஒரு வீட்டில் ஆய்வுக்கூடம் அமைத்து உற்பத்தி செய்து வருகின்றனர். இந்த குழுவினருக்கு பரங்கிப்பேட்டை ஒன்றிய வேளாண் துறை ரூ.  1.25 லட்சம் மானியம் வழங்கியுள்ளது. இந்த பூஞ்சானக்கொல்லி மருந்துகளால் நெல், வாழை, பருத்தி, கரும்பு, மணிலா, உளுந்து, பயிர், கேழ்வரகு, கம்பு, சோளம், தக்காளி, வெண்டை, உருளை மற்றும் தென்னை உள்ளிட்ட பயிர் வகைகளை நோய் தாக்குதலில் இருந்து கட்டுப்படுத்த முடியும் என தெரிவிக்கின்றனர் பூஞ்சானக்கொல்லி மருந்து தயாரிக்கும் பண்ணை மகளிர்.  

 

                          மேலும் இந்த மருந்துடன் கலந்து விதை நேர்த்தி செய்வதால் அமோக விளைச்சல் கிடைப்பதால் விவசாயிகளிடையே இந்த பூஞ்சானக்கொல்லி மருந்துகள் அமோக வரவேற்பை பெற்றுள்ளது.