கடலூர், டிச. 2:
கடலூரில் சேமிப்புக் கிடங்கில், புதன்கிழமை ஏற்பட்ட தீ விபத்தில் ரூ.20 லட்சம் மதிப்புள்ள வேப்பம் பிண்ணாக்கு எரிந்து அடைந்தது. இ.ஐ.டி. பாரி நிறுவனத்துக்குச் சொந்தமான சேமிப்புக் கிடங்கு கடலூர் முதுநகர் கிளைவ் தெருவில் உள்ளது. வேப்பங் கொட்டையில் இருந்து பூச்சிக் கொல்லி மருந்துக்கான எண்ணையை பிரித்து எடுத்துவிட்டு பிண்ணாக்கு, இந்த சேமிப்புக் கிடங்கில் வைக்கப்பட்டு இருந்தது. இது உரம் தயாரிக்க பயன்படுத்தக் கூடியதாகும். இந்த சேமிப்புக் கிடங்கில் புதன்கிழமை திடீரென தீ விபத்து ஏற்பட்டது. இதில் அஸ்பெஸ்டாஸ் கூரைகள் வெடித்துச் சிதறின. அக்கம் பக்கத்தில் உள்ளவர்கள் பார்த்து தீயணைப்பு நிலையத்துக்குத் தகவல் தெரிவித்தனர்.
கடலூர் நிலைய தீயணைப்பு அலுவலர் வெங்கடேசன் தலைமையில் தீயணைப்புப் படையினர் விரைந்து வந்து சுமார் 3 மணி நேரம் போராடி, தீயை அணைத்தனர். சேமிப்புக் கிடங்கில் தலா ரூ.1,000 மதிப்புள்ள 2 ஆயிரம் மூட்டை வேப்பம் பிண்ணாக்கு அடுக்கி வைக்கப்பட்டு இருந்தது. அவற்றில் பெரும் பகுதி எரிந்து சேதம் அடைந்து விட்டதாக சேமிப்புக் கிடங்கு நிர்வாகி ஒருவர் தெரிவித்தார்.
0 கருத்துகள்:
கருத்துரையிடுக