கடலூர் முதுநகரில் மாற்றுத் திறனாளிகளுக்கான வள மையம் திறப்பு விழா

முதுநகர் :

 

       கடலூர் முதுநகர் அருகே தொண்டு நிறுவனங்கள் சார்பில் மாற்றுத் திறனாளிகளுக்கான வள மையம் திறப்பு விழா நடந்தது.

 

        கடலூர், முதுநகர் அடுத்த மணக்குப்பத்தில் பி.ஏ.எஸ்.எப்., யு.என்.ஹாபிடாட் மற்றும் லியோனார்டு சேஷையர் ஆகிய தொண்டு நிறுவனங்கள் சார்பில் நடந்த விழாவிற்கு பி.ஏ.எஸ்.எப்., நிறுவனத் தலைவர் பிரசாத் சந்திரன் தலைமை தாங்கினார். கலெக்டர் ராஜேந்திர ரத்னு குத்துவிளக்கேற்றி துவக்கி வைத்து பேசினார். யு.என்.ஹாபிடாட் அமைப்பின் மண்டல தொழில்நுட்ப ஆலோசகர் பூஷண் துலாதர், லியோனார்டு சேஷையர் மாற்றுத்திறன் அமைப்பின் மண்டல கவுன்சில் தலைவர் ஜான் ஆகியோர் பேசினார். விழாவில் டாக்டர் சேகர், அசோக்குமார் உட்பட பலர் பங்கேற்றனர்.

 

 

 

 

 

 

Read more »

கடலூர் மாவட்டத்தில் 62 ஆயிரம் பேருக்கு தமிழக அரசின் உதவித்தொகை

 

கடலூர்:
 

                 தமிழக முதல்- அமைச்சராக ஜெயலலிதா பொறுப்பேற்றதும் முதல் 7 கோப்புகளில் கையெழுத்திட்டார் அதில் முதியோர் உதவித்தொகை ரூ.500-ல் இருந்து ரூ.1000 மாக உயர்த்தி வழங்கப்படும் கோப்பும் ஒன்று. இதன் மூலம் தமிழகம் முழுவதும் லட்சகணக்கான முதியவர்கள் பயன் பெற்று வருகிறார்கள்.

              கடலூர் மாவட்டத்தில் முதியோர் உதவித்தொகை, மாற்றுத் திறனாளிகள், கணவனால் கைவிடப்பட்ட பெண்கள், ஆதரவற்ற விவசாயக் கூலி ஆகியோர் 62 ஆயிரத்து 100 பேர் மாதத்திற்கு தலா ரூ.1000 பெற்று பயன் அடைந்து வருகிறார்கள். இவர்களில் 16 ஆயிரத்து 527 பேர் ஆண்கள், 45 ஆயிரத்து 573 பேர் பெண்கள். மாதம் 1000 ரூபாய் கிடைப்பதால் முதியோர்களுக்கு மிகுந்த மகிழ்ச்சி ஏற்பட்டு உள்ளது. அவர்கள் முதல்-அமைச்சர் ஜெயலலிதாவை மனதார பாராட்டுகின்றனர். 

 

கடலூர் மாவட்டம் பில்லாலி கிராமத்தில் வசித்து வரும் 75 வயதான பூங்காவனம் கூறியது:-

             இந்த தள்ளாத வயதில், தான் வேலைக்கு செல்ல முடியாத நிலையில் எனக்கு ஆதரவுதர யாரும் இல்லாத காரணத்தால் எனது வாழ்க்கையே பெரிய போராட்டமாக இருந்தது. தமிழக முதல்வர் ஜெயலலிதா ஆட்சிக்கு வந்ததும் எங்களை போல் கஷ்டபடுகிறவர்கள் மனக்குறையை தீர்க்கிற மாதிரி மாதம் ஆயிரம் ரூபாய் உதவித்தொகை அறிவித்துள்ளார்.

முதல்-அமைச்சருக்கு நன்றி.

வரக்கால்பட்டு கிராமத்தில் 75 வயது முதியவர் நடேசன் கூறியது:-

             வயதானவர்களுக்கு 1000 ரூபாய் பென்சன் கொடுக்க முதல்வர் ஜெயலலிதா உத்தரவிட்டு இருக்காங்க. ரூ.500 வாங்கினபோது வீட்டு செலவுக்கே போதாமல் இருந்தது. இனி எனக்கு வீட்டு செலவை பற்றி கவலை இல்லை இது மட்டுமின்றி இலவச அரிசி தருகிறார்கள். எங்களைபோல் வயதானவர்கள் கஷ்டத்தை போக்கிய முதல்- அமைச்சர் ஜெயலலிதா காலத்திற்கும் நன்றாக இருக்க வேண்டும். இவ்வாறு அவர் கூறினார்.

 

 

 

 

 

Read more »

மாற்றுத் திறனாளிகள் அனைவருக்கும் தேசிய அடையாள அட்டை

கடலூர்:

              மாற்றுத் திறனாளிகள் அனைவருக்கும் தேசிய அடையாள அட்டை வழங்க வேண்டும் என்று, தமிழ்நாடு அனைத்து வகை, மாற்றுத் திறனாளிகள் மற்றும் பாதுகாப்போர் உரிமையாகளுக்கான சங்கம் கோரிக்கை விடுத்தது.  

              கடலூர் சுத்துக்குளத்தில் செவ்வாய்க்கிழமை நடந்த இச்சங்கத்தின் பேரவைக் கூட்டத்தில், மேற்கண்ட தீர்மானம் நிறைவேற்றப்பட்டது. மனு அளித்துக் காத்து இருக்கும் அனைவருக்கும் விரைந்து உதவித் தொகை வழங்க வேண்டும். ஊனத்தின் அளவைக் குறிப்பிட, ஆரம்ப சுகாதாரநிலைய மருத்துவர்கள் கையொப்பமிடும் அரசாணையை அமல்படுத்த வேண்டும். மாற்றுத் திறனாளிகள் தொழில் தொடங்க, வங்கிகள் மானியத்துடன் கூடிய கடன் வழங்க வேண்டும் என்பவை உள்ளிட்ட கோரிக்கைகள் அடங்கிய தீர்மானங்களும் நிறைவேற்றப்பட்டன.  கூட்டத்தில் மாவட்டச் செயலாளர் உதயகுமார், துணைத் தலைவர் ராஜ்குமார், இணைச் செயலாளர் சிவபாலன் உள்ளிட்டோர் பேசினர். சங்கத்தின் புதிய தலைவராக ஆளவந்தார், செயலாளராக பி.முருகையன், பொருளாளராக வசந்தி உள்ளிட்டோர் தேர்ந்தெடுக்கப்பட்டனர். 

Read more »

கடலூரில்மாற்றுத் திறனாளிகளுக்கு சுயம்வரம்

கடலூர் : 

                கடலூரில், மாற்றுத் திறனாளிகளுக்கு சுயம்வரத்திற்கான விண்ணப்பம் வழங்கும் நிகழ்ச்சி நடந்தது. 

               தமிழ்நாடு மாற்றுத் திறனாளிகள் கூட்டமைப்பு மற்றும் கீதா பவன் அறக்கட்டளை சார்பில் மாற்றுத் திறனாளிகளுக்கான சுயம்வரம் நிகழ்ச்சி ஆக., 21ம் தேதி ஈரோட்டிலும், செப்., 4ம் தேதி சென்னையிலும் நடக்கிறது. கடலூர் மாவட்ட மாற்றுத் திறனாளிகள் சங்கம் சார்பில் மாற்றுத் திறனாளிகளுக்கு சுயம்வரத்திற்கான விண்ணப்பம் வழங்கும் நிகழ்ச்சி கடலூரில் நேற்று நடந்தது. மாற்றுத் திறனாளிகள் நல அலுவலர் சீனுவாசன் மாற்றுத் திறனாளிகளிடம் விண்ணப்பங்களை வழங்கினார். மாவட்டத் தலைவர் சந்தோஷ், செயலர் மனோகர், செய்தி தொடர்பாளர் சண்முகம், தாமஸ், ஜெயபாலன் உடனிருந்தனர். 

Read more »

நெய்வேலி இளைஞரின் மனிதாபிமானம்

 
பொன்னை விரும்பும் பூமியிலே...

என்னை விரும்பும் ஓருயிரே... 

புதையல் தேடி அலையும் உலகில் இதயம் தேடும் என்னுயிரே...

 

             என்று ஆலயமணி படத்தில் கால்களை இழந்த கதாநாயகி சரோஜாதேவியை தள்ளுவண்டியில் வைத்து தள்ளியபடி நடிகர்திலகம் சிவாஜிகணேசன் பாடுவார்.  

          அதேபோல 2 கால்களும் இல்லாத ஒரு பெண்ணை மோகன் என்ற வாலிபர் திருமணம் செய்து புரட்சி செய்து இருக்கிறார்.   வடபழனி முருகன் கோவிலில் ஞாயிற்றுக்கிழமை ( 19.06.2011)  காலை நடந்த 50 ஜோடிகள் திருமணத்தில் அனைவரையும் ஆச்சரியத்தில் ஆழ்த்தியது மோகன்- கற்பகம் திருமணம்தான்.

         பட்டுவேட்டி கட்டி கம்பீரமாக காட்சி அளித்த மணமகன் மோகன் தள்ளுவண்டியை தள்ளிக் கொண்டு வந்தார். அதில் 2 கால்களையும் இழந்த ஊனமுற்ற இளம்பெண் கற்பகம் மணக்கோலத்தில் அமர்ந்திருந்தார். பெற்றோர் முன்னிலையில் அவர்கள் மாலைமாற்றி திருமணம் செய்து கொண்டார்கள்.

ஊனமுற்ற பெண்ணை மணந்த மணமகன் மோகன் கூறியது:-  

            எனக்கு சொந்த ஊர் நெய்வேலி. எலக்ட்ரிக்கல் அன்ட் எலக்ட்ரானிக் டிப்ளமோ படித்து உள்ளேன். புரசைவாக்கத்தில் ஒரு மருந்து கடையில் வேலை பார்த்து வருகிறேன். அந்த கடையில்தான் கற்பகமும் வேலை பார்க்கிறார். தினமும் தள்ளுவண்டியில் தாயார் கடைக்கு அழைத்து வருவார்.

           எனக்கு சிறுவயது முதலே ஊனமுற்ற பெண்ணுக்கு வாழ்வு கொடுக்க வேண்டும் என்ற எண்ணம் இருந்தது. கற்பகத்தை பார்த்ததும் அந்த எண்ணம் மேலும் அதிகரித்தது.   கால்களை இழந்தபோது தன்னோடு பழகியவிதமும், நடந்து கொண்டவிதமும் என்னை கவர்ந்தது. அவரை உயிருக்கு உயிராக காதலிக்க தொடங்கினேன்.  எனது விருப்பத்தை பெற்றோர்களிடம் தெரிவித்தேன். எல்லோருடைய சம்மதத்துடன் கற்பகத்தை வாழ்க்கை துணையாக ஏற்று உள்ளேன். வெற்றிகரமாக எங்கள் வாழ்க்கை பயணத்தை நடத்துவோம்.  

மணமகள் கற்பகம் கூறியது:-

           எ  னக்கு 2 1/2 வயது இருக்கும்போது போலியோ தாக்கியதால் 2 கால்களும் செயல் இழந்து விட்டது. 10-ம் வகுப்பு வரை படித்தேன். எனது தந்தை சண்முகம் இறந்து விட்டார். அம்மா சண்முகசுந்தரிதான் ஊன்றுகோலாக இருந்து என்னை தினமும் தள்ளு வண்டியில் வைத்து பார்மசிக்கு அழைத்து செல்வார்.  எல்லோரையும் போல் எனக்கும் வாழ்வு கிடைக்குமா? அம்மாவுக்கு பிறகு யார் நமக்கு துணை இருப்பார்கள் என்று ஏங்கி கொண்டு இருந்தேன். எனது ஏக்கத்துக்கு நல்ல தீர்வு கிடைத்து உள்ளது. மோகன் கடவுள் போல் கணவராக கிடைத்து உள்ளார்.  இவ்வாறு அவர் கூறினார்.

          கற்பகத்தின் அக்காள் பிரேமா ஆரோக்கியமானவர். ஆனால் அவரது கணவர் வள்ளிநாயகம் ஊனமுற்றவர். கற்பகத்தின் தங்கை கவுரி எந்த குறையும் இல்லாதவர். அவரது கணவர் அய்யனார் ஊனமுற்றவர். 2 கால்களையும் இழந்த கற்பகத்துக்கு எந்த குறையும் இல்லாத மோகன் கணவராக கிடைக்கப்பெற்றுள்ளார். கற்பகத்துக்கு சொந்த ஊர் தூத்துக்குடி மாவட்டம் பொட்டலூரணி. 

 

 

 

 

Read more »

மாற்றுத் திறனாளிகளுக்கான குரூப்-4 தேர்வு அறிவிப்பு

                தமிழக அரசுத் துறைகளில் காலியாக உள்ள இளநிலை உதவியாளர்கள், தட்டச்சர்கள் மற்றும் சுருக்கெழுத்தர்கள் பணியிடங்களில் (குரூப்-4), மாற்றுத் திறனாளிகளை நியமிப்பதற்கான சிறப்புத் தேர்வு, வரும் ஆகஸ்ட் 7ம் தேதி நடக்கிறது. இதற்கு, மார்ச் 23ம் தேதி வரை விண்ணப்பிக்கலாம் என, டி.என்.பி.எஸ்.சி., அறிவித்துள்ளது. 

               அரசுத் துறைகளில் இளநிலை உதவியாளர் பணியிடங்கள் 145, தட்டச்சர்கள் பணியிடங்கள் 106, சுருக்கெழுத்தர் பணியிடங்கள் 17 ஆகியவை நிரப்பப்படாமல் காலியாக உள்ளன. இந்த இடங்களில் மாற்றுத் திறனாளிகளை நியமனம் செய்வதற்கான சிறப்பு போட்டித் தேர்வு, ஆகஸ்ட் 7ம் தேதி 32 மையங்களில் நடக்கின்றன. எஸ்.எஸ்.எல்.சி., கல்வித் தகுதி கொண்ட மாற்றுத்திறனாளிகள், இத்தேர்வுக்கு விண்ணப்பிக்கலாம். விண்ணப்பங்கள், தபால் அலுவலகங்களில் வழங்கப்படுகின்றன. பூர்த்தி செய்யப்பட்ட விண்ணப்பங்களை, மார்ச் 23ம் தேதி மாலைக்குள் அனுப்பி வைக்க வேண்டும் என, டி.என்.பி.எஸ்.சி., அறிவித்துள்ளது.

Read more »

கடலூர் மாவட்ட வேலை வாய்ப்பு அலுவலகத்தில் பதிவு செய்துள்ள மாற்றுத்திறனாளிகள் உதவித் தொகைக்கு விண்ணப்பிக்கலாம்

கடலூர்:

           மாவட்ட வேலை வாய்ப்பு அலுவலகத்தில் பதிவு செய்து, வேலைக்குக் காத்து இருக்கும் மாற்றுத்திறனாளிகள், மார்ச் 31-ம் தேதியுடன் முடிவடையும் காலாண்டுக்கு உதவித் தொகை பெற விண்ணப்பிக்கலாம் என்று, கடலூர் மாவட்ட ஆட்சியர் பெ.சீதாராமன் அறிவித்துள்ளார்.

ஆட்சியர் சனிக்கிழமை வெளியிட்ட செய்திக்குறிப்பு:

              உதவித்தொகை பெறுவதற்கு மாற்றுத்திறனாளிகள் தங்கள் கல்வித் தகுதியை வேலைவாய்ப்பு அலுவலகத்தில் பதிவு செய்து ஓராண்டுக்கு மேல், பதிவேட்டில்  காத்திருப்போராக இருக்க வேண்டும். தாழ்த்தப்பட்ட மற்றும் பழங்குடியினருக்கு வயது வரம்பு 45. மற்றவர்களுக்கு 40. தொடர்ந்து புதுப்பித்து இருக்க வேண்டும்.அரசு அல்லது தனியார் துறையில் வேலையில் இருத்தல் கூடாது. கல்வி நிறுவனத்தில் சேர்ந்து படித்துக்கொண்டு இருக்கக்கூடாது. ஆனால் அஞ்சல் வழியாக அல்லது தொலைதூரக் கல்வி பயில்வோராக இருக்கலாம்.

             தமிழ்நாட்டில் கல்வி பயின்றவராக இருக்க வேண்டும். பெற்றோர், பாதுகாவலர் தமிழ்நாட்டில் தொடர்ந்து 15 ஆண்டுகள் வசிப்பவராகவும், ஆண்டு வருவாய் ரூ.50 ஆயிரத்துக்கு மிகாமலும் இருக்க வேண்டும்.வேலைவாய்ப்பு அலுவலக அசல் அட்டை மற்றும் கல்விச் சான்றுகளுடன், மாவட்ட வேலைவாய்ப்பு அலுவலகத்தில், நேரில் விண்ணப்பப்படிவத்தை இலவசமாகப் பெற்று பூர்த்தி செய்து, அதே அலுவலகத்தில் அளிக்க வேண்டும்.ஏற்கெனவே விண்ணப்பித்தவர்கள் மீண்டும் விண்ணப்பிக்க வேண்டாம்.

                  விண்ணப்பித்த அனைவருக்கும் தகுதி அடிப்டையில் 10 ஆண்டுகளுக்கு அரசால் உதவித் தொகை வழங்கப்படும். விண்ணப்பிக்கக் கடைசி தேதி 28-2-2011.கல்வித் தகுதி எஸ்.எஸ்.எல்.சி.க்கு மாதம் ரூ.300, எச்.எஸ்.சி.க்கு மாதம் ரூ.375. பட்டப் படிப்புக்கு மாதம் ரூ.450 வழங்கப்படும் என்றும் செய்திக்குறிப்பு தெரிவிக்கிறது.

Read more »

கடலூர் மாவட்டத்தில் மக்கள் குறைகேட்பு நாள்: 355 மனுக்கள் பெற்ற கலெக்டர்

கடலூர்:


                 கடலூர் மாவட்ட கலெக்டர் அலுவலகத்தில் மாவட்ட மக்கள் குறைகேட்பு நாள் கூட்டம் நடந்டிதது. கலெக்டர் சீத்தாராமன் பொதுமக்களிடமிருந்து குடிநீர் வசதி, சாலை வசதி, முதியோர் உதவித்தொகை, பட்டா வழங்க கோருதல், மாற்றுத் திறனாளிகளுக்கு நலத்திட்ட உதவிகள் உள்ளிட்ட பல்வேறு கோரிக்கைகள் வலியுறுத்தி 355 மனுக்களை பெற்று உடனடியாக நடவடிக்கை எடுக்குமாறு சம்பந்தப்பட்ட அலுவலர்களுக்கு உத்தரவிட்டார்.


                இக்கூட்டத்தில் தமிழ்நாடு உலமாக்கல் நலவாரியத்தின் மூலம் ஒருவருக்கு ரூ.500 மதிப்புள்ள கண்கண்ணாடியும், ஒரு நபருக்கு கல்வி உதவித் தொகையாக ரூ.4 ஆயிரமும், ஒருவருக்கு திருமண நிதி உதவியாக ரூ.2 ஆகியவற்றை கலெக்டர் சீத்தாராமன் வழங்கினார். மாவட்ட வருவாய் அலுவலர் ராஜேந்திரன், மாவட்ட ஆதிதிராவிட நல அலுவலர் திருவேங்கடம், மாவட்ட பிற்படுத்தப்பட்ட நல அலுவலர் கணபதி, துணை ஆட்சியர் (சமூக பாதுகாப்பு திட்டம்), கந்தசாமி, மாவட்ட கலெக்டரின் நேர்முக உதவியாளர் (பொது), வனிதா மற்றும் அரசு அலுவலர்கள் உள்பட பலர் கலந்து கொண்ட னர்.

Read more »

கடலூர் மாவட்டத்தை சேர்ந்த மாற்றுத் திறனாளிகளுக்கு செல்போன் பழுதுபார்க்கும் பயிற்சி

கடலூர்:

         கடலூர் மாவட்டத்தை சேர்ந்த மாற்றுத் திறனாளிகளுக்கு செல்போன் பழுது பார்க்கும் பயிற்சி அளிக்கப்படுகிறது.

இது தொடர்பாக கடலூர் மாவட்ட கலெக்டர் சீத்தாராமன் விடுத்துள்ள செய்தி குறிப்பு:

             கடலூர் மாவட்டத்தை சேர்ந்த மாற்றுத் திறனாளிகளுக்கு செல்போன் பழுது பார்த்தல் மற்றும் பராமரிப்பு பயிற்சி அளிக்கப்பட உள்ளது. கடலூர் மாவட்டத்தை சேர்ந்தே கை, கால் ஊன முற்றவர்கள் மட்டும் இப்பயிற்சிக்கு விண்ணப்பிக்கலாம்.

            ஊனத்தின் அளவு குறைந்த பட்சம் 40 சதவீதத்துக்கு குறையாமல் பாதிக்கப்பட்டிருக்க வேண்டும். குறைந்தபட்சம் 8-ம் வகுப்பு தேர்ச்சி மற்றும் தோல்வியடைந்தவர்களாக இருக்க வேண்டும். 18 வயது முதல் 30 வயதுக்குள் இருக்க வேண்டும். பயிற்சி 3 மாத காலத்திற்கு அளிக்கப்படுகிறது. பயிற்சியின் போது மாதம் ரூ.300 உதவித் தொகையாக வழங்கப்படும்.  இந்த பயிற்சி பெற விரும்பும் ஊனமுற்றவர்கள் கடலூர் புதுபாளையத்தில் உள்ள மாவட்ட ஊனமுற்ற மறுவாழ்வு அலுவலகத்திற்கு நேரில் வந்து தேசிய அடையாள அட்டை நகல், கல்விச் சான்று ஆகியவற்றுடன் விண்ணப்பிக்கலாம்.

               விண்ணப்பத்தினை மாவட்ட ஊனமுற்றோர் மறுவாழ்வு அலுவலரிடம் விண்ணப்பக்காலத்துக்குள் சமர்ப்பிக்க வேண்டும். கடலூர் மாவட்டத்தில் உள்ள செல்போன் பழுதுநீக்கப் பயிற்சி பெற விரும்பும் தகுதியுள்ள ஊனமுற்றவர்கள் இந்த வாய்ப்பை பயன்படுத்திக் கொள்ளலாம். இவ்வாறு அதில் கூறப்பட்டுள்ளது.

Read more »

கடலூர் மாவட்டத்தில் மாற்றுத் திறனாளிகளுக்கு கருவிகள் விண்ணப்பங்கள் வரவேற்கப்படுகின்றன

கடலூர் : 

               உபகரணங்கள் வழங்குவதற்காக மாற்றுத் திறனாளிகளிடம் இருந்து விண்ணப்பங்கள் வரவேற்கப்படுகின்றன. 

  கடலூர் மாவட்ட கலெக்டர் அலுவலக செய்திக்குறிப்பு:

                கடலூர் மாவட்டத்தில் எம்.எல்.ஏ.,க்களின் தொகுதி மேம்பாட்டு திட்டத்தின் கீழ் குறிஞ்சிப்பாடி, மங்களூர் மற்றும் திட்டக்குடி ஆகிய சட்டசபை தொகுதிகளில் மாற்றுத் திறனாளிகளுக்கு கருவிகள் மற்றும் உபகரணங்கள் வழங்குவதற்கான விண்ணப்பங்கள் வரவேற்கப்படுகின்றன. இத்திட்டத்தின் கீழ் உடல் ஊனமுற்ற மாற்றுத் திறனாளிகளுக்கு மூன்று சக்கர சைக்கிள், சக்கர நாற்காலி, மடக்கு வசதி சக்கர நாற்காலிகள், நடை உபகரணங்கள் (ஊன்று கோல்), பிளாஸ்டிக் மற்றும் உலோகத்தால் ஆன ஊன்றுகோல், விபத்து அல்லது நோயினால் பாதிக்கப்பட்டு கை, கால் இழந்தவர்களுக்கு செயற்கை கால், மடக்கு ஊன்றுகோல், ஆண், பெண் இருபாலருக்கும் பிரெய்லி கை கடிகாரம், பேசும் மின்னணு கடிகாரம், காதுகேளாதோருக்கு காதொலிக்கருவிகள் மற்றும் எல்க்ட்ரிக் ரீசார்ச் பேட்டரிகள் வழங்கப்படுகிறது.

இதற்கான விண்ணப்பங்கள் 

மாவட்ட மாற்றுத் திறனாளிகள் நல அலுவலகம்,
எண். 37, ராமதாஸ் தெரு,
புதுப்பாளையம்,
கடலூர்

                  என்ற முகவரியில் வழங்கப்படுகிறது.  பூர்த்தி செய்த விண்ணப்பத்தில் மாற்றுத் திறனாளியின் தேசிய அடையாள அட்டை நகல் மற்றும் குடும்ப அட்டை நகலை 1ம் தேதிக்குள் இணைத்து ஒப்படைக்க வேண்டும். மூன்று சக்கர சைக்கிள், சக்கர நாற்காலி போன்ற உபகரணங்களை மூன்று ஆண்டுகளுக்கு முன் பெற்றவர்கள் மட்டுமே விண்ணப்பிக்கலாம். எனவே, மாற்றுத் திறனாளிகள் இடைத் தரகரிடம் அணுகாமல் உரிய அலுவலகத்தை அணுக வேண்டும். அடையாள அட்டை இணைக்கப்படாத விண்ணப்பங்கள் நிராகரிக்கப்படும். இவ்வாறு செய்திக்குறிப்பில் கூறப்பட்டுள்ளது.

Read more »

கடலூர் மாவட்டத்தில் மன வளர்ச்சி குன்றியோர் பள்ளிகளுக்கு ரூ. 6 லட்சம் மானியம்

கடலூர்:

                கடலூர் மாவட்டத்தில் மன வளர்ச்சிக் குன்றிய மாற்றுத்திறனாளிகள் பயிலும் 6 சிறப்புப் பள்ளிகளுக்கு, ரூ. 6.1 லட்சம் நிதி உதவியை, மாவட்ட ஆட்சியர் பெ. சீதாராமன்  புதன்கிழமை வழங்கினார். மனநலம் பாதிக்கப்பட்டோருக்கான இல்லமான கடலூர் ஒயஸிஸ் தொண்டு நிறுவனம், கருணா மனநலம் பாதிக்கப்பட்டோருக்கான இல்லம் என்று பெயர் மாற்றம் செய்யப்பட்டதை, மாவட்ட ஆட்சியர் பெ. சீதாராமன் புதன்கிழமை திறந்து வைத்தார்.   

                       இந்த நிகழ்ச்சியில் கடலூர் மாவட்டத்தில் அரசு அங்கீகாரத்துடன் செயல்பட்டு வரும் மன வளர்ச்சி குன்றியோருக்கான 6 சிறப்புப் பள்ளிகளுக்கு, ரூ. 6.1 லட்சத்துக்கான காசோலைகளை மாவட்ட ஆட்சியர் அந்த நிறுவனங்களின் நிர்வாகிகளிடம் வழங்கினார். மேட்டுப்பாளையத்தில் லைஃப் ஹெல்ப் சென்டர் என்ற மன வளர்ச்சி குன்றியோருக்கான பள்ளிக்கு முதல் முறை மானியமாக ரூ. 1,69,832 வழங்கப்பட்டது. மாவட்ட ஆட்சியர் பேசுகையில், கடலூர் மாவட்டத்தில் மனவளர்ச்சி குன்றிய மாற்றுத் திறனாளிகள் 4,794  பேருக்கும், மனநலம் பாதிக்கப்பட்ட 74 பேருக்கும் தேசிய அடையாள அட்டை வழங்கப்பட்டு உள்ளது. 

                     மனவளர்ச்சி குன்றியோருக்கான 6 பள்ளிகளில் 356 மாணவர்கள் படிக்கிறார்கள். 2010- 11 ம் ஆண்டில் ஏப்ரல்  முதல் ஜூன் மாதம் வரை 3 மாதங்களுக்கு பரமரிப்பு உதவித் தொகை ரூ. 31.95 லட்சம் வழங்கப்பட்டு உள்ளது.

                          கடலூர் புதுப்பாளையம் ராமதாஸ் தெரு, கருணா மன நலம் பாதிக்கப் பட்டோருக்கான இல்லத்தில், மனலம் பாதிக்கப்பட்டவர்களைச் சேர்ப்பதற்கு தொலைபேசி 04142-295953, செல் 9443129464 என்ற எண்களில் தொடர்பு கொள்ளலாம் என்றார் ஆட்சியர்.

Read more »

கடலூர் மாவட்டத்தில் மாற்றுத் திறனாளிகளுக்கு தொழிற்பயிற்சி: தொண்டு நிறுவனங்களுக்கு அழைப்பு

கடலூர்:

                மாற்றுத் திறனாளிகளுக்கு தொழில் பயிற்சி அளிக்க தகுதி உள்ள தொண்டு நிறுவனங்கள் விண்ணப்பிக்கலாம் என்று மாவட்ட ஆட்சியர் பெ.சீதாராமன் அறிவித்து உள்ளார்.

கடலூர் மாவட்ட ஆட்சியர் புதன்கிழமை வெளியிட்ட செய்திக் குறிப்பு:

                    மாற்றுத் திறனாளிகளுக்கு தங்கும் விடுதியுடன் கூடிய தொழிற்பயிற்சி மையம் நடத்துவதற்கு, தொண்டு நிறுவனங்களிடம் இருந்து விண்ணப்பங்கள் வரவேற்கப்படுகின்றன. தேர்வு செய்யப்படும் தொண்டு நிறுவனங்களின் பயிற்சி மையத்தில் 25 மாற்றுத் திறனாளிகளுக்கு உணவு, உறைவிடம், பயிற்சி இலவசமாக அளிக்கப்படும். விண்ணப்பிக்கும் தொண்டு நிறுவனங்கள், ஊனமுற்றோர் சட்டம் 1995 பிரிவு 52ன் கீழ் புதுப்பிக்கப்பட்டு இருக்க வேண்டும். 

                   பயிற்சியில் சேரும் மாற்றுத் திறனாளிகள் 16 முதல் 30 வயதுக்கு உள்பட்டவர்களாக இருப்பர். தகுதி உள்ள தொண்டு நிறுவனங்கள் மாற்றுத் திறனாளிகள் நல அலுவலரிடம் விண்ணப்பப் படிவங்களைப் பெற்று சமர்ப்பிக்குமாறு கேட்டுக்கொள்ளப்படுகிறார்கள் என்றும் செய்திக் குறிப்பு தெரிவிக்கிறது.

Read more »

கடலூர் மாவட்டத்தில் மாற்றுத்திறனாளிகளுக்கு கருவிகள் வழங்க 45 லட்சம் ஒதுக்கீடு

கடலூர்:

                 கடலூர் மாவட்டத்தில் மாற்றுத்திறனாளிகளுக்கு கருவிகள், உபகரணங்கள் வழங்க 9 சட்டப் பேரவை உறுப்பினர்களின் தொகுதி மேம்பாட்டு நிதியில் இருந்து, தலா  5 லட்சம் வீதம்  45 லட்சம் நிதி ஒதுக்கப்பட்டு இருப்பதாக மாவட்ட ஆட்சியர் பெ.சீதாராமன் தெரிவித்தார்.

கடலூர் மாவட்ட ஆட்சியர் புதன்கிழமை வெளியிட்ட செய்திக் குறிப்பு: 

               இத் திட்டத்தில் உடல் ஊனமுற்ற மாற்றுத்திறனாளிகளுக்கு 3 சக்கர சைக்கிள்கள், சக்கர நாற்காலிகள், கை தாங்கிகள், முடநீக்கியல் சாதனங்கள், செயற்கை உறுப்புகள், கருப்புக் கண்ணாடிகள், ஊன்றுகோல்கள், பிரெய்லி கடிகாரங்கள், எலக்ட்ரானிக் பேசும் கைக் கடிகாரங்கள், காதொலிக் கருவிகள், ரீசார்ஜ் பேட்டரிகள் ஆகியன வழங்கப்பட உள்ளன. பாட்டரியால் இயங்கும் மோட்டார் பொருத்திய 3 சக்கர வாகனங்கள் மற்றும் தையல் இயந்திரங்கள் இத்திட்டத்தில் வழங்கப்பட மாட்டாது. 3 சக்கர சைக்கிள், சக்கர நாற்காலி போன்றவற்றை 3 ஆண்டுகளுக்கு முன் பெற்றவர்கள் மட்டுமே தற்போது விண்ணப்பிக்கலாம். 

                    இதில் மாற்றுத்திறனாளிகள் இடைத்தரகர்களை அணுகாமல், உரிய அலுவலகத்தை அணுகுமாறு கேட்டுக் கொள்ளப்படுகிறார்கள். மேற்கண்ட உதவிகளைப் பெறுவதற்கு 1-4-2010-க்குள்  விண்ணப்பிக்காத மாற்றுத்திறனாளிகள், 

மாவட்ட மாற்றுத்திறனாளிகள் அலுவலகம், 

37, ராமதாஸ் தெரு, 

புதுப்பாளையம், 

கடலூர்- 1 

                     என்ற முகவரிக்கு அல்லது, சட்டப்பேரவை தொகுதி அலுவலகத்துக்குக்கு நேரிலோ, தபால் மூலமாகவோ 30-9-2010-க்குள் விண்ணப்பிக்கலாம். விண்ணப்பத்துடன் மாற்றுத்திறனாளிகளுக்கான அடையாள அட்டை, ரேஷன் கார்டு நகல்கள் இணைக்கப்பட வேண்டும் என்றும் செய்திக்குறிப்பு தெரிவிக்கிறது.

Read more »

வேப்பூரில் மாற்றுத் திறனாளிகளுக்கு நலத்திட்டங்கள்

சிறுபாக்கம்:

              வேப்பூர் அடுத்த கழுதூர் வெங்கடேஸ்வரா கல்லூரி வளாகத்தில் சின்னம்மாள் கல்வி அறக்கட்டளை சார்பில் மாற்றுத் திறனாளிகளுக்கு நலத்திட்ட உதவிகள் வழங்கும் விழா நடந்தது.

              அறக்கட்டளை தாளாளர் முன்னாள் எம்.பி., கணேசன் தலைமை தாங்கினார். நிர்வாக இயக்குனர்கள் பவானி, கனிமொழி முன்னிலை வகித்தனர். முதல்வர் பசுபதி வரவேற்றார்.விழாவில் ஆண்டிமுத்து - சின்னப்பிள்ளை அறக்கட்டளை நிறுவனர் கலியபெருமாள் 40 மாற்றுத் திறனாளிகளுக்கு தையல் மிஷின், சலவைப் பெட்டி உள்ளிட்ட நலத்திட்ட உதவிகள் வழங்கி பேசினார். கல்லூரி முதல்வர்கள் ராஜேந் திரன், பிரபாகர், அன்பு, தி.மு.க., ஒன்றிய தலைவர் அமிர்தலிங்கம், நகர செயலாளர் பரமகுரு, ராஜேந்திரன், வெங் கடேசன், குமணன், ஊராட்சி தலைவர்கள் ரவிக்குமார், கணேசன் உட்பட பலர் பங்கேற்றனர்.

Read more »

மாற்றுத் திறனாளிகளை ஏமாற்றும் பேர்வழிகளுக்கு எச்சரிக்கை! குற்றவியல் நடவடிக்கை எடுக்க கலெக்டர் உத்தரவு

கடலூர்: 

              மாற்றுத் திறனாளிகளுக்கு அரசின் நலத் திட்ட உதவிகளை பெற்றுத் தருவதாக கூறி செயல்படும் இடைத்தரகர்கள் மீது கடும் நடவடிக்கை எடுக்கப்படும் என கலெக்டர் எச்சரித்துள்ளார்.

               உடல் உறுப்புகளில் உள்ள குறைபாட்டினால் பொருளாதாரத்தில் பின் தங்கியுள்ள மாற்றுத் திறனாளிகளின் முன்னேற்றத் திற்காக தமிழக அரசு பல் வேறு நலத்திட்ட உதவிகளை செயல்படுத்தி வருகிறது. 

                   இந்த நலத்திட்ட உதவிகள் பெற மாற்றுத் திறனாளிகள் தமிழக அரசால் வழங்கப்பட்ட தேசிய அடையாள அட்டை, மாற்றுத் திறனாளிகள் நல வாழ்வு வாரிய அட்டை நகல் மற்றும் உரிய ஆவணங்களை விண்ணப்பத்துடன் இணைத்து மாற்றுத் திறனாளிகள் மறுவாழ்வு மாவட்ட அலுவலரிடம் விண்ணப்பித்தால், பரிசீலிக்கப்பட்டு உதவிகள் வழங்கப்படுகிறது. அரசின் நலத்திட்ட உதவிகளை பெறுவதற்கான வழிமுறைகள் அறியாத மாற்றுத் திறனாளிகள் திங்கட்கிழமை தோறும் கலெக்டர் அலுவலகத்தில் நடைபெறும் பொதுமக்கள் குறை தீர்வு கூட்டத்தில் மனுக்களுடன் அங்கும் இங்குமாக அல்லாடி வருகின்றனர். இவ்வாறு மனுக்களுடன் அல்லாடும் மாற்றுத் திறனாளிகளிடம் இடைத் தரகர்கள் சிலர் அரசின் நலத்திட்ட உதவிகளை தான் பெற்றுத் தருவதாகக் கூறி அவர்களை ஏமாற்றி பணம் வசூலித்து வருகின்றனர். மேலும், அரசு அதிகாரிகளையும் மிரட்டத் துவங்கியுள்ளனர்.

                          இதுகுறித்து பல்வேறு தரப்புகளில் இருந்து வந்த புகார்களைத் தொடர்ந்து, அரசின் நலத்திட்ட உதவிகள் வழங்குவதில் முறைகேடுகளை தவிர்க்கவும், தகுதி உள்ளவர்களுக்கு விரைவாக வழங்கவும், நலத்திட்ட உதவிகள் பெற வரும் மாற்றுத் திறனாளிகளுக்கு இடைத்தரகர்கள் இன்றி வழங்கவும் முறைகேடாக செயல்பட்டால் நடவடிக்கை மேற்கொள் ளவும் அதிகாரிகளுக்கு உத்தரவிட்டுள்ளார்.

கலெக்டர் விடுத்துள்ள செய்திக்குறிப்பு: 

                 மாவட்டத்தில் மாற்றுத் திறனாளிகள் 29 ஆயிரத்து 303 பேருக்கு தேசிய அடையாள அட்டையும், 10 ஆயிரத்து 473 பேருக்கு மாற்றுத் திறனாளிகள் மறு வாழ்வு நல வாரிய அடையாள அட்டை வழங்கப்பட்டுள்ளது. நலத்திட்ட உதவிகள் பெற விரும்பும் மாற்று திறனாளிகள் விண்ணப்பத்தில் உரிய ஆவணங்கள் மற்றும் தேசிய அடையாள அட்டை நகலை இணைத்து கொடுத்தால் போதுமானது. இடைத்தரகர்களை நாடி ஏமாற வேண்டாம். மாற்றுத் திறனாளிகளை ஏமாற்றும் இடைத்தரகர்கள் கண்டறியப்பட்டால் அவர்கள் மீது குற்றவியல் நடவடிக்கை எடுக்கப்படும். தேசிய அடையாள அட்டை பெறாதவர்கள் தங்களது ரேஷன் கார்டு மற்றும் மூன்று போட் டோவுடன் கடலூரில் உள்ள மாற்றுத் திறனாளிகள் நல வாழ்வு மாவட்ட அலுவலரை சந்தித்து விண்ணப்பம் பெற வேண் டும். அதனை பூர்த்தி செய்து கடலூர் அரசு தலைமை மருத்துவமனையில் உள்ள மருத் துவ குழுவினரிடம் பரிசோதிக்க வேண்டும். பின் னர் அதற்கான சான்று பெற்று மாவட்ட மறுவாழ்வு அலுவலகத்தில் பதிவு செய்தவுடன் தேசிய அடையாள அட்டை வழங்கப்படும் என தெரிவித்துள்ளார்.

Read more »

மாற்றுத் திறனாளிகள் நலத் திட்டம்: முதல்வருக்கு நன்றி தெரிவிக்க சைக்கிள் பயணம்

கடலூர்:

         மாற்றுத் திறனாளிகளுக்கான நலத் திட்டங்களை சிறப்பாக நிறைவேற்றி வரும் தமிழக முதல்வருக்கு நன்றி தெரிவிக்க, தொழிலாளி விஜயகுமார் (36) சைக்கிள் பயணம் மேற்கொண்டு உள்ளார். அவர் ஞாயிற்றுக்கிழமை கடலூர் வந்தார்.

             கும்பகோணத்தைச் சேர்ந்தவர் விஜயகுமார். அங்குள்ள மளிகைக் கடையில் பொருள்களைக் கையாளும் தொழிலாளியாகப் பணிபுரிகிறார். தி.மு.க. தொண்டரான அவர், பிறவியிலேயே வலதுகால் ஊனமுற்றவர். எனினும் நன்றாக சைக்கிள் ஓட்டுவார். அவர் முதல்வர் கருணாநிதியால் அறிவிக்கப்பட்டு செயல்படுத்தப்பட்டு வரும் மாற்றுத் திறனாளிகள் நலத்திட்டத்தால் ஈர்க்கப்பட்டு உள்ளார்.

             எனவே முதல்வருக்கு நன்றி தெரிவிக்கும் வகையில் கும்பகோணத்தில் இருந்து சென்னை தலைமைச் செயலகத்துக்கு சைக்கிள் பயணம் தொடங்கி இருக்கிறார். கடந்த 23-ம் தேதி தனது சைக்கிள் பயணத்தைத் தொடங்கிய விஜயகுமார், எப்போது சென்னை சென்றடைவார் என்று கூறமுடியவில்லை.எனினும் சென்னை தலைமைச் செயலகம் சென்று முதல்வரை சந்திப்பேன் என்று உறுதியாகத் தெரிவித்தார். 

அவர் மேலும் கூறியது:

           மாற்றுத் திறனாளிகள் திட்டத்தால் ஊனமுற்ற பலர் நல்ல பயன் அடைந்து இருக்கிறார்கள். அதற்காக நான் சைக்கிளில் பிரசாரப் பயணம் மேற்கொண்டு இருக்கிறேன். பகலில் மட்டும் சைக்கிளில் பயணிக்கிறேன். இரவில் ஆங்காங்கே உள்ள திமுக அலுவலகங்களிலும் திமுக தொண்டர்கள் தயவிலும் தங்கிக் கொள்வேன். எனக்கு மனைவியும் 2 பெண் குழந்தைகளும் உள்ளனர் என்றார். திமுக தொண்டர்கள் பலர் அவரைச் சந்தித்து வாழ்த்து தெரிவித்தனர்.

Read more »

கடலூர் மாவட்டத்தில் மாற்றுத் திறனாளிகளுக்கு ஓராண்டில் ரூ.209 கோடி உதவி

கடலூர்:

            கடலூர் மாவட்டத்தில் மாற்றுத் திறனாளிகளுக்கு 2009-10-ம் ஆண்டில் மட்டும், ரூ.209.29 கோடியில் நலத்திட்ட உதவிகள் வழங்கப்பட்டு இருப்பதாக, மாவட்ட ஆட்சியர் பெ.சீதாராமன் சனிக்கிழமை தெரிவித்தார்.

          மாற்றுத் திறனாளிகளுக்கு தனியார் நிறுவனங்களில் வேலைவாய்ப்பு வழங்குவதற்காக சிறப்பு வேலைவாய்ப்பு முகாம், கடலூரில் சனிக்கிழமை நடந்தது. மாற்றுத் திறனாளிகள் நலத்துறை மற்றும் அவினாசி எஸ்.இ.எம். கார்மெண்ட் நிறுவனம் இணைந்து இதற்கு ஏற்பாடு செய்யப்பட்டு இருந்தது. 

முகாமைத் தொடங்கி வைத்து மாவட்ட ஆட்சியர் பேசியது:

             முகாமில் 400-க்கும் மேற்பட்ட மாற்றுத் திறனாளிகள் கலந்து கொண்டனர். அவர்களில் வேலை செய்ய விருப்பம் தெரிவித்த 50-க்கும் மேற்பட்டோர் வேலைக்குத் தேர்வு பெற்றுள்ளனர். இவர்களுக்கு மாத ஊதியம் ஆண்களுக்கு ரூ.4,500-ம் பெண்களுக்கு ரூ.3,250 வழங்கப்படும். உணவுக்காக ஆண்களிடம் ரூ.800-ம் பெண்களிடம் ரூ.600-ம் பிடித்தம் செய்யப்படும். தங்கும் இடம் இலவசம். தேர்வு செய்யப்பட்ட நபர்களுக்கு வரும் வாரத்தில் அமைச்சர் எம்.ஆர்.கே.பன்னீர்செல்வம் பணி ஆணை வழங்குவார்.

          கடந்த ஓராண்டில் மற்ற மாவட்டங்களில் இல்லாத அளவுக்கு கடலூர் மாவட்டத்தில் மாற்றுத் திறனாளிகளுக்கு அதிக அளவில் நலத்திட்ட உதவிகள் வழங்கப்பட்டு உள்ளன. வாரம்தோறும் நடைபெறும் மக்கள் குறைகேட்கும் கூட்டங்களில் மாற்றுத் திறனாளிகளுக்கு தனிப்பிரிவு, தனி வழி அமைத்து, அவர்களின் கோரிக்கைகளுக்கு ஒரு வாரத்தில் உதவிகள் வழங்கப்பட்டு வருகின்றன. 362 பேருக்கு வயது வரம்பை தளர்த்தி உதவித் தொகைக்கு அனுமதி வழங்கப்பட்டு உள்ளது. மத்திய அரசின் புதிய திட்டத்தில் 1541 பேருக்கு உதவித் தொகை வழங்கப்பட்டது. ஓராண்டில் 3,985 பேருக்கு ரூ.12.06 லட்சம் மதிப்பில் உபகரணங்கள் மற்றும் ரூ.1.74 கோடி நிதி உதவி, தனிநபர் பொருளாதார நிதி உதவியாக ரூ.1.86 கோடி வழங்கப்பட்டது. 29,215 பேருக்கு தேசிய அடையாள அட்டையும், மாற்றுத் திறனாளிகள் நல வாரியத்தின் மூலம் 9,812 பேருக்கு அடையாள அட்டையும் வழங்கப்பட்டது. தேசிய அறக்கட்டளை மூலம் 434 நபர்களுக்கு ரூ.10.45 கோடி மதிப்பில் மருத்துவக்காப்பீட்டு அட்டை வழங்கப்பட்டு உள்ளது. 

             மேலும் பல உதவிகள் செய்யப்பட்டு உள்ளன. மொத்தத்தில் கடந்த  ஓராண்டில் ரூ. 209.29 கோடிக்கான நலத்திட்டங்கள் வழங்கப்பட்டு உள்ளன. ÷நிகழ்ச்சியில் மாவட்ட வருவாய் அலுவலர் எஸ்.நடராஜன், மாவட்ட மாற்றுத் திறனாளிகள் நல அலுவலர் சீனிவாசன், எஸ்.இ.எம். கார்மெண்ட் நிறுவன மேலாளர் யோகமூர்த்தி உள்ளிட்டோர் கலந்து கொண்டனர்.

Read more »

வேப்பூர் அடுத்த கழுதூரில் மாற்றுத்திறனாளிகளுக்கான வேலை வாய்ப்பு நேர்காணல் முகாம்

சிறுபாக்கம்: 

               வேப்பூர் அடுத்த கழுதூரில் மாற்றுத்திறனாளிகளுக்கான வேலை வாய்ப்பு முகாம் நடந்தது.வேப்பூர் அடுத்த கழுதூர் வெங்கடேஸ்வரா கல்லூரி வளாகத்தில் மாற்றுத்திறனாளிகளுக்கான வேலை வாய்ப்பு முகாம், சின்னம்மாள் கல்வி அறக்கட்டளை, தி சென்னை சில்க்ஸ் இணைந்து நடத்தியது. தி சென்னை சில்க்ஸ் நிர்வாக இயக்குனர் கோவை யூகமூர்த்தி, தாசில்தார் கண்ணன் முன்னிலை வகித்தனர். கல்லூரி முதல்வர் ராஜேந்திரன் வரவேற்றார். கல்வி அறக்கட்டளை தாளாளரும், முன்னாள் எம்.பி.,யுமான கணேசன் துவக்கி வைத்து பேசினார்.முகாமில் மங்களூர் தொகுதியை சேர்ந்த சுமார் 2 ஆயிரம் மாற்றுத்திறனாளிகள் வேலை வாய்ப்பிற் கான நேர்காணலில் கலந்து கொண்டனர்.  துயர்துடைப்பு தாசில்தார் சையத்ஜாபர், மண்டல துணை தாசில்தார் பாலு, தேர்தல் பிரிவு அண் ணாத்துரை, எழுத்தாளர் இமயம் உட்பட பலர் கலந்து கொண்டனர்.

Read more »

ரயில்களில் மாற்றுத் திறனாளிகளுக்கு மீண்டும் முன்பதிவற்ற பெட்டிகள்

          

             ""தமிழக முதல்வரின் கோரிக்கையை ஏற்று அனைத்து ரயில்களிலும் மாற்றுத்திறனாளிகளுக்கான தனி வடிவமைப்புடன் கூடிய ரயில் பெட்டிகள் மீண்டும் முன்பதிவற்ற பெட்டிகளாக இயக்கப்படும்,'' என்று, மம்தா பானர்ஜி தெரிவித்துள்ளதாக தமிழக அரசு தெரிவித்துள்ளது.

தமிழக அரசின் செய்திக்குறிப்பில் கூறப்பட்டுள்ளதாவது: 

                   மாற்றுத் திறனாளிகளுக்காக தனி வடிவமைப்புடன் கூடிய ரயில் பெட்டிகள் முன்பதிவற்ற பெட்டிகளாக இயக்கப்பட்டு வந்தது. இதை ரயில்வே துறை முன்பதிவு பெட்டிகளாக மாற்றியமைத்தது. இம்மாற்றம், மாற்றுத்திறனாளிகளுக்கு பெரிதும் இடர்பாடுகளை ஏற்படுத்தியதை தொடர்ந்து, இப்பெட்டிகளை முன்போலவே முன்பதிவற்ற பெட்டிகளாக இணைக்கப்பட்டு இயக்க வேண்டும் என்று, தமிழக முதல்வர் கருணாநிதி கடந்த மே மாதம் ரயில்வே அமைச்சர் மம்தா பானர்ஜிக்கு கடிதம் எழுதியிருந்தார்.

முதல்வரின் கோரிக்கையை ஏற்று மம்தா பானர்ஜி கடந்த 22ம் தேதி தமிழக முதல்வருக்கு எழுதிய கடிதத்தில், 

                     "அனைத்து மெயில் மற்றும் எக்ஸ்பிரஸ் ரயில்களிலும் மாற்றுத்திறனாளிகளுக்காக தனி வடிவமைப்புடன் கூடிய ரயில் பெட்டிகள் முன்பதிவற்ற பெட்டிகளாக இணைக்கப்படும். "இரண்டாம் வகுப்பு (படுக்கை வசதி) பெட்டிகளில் மாற்றுத் திறனாளிகளுக்கு இரண்டு படுக்கைகள் ஒதுக்கீடு முறை மீண்டும் முன்போலவே ஒதுக்கீடு செய்யப்படும்' என கூறியுள்ளார். இவ்வாறு செய்திக்குறிப்பில் தெரிவிக்கப்பட்டுள்ளது.

Read more »

மாற்றுத் திறனாளிகள் நலத்திட்டத்துக்கு தொகுதி மேம்பாட்டு நிதியில் இருந்து தலா ரூ. 5 லட்சம் ஒதுக்கீடு

கடலூர்:

              மாற்றுத் திறனாளிகள் நலத்திட்டங்களுக்கு சட்டப்பேரவை உறுப்பினர்களின் தொகுதி மேம்பாட்டு நிதியில் இருந்து, தலா ரூ.5 லட்சம் நிதி ஒதுக்கீடு செய்யலாம் என்று முதல்வர் உத்தரவிட்டு இருப்பதாக, கடலூர் மாவட்ட ஆட்சியர் பெ.சீதாராமன் தெரிவித்தார். 

கடலூரில் திங்கள்கிழமை நடந்த மக்கள் குறைகேட்கும் கூட்டத்தில் மாவட்ட ஆட்சியர் பேசியது:

                 மாற்றுத் திறனாளிகளுக்கு நிவாரணம் வழங்குவதற்கு, சட்டப் பேரவை உறுப்பினர்களின் தொகுதி மேம்பாட்டு நிதியில் இருந்து, தலா ரூ.5 லட்சம் ஒதுக்கலாம் என்று முதல் அமைச்சர் உத்தரவிட்டு இருக்கிறார். அதன்படி கடலூர் மாவட்டத்தில் 9 எம்.எல்.ஏ.க்களுக்கும் கடிதம் அனுப்பப்பட்டு உள்ளது. இனி வரும் காலங்களில் மாற்றுத் திறனாளிகள் நலத்திட்டங்களுக்கு தொகுதி மேம்பாட்டு நிதியில் இருந்து கிடைக்கும் ரூ.45 லட்சம் செலவிடப்படும். 

                கடலூர் மாவட்டத்தில் ஒவ்வொரு வாரமும் ஆதிதிராவிடர்கள் 50 பேருக்கு இலவச வீட்டுமனைப் பட்டா வழங்க அறிவுறுத்தப்பட்டு உள்ளது. தற்போது 22 பேருக்கு பட்டா வழங்கப்படுகிறது. இனி ஒவ்வொரு வாரமும் இதேபோல் வீட்டுமனைப் பட்டா வழங்கப்படும் என்றார் ஆட்சியர். மக்கள் குறைகேட்கும் கூட்டத்தில் 289 மனுக்கள் பெறப்பட்டன. 2 மாணவர்களுக்கு பொறியியல் கல்லூரியில் படிக்க தலா ரூ.25 ஆயிரம், கல்லூரியில் பயிலும் மாற்றுத் திறனாளிகள் 13 பேருக்கும், வேலைக்குச் செல்லும் மாற்றுத் திறனாளிகள் முவருக்குத் தலா ரூ. 35 ஆயிரம் மதிப்பில் எலக்ட்ரிக் மோட்டார் சைக்கிள்கள், திருமணம் செய்துகொண்ட மாற்றுத் திறனாளிகள் 5 பேருக்குத் தலா ரூ.20 ஆயிரம் உதவித் தொகை ஆகியவற்றை மாவட்ட ஆட்சியர் வழங்கினார். மாற்றுத் திறனாளிகளுக்கு அதிக அளவில் நலத்திட்ட உதவிகளை வழங்கி வரும் முதல்வருக்கும் கடலூர் மாவட்ட ஆட்சியருக்கும், கடலூர் மாவட்ட உடல் ஊனமுற்றோர் சங்கம் நன்றி தெரிவித்தது. நிகழ்ச்சியில் மாவட்ட வருவாய் அலுவலர் எஸ்.நடராஜன் உள்ளிட்ட அதிகாரிகள் கலந்து கொண்டனர்.

Read more »