கடலூர்:
கலைஞர் வீட்டு வசதித் திட்டத்தில் கடலூர் மாவட்டத்தில் 1,63,729 குடிசை வீடுகளில் கணக்கெடுப்புப் பணிகள் இதுவரை நிறைவுபெற்று இருப்பதாக, மாவட்ட ஆட்சிய பெ.சீதாராமன் தெரிவித்தார்.
ஆட்சியர் வியாழக்கிழமை வெளியிட்ட செய்திக் குறிப்பு:
கலைஞர் வீட்டு வசதித் திட்டத்தில் குடிசை வீடுகளைக் கணக்கெடுக்கும் பணி, 29-3-2010 முதல் நடைபெற்று வருகிறது. இதுவரை 1,63,729 குடிசை வீடுகளில் கணக்கெடுப்புப் பணி நிறைவு பெற்று உள்ளது. எஞ்சிய கூரை வீடுகள் கணக்கெடுக்கும் பணி முடியும் தருவாயில் உள்ளது. கணக்கெடுப்பு விவரங்கள் மேலாய்வு அலுவலர்களால் ஆய்வு செய்யும் வேலையும் தொடர்ந்து நடைபெற்று வருகிறது. கணக்கெடுப்பின்போது தாற்காலிகமாக வெளியூர் சென்றவர்கள், கால நிலைக்கு ஏற்ப வெளியூர்களுக்கு இடம் பெயர்ந்தவர்கள் போன்றோர், கிராம ஊராட்சிகளில் கணக்கெடுப்புப் பணிகள் முடுவதற்குள் வந்து, உரிய ஆவணங்களைச் சமர்ப்பிக்க வேண்டும். கணக்கெடுப்புக் குழு அதை ஏற்றுக் கொண்டு உரிய விவரங்களை கணக்கெடுப்புப் படிவத்தில் பூர்த்தி செய்வார்கள். மேலாய்வு முடிவடைவதற்கு முன்னதாக உரிய ஆவணங்களுடன் வந்து சமர்ப்பித்தாலும் அதை ஏற்றுக் கொள்வார்கள். கணக்கெடுப்புக் குழுவினர் தயாரித்த படிவத்தில் தேவையான திருத்தங்களை இடம்பெறச் செய்வார்கள்.
கணக்கெடுப்பின்போது கதவு பூட்டப்பட்டு இருந்த வீட்டுக்குச் சொந்தக்காரர்கள் மேலாய்வு முடிவுற்ற பின், மீண்டும் வந்து சம்பந்தப்பட்ட ஆவணங்களை, வட்டார வளர்ச்சி அலுவலரிடம் தனியாக அளித்து விண்ணப்பிக்கலாம். வட்டார வளர்ச்சி அலுவலர்கள் தனித்தனியாக ஆய்வு செய்து தகுதி குறித்து முடிவு செய்வார். ஊராட்சிகளில் கணக்கெடுப்பின்போது ஆவணங்கள் அளிக்காமல் இருந்தாலும், பூட்டிய வீடு என்று படிவத்தில் குறிப்பிடப்பட்டு இருந்தால் அந்த நபர், உரிய ஆணங்களை வட்டார வளர்ச்சி அலுவலரிடம் 5-5-2010க்குள் அளிக்குமாறு கேட்டுக் கொள்ளப்படுகிறார்கள் என்றும் செய்திக் குறிப்பு தெரிவிக்கிறது.
பி.டி.எப் கோப்பாக பதிவிறக்கம் செய்ய
0 கருத்துகள்:
கருத்துரையிடுக