நெய்வேலி:
நெய்வேலி பழுப்பு நிலக்கரி நிறுவனம் மின்சாரம் தயாரிக்கின்ற தலையாய பணியைச் செய்து, கோடிக்கணக்கான குடும்பங்களுக்கு ஒளி வீசி வருகிறது. எனவே மின்சாரத்தை தயாரிக்கவும் அதற்கு தேவையான பழுப்பு நிலக்கரியை வெட்டியெடுக்கவும் நிலம் கையகப்படுத்துவது அவசியமானது என்றார் கடலூர் மாவட்ட ஆட்சியர் சீதாராமன். கடலூர் மாவட்ட கம்மாபுரம் ஒன்றியத்துக்கு உள்பட்ட உய்யக்கொண்டராவி கிராமத்தில் மனுநீதி நாள் முகாம் வியாழக்கிழமை நடைபெற்றது. இதில் கலந்துகொண்ட மாவட்ட ஆட்சியர் 172 பயனாளிகளுக்கு அரசின் நலத்திட்ட உதவிகளை வழங்கி, பின்னர் அப்பகுதி மக்களிடம் இருந்து கோரிக்கை மனுக்களை பெற்றுக்கொண்டார். அதைத் தொடர்ந்து அவர் பேசியது: இப்பகுதியில் நிலவும் குடிநீர் தட்டுப்பாட்டைப் போக்க என்எல்சியின் சுற்றுப்புற மேம்பாட்டு நிதியைப் பயன்படுத்தி, கூட்டுக் குடிநீர் திட்டம் செயல்படுத்தப்படும், மேலும் சுரங்கப் பணிகளால் பாதிக்கப்பட்ட பகுதி மக்களுக்கு தீர்வு காணப்படும். கோட்டகம், உய்யக்கொண்டராவி பகுதியில் மயானக்கொல்லை அமைப்பது தொடர்பாக ஆய்வு செய்து விரைவில் அவை முடித்துத் தரப்படும் என்றார் சீதாராமன். தொடர்ந்து துறைவாரியாக ஒவ்வொரு அலுவலரும் அரசின் நலத்திட்டங்கள் குறித்து விளக்கினர். என்எல்சி நிறுவனம் சார்பில் நில எடுப்புத்துறை பொதுமேலாளர் என்.எஸ்.ராமலிங்கம், நிலம் கொடுத்துப் பாதிக்கப்பட்ட மக்களுக்குத் தேவையான நிவாரண உதவிகள் செய்து தரப்படும் என்றார். விழாவில் கம்மாபும் ஊராட்சி ஒன்றிய தலைவர் செல்வராஜ், கோட்டகம், சேப்ளாநத்தம், பெரியாக்குறிச்சி, நெய்வேலி உள்ளிட்ட ஊராட்சிகளைச் சேர்ந்த தலைவர்கள், கிராம நிர்வாக அலுவலர்கள், கிராம மக்கள் பெருந்திரளானோர் பங்கேற்றனர்.
0 கருத்துகள்:
கருத்துரையிடுக