கடலூர்:
கடலூர் மாவட்டத்தில் 2001-ம் ஆண்டு மக்கள்தொகை கணக்கெடுப்பின்படி 1.95 லட்சம் குடிசை வீடுகள் இருப்பதாக, மாவட்ட ஆட்சியர் பெ.சீதாராமன் தெரிவித்தார். முதல்வர் கலைஞரின் வீட்டு வசதித் திட்டத்தில் கடலூர் மாவட்டத்தில் குடிசைகள் கணக்கெடுக்கும் பணி 23-ம் தேதி முதல் தொடங்க இருக்கிறது. இதன் முதல் கட்டப் பயிற்சி வியாழக்கிழமை மாவட்ட ஆட்சியர் தலைமையில் நடந்தது.
இது தொடர்பாக மாவட்ட ஆட்சியர் கூறியது:
குடிசை வீடுகளுக்குப் பதில் கான்கிரீட் வீடுகள் கட்டிக் கொடுக்கும் திட்டம் 6 ஆண்டுகளில் நிறைவேற்றப்படும். கடலூர் மாவட்டத்தில் 681 ஊராட்சிகள் உள்ளன. அவற்றில் 2001-ம் ஆண்டு மக்கள்தொகை கணக்கெடுப்பின்படி 1.95 லட்சம் குடிசை வீடுகள் உள்ளன. 270 கிராமங்களில் தலா 200-க்கும் மேற்பட்ட குடிசைகளும், 334 கிராமங்களில் தலா 500 குடிசைகளும், 73 கிராமங்களில் 500க்கும் மேற்பட்ட குடிசைகளும், 4 கிராமங்களில் 1000-க்கும் மேற்பட்ட குடிசைகளும் உள்ளன. குடிசை வீடுகளைக் கணக்கெடுக்க பதிவு பெற்ற அலுவலர்கள் மூவர் அடங்கிய 27 குழுக்கள் அமைக்கப்பட்டு உள்ளது. இவர்கள் தவிர கிராமங்கள் தோறும் ஊராட்சி எழுத்தர், கிராம நிர்வாக அலுவலர், மக்கள் நலப் பணியாளர் மற்றும் ஒரு மேற்பார்வையாளர் இக் குழுவில் இடம்பெறுவர். இவர்களுக்கு முதல் கட்டப் பயிற்சி தொடங்கப்பட்டு உள்ளது. கணக்கெடுப்பு 100 சதவீதம் வெளிப்படையானதாக இருக்கும். அனைத்து குடிசைகளும் கணக்கெடுப்புக்கு உள்படுத்தப்படும். கைவிரல் ரேகைகள் பதிவு செய்யப்படும் என்றார் ஆட்சியர்
0 கருத்துகள்:
கருத்துரையிடுக