என்எல்சி சுரங்கத்தில் மாரடைப்பு காரணமாக வியாழக்கிழமை இறந்த ஒப்பந்தத் தொழிலாளியின் சடலத்தை உறவினர்கள் ஞாயிற்றுக்கிழமை பெற்றுச்சென்றனர்.
என்எல்சி முதல் சுரங்கத்தில் ஒப்பந்தத் தொழிலாளியாக பணிபுரிந்தவர் பழனிவேல்(47). இவர் கடந்த வியாழக்கிழமை வழக்கம்போல் பணிக்கு வந்துள்ளார். அப்போது பணியிடத்தில் நெஞ்சுவலி ஏற்பட்டதாகக் கூறியிருக்கிறார். உடனிருந்த சக தொழிலாளர்கள் பழனிவேலுவை என்எல்சி மருத்துவமனைக்கு கொண்டு சென்றனர். பழனிவேலுவை பரிசோதித்த டாக்டர்கள், அவர் இறந்துவிட்டதாகக் தெரிவித்துள்ளனர். இதையடுத்து சில தொழிற்சங்க நிர்வாகிகளும், பழனிவேலுவின் உறவினர்களும், பழனிவேலுவின் குடும்பத்தில் ஒருவருக்கு நிரந்தர வேலையும், ரூ.5 லட்சம் இழப்பீட்டுத் தொகையும் கோரியதாகத் தெரிகிறது. இதற்கு நிர்வாகம் ஒப்புக்கொள்ள மறுத்து, பழனிவேலுவின் குடும்பத்துக்கு சட்ட ரீதியாக கிடைக்க வேண்டிய சலுகைகளை வழங்க முன்வந்தது. இதை தொழிற்சங்க நிர்வாகத்தினர் ஏற்றுக்கொண்டனர். இருப்பினும் பழனிவேலுவின் உறவினர்கள் நிர்வாகத்தின் உறுதியை ஏற்க மறுத்து சடலத்தையும் வாங்க மறுத்தனர். இதனால் கடந்த 4 தினங்களாக பழனிவேலுவின் உடல் என்எல்சி மருத்துவமனையின் பிணவறையில் வைக்கப்பட்டிருந்தது. இந்நிலையில் பாமக தொழிற்சங்க செயலர் திலகர் தலையிட்டு, பழனிவேலுவின் குடும்பத்தினரிடம் சமரசப் பேச்சுவார்த்தை நடத்தினார். இப்பேச்சின் முடிவில் பழனிவேலுவின் குடும்பத்தில் ஒருவருக்கு ஒப்பந்த அடிப்படையில் வேலையும், ஒப்பந்ததாரர் மூலம் ரூ.25 ஆயிரம் வழங்க நடவடிக்கை எடுக்கப்பட்டுள்ளதாக திலகர் கூறியதையடுத்து பழனிவேலுவின் உறவினர்கள் சடலத்தைப் பெற ஒப்புக்கொண்டதாகக் கூறப்படுகிறது. இதையடுத்து பழனிவேலுவின் உடல் பிரேத பரிசோதனைக்காக பண்ருட்டி அரசு மருத்துவமனைக்கு கொண்டு செல்லப்பட்டு பின்னர் உறவினர்களிடம் ஒப்படைக்கப்பட்டது. பழனிவேலுவின் இறப்பு குறித்து நெய்வேலி தெர்மல் போலீசார் வழக்குப் பதிவுசெய்து விசாரணை நடத்தி வருகின்றனர்.
0 கருத்துகள்:
கருத்துரையிடுக