சிதம்பரம்:
சிதம்பரம், காட்டுமன்னார்கோவில் வட்டங்களில் மின்தடையால் 50க்கும் மேற்பட்ட கிராமங்களில் குருவை சாகுபடி பயிர்கள் காய்கின்றன.
சிதம்பரம், காட்டுமன்னார்கோவில் வட்டங்களில் ஆண்டுதோறும் மின்மோட்டார்கள் உதவியுடன் முன்குருவை சாகுபடி செய்வது வழக்கம். அதுபோல் இந்த ஆண்டு முன் குருவை சாகுபடி செய்யப்பட்டுள்ளது. ஆனால், அதிகரித்துள்ள மின்தடையால் மின்மோட்டார் இயக்க முடியாமல் நீரின்றி பயிர்கள் காய்கின்றன.
பயிர்கள் காய்கின்ற பகுதிகள்:
சிதம்பரம் வட்டம் - பூலாமேடு, காட்டுக்கூடலூர், வையூர், கண்டியாமேடு, நாஞ்சலூர், சிவபுரி, வரகூர்பேட்டை, பெராம்பட்டு, ஜெயங்கொண்டப்பட்டினம், நடுத்திட்டு, கவரப்பட்டு, வல்லம்படுகை, செட்டிக்குளம், கீரப்பாளையம், வடஹரிராஜபுரம், தாதம்பேட்டை, சாக்காங்குடி, குச்சிப்பாளையம், புளியங்குடி, ஆயிப்பேட்டை, ஒரத்தூர், பரதூர், அய்யனூர், அக்கிராமங்கலம், விளாகம், புதுவிளாகம், சேதியூர் காட்டுமன்னார்கோவில் வட்டம்- அத்திப்பட்டு, மாங்குடி, கருப்பூர், முள்ளங்குடி, நளன்புத்தூர், கீழப்பருத்திக்குடி, குமராட்சி, குணவாசல், ஆயங்குடி, ரெட்டியூர் உள்ளிட்ட கிராமங்கள்.
எனவே மேற்கண்ட கிராமங்களுக்கு தடையில்லா மின்சாரம் வழங்க வேண்டும் எனவும், அதற்கு நெய்வேலி மின்சாரம் முழுவதையும் தமிழகத்துக்கே கேட்டுப் பெற வேண்டும் என தமிழக உழவர் முன்னணி அரசுக்கு கோரிக்கை விடுத்துள்ளது.
கூடுதல் வரி வசூல்:
சிதம்பரம் காட்டுமன்னார்கோவில் வட்டங்களில் நிலவரியாக நஞ்சை நிலத்துக்கு ஏக்கருக்கு ரூ.5, புஞ்சை நிலத்துக்கு ஏக்கருக்கு ரூ.2 வசூலிக்கப்பட்டு வந்தது. ஆனால், தற்போது நூற்றுக்கணக்கில் வரி செலுத்தும்படி அலுவலர்களால் வலியுறுத்தப்படுகிறது. ஆகவே மாவட்ட ஆட்சியர் இதுகுறித்து நடவடிக்கை மேற்கொண்டு பழையபடியே வசூலிக்க ஆணையிட வேண்டும். கவரப்பட்டு வாய்க்கால் (உளையார் வாய்க்கால்) வெட்டும் பணி தொடங்கப்பட்டிருக்கிறது. இவ்வாய்க்கால் பூலாமேட்டிலிருந்து கவரப்பட்டு வரை வெட்டப்பட்டால் மட்டுமே பாசனத்துக்கும், வடிகாலுக்கும் முழுமையான பயன்தரும் எனவே இவ்வாய்க்கால் பணியை இடையில் நிறுத்தாமல் கவரப்பட்டு வரை முழுமையாக வெட்டி சீர்செய்ய வேண்டும் என தமிழக உழவர் முன்னணி கடலூர் மாவட்டச் செயலாளர் சி.ஆறுமுகம் கோரிக்கை விடுத்துள்ளார்.
0 கருத்துகள்:
கருத்துரையிடுக