பண்ருட்டி, டிச. 13:
பண்ருட்டி நகராட்சி 29-வது வார்டில் சுகாதார வளாகத்தின் கழிவு நீர் தேங்கி குளம் போல் நிற்பதாலும், வீடுகளில் இருந்து வெளியேறும் கழிவு நீர் சாலையில் தேங்கியுள்ளதாலும் நோய் பரவும் சூழல் ஏற்பட்டுள்ளது.
29-வது வார்டு சத்தியமூர்த்தி தெரு கடைசியில், அய்யனார் கோயில் தெரு உள்ளது. 100-ம் மேற்பட்ட குடும்பத்தினர் வசித்து வரும் இப்பகுதியில், சலவைத் தொழிலாளர் குடியிருப்பும், புகழ் பெற்ற அய்யனார் கோயிலும் அமைந்துள்ளது. நகராட்சி நிர்வாகத்தால் 2005-ம் ஆண்டு கட்டப்பட்ட சுகாதார வளாகத்தின் கழிவு நீர்த் தொட்டி கடந்த இரு ஆண்டுகளுக்கு முன்னரே நிரம்பி கழிவு நீர் வெளியேறி அப்பகுதியில் குளம் போல் தேங்கி நிற்கின்றது. இதனால் அப்பகுதியில் துர்நாற்றம் வீசுவதுடன், நோய் பரப்பும் கிருமிகள் உற்பத்தியாவதால் அப்பகுதி மக்கள் பாதிப்படைந்துள்ளனர். மேலும் பல ஆண்டுகளாக தேங்கி நிற்கும் கழிவு நீரால் நிலத்தடி நீர் மாசு அடைந்து வருகிறது. ÷இது குறித்து நகர நிர்வாகத்திடம் முறையிட்டும் எந்த வித நடவடிக்கையும் எடுக்கவில்லை என அப்பகுதி மக்கள் குற்றம் சாட்டுகின்றனர்.
மேலும் சலவைத் தொழிலாளர் குடியிருப்பில் உள்ளவர்களின் தண்ணீர் தேவைக்காக அமைக்கப்பட்ட கைப் பம்பை சுற்றிலும் கழிவு நீர் தேங்கி நிற்பதால் பயனற்று போய் உள்ளது.
இ தேபோல் சத்தியமூர்த்தி தெருவில் முறையாக கழிவு நீர் கால்வாய் பராமரிக்கப்படாததாலும், கால்வாய் இல்லாததாலும் கழிவுநீர் சாலையில் வழிந்தோடி அங்காங்கே தேங்கி நிற்கிறது. இதனால் சாலையில் தேங்கியுள்ள கழிவு நீரில் நடந்து செல்லும் பரிதாப நிலையில் பொது மக்கள் உள்ளனர். பண்ருட்டி நகரப் பகுதியில் பருவ நிலை மாற்றத்தாலும், சுகாதாரமற்ற சூழலாலும் பலர் பாதிக்கப்பட்டுள்ளனர். இந்நிலையில் கடந்த சில தினங்களுக்கு முன் 26-வது வார்டு விழமங்கலம் பகுதியில் மாசடைந்த குடிநீர் மற்றும் சுகாதாரமற்ற சூழலால் வாந்தி-பேதி ஏற்பட்டது. இதில் பாதிக்கப்பட்ட முதியவர் ரங்கநாதன் சிகிச்சை பலனின்றி இறந்தார். மேலும் 60-க்கும் மேற்பட்டோர் மருத்துவமனையில் சிகிச்சை பெற்று வந்தனர். இதனால் பண்ருட்டி பகுதியில் பரபரப்பு ஏற்பட்டது.
இந் நிலையில் அய்யனார் கோவில் தெருவில் உள்ள சுகாதார வளாகத்தில் இருந்து வெளியேறி தேங்கி நிற்கும் கழிவு நீரை வெளியேற்றி சுத்தம் செய்து, சாலையில் கழிவு நீர் தேங்காவண்ணம் இருக்க நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.
0 கருத்துகள்:
கருத்துரையிடுக