அணு ஆயுதங்களை ஏந்திச் சென்று இலக்குகளைத் தாக்கும் திறன் கொண்ட அக்னி-2 ஏவுகணை வெற்றிகரமாக ஏவப்பட்டது. இதற்கு முன்னர் நடத்தப்பட்ட இரண்டு சோதனைகள் தோல்வியடைந்தன. தற்போது திங்கள்கிழமை ஏவப்பட்ட அக்னி-2 ஏவுகணை சோதனை வெற்றியடைந்ததாக பாதுகாப்புத்துறை வட்டாரங்கள் தெரிவித்தன. ஏவுகணை சோதனையானது அனைத்து இலக்குகளையும் பூர்த்தி செய்யும் வகையில் அமைந்ததாக ஒருங்கிணைந்த சோதனை சரக (ஐடிஆர்) இயக்குநர் எஸ்.பி. தேஷ் கூறினார். திங்கள்கிழமை காலை 9.15 மணி அளவில் நகரும் வாகனத்திலிருந்து இந்த ஏவுகணை ஏவப்பட்டது. ஐடிஆர் வளாகம்-4-ல் இருந்து இது ஏவப்பட்டது. இந்த ஏவுகணை 1,000 கி.கி. எடையை சுமந்து செல்லும் திறன் கொண்டது. 2,000 கி.மீ. தூரம் வரை தரையிலிருந்து விண்ணில் சென்று தரை இலக்கை தாக்கும் வகையில் இது வடிவமைக்கப்பட்டுள்ளது. அக்னி ஏவுகணையின் பயணப்பாதை முழுவதும் நவீன ரேடாரால் கண்காணிக்கப்பட்டது. தவிர, தொலைநோக்கிகள் மற்றும் மின்னணு நோக்கிகள், கடற்படைக் கப்பல்கள் மூலம் கண்காணிக்கப்பட்டன. வங்கக் கடலில் விழும்படி இதன் இலக்கு நிர்ணயிக்கப்பட்டிருந்தது. இது கடலில் விழுந்தபோது அதன் தாக்கம் எந்த அளவுக்கு இருந்தது என்றும் அளவிடப்பட்டது. ராணுவத்தின் உத்திகள் வகுக்கும் பிரிவு (எஸ்எப்சி), பாதுகாப்பு ஆராய்ச்சி மற்றும் மேம்பாட்டு நிறுவனம் (டிஆர்டிஓ) ஆகியவற்றின் அதிகாரிகள் இந்த செயல்பாட்டை ஆராய்ந்தனர். ஏவுகணை கிளம்பும்போது எழுந்த வெப்பம் உள்ளிட்ட பலவித நடவடிக்கைகளும் துல்லியமாக அளவிடப்பட்டன. கடந்த ஆண்டு மே 19-ம் தேதியும், நவம்பர் 23-ம் தேதியும் நடத்தப்பட்ட ஏவுகணை சோதனை தோல்வியில் முடிந்தது.அக்னி வடிவமைப்பில் எவ்வித கோளாறும் இல்லை. இதிலிருந்த பாகங்கள் தவறாக செயல்பட்டதால் முந்தைய சோதனைகள் தோல்வியில் முடிந்தன என்று டிஆர்டிஓ தலைமைக் கட்டுப்பாட்டாளர் டபிள்யூ. செல்வமூர்த்தி தெரிவித்தார். அடுத்த கட்டமாக 5,000 கி.மீ. தூரம் செல்லக்கூடிய ஏவுகணையை வடிவமைக்கும் பணியில் விஞ்ஞானிகள் ஈடுபட்டுள்ளதாக அவர் தெரிவித்தார்.
ஓராண்டில் இது தயாராகிவிடும் என்றும் அவர் கூறினார். ஏ.கே. அந்தோனி பாராட்டு: அக்னி-2 ஏவுகணை சோதனை வெற்றியடைந்ததற்காக இதை வடிவமைத்த குழுவினருக்கு மத்திய பாதுகாப்பு அமைச்சர் ஏ.கே. அந்தோனி பாராட்டு தெரிவித்துள்ளார். ஏவுகணை சோதனையின்போடு வீலர்ஸ் தீவில் டிஆர்டிஓ தலைவர் சரஸ்வத், அக்னி-2 ஏவுகணை திட்ட இயக்குநர் அவினாஷ் இருந்தனர். அக்னி ஏவுகணை வரிசையில் இடம்பெற்றுள்ள மூன்று ஏவுகணைகளை வெற்றிகரமாக ஏவும் திறனை ராணுவ உத்திகள் வகுக்கும் பிரிவு பெற்றுள்ளது குறிப்பிடத்தக்கது.
0 கருத்துகள்:
கருத்துரையிடுக