எம்.பி.பி.எஸ். படிப்பில் சேர சென்னை கீழ்ப்பாக்கம் அரசு மருத்துவக் கல்லூரியில் திங்கள்கிழமை விண்ணப்பம் பெறும் மாணவி. சென்னை, செங்கல்பட்டு, விழுப்புரம், வேலூர் உள்பட 17 அரசு மருத்துவக் கல்லூரிகளில் தொடர்ந்து மே 31-ம் தேதி வரை விண்ணப்பம் விநியோகிக்கப்படும்.
எம்.பி.பி.எஸ். படிப்பில் சேர முதல் நாளிலேயே 6,249 மாணவ-மாணவியர் விண்ணப்பத்தைப் பெற்றுள்ளனர். கடந்த ஆண்டு எம்.பி.பி.எஸ். படிப்பில் சேர முதல் நாளில் 5,000 விண்ணப்பங்கள் விநியோகிக்கப்பட்டதை ஒப்பிடும்போது, மருத்துவப் படிப்பில் சேர மாணவர்கள் காண்பிக்கும் ஆர்வம் வெளிப்படுகிறது. சென்னை, செங்கல்பட்டு, விழுப்புரம், திருச்சி, தஞ்சாவூர், திருவாரூர் என 17 அரசு மருத்துவக் கல்லூரிகளில் எம்.பி.பி.எஸ். படிப்பில் மாணவர்களைச் சேர்க்க விண்ணப்ப விநியோகம் திங்கள்கிழமை தொடங்கியது.
சென்னை பாரிமுனையில் உள்ள ஒரே அரசு பல் மருத்துவக் கல்லூரியில் பி.டி.எஸ். படிப்பில் சேரவும் இதே விண்ணப்பத்தைத்தான் பூர்த்தி செய்து அளிக்க வேண்டும். அரசு பல் மருத்துவக் கல்லூரியிலும் விண்ணப்பம் விநியோகிக்கப்படுகிறது. எம்.பி.பி.எஸ். படிப்பில் சேர மாணவர்கள் பெரிதும் விரும்பும் சென்னை மருத்துவக் கல்லூரியில் மட்டும் முதல் நாளான திங்கள்கிழமை 467 மாணவர்கள் விண்ணப்பத்தைப் பெற்றுள்ளனர்.
விண்ணப்பக் கட்டணம் ரூ.500-ஐ, கடந்த ஆண்டுகளைப் போன்றே 'செயலர், தேர்வுக் குழு, கீழ்ப்பாக்கம், சென்னை-10' என்ற பெயருக்கு டி.டி. எடுத்துத்தான் பெற வேண்டும். பணமாகச் செலுத்தினால் விண்ணப்பம் அளிக்கப்பட மாட்டாது என்று மருத்துவக் கல்வி தேர்வுக் குழுச் செயலர் டாக்டர் ஷீலா கிரேஸ் ஜீவமணி தெரிவித்தார். சனி, ஞாயிறும் உண்டு: அனைத்து 17 அரசு மருத்துவக் கல்லூரிகள் மற்றும் சென்னை பாரிமுனையில் உள்ள அரசு பல் மருத்துவக் கல்லூரியில் சனிக்கிழமை, ஞாயிற்றுக்கிழமை உள்பட எல்லா நாள்களிலும் எம்.பி.பி.எஸ்., பி.டி.எஸ். விண்ணப்பத்தை வரும் 31-ம் தேதி பிற்பகல் 3 மணி வரை பெறலாம். பூர்த்தி செய்யப்பட்ட விண்ணப்பங்கள் சென்னை மருத்துவக் கல்வி இயக்குநர் அலுவலக தேர்வுக் குழுச் செயலகத்துக்கு மே 31-ம் தேதி மாலை 5 மணிக்குள் வந்து சேர வேண்டும்.
0 கருத்துகள்:
கருத்துரையிடுக